شاباش وزیراعظم صاحب!

لكهت:ابرار ندیم

مہنگائی‘ بیروزگاری‘ کرونا‘ چوری‘ ڈکیتی تے قومی اسمبلی دے اندر تے باہر معزز ارکان اسمبلی دی دھینگامشتی تے گالھاں ورگیاں دل ساڑن والیاں خبراں دی بھیڑ وچ لمے چر مگروں اک چنگی خبر ایہہ وے کہ وزیراعظم پاکستان نے اسلام آباد پولیس وچ ہیڈکانسٹیبل قیصر شکیل نوں دوران ڈیوٹی زخمی ہون دے باوجود اپنی ذمہ داری چنگے طریقے نال نبھان تے وزیراعظم ہائوس سد کے اوہدی حوصلہ افزائی کیتی تے فرض شناسی دی ودھیا مثال قائم کرن تے انعام دین دا اعلان وی کیتا۔ خبر وچ ایہ نہیں دسیا گیا کہ متعلقہ اہلکار دی وزیراعظم ہائوس وچ صرف حوصلہ افزائی ای کیتی گئی یاں اوہدی کوئی خاطر داری وی ہوئی۔ مینوں ریڈیو پاکستان دی کینٹین تے اک خان صاحب نال پیش آن والا واقعہ یاد آ رہیا اے جہدے وچ اوہناں نے بڑی بدمزہ چائے دا صرف اک گھٹ پی کے اوہنوں پرے کر دین دے بعد اوہدا بل دین لئی جیب چوں پیسے کڈھدے ہوئے چائے والے توں پچھیا یار! ایہ چائے جو تسیں مینوں دتی اے ایہدے وچ نہ ددھ اے نہ پتی اے نہ مٹھا تے تریہہ روپیے ایہدی قیمت اے ایہ دسو تہانوں کوئی بچت وی ہوندی اے یاں نہیں۔ جے حکومت دی آئینی مدت پوری ہون تک ایہ سلسلہ انج ای چلدا رہیا تے امید کیتی جا سکدی اے ایس بچت توں حاصل ہون والی ایس چوکھی رقم توں اوہ ادھی رقم بقول مراد سعید بڑی چھیتی اوہناں ملکاں دے منہ تے مارن گے جہناں دا اساں قرضہ دینا اے تے باقی ادھی رقم لوکاں دی فلاح و بہبود تے خرچ کرکے ملک دی کایا پلٹ دیاں گے۔
بہرحال متعلقہ پولیس اہلکار لئی چنتا دا کارن ضرور اے اوہ ایس طرح کہ اوہ وکھووکھ ٹی وی چینلاں تے اخباراں وچ ایس خبر دی تشہیر توں اوس اہلکار دی جنی مشہوری ہو چکی اے اوہدے نتیجے وچ اوہدے گھر آ کے اوہنوں مبارکباد دین والیاں نے ہن تک چائے پانی دے چکر وچ اوس نمانے دا چنگا بھلا کباڑا کر دتا ہووے گا۔ گھر آئے پروہنیاں دی ایس طرح خدمت دی گل ممکن اے وزیراعظم صاحب لئی عجیب ہووے ایس لئی کہ اوہناں دی زندگی دا زیادہ حصہ یورپ وچ گزریا اے جتھے گھر آئے پروہنیاں نوں روٹی شوٹی کھا کے جان والے رواج نوں غیرضروری سمجھیا جاندا اے پر جس معاشرے وچ اسیں رہنے آں اوہدے وچ تے فوتگی تے آئے پروہنیاں نوں وی کھائے پیائے بناں واپس گھلنا بے عزتی سمجھیا جاندا اے۔ ایتھے تے معاملہ ٹریفک کانسٹیبل نوں مبارک دین دا اے جہدے وچ گھر آئے پروہنیاں دا منہ مٹھا نہ کروان تے ہمیشہ لئی تعلق داری ختم وی ہو سکدی اے کیوں جے ایس کیس وچ انعام دا اعلان وی اے ایس لئی ممکن اے وزیراعظم صاحب ولوں بہت وڈے انعام دی آس وچ اوس اہلکار نے کسے توں چنگا بھلا ادھار لے کے مبارکباد دین والیاں دا منہ مٹھا کروان دے نال ہن تک اپنے بیوی بچیاں دے نال چنگے بھلے گل چھرے وی اڑا لئے ہون۔ ہن جے اللہ نہ کرے اوہنوں ایہ انعام نہ ملیا یاں انعام اوہدی توقعات توں گھٹ ہویا تے اجہی صورت وچ وزیراعظم صاحب دا ایہ تھاپڑا اوس مسکین نوں بڑا مہنگا وی پے سکدا اے ایس لئی کہ محکمہ پولیس وچ اک چھوٹے درجے دے ملازم لئی اپنی محدود تنخواہ وچ کسے خوشی تے غم دے موقعے تے لئی گئی ادھار رقم نوں واپس کرنا کناں اوکھا ہو سکدا اے ایہدا آسانی نال اندازا پولیس دے کسے وی سپاہی دی اپنی تے اوہدی وردی دی اڈدی ہوئی رنگت‘ گھسے ہوئے بوٹ تے سڑک کنڈھے کھلو کے راہیاں توں لفٹ لئی ترلیاں توں لایا جا سکدا اے۔ ڈاڈھی گرمی وچ سڑکاں تے اپنے فرض دی ادائیگی لئی گھنٹوں کھڑے رہن تے لوکاں نوں چوراں‘ ڈاکوئواں تے دہشت گرداں توں محفوظ رکھن لئی دن رات برسرپیکار عیدشب برات تے وی ڈیوٹی کرن والے پولیس ملازماں دے ذاتی حالات ایہہ نیں کہ اوہناں تے اوہناں دی فیملی نوں صحت‘ رہائش تے تعلیم ورگیاں مناسب سہولتاں ملدیاں نیں نہ اوہناں نوں اپنی جان دی بازی لا کے ملک و قوم دی خدمت دے اعتراف وچ ملازمت دوران یاں ریٹائرمنٹ دے بعد کوئی پلاٹ یا ںزرعی زمین الاٹ کیتی جاندی اے۔
وزیراعظم صاحب! تہاڈے اگے گزارش اے کہ تسیں جس طرح ہیڈکانسٹیبل قیصرشکیل نوں اپنی ذمہ داری چنگے طریقے نال نبھان تے اوہدی حوصلہ افزائی کیتی اے اوسے طرح پولیس دے دوجے ملازماں دیاں قربانیاں تے اوہناں دیاں اوکڑا ںدا احساس کردے ہوئے اوہناں لئی وی مناسب اصلاحات کرو تاں جے محکمہ پولیس دے سارے اہلکار اپنے بیوی بچیاں دی فکر توں پوری طرح آزاد ہو کے افواج پاکستان دے موڈھے نال موڈھا جوڑ کے قوم نوں چوراں‘ ڈاکوئواں تے دہشت گرداں توں نجات دوان لئی ہور جوش و جذبے نال اپنا فرض نبھا سکن۔٭٭