قومی اقتصادی کونسل دی مالی سال 2021-22 لئی 2100 ارب روپئے دے ترقیاتی بجٹ پلان دی منظوری

آئندہ مالی ورہے لئی 5.8 ٹریلین روپئے دے ٹیکساں دا ہدف رکھیا جائے گا، شرح نمو 4.8 فیصد تجویز

بلال مدثر بٹ

قومی اقتصادی کونسل نے مالی سال 2021-22 لئی 2100 ارب روپئے دے ترقیاتی بجٹ پلان دی منظوری دے دتی اے۔ جس وچ مرکز تے سارے صوبیاں دا حصہ شامل ہوئے گا۔ بجٹ وچ رکھی گئی ایہہ رقم پچھلے مالی سال 2020-21 دے 1324 ارب روپئے دے مقابلے وچ 776 ارب روپئے زیادہ اے۔ گویا حکومت نے اک گل طے کر دتی اے کہ بجٹ 2021-22 ترقیاتی منصوبیاں دے لحاظ نال بہتر بجٹ ہوئے گا۔ ترقیاتی کماں نال روزگار دے موقعے پیدا ہون گے گردش زر وچ وادھا ہوئے گا۔ نکی وڈی صنعتاں ترقی کرن گیاں۔ معیشت وچ کھلا پن پیدا ہوئے گا جس نال قومی آمدنی وچ وی وادھا ہوئے گا ایہو وجہ اے کہ حکومت بڑے فخر نال کہہ رہی اے کہ آئندہ سال قومی معیشت 4.8 فیصد دی شرح نال ترقی کرے گی تے ایسے حساب نال ٹیکس وی اکٹھے ہون گے۔ حکومت نے ٹیکساں توں حاصل کردہ آمدنی 5829 ارب روپئے دا ٹارگٹ طے کیتا اے۔ سال 2020-21 دے دوران معاشی نمو دی شرح 3.9 فیصد دا اندازہ لایا گیا اے جد کہ اگلے سال دے دوران ایہنوں 4.8 فیصد کر دتا گیا اے۔ زرعی شعبے دی شرح نمو 3.4 فیصد، صنعت دی شرح نمو 6.6 فیصد مینو فیکچرنگ 6.2 فیصد تے خدمات دے شعبے وچ 4.7 فیصد نمو دے ذریعے قومی معیشت وچ نمو دی شرح 4.6 فیصد حاصل کیتی جان دا ٹارگٹ طے کیتا گیا اے۔
فیڈرل پبلک سیکٹر ڈویلپمنٹ پروگرام دا حجم 2020-21 وچ 650 ارب روپئے دے مقابلے وچ 2021-22 دے دوران 900 ارب روپئے مقرر کیتا گیا اے۔ ایہہ ٹارگٹ بظاہر وڈا نظر آندا اے پر حکومت دی معاشی حکمت عملی نوں ویکھدے ہوئے ایس دا حصول ہر گز مشکل نہیں ہوئے گا کیوں جے معاشی اشاریے مثبت سمت وچ جاندے ہوئے نظر آ رہے نیں ایس دے علاوہ صوبیاں نے وی مجموعی طور اُتے سالانہ ترقیاتی پروگراماں دا حجم 1200 ارب روپئے مقرر کیتا گیا اے۔
اسیں جس معاشی و اقتصادی نظام دے تحت زندگیاں لنگھا رہے آں ایس وچ حکومتی کارکردگی دے جانچن دا اک کلیدی پیمانہ ’’ترقیاتی اخراجات ‘‘ ہوندا اے جس حکومت دا سہولیا ت دی فراہمی اُتے جس قدر وی فوکس ہوئے گا اوہ ای ایس دی کارکردگی شمار کیتی جائے گی۔ معاشی سرگرمیاں وچ کھلا پن آن نال زر تے ایس دی گردش جس قدر زیادہ ہوئے گی عوام دے ہتھاں وچ زر جنہا زیادہ ہوئے گا ایہناں دی قوت خرید اینی ای زیادہ ہوئے گی ایہناں دی طلب وچ ایسے قدر وادھا ہوئے گا۔ فیر ایس طلب نوں پورا کرن لئی صنعت و حرفت وچ ایس دی پیداوار صلاحیت وچ وی وادھا ہوئے گا۔ معیشت وچ پیداوار عمل دا فروغ روزگار وچ وادھے تے مجموعی طور اُتے معاشی نمو دا باعث بن دا اے۔ حکومت مالی سال 2021-22 وچ ایس پالیسی اُتے عمل پیرا اے۔
