لکھاری کیویں بنیا جا سکدا اے؟

Qasim Ali Shah'

قاسم علی شاہ

منی پرمنی شاعرہ مائیکل اینجلیو آکھدیاں نیں کہ تہاڈے اندر اک کہانی اے جہڑی جے تسیں نہ سنائو تے اوہ تہانوں تکلیف دیندی اے۔ لکھنا تہانوں ایس تکلیف توں نجات دے سکدا اے۔
ایہہ ایسی تخلیقی صلاحیت اے جہڑی زندگی دے ہر میدان وچ فیدہ پہنچاندی اے ۔ لکھنا انسان دے کتھارسس دا اک بہترین ذریعہ اے۔ دل دا غبار کاغذ اتے اتارن مگروں انسان پرسکون ہو جاندا اے۔ اک تحقیق دے مطابق ہر اوہ انسان جہڑا اپنے خیالاں تے روزمرہ حالات نوں لکھدا رہندا اے اوہ اپنے اہداف چھیتی حاصل کر لیندا اے۔
میں یونیورسٹی دا طالبعلم سی۔ جدوں مینوں کجھ ایسے استاد ملے جنہاں نے اردو دے نال میرے ذوق نوں بیدار کیتا۔ مینوں اردو ادب دے نال اک خاص لگائو پیدا ہو گیا تے دل ای دل وچ ایہہ گل کدھرے بیٹھ گئی کہ میں اردو اتے محنت کرنی اے تے تحریر دے فن نوں سکھنا اے۔ اوہناں دناں اک واقعہ ہویا جہنے میرے تے میری کمزوریاں آشکار کرن دے نال نال مینوں اک بہترین لائحہ عمل وی دتا۔ کلاس وچ سانوں اسائنمنٹ ملی کہ فلاں موضوع اتے اک مضمون لکھنا اے۔ اگلے دن میں اک مضمون تیار کر کے آ گیا۔ استاد صاحب نے چیک کیتا تے Very Goodلکھ کے مینوں 20وچوں 17نمبر دے دتے۔ میں بہت خوش ہویا۔ اوہناں نے میرے کولوں پچھیا: پتر! توں اینا بہترین مضمون کیویں لکھیا اے؟ میں بولیا’ سر تن چار خلاصے سامنے رکھ کے میں مختلف شیواں اوتھوں چکیاں تے ایہہ مضمون بن گیا۔ اوہناں نے آکھیا: پتر! جے ایہو مضمون تسیں دوبارہ لکھ لوو تے رٹا لگا کے نہیں بلکہ اپنے ذہن نال لکھ لوو تے مینوں بڑی خوشی ہووے گی۔ میں کجھ پریشان ہو گیا کیوں جے ایہ چیز میرے لئی بالکل نویں سی۔
اوہناں نے وضاحت کیتی کہ جدوں اپنے ذہن توں کجھ لکھنا ہووے تے فیر اوہدے لئی سوچنا پیندا اے تے اپنی تخلیقی صلاحیت نوں بیدار کرنا پیندا اے۔ لکھنا تے سی ای چنانچہ گھر آ کے میں ایہدے بارے سوچن لگیا تے دو تن صفحے لکھ کے اگلے دن اوہناں نوں وکھائے۔ اوہناں نے غور نال پڑھن مگروں مینوں 20وچوں 3نمبر دے دتے۔ فیر اوہناں نے میرا مضمون سامنے رکھیا تے میری کمزوریاں توں مینوں آگاہ کرن لگے۔ ایہدے نال تحریر دی باریکیاں وی مینوں دسن لگے۔ فیر اوہناں نے آکھیا تہاڈا ایہہ مضمون شاید نمبراں دے اعتبار نال کمزور ہووے لیکن جے ایسے انداز نوں تسیں پھڑ لو و تے لکھنا شروع کر لوو تے بہت ترقی کر سکدے او۔
اردو دے نال ذوق و شوق تے پہلاں توں سی۔ ہن جدوں لکھن لئی رہنمائی تے تھپکی وی مل گئی تے میں قلم کاغذ دے نال رشتہ مضبوط کر لیتا۔ کتاباں دا مطالعہ وی جاری رکھیا۔ کجھ عرصے مگروں میں اک قومی اخبار وچ اپنا آرٹیکل لکھ کے گھلیا جہڑا خوش قسمتی نال چھپ گیا۔ اوس دن میری خوشی دی انتہا نہیں سی۔ مینوں ہور حوصلہ ملیا کہ جے چنگا لکھ لیتا جاوے تے اوہ اخبار وچ ضرور چھپدا اے۔ میںنویں کتاباں دی تلاش وچ رہن لگیا تے کوئی وی چنگا موضوع ہتھ آندا تے میں اوہدے تے اک بہترین آرٹیکل لکھ کے اخبار وچ بھیج دیندا۔ میرے قارئین دی تعداد ودھن لگی تے میں باقاعدگی نال لکھن لگیا تے کجھ عرصے وچ ایہناں مضموناں دی چنگی بھلی تعداد بن گئی۔ اک سال مگروں کجھ دوستاں نے مشورہ دتا کہ ایہناں سارے آرٹیکلز نوں کتابی شکل دینی چاہیدی اے۔ اوہناں دا مشورہ مینوں پسند آیا۔ چنانچہ کامیابی کاپیغام دے ناں توں میری پہلی کتاب منظر عام تے آئی جہڑی بڑی مقبول ہوئی تے ہن تک اوہدے بے شمار ایڈیشن چھپ چکے نیں۔
