پِلاک ولوں جگ دُھمے شاعر ارشد منظور نال مکالماتی نشست

ایس موقعے اتے گلوکار آصف جاوید مہدی نے اوہناں دا کلام پیش کیتا

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام پلاک سٹوڈیو وچ معروف شاعر ارشد منظور دے نال اک مکالماتی نشست دا انعقاد کیتا گیا جس وچ خاقان حیدر غازی، ڈپٹی ڈائریکٹرپلاک نے میزبانی دے فرائض سرانجام دتے ہوئے ایہناں دی شخصیت تے فن شاعری دے حوالے نال بھرپور گفتگو کیتی۔ ارشد منظور دی شاعری دی دو کتاباں منظر عام اُتے آ چکیاں نیں۔

ایہناں دا بیشتر کلام غزلیات اُتے مشتمل اے جس دے اندر اپنی دھرتی دے سارے رنگ موجود نیں اوہناں نے اپنی غزلاں وچ رومانیت دے نال نال عوامی مسائل نوں وی اپنی شاعری دا حصہ بنایا۔ انقلابی رحجان وی ایہناں دی شاعری نوں خوبصورت بناندا اے۔ ایس موقعے اُتے نامور گلوکار آصف جاوید مہدی نے ایہناں دا کلام نہایت خوبصورت انداز وچ پیش کیتا۔