انتخابی اصلاحات واسطے اپوزیشن نوں دعوت

Hameed Ullah Bhatti

تحریر حمیداللہ بھٹی

ملک وچ کئی دہائیاں توں روایت بن گئی اے کہ کامیابی حاصل کرن والے انتخابی عمل نوں صاف شفاف تے آزادانہ وغیرہ جانبدارانہ قرار دیندے جد کہ ہرن والے دھاندلی دا الزام لاندے نیں کجھ سیاستدان تے ہون والی شکست دا ذمہ دار اداریاں نوں ٹھہراندے نیں جس نال انتخابی عمل دی شفافیت اُتے عام بندے دا اعتبار گھٹ ہون دے نال اداریاں نوں اداریاں دی غیر جانبداری اُتے شبہات وچ وادھا ہویا اے۔ ایس لئی ویلا آ گیا اے کہ انتخابی عمل نوں متنازع ہون توں بچایا جائے۔ جس لئی اصلاحات ناگزیر نیں پر کیہ ساڈے حکمران و اپوزیشن عمائدین ایس حوالے نال اپنے فرائض دی انجام دہی لئی آمادہ و تیار نیں وائے افسوس کہ انج نہیں بلکہ دونویں پاسے ای بداعتماد دی فضا اے تے انتخابی عمل دی شفافیت نوں یقینی بنان دی بجائے دونواں دی نظر پوائنٹ سکورنگ اُتے وے تے اصلاحات دی بجائے سب دا دھیان دشنام طرازی اُتے اے حالانکہ دھاندلی دے سدباب توں نتیجے تسلیم کرن دی راہ ہموار ہو سکدی اے، دور کیوں جائیے ہجے حال ای وچ ڈسکہ تے کراچی وچ ہون والے ضمنی انتخابات ویکھ لوئو صرف جتن والے خوش نیں جد کہ شکست توں دو چار ہون والے ہنوز ہار دے اسباب گنوا رہے نیں ستم ظریفی تے ایہہ وے کہ آہ و بکا وچ مصروف تے خوشی دے شادیانے بجان والے مذاکرات دی میز اُتے آن نوں تیار نہیں، سیاسی اشرافیہ دے انداز جموری رویاں توں متصادم نیں حالانکہ برداشت و رواداری دی بجائے محاذ آرائی دی روشن نال انتخابی عمل دے نال ایہناں دی اپنی ساکھ نوں متاثر کر رہی اے۔
کراچی دے حلقہ این اے 249 وچ ملک دی کئی جماعتاں دے امیدواراں نے حصہ لیا تے بھرپور انتخابی مہم دے ذریعے ووٹراں نوں اپنے ول مائل کرن دی کوشش کیتی پر ووٹ پان دی شرح انتہائی مایوس کُن رہی جتن والا امیدوار وی 17 ہزار توں گھٹ ووٹ لے سکیا جد کہ ماضی وچ ایسے حلقہ توں جتن والے امیدوار اک لکھ توں وی زائد ووٹ لے کے کامیاب ہوندے رہے نیں ہن لکھ جواز پیش کیتا جائے کہ چھٹی دے باوجود کرونا دے ڈر توں لوک گھٹ گھراں توں باہر نہیں نکلے یا گرمی لوکاں دے ووٹ پان وچ آڑے آئی یا فیر انتظامات وچ نقائص تلاش کیتے جان پر سچ ایہہ وے کہ عام بندے نے ووٹ پان دی بجائے گھراں وچ چھٹی نوں انجوائے کرنا بہتر خیال کیتا۔ایس توں علاوہ جدوں ہر جماعت کامیابی و ناکامی دا ذمہ دارنادیدہ ہتھاں نوں قرار دیندی اے تے ایہہ اک لحاظ نال لوکاں نوں ووٹ نہ پان دی ترغیب دینا اے ایسے لئی ووٹر سوچدا اے کہ جوں ایس دی رائے دی کوئی اہمیت نہیں تے ووٹ پان دے جھنجٹ وچ پین دی کیہ لوڑ اے چھٹی آرام نال لنگھائو جس نوں جیہڑا امیدوار پسند ہوئے اوہ ادارہ اپنی مہارت نال نتیجے ترتیب دے لوے گا پر کراچی دے ضمنی الیکشن وچ اک نواں پہلو ایہہ ساہمنے آیا اے کہ مسلم لیگ ن نے الیکشن کمیشن توں ریکارڈ قبضے وچ لین تے فوج ولوں حفاظت یقینی بنان دا مطالبہ کیتا اے ایہہ مطالبہ خاصا انو کھا اے کیوں جے قبل ازیں جماعت دا موقف بلکل ای متضاد سی ایس دا مطلب اے کہ سیاسی چہرے حالات دے نال موقف بدلن وچ عار تصور نہیں کردے۔
دوجی حیران کُن گل ایہہ وے کہ پی پی دے امیدوار دی جت نال مسلم لیگ ن تے پی ٹی آئی دے موقف وچ ہم آہنگی پیدا ہوئی اے شاید دونواں جماعتاں دے امیدوار اپنی اپنی جت لئی پُراعتماد سن پر ہن تیجی جماعت دے امیدوار دی کامیابی نال بھونچکانیں پر جدوں تیکر حکومت تے اپوزیشن مل بہہ کے نقائص تلاش کرن تے فیر سدباب دی کوشش نہیں کرن گیاں اودوں تیکر جت تے ہار اُتے شکوک و شہبات دا سلسلہ ختم نہیں ہو سکدا الیکٹرانک ووٹنگ سسٹم وچ وی خامیاں ہو سکدیاں نیں جنہاں نوں دور کرن دی ذمہ داری حکومت تے اپوزیشن اُتے ای عائد ہوندی اے حکومت تے اپوزیشن وچ ڈیڈ لاک توں جمہوری قدراں مضبوط نہیں ہو سکدیاں مسائل حل کرن وچ دونواں دا اہم کردار اے دونواں وچ بہتر ورکنگ ریلیشن دے بغیر بہتری خرابیاں اُتے قابو نہیں پایا جا سکدا۔
