باپ دا پیار

راجہ صاحب نوں شادی دی فکر ہوئی تے رانی نے اعلان کر دتا باپ توں جدائی دا سوچ وی نہیں سکدی بلکہ مر جائے گی پر باپ توں دور نہیں ہوئے گی

تحریر:پروفیسر محمد عبداللہ بھٹی

راجہ صاحب دی بیگم نوں ایہناں دی کدی کدھار دی شراب نوشی توں بوہت چڑ سی دل دے عارضے تے جگر دی خرابی دے بعد ڈاکٹراں نے شراب نوشی ایہناں لئی زہر قرار دتی سی راجہ صاحب دی صحت دی وجہ نال بار بار روکن تے لڑائی جھگڑیاں دے بعد راجہ صاحب نے شراب چھڈ دتی سی پر حلقہ دوستاں جنہاں دے نال بہہ کے ایہہ شغل کردے سن ایہناں دے مجبور کرن اُتے کدی کدھار ایہہ غطی کر جاندے جنہاں اُتے خود وی پشیمان ہوندے تے بیگم توں لڑائی وکھری گل سی ۔ راجہ صاحب دے گھر جدوں میرا آندا جانا شروع ہویا تے اک دن اوہ بیچاری مُجھ توں مدد دی خواہشتگار ہوئی کہ بھائی جان تہاڈے نال راجہ صاحب بوہت پیار کردے نیںتہاڈی ہر گل من دے نیں تسیں ایہناں نوں سختی نال منع کرو گے تے شراب نوشی نہیں کرن گے ہن میں اک ترکیب سوچھی تے راجہ صاحب دی بیگم نوں کہیا جس دن ایہہ دوبارہ غلطی کرن تے تسیں اگلے دن مینوں فون کر کے دس دینا نال ای بیگم صاحبہ نوں ترکیب وی دس دتی ہن اسیں دونویں انتظار کرن لگے کیوں جے جس دن ایہہ دوستاں دی محفل وچ جاندے ایس دن اکثر ایہہ گناہ کر کے واپس آندے سن۔ آخر اوہ دن آ گیا جدوں دوستاں نے فیر راجہ صاحب نوں ایس گناہ اُتے مجبور کیتا تے بیگم صاحبہ نے مینوں فون کر کے روندے ہوئے دسیا بھائی جان اج ایہہ اوہ ای حماقت کر کے رات نوں آئے نیں ہن تسیں سنبھال لوئو۔ اگلے دن حسب معمول جدوں راجہ صاحب اپنی رانی دھی دے نال سڑک توں لنگھدے ہوئے مینوں سلام کر کے لنگھن لگے تے میں پلان دے تحت سرسری جہیا جواب دے کے اپنے گھر دے اندر چلیا گیا پہلے میں کجھ دیر رُک کے گپ شپ لاندا سی اگلے دن وی جدوں میں سرد مہری دا مظہری کیتا تے رات نوں راجہ صاحب کلے میرے کول تشریف لیائے تے شرمندہ شرمندہ جہیا بولے جناب تہاڈے نال گل کرنی اے تے نال میں چاہ وی پینی اے میں ایہناں نوں لے کے ڈرائنگ روم وچ چلا آیا گھر توں چائے لوازمات آ گئے تے راجہ صاحب بولے تسیں میرے توں ناراض او۔ کل تے اج میں تہانوں سلام کیتا تے تسیں روکھے لہجے وچ جواب دتا پہلے والی گرم جوشی آشنائی نہیں سی میرے توں کوئی غلطی گستاخی ہو گئی ہوئے تے میں ہتھ جوڑ کے معافی منگنا واں تے میں منصوبے دے مطابق بولیا راجہ صاحب میں تہاڈے گھر نوں اپنا گھر بھابھی نوں بھین تے رانی نوں اپنی سگی دھی مننا واں تہاڈے دتے ہوئے جائے نماز اُتے عبادت کرنا واں رات نوں جدوں تہاڈے لئی دعاواں کر رہیا سی تے مینوں رانی بیٹی بوہت تکلیف وچ نظر آئی پریشانی دی وجہ پچھی تے اندازہ ہویا کہ تسیں پرسوں رات کوئی غلط کم یا گناہ کیتا سی جس دی وجہ نال گھر اُتے برکت دے اثرات نہیں بلکہ نحوست دے کالے بدل نظر آ رہے سن تہانوں ویکھیا تے تسیں وی ہوش وچ نہیں بلکہ کسے نشے وچ سو۔