مثالی میزبان تے خداترس شخصیت

حمید اللہ بھٹی

عام طور تے آکھیا جاندا اے کہ بظاہر ویکھ کے کسی دے بارے ایہہ اندازہ لانا اوکھا اے کہ اوہ کیسا شخص اے بلکہ نال چلن یا فیر کم پین نال ای پتہ چلدا اے کہ کس قماش دا اے مگر چودھری زاہد رضا بھدر اُتے ایہہ کلیہ صادق نہیں آندا۔ اوہناں نوں ملدے ای صاف پتہ چلدا اے کہ ایہہ دوستی وچ خود تے نقصان چک سدے نیں لیکن کسی نوں دھوکہ نہیں دے سکدے نیں ‘ جیویں چہرے اتے ای لکھیا ہووے کہ ایہہ مثالی میزبان تے خدا ترس شخصیت نیں۔ ایہناں وچ کسے نوں دھوکہ دین دی صلاحیت ہے ای نہیں۔ ایہہ درست اے کہ بحیثیت انسان اوہ وی بشری خامیاں توں پاک نہیں مگر اوہناں وچ جہڑی اک ادھ خامی اے اوہ اوہناں دی اپنی ذات تک محدود اے۔ مخلوق خدا دا ایہدے وچ کوئی نقصان نہیں۔ میرا پہلا تعارف ہویا تے میں چودھری سجاد وڑائچ نوں بے ساختہ آکھیا کہ ایہہ اک صاف گو انسان نیں۔ بشری خامیاں دے باوجود اوہناں دے چہرے اتے لکھیا اے کہ ایہہ نقصان چک کے وی دوستی برقرار رکھن دے قائل نیں ایس لئی ایہناں نال تعلق بناندے ہوئے یقین رکھو کہ ایہہ کدی کسے موڑ تے تہانوں دھوکہ نہیںدین گے۔
چودھری زاہد رضا بھدر اک ملنسار تے مہمان نواز شخص نیں۔ ایہناں دا شمار بلجیم دے وڈے صاحب ثروت لوکاں وچ ہوند ااے۔ لمی محنت و ریاضت دا اوہناں نوں ایہہ انعام ملیا اے کہ اج اپنا اک وسیع کاروبار اے۔ اوہ اک قنون پسند تے پرامن شہری نیں۔ بے جا مداخلت دے بجائے صرف اپنے کم نال کم رکھدے نیں لیکن اینے مہمان نواز نیں کہ پاکستان توں کوئی پروہنا آوے تے چودھری زاہد رضا بھدر مہمان نوازی نہ کرن انج ممکن ای نہیں۔ سر سنگیت نال خاص انس رکھدے’ فنکار دی قدر کردے تے حوصلہ افزائی کردے نیں۔ پاکستانی کمیونٹی دے بے لوث خدمت گزار نیں۔ ایہناں خوبیاں دے تذکرے دا مقصد ایہہ ہے کہ مہمان نوازی ‘ خدا ترسی تے ملنساری نے اوہناں نوں بلجیم دی ہر دلعزیز شخصیت بنا دتا اے جہدا ثبوت ایہہ اے کہ بلجیم تحریک انصاف دے عہدیداراں دے چنائو دا موقع آیا تے چودھری زاہد رضا بھدر نے وی صدر دے انتخاب وچ حصہ لین دا عندیہ دتا۔ ایہہ سن کے کوئی وی اوہناں دے مقابلے تے نہ آیا۔ اپنی مہمان نوازی تے ملنساری دی وجہ نال چودھری زاہد رضا بھدر بلامقابلہ صدر بن گئے۔ اوہناں نے صدر بن کے کسے اتے حکم نہیں چلایا بلکہ سارے فیصلے مشاورت نال کرن دی بنا تے صرف دوست احباب ای نہیں کارکناں وچ وی عزت و احترام حاصل کیتا۔ عہدے توں مفاد حاصل کرن توں ودھ دیار غیر وچ جماعت نوں منظم تے فعال کرن لئی محنت تے لگن نال کم کیتا۔ جدوں وی کوئی جماعت دا اہم رہنما ربرسلز دورے تے آیا تے چودھری زاہد بھدر مہمان نوازی لئی پیش پیش رہے مگر کدی ستائش و تحسین دی تمنا نہیں کیتی جہڑی اوہناں دی اپنی جماعت نال نیک نیتی اے۔ عاجزی تے انکساری دے پیکراینے کہ بھولے نال وی کسی کارکن اتے رعب جھاڑن دی کدی کوشش تک نہیں کیتی’ اک عزت دار وانگوں ساریاں نال عزت نال پیش آندے نیں۔
