آٹا مافیا میدان وچ اوہ وی دھڑلے نال

لکھت: خالد مسعود خان

ساڈے ایتھوں دی پرانی روایت اے کہ جدوں کسے چیز دی تردید بڑے شدومد تے زوراں نال کیتی جاوے تے سمجھو کہ دال وچ کجھ کالا اے۔ اج کل ایہو صورتحال اے۔ حکومتی حلقے بڑے زور و شور نال کسے تبدیلی دا ورد کر رہے نیں۔ عجیب صورتحال اے کہ تبدیلی دے دعویدار ہن آپ کسے تبدیلی دے امکان دے منکر نیں۔ ملک عزیز وچ جدوں کسے حکومت دی مضبوطی دا دعویٰ کیتا گیا اودوں حکومت کمزور ثابت ہوئی۔ جدوں کسے حکومت دی تبدیلی دے امکان نوں رد کیتا گیا اودوں حکومت تبدیل ہوئی تے ہن وی عین ایہو صورتحال اے جیویں جیویں حکومتی کندھ دیاں اِٹاں ہلدی جا رہیاں انج انج طبلچیاں ولوں کندھ دی مضبوطی دا طبلہ وجایا جا رہیا اے۔ تبدیلی دے دو امکانی منظرنامے نیں۔ اسمبلی دی رخصتی تے اسمبلی دی موجودگی وچ صرف وزیراعظم دی رخٹی۔ جے موجودہ سیٹ اپ نوں تبدیل کرنا ای ضروری اے تے فیر میرے خیال وچ پہلا آپشن زیادہ قرین قیاس اے کہ عمران خان وزارت عظمیٰ دا منصب چھڈن دے بجائے اسمبلی نوں گھر گھل دین گے مڈٹرم الیکشن کروا کے دوبارہ قسمت آزمائی کرن گے جے (بھاویں ایہدا امکان ایس صورت وچ گھٹ ای نہیں سگوں معدوم نظرآندا اے) اوہ دوبارہ برسر اقتدار آ گئے تے فیر اصل دمادم مست قلندر ہووے گا۔ایمانداری دی گل اے کہ عمران خان صاحب نوں لوکاں نے اک جنگجو تے سمجھوتہ نہ کرن والا بندہ سمجھ کے ووٹاں راہیں لیاندا سی پر اقتدار دے سنگھاسن تے بیٹھدیاں ای عمران خان اوہ والے عمران خان نہ رہے جو ٹی وی تے بیٹھ کے شیخ رشید نوں اپنا چپڑاسی وی نہ رکھن دا دعویٰ کردے سن جو چوہدریاں نوں کرپشن دا وڈاگھر قرار دیندے سن کسے قسم دی ایکسٹینشن دے خلاف دھواں دھار تقریر کردے سن این آر او دین والیاں نوں صبح شام مطعون کردے سن تے کرپشن نوں جڑ توں ختم کرن دے دعویدار سن۔ ہن صورتحال ایہ اے شیخ رشید صاحب عمران خان دے وزیر نیں چوہدری پرویز الٰہی اتحادی نیں ، سپیکر پنجاب اسمبلی نیں تے اوہناں دی پارٹی وزارتاں وچ حصہ دار اے۔ ایکسٹینشن بارے کیہ کہواں؟ سب نوں میرے توں کدھرے ودھ علم اے۔ این آر او دا کوئی منے یاں نہ منے پر ہو چکیا اے تے کرپشن پہلے دی طرح جاری و ساری اے پر ایہدی شرح فیصد وچ وادھا ہو گیا اے کہ افسران ہن عمران خان دی حکومت دا ناں لے کے لوکاں نوں ڈراندے نیں تے زیادہ ریٹ دے نال پچھلے کم وچ مصروف نیں۔ہن اجہی صورت وچ تحریک انصاف نوں ووٹ ملن دے کیہ امکانات نیں جدوں عمران خان دا طلسم ٹُٹ چکیا اے۔ سارے دے سارے وعدے ریت دی کندھ دی طرح ڈھے چکے نیں۔ نوکریاں دا سیلاب کیہ آنا سی؟ بیروزگاری وچ وادھا ہو چکیا اے۔ 50لکھ مکاناں نے کیہ بننا سی؟ حالیہ بارشاں تے برف باری نے غریباں دے سر توں چھت کھوہ لین وچ اپنا حصہ پا دتا اے۔ پٹرول دی قیمت قریب 25فیصد ودھ چکی اے۔ بجلی تے گیس دے ریٹاں وچ تھوڑے جہے وادھے نال لوکاں نوں بل نہ دین دی تلقین کرن والے اپوزیشن رہنما عمران خان دی وزارت عظمیٰ دے دور وچ بجلی تے گیس دیاں قیمتاں وچ ہوشربا وادھا ہو چکیا اے۔ ساری دی ساری مارکیٹ بیٹھی ہوئی اے سوائے لطیفیاں دی مارکیٹ دے۔ روز اک نواں لطیفہ مارکیٹ وچ آ جاندا اے۔ اک ستم ظریف آکھیا: خان صاحب! تسیں اٹھ روپے یونٹ تے بجلی دا بل پھاڑن دا حکم دتا سی ہن 18روپے دا اک یونٹ اے اجازت دیو تے کھمبے پٹ دیئے؟صورتحال ایہ اے کہ تحریک انصاف نوں پہلاں جنے نہ تے ووٹ ملنے نیں تے نہ ای سجے کھبے والی حمایت۔ سجے کھبے والی حمایت توں میری مراد بالکل اوہی اے جو تسیں سمجھدے او۔ تے اجہے منظرنامے وچ جتھے عمران خان پہلاں ای ایدھر اودھر توں گھیر گھار کر دتے گئے ووٹاں نال اسمبلی وچ معمولی اکثریت لے کے بیٹھے ہوئے سن تے ہن اوہ گھیرے گئے ووٹ سارا گھیرا توڑ کے واپسی دی کال دین تے آئے ہوئے نیں۔ بھلا صورتحال کدوں تک کنٹرول وچ رہ سکدی اے تے آئندہ دے منظرنامے وچ ایہناں وچوں کہڑی پارٹی ایہناں نال دوبارہ ہتھ ملان تے تیار ہووے گی؟ انج تاں پہلاں وی ایہناں نال ہتھ جوڑی کروان دا سہرا کسے ہور دے سر جاندا اے پر اپنی ساری اتحادی جماعتاں نال کیتے گئے وعدے وعید وی ایسے شمار قطار وچ نیں جہدے وچ پاکستان دے عوام شامل نیں یعنی وعدہ فردا ۔ تے نتیجہ صفر بٹا صفر۔ جواب صفر۔ اصل مصیبت مستقبل دا منظر نامہ اے۔ پہلی دو پارٹیاں دی لٹ مار تے اسحاق ڈار اینڈ کمپنی دی جعلی فنانشل مینجمنٹ سب تے واضح اے۔ ایتھے سب توں مراد اوہ لوک نیں جہڑے عقل استعمال کردے نیں تے کسے پارٹی دے انھے مقلد نہیں۔ نہیں تاں انھے مقلدین نے تے اپنی اکھاں، کن تے زبان سب اپنی اپنی پارٹی دی موروثی لیڈر شپ دے کول گروی رکھ چھڈے نیں تے اپنی عقل دے استعمال نوں وسائل دا ضیاع تصور کردیاں ہوئیاں سنبھال کے رکھ چھڈیا اے تاں جے کدھرے خرچ نہ ہو جاوے۔ہن اجہے لوکاں دے ساہمنے کیہ راستہ باقی بچیا اے؟ میں دو تن اجہے ای لوکاں توں پچھیا تے اوہناں دا جواب وی وکھو وکھ سی۔ کسے نے آکھیا بہرحال ن لیگ تے پی پی پی دے مقابلے تے ہن وی عمران خان نوں ترجیح دیوے گا۔ کسے دا جواب سی کہ اوہ ووٹ پان دے بجائے ایس واری گھر بیٹھے گا تے کسے دا جواب سی کہ اجے تیل ویکھو تیل دی دھار ویکھو قدرت دے کارخانے دی صناعی جاری اے تے کوئی چنگی صورتحال ساہمنے آ سکدی اے پر جہڑی گل سب وچ اکو جہی سی ایہ اے کہ کسے صائب الرائے بندے نے مسلم لیگ ن یاں پیپلزپارٹی ولوں واپسی دا اشارہ بہرحال نہیں دتا۔ ایہ اک صحت مند علامت اے کہ بہت سارے لوک موجودہ حالات توں تنگ و پریشان ہون دے باوجود سابقہ لٹیریاں تے چوراں نوں اپنی دوجی ترجیح بنان تے تیار نہیں۔اجہی صورتحال وچ دو پارٹیاں اندر ای اندر خوش نیں تے اوہناں دے دل وچ خوشی دے لڈو پھٹ رہے نیں۔ ایہ چوہدری صاحبان تے شاہ محمود قریشی نیں۔ چوہدری صاحبان تے خیر نال اپنی خاندانی مروت دی وجہ توں منتخب نمائندیاں وچ وی اپنا اثر و رسوخ رکھدے نیں تے ویلا پین تے مخالف پارٹیاں توں وی ووٹ کھسکا لین وچ مہارت رکھدے نیں تے اُتوں دی امداد تے صرف نامزدگی دی حد تک بھروسہ کرن دے قائل نیں جد کہ میرے پیارے شاہ محمود قریشی سارے دا سارا بھار اُتے والیاں تے پان دے قائل نیں کہ اوہ اپنی محنت دا محنتانہ وی صرف اوہناںتوں لین دے قائل نیں جہناںتے اوہناں نے محنت کیتی اے۔ دوستاں دی اک محفل وچ کل پرسواں ایسے موضوع تے گل ہوئی تے اک دوست نے ازراہ مذاق آکھیاشاہ محمود قریشی صاحب نے اپنی شیروانی اک واری فیر دھوا کے استر کروا لئی اے۔ دوجا کہن لگا: نہیں! اوہناں نے شیروانی دی دھلائی تے استری وغیرہ نہیں کروائی سگوں وارڈروب توں کڈھ کے چنگی طرح جھاڑی اے، پا کے فٹنگ چیک کیتی اے تے فیر دوبارہ تھوڑی اگے کرکے دوبارہ لٹکا دتی اے کہ کیہ پتہ کسے ویلے لوڑ پے جاوے۔ اک شرپسند دوست نے میرے توں پچھیا کہ جے بالکل آزادانہ تے غیر جانبدارانہ الیکشن ہون تے شاہ محمود قریشی صاحب نوں پی ٹی آئی دی پارلیمانی پارٹی وچ کنے ووٹ ملن گے؟ میں آکھیا: اوہناں نوں گھٹ توں گھٹ دو ووٹ تے بہرحال ضرور ملن گے اک اوہناں دے پتر زین قریشی دا تے دوجا اوہناں دے بھانجے ظہور حسین قریشی دا۔ اوہ دوست ہسیا تے کہن لگا: میرے ایس آزادانہ توں مراد بالکل آزاد الیکشن سی۔ رشتے داریاں دی مجبوریاں توں وی آزاد۔ خاندانی رشتیاں دی زنجیراں توں وی بالاتر تے مکمل آزاد۔ انگریزی وچ جہنوں Ultimate fare and free کہندے نیں۔ جے اجہے الیکشن ہون تے فیر شاید (شاید تے بہت زیادہ زور دیندیاں ہوئیاں) اوہ اک ووٹ حاصل کر لین۔ ہن میں ایہ نہیں دساں گا کہ اوہ اکلوتا ووٹ کہدا ہووے گا پر ایتھے فیئر اینڈ فری الیکشن دا صرف خواب ویکھیا جا سکدا اے۔ معاملات صندوقچیاں دے مرحلے توں پہلے ’’سدھے پدرے ہو جاندے نیں۔ الیکشن ڈے تے کاریگری اک باقاعدہ فن اے تے جہڑا ایس فن وچ گھامڑ اے اوہنوں چاہیدا اے کہ اوہ الیکشن لڑن دے بجائے ایس پیسے نال فٹافٹ فلور مل لا لوے۔ اک ورھے دے اندر اندر ساری انویسٹمنٹ واپس مل جاوے گی۔ پاکستان وچ فی الوقت فلور مل نال جلدی پے بیک والا تے کوئی کاروبار نہیں اے۔ آٹا مافیا نے اجہی انھی مچائی اے کہ لوک شوگر مافیا نوں بُھل گئے نیں

اپنا تبصرہ گھلو