تسیں اللہ والیاں دیاں گلاں کردے او مُجھ فقیر نال وی محبت دا دم بھردے او پر راتاں نوں نشہ کر کے گھر آندے او تہاڈے اندر کتھوں اینی زیادہ ہمت آندی اے کہ نشہ کر کے پاک نیک دھی دے ساہمنے آ جاندے او ایس نوں ہتھ لاندے او ایہہ میرے لئی بوہت شرم دی گل اے میرا تیرعین نشانے اُتے لگیا۔ راجہ صاحب ایس نوں میری کرامت یا کشف سمجھ رہے سن اٹھ کے میرے پیراں وچ ڈگن دی کوشش کرن لگے میں اٹھیا کہ صوفے اُتے بٹھایا پر اوہ زار قطار روئے جا رہے سن اوہ میری روحانی کرامت یا کشف توں بہت زیادہ خوفزدہ ہو گئے سن بلک بلک کے روندے ہوئے توبہ کیتی تے وعدہ کیتا کہ اج دے بعد اوہ پوری زندگی کدی شراب پینا تے دور دی گل اے ہتھ وی نہیں لان گے تے فیر اوہناں نے واقعی ساری عمر کسے وی قسم دے نشے نوں سونگھیا تیکر نہیں ایس واقعے دے بعد میرا تے راجہ صاحب دا تعلق بوہت پکا تے گہرا ہو گیا۔ ہن ساڈے تعلقات دا نواں دور شروع ہو گیا ہن اوہ مُجھ گناہ گار مشت غبار نوں نیک بندہ سمجھنا شروع ہو گئے سن میں تے ایہناں دی بیگم دے نال مل کے ایہہ کھیڈ کھیڈیا سی تاکہ اوہ شراب چھڈ دین پر ساڈا ایہہ کھیڈ راجہ صاحب دی زندگی بدل گیا ہن اوہناں نے ذوق شوق نال نماز دی پابندی ذکر اذکار جائے نماز اُتے ویلا دینا شروع کر دتا۔ تسبیع اوہ پہلے وی کردے سن پر ہن پکے ارادے نال اللہ دے ناواں دا ورد دن رات کرنا شروع کر دتا برائیاں توں تائب ہوئے تے تبدیل ہو کے رہ گئے ایہناں دی ایہہ مثبت تبدیلی ایہناں دے دوستاں تے رشتہ داراں لئی بوہت حیران کن سی جدوں ایہناں نوں پتہ چلیا کہ ایہناں دی ایس خوشگوار تبدیلی دی وجہ میں واں تے اوہ وی میرے کول آنا شروع ہو گئے۔ ہن راجہ صاحب میرے ہور نیڑے آ گئے تے میں اک خاص گل نوٹ کیتی کہ رانی بیٹی تے راجہ صاحب دی اک دوجے وچ جان سی ایہہ دونویں اک دوجے دے بغیر ساہ وی نہیں لے سکدے سن۔ راجہ صاحب آن والے مختلف کرایاں دی وجہ توں گھر وچ ای ہوندے سن۔ صرف شام توں پہلے واک لئی گھر توں نکلدے تے رانی بیٹی نوں ایہہ تھوڑی جہی جدائی وی قبول نہیں سی رانی بیٹی دی کل کائنات باپ راجہ صاحب تے راجہ صاحب دی جنت دونویں جہاں رانی بیٹی سی۔ ہن راجہ صاحب اکثر آندے ہوئے پکوڑے سموسے کوئی سویٹ ڈش بنا کے لے آندے جیہڑی میں تے راجہ صاحب چاہ دے نال نوش فرماندے ۔ ایس دوران رانی بیٹی پھُلاں اُتے منڈلاندی تتلیاں دے پچھلے چھالنگاں ماردی نظر آندی تھوڑے تھوڑے وقفے توں آ کے راجہ صاحب نوں گلے مل جاندی کدی چم جاندی کدی ہتھ لا جاندی رانی دا محبوب دوست تے ساتھی ایس دا باپ سی دونواں دا رشتہ نہایت مثالی تے قابل رشک سی ۔ ہن میں وی رانی بیٹی دا مشاہدہ کرنا شروع کیتا پتہ چلیا کہ اوہ پیار محبت ایثار وچ گندھی بچی اے۔جیہڑی دن رات اپنے باپ نال محبت دا اظہار کردی رہندی سی۔ ہن کیوں جے راجہ صاحب مُجھ فقیر نال بے پناہ محبت کرنا شروع ہو گئے سن ایس لئی ہن میں وی رانی دا آئیڈیل مرشد بابا جان سی ۔
اک دن راجہ صاحب نے میرے ساہمنے رانی نوں کہیا تہاڈے مرشد بھٹی صاحب نیں ساری زندگی ایہناں نال محبت عقیدت کرنا ہر کم ایہناں دے مشورے نال کرنا باپ دی گل رانی لئی پتھر اُتے لکیر سی ہن چونکہ راجہ صاحب رانی نوں پیار نال رانی دیوانی کہیا کردے سن بھٹی صاحب ایہہ میری رانی دیوانی بیٹی اے جیہڑی دنیا وچ میرے نال پیار کرن لئی آئی اے۔ ہن راجہ صاحب دی وجہ نال میں وی رانی نوں اصل ناں دی بجائے رانی بیٹی رانی دیوانی کہنا شروع کر دتا ویلے دا بے راس گھوڑا نسدا رہیا پتہ نہیں کس ویلے حق تعالیٰ نوں مُجھ گناہگار وچ کیہ نظر آیا مینوں خدمت خلق لئی چن لیا لوکاں دا ہجوم شروع ہویا تے راجہ صاحب بوہت خوش ہوئے ہن رانی بیٹی وی بچپن دی دہلیز پار کر کے جوانی دے خواب نگر وچ آ گئی سی پر باپ بیٹی دا رشتہ دیوانہ وار ایسے طرح جاری رہیا جوانی دی امنگاں بھرے دور وچ وی رانی نوں کسے جوان منڈے وچ کشش محسوس نہ ہوئی بلکہ اوہ ہن وی باپ دے سائے وانگوں ایس دے نال لپٹی رہندی رانی بیٹی نوں باپ دے علاوہ کجھ نظر ای نہیں آندا سی رانی جوان ہو گئی سی راجہ صاحب نوں شادی دی فکر ہوئی تے رانی نے اعلان کر دتا باپ توں جدائی دا سوچ وی نہیں سکدی بلکہ مر جائے گی پر باپ توں دور نہیں ہوئے گی۔ ایسے دوران میری ٹرانسفر مری توں لہور ہو گئی ہن راجہ صاحب ہر مہینے میرے کول لہور چکر لان لگے تے پرانی یاداں نوں تازہ کردے جدوں اسیں مری وچ گھنٹیاں اکٹھا ویلا لنگھادے سی ۔ اک دن راجہ صاحب رانی بیٹی جیہڑی ہن مکمل جوان ہو چکی سی نوں لے کے لہور میرے گھر تشریف لیائے تے علیحدگی وچ التجا ئیہ لہجے وچ بولے ایہہ دنیا وچ میرے بعد صرف تہاڈی گل من دی اے ایس نوں سمجھائو کہ شادی لئی من جائے مینوں دو ہارٹ اٹیک ہو چکے نیں تیجا جان لیوا ہوئے گا ایس توں پہلے میں رانی دی شادی کرنا چاہنا واں لہٰذا میں رانی نال گل کرن دا فیصلہ کیتا۔
( جاری اے )