آغاامیرحسین تے طفیل اختر دی وفات

tanveer-zahoor

لكهت:تنویر ظہور

نویں ورھے دے پہلے مہینے دو علمی تے ادبی شخصیتاں ایہہ عارضی جہان چھڈ کے اگلے جہان ٹُر گئے۔ آغاامیر حسین تے طفیل اختر دادا‘ دوویں عمر دے لحاظ نال میرے توں سینئر سن۔ ایہدے باوجود ایہناں نال دوستی تے بے تکلفی رہی۔ آغاامیر حسین نے میریاں کجھ کتاباں اپنے ادارہ کلاسیک دی چھترچھاویں چھاپیاں۔ پہلی کتاب جہڑی اوہناں نے چھاپی میرا بچپن سی۔ جہدے وچ نامور شخصیات دے بچپن دے حوالے نال انٹرویوز سن۔ ایس کتاب وچ آغاامیرحسین دا انٹرویو وی شامل سی۔ میری آخری کتاب جہڑی 2018ء وچ اوہناں دے ادارے نے چھاپی اوہ ’’یادیں‘‘ سی۔ ایہ اخبار وچ چھپے میرے کالماں دا انتخاب سی۔ آغاصاحب پبلشر ہون دے نال نال رائٹر‘ ایڈیٹر‘ مرتب‘ کالم نگار‘ سماجی شخصیات تے دانشور سن۔ آپ دا پورا ناں سید آغاامیرحسین نقوی اے۔ وڈے اشاعتی ادارے دے مالک ہون دے نال پیپلز ٹریڈرز سیل پنجاب دے کنونیئر سن۔ ایہناں دی پیدائش دہلی وچ 1932ء نوں ہوئی۔ انج اوہناں نے 88ورھے دی بھرویں عمر گزاری۔ گرائونڈ فلور تے شوروم وچ ای اوہ بیٹھدے سن۔ کجھ ورھے پہلاں اوہناں نے دوجی منزل تے اپنا دفتر بنا لیا۔ رسالہ سپوتنک تے دوجے معاملے اوہ ایسے کمرے وچ ای نبھاندے۔ گرائونڈ فلور تے شوروم اوہناں نے اپنے صاحبزادے سید راشد حسین آغا دے حوالے کر دتا۔ کتاباں دے نال نال سٹیشنری تے بیکری دا سامان وی ا وہنے رکھ لیا۔ آغاامیرحسین نال جدوں وی ملاقات ہوندی وقت دا پتہ ای نہ لگدا۔ اپنیاں یادداشتاں شیئر کردے۔ ایس طرح میرے علم وچ وادھا ہوندا۔ اوہ دسدے کہ کتابی دنیا وچ میری آمد حادثہ نہیں۔ میرے والد صاحب نوں کتاباں پڑھن تے اوہناں نوں سلیقے نال رکھن دا بڑا چاء سی۔ اوہناں دا کمرہ کتاباں نال بھریا ہوندا۔ ایہناں وچ بہت ساریاں کتاباں نایاب سن۔ میں زیادہ وقت اوسے کمرے وچ گزاردا۔
میں پنجویں جماعت وچ ای فیصلہ کر لیا سی کہ جے کوئی کم کراں گا تے کتاباں دا کراں گا۔ قیام پاکستان دے ویلے آغا صاحب اٹھویں جماعت وچ سن۔ ایہناں دے والد ریلوے میل سروس وچ ملازم سن۔ بسلسلہ ملازمت اوہ اکثر لہور آئوندے رہندے۔ 11اگست 1947ء نوں اوہ اپنے والد دے نال لہور دی سیر لئی آئے۔ ایہدے اک دن بعد ای ہنگامے تے فسادات بھڑک اٹھے تے فیر اوہ واپس دہلی نہ جا سکے۔ ایہناں دے خاندان دے دوجے بندے کئی مہینیاں بعد لہور آئے۔ یاراں ورھے دی عمر وچ گزر بسر لئی اوہناں نے اخبار ویچے۔ ڈیڑھ ورھے ایہ سلسلہ جاری رہیا۔ ایہناں دا اصل رجحان کتاباں ول سی۔ ایس لئی اوہناں نے شروع وچ مکتبہ جدید دے چوہدری بشیر دے کول ملازمت کر لئی۔ اوہنا ں اینی محنت تے لگن نال کم کیتا کہ 1960ء وچ مال روڈ تے کلاسیک دے ناں توں اپنا پبلشنگ ادارہ قائم کر لیا۔ اج ایہ ادارہ پبلشنگ دے شعبے وچ اچا مقام رکھدا اے۔ ایہدے تحت اوہناں نے ہزاراں کتاباں چھاپیاں۔ ماہنامہ سپوتنک دا اجرا آغا صاحب نے 1991ء وچ کیتا جو باقاعدگی نال چھپ رہیا اے آغا صاحب کجھ کتاباں دے لکھاری تے مرتب نیں۔
طفیل اختر دا زیادہ حوالا فلمی صحافت نال رہیا۔ ایہ دوستاں وچ طفیل اختر دادا دے ناں توں مشہور سن۔ ہندی وچ دادا وڈے بھائی نوں کہندے نیں۔ ایہناں دا اصل ناں محمدطفیل اے۔ اپنی بھین اختری نال اوہناں نوں بڑا پیار سی۔ ایس مناسبت نال اوہناں نے اپنا ناں طفیل اختر رکھ لیا۔ طفیل اختر بڑے دھیمے مزاج دے آدمی سن۔ اوہناں دی اچانک وفات دا سن کے بڑا دکھ ہویا۔ مرحوم دے صاحبزادے جاویداختر نے مینوں دسیا کہ اوہ چنگے بھلے سن۔ دو گھنٹے دے اندر ای سانوں ہمیشہ لئی چھڈ گئے۔ اوہناں دے دو پتر تے دو دھیاں نیں۔ طفیل اختر دی پیدائش وی انڈیا دی اے۔ تقریباً 80 ورھے دی عمر گزار کے اوہ ساڈے توں رخصت ہوئے۔ اوہناں نے زیادہ تر فلمی موضوعات تے 25 توں ودھ کتاباں تصنیف تے مرتب کیتیاں۔ وکھووکھ فلمی جریدیاں وچ اوہناں دے مضمون چھپدے رہے۔ طفیل اخترنے سٹیج ڈرامے وی لکھے۔ ریڈیو تے ٹی وی لئی لکھیا تے کجھ پروگرام کیتے۔ مسکراہٹ رسالہ 25 ورھے تک چھاپدے رہے جو چار ورھے پہلاں بند ہو گیا۔ آرٹ پیپر تے چھپن والا ایہ معیاری علمی تے فلمی جریدہ سی۔ میں اپنا رسالہ ’’سانجھاں‘‘ جدوں وی اوہناں نوں گھلدا اوہ خط راہیں وصولی دی اطلاع کردے۔ اوہناں دے خطوط ادبی چاشنی لئی ہوندے جو میں اپنے شمارے وچ چھاپ دیندا۔ ایہ لیٹرز اردو توں علاوہ پنجابی زبان وچ وی لکھے جاندے۔
پچھلے ورھے میں ایہ جریدہ بند کر دتا ایس طرح میں طفیل اختر دے خطاں توں محروم ہو گیا۔ اوہناں دا آخری خط اکتوبر 2019ء وچ چھیا۔ ایہدے وچ افتخار مجاز مرحوم دا تذکرہ سی۔ افتخار مجاز دی وفات دے بعد میں ایک فوٹو چھاپی سی۔ جہدے وچ افتخارمجاز دے نال طفیل اختر‘ سید فراست بخاری تے راقم کھلوتے سن۔ اوہناں نے لکھیا سچ مچ افتخارمجاز پیار نال بھرپور اک دوست نما بھائی سی۔ گلہ یاں شکایت اوہدی عادت نہیں سی نہ میرا چلن۔ اسیں دوویں معاملات نوں کھلے دل نال لیندے سی۔ پی ٹی وی دی ملازمت تے آخر اوہدے توں ریٹائرمنٹ تک گڈی متواتر اک ڈھب نال چلدی رہی۔٭٭

اپنا تبصرہ گھلو