پہلے حریف نوں سمجھو فیر کجھ سوچو

لكهت: وسعت اللہ خان

جدوں پہلے وزیراعظم ڈیوڈبن گوریان نے صیہونی نظریے دی بنیاد تے پنج مئی 1948ء نوں مملکت اسرائیل دے وجود دا اعلان کیتا۔ اودوں تک یہودی آبادکاراں دا فلسطین وچ تناسب چھ فیصد سی۔ ایس لئی مسلح یہودی ملیشیاواں نے فلسطینیاں نوں جبراً اکھاڑ سٹن دی کاروائی شروع کیتی تے 1948ء توں 1950ء وچکار فلسطین دے 78فیصد تریخی علاقے توں ساڑھے ست لکھ مقامی باشندیاں نوں دہشت دا بازار گرم کرکے کھدیڑ دتا گیا۔ ایس 78فیصد علاقے نوں ریاست اسرائیل دا ناں دتا گیا۔ باقی 22فیصد فلسطین غرب اردن (ہاشمی سلطنت دے ماتحت دریا اردن دا مغربی کنڈھا) تے غزہ دے دو ٹوٹیاں دی شکل وچ بچیا۔ اوہ وی 1968ء دی جنگ وچ اسرائیلی قبضے وچ چلا گیا۔
1948ء توں 1950ء دے دو ورھیاں نوں فلطینی ال نقبہ (قیامت صغریٰ) دے ناں تو ںنسل در نسل یاد رکھے ہوئے نیں۔ ساڑھے ست لکھ پناہ گزیناں وچوں اکثر اردن‘ شام‘ لبنان تے مصر دے مہاجر کیمپاں وچ رہے یاں فیر غزہ تے غرب اردن منتقل ہو گئے۔ اج اوہناں دی چوتھی نسل دے کول اوہناں گھراں دیاں چابیاں محفوظ نیں جہناں دا ہن کوئی وجود نہیں رہیا۔ ال نقبہ دے دور دہشت وچ نہ صرف وڈے شہراں (جافا‘ حیفہ‘ تل ابیب‘ اشدود وغیرہ) توں فلسطینی جبراً کڈھے گئے سگوں 530 پنڈوی مٹا دتے گئے یاں اوہناں نوں نویاں آبادیاں وچ ضم کرکے ناں بدل دتے گئے۔ ایہناں ساڑھے ست لکھ فلسطینیاں وچ ہور تن لکھ بے گھر فلسطینیاں دا وادھا 1968ء دی جنگ دے بعد ہویا۔ ایس طرح تقریباً ساڑھے دس لکھ فلسطینی براہ راست بے گھر ہوئے تے ہن اوہناں دی چوتھی نسل وچوں تقریباً پنجاہ لکھ لوک اقوام متحدہ دے منے 58 پناہ گزین کیمپاں چوں باہر‘ اسرائیلی مقبوضہ علاقے‘ مشرق وسطیٰ تے مغربی ملکاں وچ کھلرے ہوئے نیں۔ اسرائیل دی پہلی شرط ایہہ وے کہ دو ریاستی حل ہووے یاں ہور کوئی امن فارمولا‘ جہڑے فلسطینیاں نے 1948ء وچ اپنا وطن چھڈیا اوہناں دے وارثاں نوں فیر اپنے آبائی علاقیاں وچ رہن دا حق حاصل نہیں ہووے گا پر کجھ فلسطینی خاندان زیادہ سخت جان ثابت ہوئے۔ اوہ اک علاقے چوں کڈھے گئے تے دوجے وچ ٹر گئے پر ریاست اسرائیل دی حدود وچ ای دربدر رہے۔ ایس لئی اوہناں نوں آخر کار ریاستی شہریت دے دتی گئی۔ ایس ویلے اجہے اسرائیلی عرباں دی گنتی سولاں لکھ دے نیڑے اے۔ اوہناں نوں ملکی سیاست وچ حصہ لین دی وی اجازت اے۔ اوہناں دی پارلیمانی نمائندگی وی اے۔ عبرانی دے نال نال عربی نوں وی قومی زبان دا درجہ حاصل اے۔ بظاہر اوہناں نوں دوجے شہریاں وانگوں تعلیم‘ صحت تے روزگار و رہائش دا آئینی حق وی حاصل اے پر یہودی اکثریت اوہناں نوں مشکوک سمجھدی اے تے غیراعلانیہ پالیسی ایہہ وے کہ اوہناں نوں آئینی حقوق دے فائدے چکن توں جناں روکیا جا سکے روکیا جاوے۔
جتھوں تک اسرائیلی حدود توں باہر مقبوضہ مغربی کنڈھے دے شہراں تے پنڈاں دا معاملہ اے تے اوہناں دے وی ہور انتظامی بخرے کرکے تن حصیاں وچ ونڈیا گیا اے۔ اے ایریا مغربی کنڈھے دے اٹھاراں فیصد رقبے تے مشتمل اے تے ایہدے اندرونی نظم و نسق دے معاملے فلسطینی اتھارٹی دے اختیار وچ نیں۔ بی ایریا مغربی کنڈھے دے بائی فیصد رقبے تے مشتمل اے۔ ایہ علاقہ فلسطینی اتھارٹی تے اسرائیل دے سانجھے کنٹرول وچ اے۔ کہن نوں ایریا اے تے بی وچ صحت‘ تعلیم و روزگار سنے کجھ بنیادی شعبے فلسطینی اتھارٹی دے دائرہ اختیار وچ نیں پر عملاً ایہناں علاقیاں دی حدود چوں باہر دے سکیورٹی معاملے اسرائیل دے کول نیں۔ یعنی اسرائیل جدوں چاہوے ایریا اے تے بی وچ فوجی تے انتظامی مداخلت دا حق رکھدا اے۔ سی ایریا مغربی کنڈھے دے سٹھ فیصد رقبے تے مشتمل اے تے اسرائیل دے سوفیصد فوجی تے انتظامی کنٹرول وچ اے۔ ایتھے یہودی آبادکاری دی رفتار سب توں تیز اے۔ بھاویں اوسلو امن سمجھوتے دے تحت اسرائیل سی ایریا دا انتظام وی سمجھوتے دے پنج ورھے بعد فلسطینی اتھارٹی دے حوالے کرن دا پابند سی پر چھبی ورھے گزر گئے‘ انج اج تک نہیں ہو سکیا پہلا اوسلو سمجھوتہ 1993ء تے دوجا 1995ء وچ ہویا سی۔
ایس ویلے یروشلم سنے پورے مقبوضہ مغربی کنڈھے تے چھ توں ست لکھ یہودی آبادکار ڈھائی سو بستیاں وچ رہ رہے نیں۔ ایس لئی اسرائیل دی مجموعی 68لکھ یہودی آبادی دا دس فیصد مقبوضہ علاقیاں وچ آباد کیتا گیا اے۔ ایہناں وچوں 130بستیاں سرکاری تے 120 غیرسرکاری طور تے بسیاں ہوئیاں نیں۔ پر چوتھے جنیوا کنونشن دے مطابق ایہ ساریاں بستیاں غیرقنونی نیں۔ بین الاقوامی قنوناں دے مطابق قابض طاقت مقبوضہ آبادی وچ جبراً ردوبدل نہیں کر سکدی تے نہ ای باہروں لوک لیا کے بسا سکدی اے۔ اسرائیل دی ریاستی حدود چوں باہر آباد ہون دے باوجود ایہناں آبادکاراں نوں نہ صرف ریاستی شہریت حاصل اے سگوں اوہناں نوں اپنا گھٹو گھٹ معیار زندگی برقرار رکھن لئی سرکاری سبسڈی وی دتی جاندی اے۔ جد کہ ایسے علاقے دی فلسطینی اکثریت اسرائیلی فوجی قنوناں دے تابع اے۔ فلسطینیاں دی نقل و حرکت تے مکمل کنٹرول لئی پورے مغربی کنڈھے تے تقریباً ساڑھے ست سو فوجی رکاوٹاں نیں ایہناں وچوں 140 مستقل چیک پوسٹاں نیں۔ فلسطینی مرداں‘ عورتاں‘ بچیاں نوں اوہناں توں گزرن لئی ہر موسم وچ گھنٹوں قطار وچ کھڑے رہن دی عادت ہو گئی اے جد کہ اوہناں دے سامنے آبادکار بستیاں نوں اسرائیلی شہراں نوں جوڑن والی سڑکاں تے یہودی شہری زن توں بناں پچھ گچھ گزر جاندے نیں۔ ایہناں چیک پوسٹاں توں اوہ ستر ہزار مزدور وی روزانہ گزردے نیں جو ورک پرمٹ دے تحت اسرائیل دے اندر دیہاڑی لئی جاندے نیں۔ مقبوضہ فلسطینیاں وچ بیروزگاری دا تناسب تقریباً پنجاہ فیصد دسیا جاندا اے۔
ایہہ جے اوہ مجموعی تصویر جہنوں چھپان یاں دھندلان دی اسرائیلی اسٹیبلشمنٹ نے ہرابلاغی محاذ تے بھرویں کوشش کیتی تے ہن تک کامیاب وی رہی پر بھلا ہووے بے لگام سوشل میڈیا دی طاقت دا۔ ایس واری وحشی عرباں دے سمندر وچ گھرے ہوئے اک محاصرہ زدہ جیزرے دا تاثر پہلی واری کسے حد تک تار تار ہویا اے۔ پہلی واری بین الاقوامی دبائو نے اسرائیل نوں یاراں دیہاڑیاں بعد جنگ بندی دے اعلان وچ پہل تے مجبور کیتا۔ ایس توں پہلاں اوہ ہمیشہ اپنیاں شرطاں تے فائرپاور روکن دا عادی سی۔ سوشل میڈیا پاروں پہلی واری فلسطینیاں دے جوابی بیانیے نوں مغربی پریس وچ کجھ نہ کجھ تھاں ملی۔ پہلی واری اک انہونی ایہ وی ہوئی کہ امریکی کانگریس وچ مقدس اسرائیلی گاں دے خلاف کھل کے کجھ سرپھرے ارکان نے اپنے جذبات دا اظہار کیتا تے درجن بھر امریکی شہراں وچ فلسطینیاں دے حق وچ وڈے وڈے مظاہرے ہوئے۔ بھاویں امریکی کانگریس وچ اسرائیل مخالف آوازاں دی گنتی اجے آٹے وچ لون برابر اے پر اوہ جہڑی چینی کہاوت اے کہ ہزار میل دا سفر پہلے قدم توں ای شروع ہو جاندا اے۔ اسرائیل نوں ہن اپنی مظلومیت دی نویں فلم تیار کرنی پوے گی پر نویں دنیا بڑی سیانی ہوندی جا رہی اے۔ ہن اوہ نویں بوتل وچ پرانی شراب وی اوویں پچھانن لگ پئی اے۔

اپنا تبصرہ گھلو