وفاقی وزیر خزانہ شوکت ترین دس چکے نیں کہ وزیراعظم دے مشیر برائے ادارہ جاتی اصلاحات ڈاکٹر عشرت ترین دی سربراہی وچ تشکیل کردہ اکنامک ایڈوائزری کونسل ماہرین دی مشاورت تے مدد نال قومی معیشت دے گھٹ توں گھٹ 12 شعبیاں دی ترقی لئی تجاویز مرتب کر چکی اے۔ ایہناں تجویزاں نوں بجٹ 2021-22 وچ شامل کیتا جا چکیا اے۔ جس نال ایہناں شعبہ جات وچ کارکردگی دے لحاظ نال بہتری تے نمو دے نال نال اخراجات وچ کمی واقع ہوئے گی جس نال نہ صرف قومی معیشت دے ایہناں شعبیاں وچ بہتری آئے گی بلکہ ٹیکس وصولیاں وچ وی خاطر خواہ وادھا ہوئے گا۔ انسٹی ٹیوٹ آف پالیسی ریفارمز دے زیر اہتمام اک سیمینار نال خطاب کردے ہوئے وزیر خزانہ بڑے واضح الفاظ وچ کہہ چکے نیں کہ مستحکم معاشی ترقی ای ساڈے قومی مسائل دا حل اے حکومت دی ایس موثر تے کامیاب حکمت عملی پاروں وصولیاں دا حجم 4 ہزار ارب روپئے توں تجاوز کر چکیا اے جد کہ اگلے سال یعنی 2020-21 وچ وصولیاں دا ہدف 5829 ارب روپئے رکھیا گیا اے۔
ایس توں پہلے وزیراعظم عمران خان کہہ چکے نیں کہ قومی معیشت گھمبیر صورتحال توں نکل آئی اے تے مالی سال 2020-21 دے اختتام تیکر معاشی گروتھ 4 فیصد تیکر ہوئے گی۔ حکمران جماعت نے مختلف معاشی اشاریاں دے حوالے نال اعداد و شمار جاری کیتے نیں۔ ساڈے کول کیوں جے ایہناں اعداد و شمار دی تکذیب کرن دا کوئی دوجا معتبر ذریعہ دستیاب نہیں ایس لئی بجٹ 2021-22 دے پیش ہون تیکر ایہناں ای گلاں اُتے یقین کرنا ہوئے گا۔ تاں اپوزیشن حکومت دے بیان کردہ اعداد و شمار نوں شک و شبہ دی نگاہ نال ویکھ رہی اے۔ تنقید وی کر رہی اے پر اک گل تے طے اے کہ پاکستان دی قومی معیشت اک بوہت وڈی معیشت اے جس دی خام قومی پیداوار دا حجم 300 ارب ڈالر دے اردگرد رہندا اے۔ ساڈا صنعتی ڈھانچہ وی زراعت تے ایس دی پیداوار متعلق اے۔ ساڈی برآمدات دا کثیر حصہ کپاس، چاول، چمڑہ وغیرہ توں حاصل ہوندا اے جد کہ زراعت دا زیادہ تر انحصار قدرتی عوامل اُتے ہوندا اے۔ ہندوستان تے بنگلہ دیش وچ کرونا دی بدترین صورتحال پاروں پیداواری عمل شدید متاثر ہویا اے جس پاروں ایہناں ملکاں نوں ملن والے برآمدی اہداف پورے نہیں کیتے جا سکے۔ یورپی ملکاں دے انج دے آرڈر ایتھے پاکستان منتقل ہوئے جس پاروں ساڈی برآمدات وچ وی وادھا ہویا تے اقتصادی نمو وچ وی بہتری آئی اے۔
