بول مِٹی دیا باویا

لکھت:طاھر وزیر آبادی

ریاست مدینہ ورگا نظام اوہدوں تیک ممکن نہیں، جدوں تیک اسلامی شریعت دا مکمل طور تے نفاذ نہیں ہو جاندا۔۔ مسلمان عام شہری ہو وے تے بھا ویں کوئی آ گو ہووے۔شریعت ہر دوجے مسلمان اُتے لاگو ہوندی اے۔پاکستان وچ ریاست مدینہ بنا ون دی گل کرنا بڑی سوکھی گل اے جد کہ عملی طور تے اوہناں چِرکجھ وی ممکن نہیں کہ جِنا چر پاکستان وچ پورے سچ نوں آ باد نہیں کیتا جاندا۔ا یس مشن نوں توڑ چاہڑن لئی نا انصافی تے ظلم دا ناس مارنا ڈھیڑ ضروری اے ۔حقدار تا ئیں اوہدا حق پچاون دی ریت نوں رواج دینا پوے گا۔پاکستانی معاشرے نوں صاف ستھرا تے مضبوط بناون لئی۔ریاستِ
مدینہ دا سنفہ پورا کرن لئی سب توں پہلےمذہبی تے سیاسی لیڈراں نوں اپنے اُچے اُچے محل تے جاگیراں دے نال نال اپنا سرمایہ وی اپنے وطن دے ناں وقف کرن دی لوڑ اے۔
ادھے مُلک دیاں جاگیراں،پلازے،دولتاں تے اُچے بنگلیاں دے مالک اسلامی نظام دی گل تے ضرور کر دےنیں پر افسوس عمل کرن نوں کوئی اک وی تیار نہیں۔جناں لیڈراں نوں آٹے ،دال ،لون دےریٹ معلوم نہیںاوہوی ریاست مدینہ دی گل کر کے عوام توں ہمدردیاں وصولی جا رہے نیں۔قوم نوں اک سازش دے تحت غریب رکھن والے لیڈر اسلام دا ناں ورت کے اپنا قد اُچا کرن دی جُہد کر رہے نیں۔دور نبوت ول جھاتی مارو تے خُلفا دے ادوار ول نِگاہ دوڑائو،کسے اک رہنما نے وی کوئی ذاتی مفاد حاصل نہ کیتا ،سگوں اپنا ذاتی مال ومتاع وی عوام دی فلاح لئی دان کر چھڈیا۔نہ کسے اناج ذخیرہ کیتا نہ محل بنائے،نہ جاگیراں دا لو بھ کیتانہ اُچے بنگلیاں وچ رہنا پسند کیتا۔عام شہریاں وانگ زندگی گزارن والےاوہناں مہان لیڈراں دی سوچ تے کردار دی مثال ساڈے اج دے لیڈر واسطے ثواب دے دیندے نیں جو کہ آپ کدی وی عمل نہیں کر دے۔ایتھے جہڑا وی لیڈر تخت اُتے آیا اوہنے عوام دا تحتہ کر چھڈیا۔۔
قائدِ اعظم محمد علی جناح توں بعدکروڑاں پتی لوک وی لیڈر بن کے سامنے آوندے رہے تے فیر ہر کسے نے ملکی خزانے نوں اپنے باپ دا مال سمجھ کے خوب لُٹیا ۔آپ وی کھاندے رہے تے اپنے رشتےداراں
نوں وی امیر کر دے رہے۔ہر دوجے لیڈر نے اپنے بچیاں نوں امریکہ تے برطانیہ توں تعلیم دلوائی تے فیر اوتھے ہی کاروبار کروایا۔سیاسی لیڈراں داایہہ وطیرہ عوامی دُکھاں وچ وادھاکر گیا۔اپنے مُلک وچ تعلیمی نظام ول کوئی خاص توجہ دتی گئی تے نہ ای صحت عامہ لئی کجھ خاص کیتا گیا۔امیر نوں اپنے نال ملا کے ہور امیر تے غریب نوں ہر سہولت توں دور کر کے ہور غریب کیتا گیا۔لنگے ہر دور وچ عوام اہناں لیڈراں ہتھوں دُکھی ہوندے رہےتے اج وی موجودہ سرکار نے وی کوئی اک سہولت وی نہ دِتی ۔کوڑے وعدیاں دی گندی ریت نوں زندہ رکھیا۔
جدوں وی کدی کسے سیاسی پارٹی یاں لیڈر اُتے کوئی بھیڑا وقت آیا عوام نے کُھل کُھلا کے اوہدا ساتھ دِتا ۔سڑ کاں اُتے احتجاجی جلوس کڈھے ، پُلساں توں ڈنڈے کھادے تے مقدمیاں دی مار وی برداشت کیتی۔جے کوئی لیڈر بیمار ہویا تے عوام اوہدے بُوہے ا گے کھلو کے دعاواں کر دے نظری آئے۔جے کسےتے کوئی مقدمہ بنیا تے عوام نے سڑکا ں اُتے آواز چُکی۔عوام نے ہر تھاں ہر حوالےنال اپنے لیڈراں دا سنگ نبھا یا ۔بھُکھ ورگا ڈا ہڈا دُکھ بر داشت کر کے وی اپنے لیڈراں دے ہر دُکھ نوں اپنا دکھ سمجھیا ۔۔ووٹراں نے ہمیشہ وفا کیتی صد افسوس کہ اہناں کوڑے سیاسی لیڈراں کسے وی دور وچ اپنے ووٹراں دے کسے
دُکھ نوں اپنا دکھ نہ سمجھیا ۔سگوں اپنے ہتھیں اپنے ووٹراں وچ دکھ تقسیم کیتے ۔ چوکھے سکھ والی گل تے ایہہ وے کہ عوام نوں اپنا خیال نہ آیا۔
لیڈراں ولوں آ ون والے دکھاں نوں ڈکا پاون دی بجائے عوام نے ہر دکھ توں سوا کجھ نہیں برداشت کیتا۔جے ساڈے لیڈراں اپنا وطیرہ نہیں بدلیا تے عوام نے وی بدلن دی جُہد نہیں کیتی۔ایہو وجہ اے کہ
عوام اپنا حق منگینا وی بھل گئے نیں ۔ایس طراں ساڈے لیڈراں نہ کدی پہلے شرم آئی تے نہ ای ہون اوہ عوام نوں کوئی اہمیت دیون دا آہر کر دے نیں۔جناں چر صرف مٹی دے باوے وانگوں چپ رہن گے اپنے ہی لیڈراں ہتھوں ذلیل ہوندے رہن گے۔