ایہہ جہڑا ساڈے ایتھے تصور پایا جاندا اے کہ بیرون ملک رہن والے بغیر کچھ کیتے دن رات دولت اکٹھی کر لیندے نیں۔ ایہدے وچ رتی بھر صداقت نہیں۔ تسیں کسے کامیاب شخص نال زندگی دے ورقے پلٹن دی فرمائش کرو زندگی رعنائیاں دی بجائے ساری سختیاں تے تلخیاں نال بھری محسوس ہووے گی۔ ہر صاحب ثروت تے صاحب حیثیت نوں اللہ نے محنت’ ریاضت تے دیانت دا انعام دتا اے۔ محنت کرن والا اللہ دا دوست اے تے فیر کوئی محنت تے کوشش کرے تے رحیم’ کریم تے رازق ہستی ولوں برکت شامل حال ہو جاندی اے۔ جہدے توں ترقی دی منزلاں آسان ہوندی چلی جاندیاں نیں۔ چودھری زاہد رضا بھدر نے وی یورپ آ کے شروع دے دن بہت سخت گزارے۔ اوہناں نے پاکستان توں ایس لئی رخت سفر بنھیا کہ والد چودھری ریاست علی ڈویژنل انجینئر ٹیلیفون نیں۔ میں جے کسے کمتر عہدے اتے کم کراں گا تے لوگ مذاق اُڈان گے کہ اینے وڈے افسر دا پتر ویکھو کیہ کم کر رہیا اے۔ والد تے ہے ای دیانتدار تے کم نال کم رکھن والے۔ اوہناں نے وی صاف دس دتا زندگی بھر میں دیانتداری نال کم کیتا اے۔ ہن آخری دناں وچ عہدے توں تینوں کوئی ناجائز فیدہ نہیں دے سکدا۔ میرے کولوں کسے وی غلط کم دی امید نہ رکھنا بلکہ جے حیثیت تے مقام بنان دی تمنا اے تے اپنی محنت دے بل اتے ای مقام بنانا ہووے گا۔ والد دی گل سن کے اوہناں نے بس اینی فرمائش کیتی کہ مینوں یورپ بھیج دیو۔ ہن میں محنت تے قابلیت نال ای مقام تے مرتبہ حاصل کرن دی کوشش کراں گا۔ والد نے سفر تے ویزے دی راہواں ہموار کر دتیاں تے اوہ جرمنی پہنچ گئے۔
میں شروع وچ ای ذکر کیتا اے کہ کامیابی محنت تے ریاضت دے بغیر نہیں ملدی۔ ہر کامیاب بندے دی کامیابی دا ایہو راز اے۔ شروع وچ سب نوں مختلف نوعیت دی تکلیفاں توں گزرنا پیندا اے۔ جہڑا مایوس ہون دے بجائے ثابت قدم رہندا اے اوہ اپنی منزل حاصل کر لیندا اے۔ چودھری زاہد رضا بھدر نوں وی شروع وچ تکلیفاں دا سامنا کرنا پیا۔ سب توں پہلاں دھچکا ایہہ لگیا کہ جتھے اوہ ٹھہرے سن اک دن میزبان نے عزیزداری دی پرواہ کیتے بغیر صاف صاف لفظاں وچ آکھ دتا کہ روز روز نہان دی عیاشی چھڈو ہفتے وچ اک دو دن وی نہانا کافی اے۔ نازو نعم وچ پرورش پان والے نوجوان نوں ایہہ سن کے شاک لگیا تے پہلی واری احساس ہویا کہ عملی زندگی آسان نہیں سخت تکلیف دہ اے تے ایہہ کہ تیرہویں جماعت وچ پڑھائی چھڈ کے یورپ آن دا غلط فیصلہ کیتا اے مگر ہن کیہ ہو سکدا سی اوہناں نے غلط فیصلے اتے پچھتان تے مایوس ہو کے واپس جان دی بجائے اپنے رحیم و کریم مالک کولوں صبر طلب کیتا جہدے مگروں سکون جیا آ گیا تے اوہناں نے مشکلاں دس کے گھر والیاں نوں پریشان کرن دے بجائے دل لا کے محنت کیتی۔ دن رات اک مشین وانگوں کم کیتا۔ خود تنگ دستی وچ گزارہ کر لیا لیکن مدد لئی کسے دا پھیلیا دامن خالی نہیں لوٹایا۔ کجھ دوست احباب نے اوہناں دی رحمدلی تے مدد دی خوبی توں ناجائز فیدہ وی چکیا مگر اوہناں نے رویہ تبدیل نہیں کیتا۔ کجھ عرصہ فرانس رہے فیر بلجیم آ گئے۔ ایتھے اللہ نے اینا کرم کیتا کہ اج دولت’ عزت تے شہرت سنے کسے چیز دی کمی نہیں رہی۔ جدوں اللہ مہربان ہووے تے وگڑے کم وی درست ہو جاندے نیں۔ برسلز وچ اوہناں نے کسی کولوں ادھار لینا سی اوہنے ادائیگی دے بجائے اک ناکام کاروبار اوہناں دے حوالے کر دتا لیکن اللہ نے نیک نیتی دا ایہہ صلہ دتا کہ اک نکام کاروبار توں وی توقع توں ودھ کے مالی فیدہ ملیا۔ بے شک مخلوق خدا نال پیار کرن والے نوں اوہ مالک ارض و سما کدی رنجیدہ نہیںکردا مثالی میزبان تے خدا ترس شخصیت چودھری زاہد رضا بھدر برسلز دے اک ایسے بے لوث خدمتگار نیںجہڑے پاکستانی کمیونٹی لئی کسے نعمت توں گھٹ نہیں۔