وزیر خزانہ نے جس ٹھوس تے محکم انداز وچ گل کیتی اے۔ ایس توں لگدا اے کہ حکومت بجٹ 2021-22 نوں حقیقتاً عوام دوست بنان وچ سنجیدہ اے۔ ساڈے کول جے ٹیکس جمع کرن دا نظام جدید بنیاداں اُتے استوار کر لیا جائے تے بدعنوانی دے عنصر نوں حتی المقدور گھٹ کر دتا جائے تے فیر بعید نہیں کہ ٹیکساں دی شرح ودھائے تے نویں ٹیکس لائے بغیر وی ٹیکس وصولیاں دے حجم وچ وادھا کیتا جا سکدا اے۔ وزیر خزانہ نے ایسے سمت اشارہ ای نہیں کیتا بلکہ واضح انداز وچ دسیا اے کہ نظام وچ جدید ٹیکنالوجی متعارف کروائی جا رہی اے۔ ٹیکس ڈیپارٹمنٹ دی دست درازیاں نے وی معاملات وچ وگاڑ پیدا کیتا اے۔ ٹیکس ادا کرن والیاں نوں اکثر ہراساں کیتا جاندا اے۔ ایہو وجہ اے کہ حکومت ٹیکنالوجی دے ذریعے ٹیکس وصولیاں دے نظام وچ بہتری لیان دی کوشش کر رہی اے۔
تحریک انصاف دی حکومت اپنا تیجا بجٹ پیش کرن جا رہی اے۔ شوکت ترین چوتھے وزیر خزانہ ایہہ بجٹ پیش کرن گے۔ اولاً اسد عمر تحریک انصاف دے معاشی و اقتصادی حکمت کار سن، پر اوہ بوجوہ چل نہیں سکے۔ ایہناں نوں کامیاب یا ناکام کہنا درست نہیں ہوئے گا۔ بہرحال حفیظ شیخ صاحب نے دو سال تیکر معیشت نوں چلایا بلکہ چلان دی کوشش کیتی۔ آئی ایم ایف دی شرطاں دے مطابق قرضہ دین والے عالمی و علاقائی اداریاں دی شرطاں دے عین مطابق معیشت نوں چلاندے رہے۔ توانائی یعنی بجلی، گیس تے پٹرولیم مصنوعات دی قیمتاں وچ وادھے نے عام بندے دی معیشت دا بھرکس کڈ دتا۔ روپئے دی قدر وچ کمی نال ساڈے حالیہ معاشی مسائل دا آغاز ہویا جیہڑا ودھدے ودھدے قومی معیشت دے ہر شعبے اُتے چھا گیا۔ کرونا وائرس نے بلدی اُتے تیل دا کم کیتا۔ معاشی سرگرمیاں محدود ای نہیں بلکہ بوہت زیادہ ای محدود ہو گئیاں۔ عالمی معیشت وی کرونا دا شکار ہو گئی۔ عالمی تجارت دا پہیہ جام ہو گیا۔ پیداواری عمل ٹھٹھر گیا۔ ایسے طرح دے عوامل نے مل جل کے عوامی معیشت دا دھڑن تختہ کر دتا۔ ایس دے باوجود کرونا دے منفی اقتصادی اثرات نوں گھٹ توں گھٹ کرن دی کاوشاں کیتیاں گئیاں۔ دوجے پاسے غریباں نوں نقد روپئے دے ذریعے کفالت دا بندوبست کرن دی منصوبہ سازی اُتے عمل کیتا گیا۔ ایسے طرح گردش زر وچ وادھے دی حکمت عملی اپنائی گئی ۔ رئیل اسٹیٹ دے شعبے نوں اک طے شدہ منصوبہ بندی دے مطابق بحال کرن لئی مراعاتی پیکیج دتا گیا جس پاروں نکی تے درمیانے درجے دی صنعتاں وچ بحالی دے آثار پیدا ہو چکے نیں تے ہن ایہناں سب عوامل نوں ویکھدے ہوئے مالی سال 2021-22 دے اہداف مقرر کیتے گئے نیں۔
