نویں کاروباراں لئی قرضے

jameel Ahmad paul

جمیل احمد پال

وفاقی کابینا تے پنجاب سرکار نے پہلی واری نکے تے وچکارلے درجے دے کاروباری اداریاں لئی پالیسی منظور کیتی اے۔ ایس ایم ای پالیسی 2021پاروں اجہے کاروبار کرن والیاں نوں اک کروڑ رپئے تیکر دا بلا ضمانت قرضادتا جاوے گا جد کہ پیداواری کاروباراں نوں ٹیکساں وچ وی 83 فیصد تیکر چھٹ دتی جاوے گی۔ایہدے واسطے این او سی دی پابندی وی ختم جد کہ سوانیاں نوں ٹیکس وچ 25فیصد رعایت دتی جاوے گی۔ایہ گل فواد چودھری تے خسرو بختیار نے اک سانجھی پریس کانفرنس وچ دسیاں۔ لمے چراں توں نکے تے وچکارلے کاروباراں دا کھیتر نظر انداز کیتا جا رہیا سی۔ وڈے کاروبارچی تاں ہر لحاظ نال فایدے وچ رہندے نیں سمجھو کہ حکومت ای اوہناں دی ہوندی اے پر نکے کاروبارچیاں واسطے حالات دن بدن ماڑے ہوندے جاندے سن۔ اک پاسے درجن توں ودھ سرکاری ادارے مختلف قسم دیاں منظورِیاں تے چیک رکھن دے بہانے کاروباراں نوں خراب کرن دا عمل کر رہے سن۔ منن والی گل اے کہ ساڈے سرکاری اداریاں وچ کم اگے ٹورن دی بجائے کم روکن اوہدی رفتار گھٹ کرن اڑچناں پاون ورگے کارے زیادا ہوندے نیں۔ بہت سارے کرپٹ ملازم اپنی دیہاڑی بناون دے چکر وچ کاروباراں دا گلا گھوٹن دا کارا کردے نیں جہدے پاروں نکے کاروباری ہر سمے ڈردے ای رہندے نیں۔ عام کر کے پاکستان اندر نکی رقم ڈب جان تے کاروبار وچ رِسک دے امکان دوجے دیساں نالوں ودھ ہوندے نیں۔ ترقی یافتا دیساں دی ترقی دا وڈا راز ایہو اے کہ اوتھے حکومتاں کاروبار دوست ہوندیاں نیں۔ کاروباراں لئی وافر قرضے تے سہولتاں ملدیاں نیں تے کاروبار کرن والیاں نوں ڈر خوف وی نہیں ہوندا۔ قانونی پابندیاں پوریاں کر کے اوہ جو چاہن کردے نیں۔ حکومت نوں وی ٹیکس دی مد وچ چنگی چوکھی رقم ملدی اے۔ ساڈے ایتھے معاملا الٹ اے۔ قرضے دین دا کم نواز شریف دور وچ وی کافی ہویا پر ایہدے وچ اک تاں سیاسی جڑت دے پکھ نوں دھیان وچ رکھیا گیا دِوجا قرضے لین والیاں نے وی قرضے معاف کروان دی نیت نال ای لئے۔ پیلی ٹیکسی ورگیاں سکیماں نے وی بینکاں نوں کنگال کر کے رکھ دتا۔ اجوکی حکومت دی سکیم جویں کہ دسیا جا رہیا اے جے دسے گئے مطابق ای اے تاں یقینن بہت چنگی سکیم اے۔ البتا ایس گل دا خیال رکھنا ضروری اے کہ سرکاری ادارے کسے نہ کسے بہانے مداخلت دا جواز پیدا کر کے اپنے کھان پین دے موقعے نہ پیدا کرن لگ پین۔ ایہ وی ضروری اے کہ کاروباری ماحول پیدا کیتا جاوے تاں جے دِتے گئے قرضے دا مثبت استعمال دیس اندر صنعت تے کاروبار دے حقیقی فروغ دا کارن وی بنے۔٭

اپنا تبصرہ گھلو