حکومتی اتحادیاں دے چونچلے

لکھت:اعجاز علی ساغر

پچھلے دیہاڑ ایم کیو ایم پاکستان دے خالد مقبول صدیقی نے انفارمیشن ٹیکنالوجی دی وزارت چھڈدیاں ہوئیاں ایہ آکھیا کہ ساڈے مسئلے حل نہیں ہو رہے ایس لئی ہن ایس حکومت وچ بیٹھنا ساڈے لئی سودمند نہیں پر اسیں حکومت دی سپورٹ جاری رکھاں گے۔

ایس پریس کانفرنس نے بظاہر حکومت دیاں صفاں وچ کھلبلی مچا دتی تے وزیراعظم عمران خان نے اسد عمر نوں ٹاسک دتا کہ اوہ اتحادی جماعت دے خدشات دور کرن تے اوہناں نوں منان دیاں کوششاں کرن۔ کیہ ایہ پہلی واری ہویا اے یاں ایہ رسم پرانی اے ماضی وچ وی پیپلزپارٹی تے ن لیگ نوں اوہناں دے اتحادیاں دی وجہ توں کافی مسئلیاں دا ساہمنا رہیا جہدے وچ ایم کیو ایم نے نویں ووہٹی وانگوں بھا کھاندیاں ہوئیاں حکومت توں علیحدگی دا اعلان کیتا تے آکھیا ایم کیو ایم نوں فنڈز نہیں دتے جا رہے اوس ویلے وفاقی حکومت نے اوہناں دے جائز نجائز مطالبات من کے اوہناں نوں راضی کر لیا تے اوہ حکومت دا حصہ بن گئے۔

پچھلے دناں پیپلزپارٹی ولوں ایم کیو ایم نوں ساتھ دین تے سندھ وچ وزارتاں دین تے فنڈز دے اجراء دا اعلان کیتا گیا تے بیک ڈور رابطیاں نوں اپنایا جان لگ پیا ایس اعلان دے کجھ دن بعد ای خالد مقبول ولوں کیتی گئی پریس کانفرنس وچ حکومت توں علیحدگی دا اعلان کر دتا گیا تے نال ای ایہ وی دس دتا گیا کہ اسیں قنون دی وزارت نہیں منگی سی تے نہ ای اسیں فروغ نسیم دا ناں وزارت لئی دتا سی ایہدے علاوہ کراچی لئی فنڈز جاری نہ کرن دا وی شکوہ کیتا گیا ایہدی وجوہات جانن دی کوشش کیتی گئی کہ ایہدے پچھے محرکات کیہ نیں تے کجھ چیزاں ساہمنے آئیاں اک تے ایم کیو ایم دی شروع توں ای دو وزارتاں تے نظر سی ایہدے وچ اک پورٹ اینڈ شپنگ دی سی جہدے وزیر علی زیدی نیں تے دوجی اوورسیز پاکستانیز والی وزارت سی چونکہ کراچی وچ شپنگ دے شعبے وچ بہت ساری یونینز کم کر رہیاں نیں ایس لئی اوہ ایس وزارت نوں ہر حال وچ حاصل کرنا چاہندی سی تے دوجا زلفی بخاری دی منسٹری اوورسیز پاکستانیز تے اوہناں دی نظر ایس وجہ توں سی کہ اوہ بیرون ملک پاکستانیاں توں ملن والی خطیر رقم حاصل کرکے ایہ اپنے اکانٹس بھرنا چاہندے سن تحریک انصاف نوں شروع توں ای اتحادیاں ولوں پریشانیاں دا ساہمنا رہیا اے ۔