کل 11 جون 2021 نوں نواں وفاقی بجٹ پیش کیتا گیا۔ پاکستان وچ کرونا دی وجہ نال معاشی صورت حال تسلی بخش نہیں رہی جس دے بعد متوازن بجٹ پیش کرنا اک چیلنج توں گھٹ نہیں۔ خاص طور تے جدوں پچھلے ورہے معاشی شرح نمو منفی دو فی صد ریکارڈ ہوئی پاکستان نوں ایس ویلے ٹیکس وصولیاں وچ مسائل دا ساہمنا رہیا اے۔ بجٹ خسارہ، ریکارڈ سطح اُتے ویکھیا جا رہیا اے۔ روپئے دی قدر، برآمدات تے تجارتی توازن دے مسائل ودھ رہے نیں۔ مہنگائی نے عوام دی کمر توڑ کے رکھ دتی اے۔
رئیل اسٹیٹ لئی مراعات
پاکستان وچ ایس ویلے سب توں زیادہ سرمایہ کاری رئیل اسٹیٹ دے کاروبار وچ ہو رہی اے پر بدقسمتی نال ایس انڈسٹری دے نال سوتیلی ماں ورگا سلوک کیتا جا رہیا اے ۔ مختلف شہراں وچ بنن والی ہائوسنگ اسکیماں نوں قانونی شکل دین لئی اک انج دا لمبا رستہ متعین کیتا گیا اے جس دے تقاضیاں نوں پورا کرنا بظاہر ناممکن ہوندا اے۔ کروڑاں روپئے دی رقم سرمایہ کاری کرن دے بعد سوسائٹی مالکان دفتراں دے دھکے کھا رہے نیں پر ایہناں دے کاروبار نوں تحفظ دین لئی موجودہ قوانین اُتے وی عمل نہیںہو رہیا۔ موجودہ بجٹ جیہڑا کہ موجودہ حکومت دا تیجا بجٹ اے ایس وچ رئیل اسٹیٹ دے کاروبار نوں تحفظ دین لئی مثبت اقدامات کرن دی لوڑ اے۔ حکومت نوں چاہیدا اے کہ ہائوسنگ سوسائٹیاں نوں قانونی شکل دین دے عمل نوں آسان بنائے تے جیہڑے سوسائٹی مالکان قانونی تقاضیاں نوں پورا کردے نیں ایہناں دی ہائوسنگ سکیماں دی منظوری دتی جائے ایس نال ارباں روپئے دا ریونیو حاصل کیتا جا سکدا اے۔ حکومتی اہلکاراں دی عدم دلچسپی پاروں غیر قانونی رہائشی سکیماں دن بدن ودھ رہیاں نیں جد کہ جیہڑے لوک اپنے کاروبار نوں قانونی شکل دینا چاہندے نیں ایہناں دے رستے وچ روڑے اٹکائے جا رہے نیں جے رئیل سٹیٹ دے کاروبار نوں رستے وچ رکاوٹاں دور کیتیاں جان تے نہ صرف ریونیو وچ وادھا ہوئے گا بلکہ عوام دے رہائشی مسئلے حل کرن وچ مدد ملے گی۔
تعمیراتی شعبہ اُتے توجہ دی لوڑ