حکومت تے اپوزیشن وچ ورکنگ ریلیشن نہ ہون نال الیکشن کمیشن دے ریٹائرہون والے دونواں ممبراں دی تھاں نویں نامزدگی دی وی کوئی صورتحال نہیں بن رہی وزیراعظم عمران خان نے انتخابی اصلاحات اُتے گل بات دی دعوت سماجی رابطے دی ویب سائٹ ٹویٹر اُتے دتی حالانکہ بہتر فورم پارلیمنٹ اے تے پارلیمان توں بالا بالا سب کجھ طے کرن دی حکمت عملی توں اعتماد سازی مشکل اے پارلیمان ول ویکھیے تے چنگی صورتحال وکھائی نہیں دیندی جس نال پارلیمان مضبوط ہون دی بجائے کمزور یا غیر اہم نظر آندی اے اسمبلی اجلاس وچ دعوت دین نہ صرف ورکنگ ریلیشن قائم ہوندا بلکہ محاذ آرائی وچ وی کمی آندی پر دونواں پاسے اگ اے برابر لگی ہوئے دے مصداق اک دوجے اُتے الزامات دی بھرمار اے جے وزیراعظم نے چنگے ماحول وچ دعوت دین توں اجتناب کیتا تے مسلم لیگ ن دی نائب صدر مریم نواز نے وی ٹویٹر اُتے ای دعوت مسترد کر کے حساب برابر کر دتا۔ ایہہ ماحول ایہہ اطوار کسے طور جمہوریت لئی بہتر نہیں انتہا پسندی دی بجائے میانہ روی توں ای گل بنے گی۔
حکومت دی اصلاحات وچ عجلت ظاہر کردی اے کہ اوہ آمدہ الیکشن دی تیاریاں وچ مصروف اے تے چاہندی اے کہ جت لئی کجھ نہ کجھ سامان کر لوے حکومت دا خیال اے کہ آبادی دی بجائے ووٹرز نوں حلقہ بندی دی بنیاد بنایا جائے جماعتاں دی رجسٹریشن تے الیکشن کمیشن نوں بطور ادارہ مالی خود مختاری دینا چاہندی اے ، پارلیمانی امور دے مشیر بابر اعوان نے آئینی و قانونی ترامیم اُتے مشتمل تیرہ نکاتی ایجنڈے دی وضاحت کردے ہوئے کہیا اے کہ آئین دے آرٹیکل 226 وچ ترمیم ہوئے گی تاں جے سینٹ الیکشن وچ رقماں دے استعمال تے ہارس ٹریڈنگ دا خاتمہ ہو سکے پر اپوزیشن دے تعاون دے بغیر آئینی ترامیم ممکن نہیں تے جدوں محض الزامات اُتے ای کئی مہینے تیکر اپوزیشن رہنما نوں قید رکھیا جائے جیہڑا ثابت نہ ہون اُتے رہائی ملے اوتھے اپوزیشن کیوں جے تعاون کر سکدی اے ایس لئی مینوں نہیں لگدا کہ حکومتی تجویزاں طے کردہ طریقہ کار دے مطابق انتخابی اصلاحات دا عمل مکمل ہو سکے پر جے اصلاحات نہیں ہوندیاں تے انتخابی شفافیت دے متعلق سوال اُٹھدے رہن گے۔
ڈسکہ الیکشن ہوئے یا کراچی دا ضمنی انتخاب، دونواں حلقیاں وچ نتیجے اکٹھے کرن دے دوران غیر ضروری تاخیر ہوئی اے جس دا مطلب اے کہ طاقتور گروہواں نے نتائج اُتے اثر انداز ہون دی کوشش کیتی پر حکومت ولوں پیش کیتی گئی کسے تجویز وچ انج دے کسے متوقع اقدام دی راہ مسدود کرن دی کوئی تجویز ساہمنے نہیں آئی الیکشن کمیشن نوں انتخابی عمل دی تکمیل لئی مختلف شعبیاں نوں تعاون لینا پیندا اے تے فیر ووٹ پان دے عمل وچ عملہ تعینات کردے ہوئے عدلیہ، تعلیم سنے کئی شعبیاں دے ملازمین دی مدد لئی جاندی اے جنہاں وچوں اکثر غیر ضروری دبائو برداشت کرن دی سکت نہیں رکھدے اصلاحات وچ ایس نکتے نوں وی دھیان وچ رکھن دی لوڑ اے کہ جتن والے الیکشن عمل دے بعد عملے دے کسے بندے نوں ہراساں کرن تے انتقامی کاروائی دا نشانہ نہ بنا سکے حیران کن امر ایہہ وے کہ اصلاحات دے دوران ایس حوالے نال کوئی پیش رفت ہوندی نظر نہیں آندی خیر پیش رفت تے اودوں ہوئے گی جدوں گل بات لئی فضا ساز گار ہوئے گی ہجے تے دعوت دین تے ٹھکران اُتے ای سارا زور اے۔

اپنا تبصرہ گھلو