افواج پاکستان دے اندرونی تے بیرونی دشمن

لکھت:محمد اکرم چوہدری

اداریاں نوں اپنی اپنی حد وچ رہ کے کم کرنا چاہیدا اے۔ ادارے حدود توں تجاوز کرن تے نظام کیویں چلے گا۔ انصاف دا شعبہ اپنی حد پار کرے تے ایہنوں پچھن والا کون اے۔ اداریاں دی حدود دا تعین کون کرے گا۔اج ساڈے مسئلیاں دی وڈی وجہ ای حدود توں تجاوز تے فرائض ادا نہ کرنا اے۔ اسیں اپنا کم نہیں کردے تے دوجیاں دے کماں وچ ٹنگاں اڑانے آں۔ اہم فیصلیاں وچ نہ حالات ویکھنے آں نہ واقعات دا جائزہ لینے آں بس جدھر دل کردا اے اودھر رخ موڑ دینے آں۔ نتیجہ ایہ نکلیا کہ ملک نوں بے پناہ مسئلیاں دا ساہمنا اے۔ ادارے اپنی ذمہ داریاں ادا نہیں کر سکے ایہو وجہ اے کہ دشمن نوں کھل کے کھیڈن دا موقع ملیا اے۔ دشمن دا سب توں وڈا ہدف فوج اے۔ فوج دا دشمن کون اے۔گل سادہ اے پر ہے تکلیف دہ کہ افواج پاکستان دے دشمن صرف بیرونی نہیں اندرونی وی نیں۔ ہن تسیں سوچو گے کہ بیرونی دشمن تے نظر آندے نیں۔ ایہ اندرونی دشمن کیسے ہوندے نیں۔ فیر تسیں پچھو گے کہ بیرونی دشمن تے پاکستان دے وجود دے خلاف نیں ساڈے منہ وچ خاک اوہ ایہدے خاتمے دیاں کوششاں کردے نیں۔ اندرونی دشمن کیہ کردے نیں۔ ایہدا جواب ایہ اے کہ اندرونی دشمناں دی ڈیوٹی افواج پاکستان تے عوام دے وچکار فاصلے پیدا کرنا اے۔کیہ تہانوں لگدا اے کہ بیرونی و اندرونی دشمن کامیاب ہو رہے نیں۔کامیاب تے نہیں ہو رہے پر کوششاں زور و شور نال جاری نیں۔ بیرونی دشمناں نے دہشت گرداں دے راہیں ملک وچ خون دی ہولی کھیڈی۔ اک عرصے تک ملک دے وکھو وکھ حصیاں وچ دہشت گرداں دے گروہواں نے دہشت پھیلائے رکھی۔ عوام دا جینا دوبھر کر دتا۔ چنگے بھلے خوبصورت علاقے خوف تے دہشت دی علامت بنے۔ عام بندے لئی ایہ علاقے غیر کہلان لگے۔ بارود دی بو نے ملک دے اک وڈے حصے نوں اپنی لپیٹ وچ لے لیا۔ اک دہائی توں ودھ عرصہ ہو چکیا اے فوج دے جوان ایہناں علاقیاں توں دہشت گرداں نوں کڈھن، ایہناں دا قلع قمع کرن وچ مصروف نیں۔ وزیرستان ہووے یاں سوات ہر تھاں ایہناں دا لک توڑیا گیا۔ ایہ کوشش اج وی جاری اے۔ ملک وچ تھاں تھاں پھیلے ایہناں بیرونی دشمناں دے آلہ کاراں نوں جہنم واصل کیتا گیا اے تے اج ملک وچ امن و سکون اے۔ خوف دے پرچھاویں چھٹ رہے نیں۔ امن واپس آ رہیا اے۔ اسیں سکون دا ساہ لے رہے آں۔ہن اندرونی دشمناں دی کاروائیاں سن لو۔ ایہناں دا سب توں وڈا ہدف افواج پاکستان تے عوام وچ فاصلیاں نوں ودھانا اے۔ عوام تے افواج پاکستان وچ بداعتمادی پیدا کرنا اے۔ افواج پاکستان تے عوام وچ دوریاں پیدا کرنا اے۔ عوام تے فوج نوں آمنے ساہمنے کھڑا کرنا اے۔ ایہناں اندرونی دشمناں دا مقصد عوام تے افواج پاکستان دی ڈونگھی محبت تے جذباتی وابستگی دے رشتے نوں کمزور بنانا اے۔ اندرونی دشمن ایس کم وچ جتے ہوئے نیں ایہناں نوں کامیابی تے نہیں مل سکدی اوہ جنی شدت نال فوج تے حملہ آور ہوندے نیں عوام ایہناں توں ودھ شدت نال جواب دیندے نیں۔ ہر لنگھدے دن دے نال فوج تے عوام وچ تعلق پکا ہونا جا رہیا اے۔ اعتماد دے رشتے وچ مضبوطی آ رہی اے۔ عوام تے فوج وچ محبت ودھدی جا رہی اے۔ویکھ لو پچھلے کجھ ورھیاں وچ فوج دی ساکھ نوں خراب کرن، ادارے نوں متنازعہ بنان دے اقدامات کہڑے کہڑے پاسیوں ہوئے نیں، کہڑے کہڑے لوکاں ولوں ہوئے نیں، کہڑیاں کہڑیاں جماعتاں تے اداریاں ولوں ہوئے نیں تے سمجھن وچ دیر نہیں لگدی۔ ایہ سب ملک دشمناں دے ساتھی نیں۔ ذاتی فائدے لئی کروڑاں مسلماناں دے آزاد وطن تے حملہ آور ہو رہے نیں تے ایس وطن دی حقیقی تے اکلوتی محافظ بہادر فوج دے خلاف جھوٹھ پھیلا رہے نیں۔اندرونی دشمناں دی ایہ ڈیوٹی اے کہ ملک وچ انتشار پیدا کیتا جاوے، کدھرے مذہبی بنیاد تے، کدھرے صوبائیت تے، کدھرے زبان دی بنیاد تے ،تے کدھرے اداریاں دے ٹکرا دی صورت وچ۔ بیرونی اشاریاں تے ملک وچ عدم استحکام پیدا کرن دیاں کوششاں کردے رہنا ایہناں دی ذمہ داریاں وچ شامل اے۔ ایہ سارے کم اندرونی دشمن دلجمعی نال کر رہے نیں تے ایہناں نوں ایہدا بھرواں جواب وی مل رہیا اے۔ افواج پاکستان سب دشمناں دی نشاندہی کر چکی اے۔ سب دی واری آوے گی۔ سب نوںنشان عبرت بنایا جاوے گا۔ بیرونی دشمناں نوں منہ توڑ جواب دتا جا رہیا اے۔ اندرونی دشمناں نوں وی معاف نہیں کیتا جاوے گا۔اسیں ایہناں صفحیاں تے ایس توں پہلاں وی کئی واری لکھ چکے آں تے جدوں تک ایہ کم کر رہے آں لکھدے رہواں گے کہ افواج پاکستان ملکی سلامتی، وقار تے بقاء دی ضامن نیں۔ پاکستان دے دشمناں نوں ایہ پاک دھرتی اک اکھ نہیں بھاندی تے پاک فوج دے ہر جوان دا عزم اے کہ خون دے آخری قطرے تک ملک دی حفاظت کرنی اے۔ آخری ساہ تک، آخری فوجی تک ایہ فرض نبھاندے رہن گے۔ فوج دی طاقت عوام دا اعتماد تے محبت اے۔ دشمن جان لین کہ ایہناں دے منفی ہتھکنڈیاں نال نہ محبت گھٹ ہو سکدی اے نہ اعتماد گھٹ ہو سکدا اے۔ پاکستان قائم و دائم رہوے گا۔ اسلام دا مضبوط قلعہ بنے گا تے اسلامی دنیا دی رہنمائی کرے گا۔ ایہ مشکل ویلا ضرور اے پر ایہدے بعد آسانی وی اے ۔ انشا اللہ