پِلاک دے پربندھ ہیٹھ معروف شاعر فیض احمد فیض دی 37 ویں برسی دی تقریب

رپورٹ: حافظ ممتاز ملک

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام معروف شاعر فیض احمد فیض دی 37 ویں برسی دے حوالے نال پنجاب آڈیٹوریم پنجابی کمپلیکس وچ اک تقریب دا انعقاد کیتا گیا جس وچ ڈاکٹر عارفہ سیدہ نے خصوصی شرکت کیتی۔

اوہناں نے اپنے خطاب وچ کہیا کہ فیض احمد فیض دی شاعری نے لوکاں وچ احساس تے شعور پیدا کیتا۔ ایس موقعے اُتے ڈی جی پلاک ڈاکٹر صغرا صدف دا کہنا سی کہ فیض احمد فیض اک عظیم شاعر سن، اوہناں نے اردو زبان دے نال نال پنجابی زبان وچ وی بوہت عمدہ شاعری کیتی۔

تقریب وچ استاد حامد علی خان نے فیض احمد فیض دا کلام پیش کر کے حاضرین توں بھرپور داد وصول کیتی۔ استاد حامد علی خان نے پنجابی کلام وی پیش کیتا جنہوں تقریب دے شرکاء نے بوہت پسند کیتا۔ تقریب وچ سلیمہ ہاشمی، منیزہ ہاشمی، ڈائریکٹر پلاک محمد عاصم چودھری تے خاقان حیدر غازی سنے دیگر شخصیات نے وی شرکت کیتی۔