پاکستان دی معیشت وچ زراعت دے بعد سب توں وڈا شعبہ تعمیراتی صنعت اے۔ اعداد و شمار دے مطابق تعمیراتی شعبے نال مجموعی طور اُتے 35 فیصد روزگار دے موقعے فراہم ہوندے نیں۔ ایس طرح تعمیراتی صنعت روزگار دی فراہمی دے نال نال ملکی معیشت دی ترقی وچ اہم کردار ادا کردی اے۔ حکومت نوں ایس حقیقت دا ادراک کرنا چاہیدا اے کہ معیشت دی ترقی تعمیراتی صنعت وچ مضمر اے ایس لئی پاکستان دی معیشت نوں تعمیراتی صنعت دے ذریعے ترقی دین لئی خصوصی ریلیف پیکج دا اعلان کیتا گیا سی جس دے تحت تعمیرات تے رئیل اسٹیٹ وچ سرمایہ کاری کرن والیاں نوں ذرائع آمدن ظاہر نہ کرن دی 30جون 2021 تیکر چھوٹ جد کہ 31 دسمبر 2021 تیکر فکس ٹیکس ریجیم دی سہولت دتی گئی سی۔ کرونا وبا نوں مدنظر رکھدے ہوئے تعمیراتی صنعت نوں دتا گیا ریلیف پیکیج معیشت دی ترقی لئی درست فیصلہ اے پر حکومت نوں ایس پیکیج دی مدت وچ توسیع کرنی چاہیدی اے کیوں جے دتے گئے تعمیراتی پیکیج دے تحت صرف 20 فیصد کم مکمل تے 80 فیصد کم باقی اے۔ تاں حکومت نوں چاہیدا اے کہ بقیہ 80 فیصد کم مکمل کرن لئی ایس پیکیج دی مدت وچ توسیع کرے تاکہ ایہہ شعبہ ترقی کر سکے۔ ملکی معیشت دے اشاریے ایہہ دسدے نیں کہ تعمیراتی پیکیج دے اعلان توں بعد ملک وچ تعمیراتی سرگرمیاں بلند ترین سطح اُتے اپڑیاں۔ پاکستان دی تاریخ وچ سیمنٹ تے سریا دی پیداوار تے ٹائلز سنے دیگر تعمیراتی مصنوعات دی فروخت پاکستانی تاریخ وچ ریکارڈ وادھا ہویا اے جس دے مثبت اثرات جاری مالی سال دے جی ڈی گروتھ وچ حیران کن وادھے نال ظاہر ہوئے نیں۔ رئیل سٹیٹ دے حوالے نال جس طرح پہلے عرض کیتا کہ تعمیراتی شعبے تے رئیل اسٹیٹ وچ سرمایہ کاری کرن والیاں نوں ذرائع آمدن ظاہر نہ کرن دی چھوٹ وچ مزید 2 سال دی توسیع دتی جائے ۔
تعمیراتی صنعت نوں
دتے گئے پیکیج دی اہمیت
تعمیراتی صنعت نوں دتا گیا ریلیف پیکیج صحیح معنیاں وچ عوامی پیکیج اے۔ کہ ایس پیکیج دے حقیقی فائدے عام عوام تیکر اپڑے نیں۔ ایس پیکیج دے ذریعے گھٹ آمدنی والے طبقے دا اپنا گھر دا خواب پورا ہوندا ہویا نظر آ رہیا اے پر ایس پیکیج نال بلڈرز تے ڈویلپرز کوئی فائدہ نہیں چک سکے تاں ملکی آبادی دا گھٹ آمدنی والا طبقہ ایس سکیم توں فائدہ مند ہویا اے۔ ایس پیکیج نال گھٹ آمدنی والے طبقے نوں سستے گھراں دی فراہمی ممکن بنائی جا سکدی اے۔ سیمنٹ تے سریا تعمیرات دا اہم جز اے۔ تعمیراتی شعبے لئی مراعات پیکیج دے اعلان دے بعد تعمیراتی سرگرمیاں نوں فروغ ملیا جس نال سیمنٹ تے سریا دے مینو فیکچررز دے کارٹیل نے سریا تے سیمنٹ وچ مسلسل وادھا کرنا شروع کر دتا اے جس نال گھٹ آمدنی والے گھر بنان دے خواہش مند بندے تے نیا پاکستان ہائوسنگ اسکیم نوں شدید خطرات لاحق ہو گئے نیں۔ وزیراعظم عمران خان دا گھٹ آمدنی والی طبقے نوں سستے گھراں دی فراہمی دا منصوبہ پایہ تکمیل تیکر اپڑانا مشکل ہو گیا اے۔ ایس لئی حکومت نوں چاہیدا اے کہ سیمنٹ تے سریا بنان والی صنعتاں نوں قانون دے دائرے وچ لیان، بصورت دیگر سیمنٹ تے سریا دی درآمد تے ریگولر ڈیوٹی تے ایڈیشنل ریگولر ڈیوٹی دا خاتمہ کیتا جائے تاکہ سریا تے سیمنٹ دی قیمتاں وچ استحکام آ سکے ۔ گھٹ آمدنی والے طبقے نوں سستے گھراں دی فراہمی موجودہ حکومت تے وزیراعظم عمران خان دا ویژن اے۔ وزیراعظم دے ایس خواب نوں شرمندہ تعبیر کرن لئی ضروری اے کہ سیمنٹ، سریا، ٹائلز تے دیگر تعمیراتی میٹریل دی قیمتاں نوں گھٹ توں گھٹ 3 سال لئی فکس کیتا جائے تاکہ تعمیراتی منصوبیاں دی تعمیر دے دوران مذکورہ میٹریل دی قیمتاں وچ وادھے نال ایہناں منصوبیاں نوں نقصان توں بچایا جا سکے۔ دوجی صورت وچ بجٹ 2021-22 وچ سیمنٹ، سریا، ٹائلز تے دیگر تعمیراتی میٹریل اُتے 3 سال لئی مقامی ٹیکساں سنے سارے ٹیکس ختم کیتے جان۔
این او سی لئی غیر ضروری رکاوٹاں دا خاتمہ کیتا جائے۔ تعمیراتی منصوبیاں لئی افسر شاہی ولوں لاگو کیتے گئے سرخ گیتاں نوں ختم کیتا جائے۔ این او سی دی منظوری لئی آن لائن ون ونڈو اپریشن دا نظام پورے پاکستان وچ نافذ کیتا جائے تے تعمیرات دے حوالے نال سارے بائی لاز پورے ملک لئی یکساں کیتے جان۔تعمیراتی منصوبے لئی بلڈرز نوں درجناں متعلقہ سرکاری محکمیاں وچ دھکے کھانے پیندے نیں تے این او سی لئی وی سال توں زیادہ عرصہ لگ جاندا اے۔ آن لائن ون ونڈو اپریشن دا نظام نافذ کر کے 15 دن وچ تعمیراتی منصوبے لئی این او سی جاری کیتی جانی چاہیدی اے۔ جدوں رہائشی منصوبیاں نوں منظوری وچ بلاوجہ رکاوٹاں دا ساہمنا اے تے ایس دی وجہ نال غیر قانونی تعمیرات وچ وادھا ہو رہیا اے تے ایہو وجہ اے کہ کراچی دے 54 فیصد رہائشی کچی آبادیاں وچ رہائش پذیر نیں۔ حکومت نوں چاہیدا اے کہ قانونی تعمیرات وچ ہون والی رکاوٹاں نوں ختم کیتا جائے تاکہ شہریاں نوں معیاری رہائشی سہولت میسر تے کچی آبادیاں وچ کمی آ سکے۔ پاکستان دی معیشت نوں ترقی دین لئی ضروری اے کہ پاکستان نوں صنعتی ملک بنایا جائے۔ بلڈرز تے ڈویلپرز نوں صنعتی زونز بنان لئی مراعات دتیاں جان۔ ایہناں صنعتی زونز وچ ورکرز نوں معیاری رہائش، صحت دی سہولتاں لئی ہسپتال، سکول تے پارک وغیرہ سنے بنیادی سہولتاں میسر آ سکن۔

اپنا تبصرہ گھلو