پنجاب ہائوس وچ جنید اکرم (مرحوم دی یاد وچ تعزیتی ریفرنس

لہور:پنجابی یونین دے زیر اہتمام پنجاب ہائوس لہور وچ اپنی پوری حیاتی مادری زبان پنجابی دے ناں کرن والے ماہنامہ پنجابی دے مدیر ، معروف اداکار تے کامیڈین سہیل احمد (عزیزی) دے چھوٹے بھرا جنید اکرم دا تعزیتی ریفرنس ہویا جہدے وچ پنجابی زبان ، ادب تے صحافت نال وابستہ اہم شخصیات نے رلت کیتی۔ شرکاء نے ایس اکٹھ وچ پروفیسر جنید اکرم نال گزارے ہوئے لمحیاں نوں یاد کردیاں ہویاں اوہناں دی حیاتی دے کجھ اجہے پہلوواں تے روشنی پائی جہدے نال اوہناں دی زندہ دلی تے پنجابی زبان نال محبت واضح ہوئی۔صدر پنجابی میڈیا گروپ ندیم رضا آکھیا پروفیسر جنید اکرم نے مادری زبان لئی کم کرن والیاں وچ سبھ توں مشکل کم ’’تحقیق‘‘ اپنے ذمے لیا۔ چیئرمین پنجابی میڈیا گروپ مدثر اقبال بٹ تقریر کردیاں ویلے اوہناں نال اپنی محبت پاروں آبدیدہ ہو گئے تے آکھیا میرے الفاظ میرا ساتھ نہیں دے رہے کہ میں جنید اکرم جہی درویش ہستی لئی کجھ کہہ سکاں۔ڈاکٹر جنید اکرم دے وڈے بھرا تے معروف اداکار سہیل احمد(عزیزی) دا کہنا سی اوہناں دے بچھڑ جان دے بعد سانوں اندازہ ہویا کہ مادری زبان دے کہڑے انمول ہیرے توں اسیں جدا ہو گئے۔دوجے مقررین وچ معروف شاعر بابا نجمی، ڈی جی پِلاک ڈاکٹر صغریٰ صدف، ڈائریکٹر پنجاب کالج جہلم نوید ملک، چیئرمین سٹینڈرڈ گروپ آف کالجز پروفیسر امان اللہ، ابرار احمد، پروفیسر کلیان سنگھ کلیان، ڈائریکٹر پنجابی کھوج گڑھ اقبال قیصر، شاعر ویر سپاہی، جنید اکرم دے قریبی ساتھی ماہنامہ پکھیرو دے چیف ایڈیٹر اشرف سہیل، چیف ایڈیٹر روزنامہ لوکائی پروفیسر جمیل احمد پال تے مذہبی سکالر طارق شریف زادہ شامل سن ۔تقریب دے اختتام تے شرکاء نے مرحوم دے درجات دی بلندی لئی خصوصی دعا وی کیتی جہدے بعدپر تکلف افطاری دا بندوبست وی کیتا گیا۔