عمران خان نے واضح طور تے اعلان کیتا سی کہ اوہ کرپشن کسے صورت برداشت نہیں کرن گے اوہناں نے احتساب دا عمل اپنے گھرتوں شروع کیتا تے اوس ویلے جدوں اوہناں نوں اک اک سیٹ دی لوڑ نہیں اوہناں نے 25لوکاں نوں پارٹی چوں کڈھ دتا اوہ پاکستان نوں کرپشن فری پاکستان بنانا چاہندے سن تے ایہ گل اوہ ہر فورم تے اپنی کابینہ، اتحادیاں تے اپوزیشن نوں کہندے سن کہ کرپشن کرن والے تے ملک لُٹن والیاں نوں میں نہیں چھڈاں گا اوہناں نے اپنے منشور وچ قوم نال وعدہ کیتا کہ میں اداریاں نوں مضبوط بناواں گا ایہ گل اوہناں دے اتحادیاں تے ہر واری ناگوار گزردی رہی ایس لئی اوہ گاہے بگاہے حکومت لئی مسئلے کھڑے کردے رہے۔سب توں پہلاں مسلم لیگ (ق) نے وزارتاں ودھان لئی سرکار تے دباء ودھایا سپیکر پنجاب اسمبلی پرویز الٰہی دیاں نظراں وزیراعلیٰ پنجاب دی کرسی تے سن جد کہ بلوچستان توں بی این پی دے اختر مینگل وی میدان وچ آ گئے اوہ وی اپنے آپ نوں جام کمال دی کرسی تے ویکھنا چاہندے سن ایس لئی ایس ساری صورتحال نے کرسی دے طلبگار مولانا فضل الرحمان لئی راہ پکی کیتی تے اوہ وی لشکر لے کے اسلام آباد چڑھ دوڑے اوہناں نے پشاور موڑتے ڈیرہ لایا تے مطالبہ کیتا کہ سانوں وی حصہ دیو ۔ اپوزیشن نے پہلاں ای تلواراں تیز کیتیاں سن ایس لئی سرکار نوں بلیک میل کیتا جان لگا مرد آہن عمران خان ڈٹے ہوئے سن اوہ کسے وی ڈیل لئی تیار نہیں سی ایس لئی ایس موقع تے اتحادیاں نے لوہا گرم ویکھ کے سٹ لان دا فیصلہ کیتا تے مولانا توں ظاہراً تے خفیہ ملاقاتاں کیتیاں تے وعدے وعید کرکے اوہناں نوں واپس گھل دتا ایس ساری صورتحال وچ نہ صرف اپوزیشن نوں ریلیف ملیا سگوں اتحادیاں نے وی بہندی گنگا وچ ہتھ دھوئے سگوں پورے نہائے کجھ دن پہلاں مسلم لیگ ق نے فیر وزارتاں ودھان دا مطالبہ کیتا پر تحریک انصاف ولوں صاف انکار کر دتا گیا ہن اجہے ویلے ایم کیو ایم دے حکومت توں علیحدگی دے اعلان نے ایہ واضح کر دتا کہ اتحادی اپنی چالاں چلن توں باز نہیں آن گے اوہناں ولوں ان ہاؤس تبدیلی دی وی آوازاں اٹھ رہیاں نیں تحریک انصاف نوں بدقسمتی نال اکثریت نہ مل سکی جہدی وجہ توں اوہدے اتحادیاں دی چونچلے بازیاں دن بدن ودھدی جا رہیاں نیں ایس ملک تے قوم نوں عمران خان ورگے مخلص لیڈر دی لوڑ اے گو کہ خالد مقبول صدیقی معاملات طے ہون دے بعد دوبارہ کابینہ دا حصہ بن جان گے پر تحریک انصاف تے عمران خان سنے مقتدر قوتاں نوں ایہ سوچنا ہووے گا کہ ایس بلیک میلنگ تے بار بار رُسن منان توں کیویں جان چھڈائی جاوے ایہدا سدباب بہت ضروری اے نہیں تاں تحریک انصاف تے عمران خان لئی مشکلات پیدا ہو سکدیاں نیں۔

اپنا تبصرہ گھلو