لکھن دی صلاحیت نے نہ صرف مینوں شناخت دتی بلکہ اک لیڈر’ کوچ’ ٹرینر تے کنسلٹنٹ دے طور تے وی میری بڑی مدد کیتی۔ میرے نزدیک ہر انسان دی کامیابی لئی جتھے ہور بہت ساری شیواں سکھنا ضروری اے اوتھے ای لکھن دی قابلیت وی ضروری اے۔ کیوں جے لکھی ہوئی گل دی اہمیت بوہتی ہوندی اے۔ اک واری جدوںکوئی شے لکھ لیتی جاوے تے فیر اوہ سند بن جاندی اے جہدے توں انکار ممکن نہیں۔
ایس کائنات وچ موجود ہر انسان اک کہانی اے۔ ایس کہانی وچ کجھ مناظر تے دوجے انسان دی کہانی جیسے ہو سکدے نیں لیکن مرکزی کرادر ہمیشہ مختلف ہوندا اے۔ اپنی کہانی وچ ہر انسان نے مشکل حالات وی ویکھے ہوندے نیں۔ کٹھن مراحل دا سامنا وی کیتا ہوندا اے۔ دھوکے وی کھاہدے ہوندے نیں۔ غلط فیصلے وی کیتے ہوندے نیں۔ دل کھول کے رویا وی ہوندا اے تے کدھرے قہقہے مار کے ہسیا وی ہوندا اے۔ ایہہ چوٹاں’ درد’ تکلیفاں تے خوشی دے لمحات زندگی وچ ویسے نہیں آندے بلکہ ایہہ کجھ نہ کجھ دے کے جاندے نیں تے عقل مند انسان جدوں اوہناں توں سبق لے کے زندگی وچ اودے ودھدا تے فیر اوہ منزل تے ضرور اپڑدا اے۔
تے کیہ ہر انسان لئی لکھنا ضروری اے؟
میرے خیال وچ تے ہر انسان وچ لکھن دی قابلیت ہونی چاہیدی اے کیوں جے زندگی دے ہر میدان وچ ایہہ قابلیت تہانوں فیدہ دیندی اے۔ ابلاغ تے بولن دے نال ہوندا اے یا فیر لکھن دے نال’ انساناں دے نال رہندے ہوئے جس طرح بولنا ساڈی زندگی دا لازمی حصہ اے۔ اوسے طرح لکھنا وی اے۔ ایہناں دونواں وچوں کسے وی فن تے جے انسان نوں مہارت حاصل ہووے تے اوہ زندگی وچ کامیاب ہو سکدا اے۔
لکھنا انسان دے کتھارسس دا اک بہترین ذریعہ اے۔ قلم نوں وسیلہ بنا کے دل دے غبار نوں کاغذ اتے اتارن مگروں انسان پرسکون ہو جاندا اے۔ اپنے ایہناں تجربیاں تے احساساں نوں جے ایسا رنگ دتا جاوے جہدے توں دوجے انساناں نوں وی فیدہ پہنچے تے فیر ایہہ سونے اتے سہاگا ہووے گا۔ لکھنا تہانوں سوچن تے مجبور کردا اے تے صرف سوچن تے ای نہیں بلکہ مختلف انداز وچ چیزاں نوں ویکھن تے امکانات نوں پرکھن دی قابلیت وی تہاڈے اندر پیدا کردا اے۔ تخیل تے تصور دی طاقت نال تسیں ایسی چیزاں سامنے لیا سکدے او جہڑیاں پہلے کسے انسان دے ذہن وچ نہیں آئیاں۔ انگریزی دا معروف ناول Black Beautyایہدی شاندار مثال اے۔ ایہدی مصنفہ اناسیول ٹنگاں توں معذور سی۔ اوہ جدوں دوجے صحت مند انساناں نوں چلدے تے دوڑدے ہوئے ویکھدی تے اوہدے دل وچ ایہہ خواہش شدت نال سر ابھاردی کہ کاش اوہ وی اپنے پیراں نال دوڑ سکے۔
ایہہ محرومی آہستہ آہستہ ایہدے اندر جڑ پھڑدی جا رہی سی تے فیر جدوں اوہ حد توں ودھ گئی تے اوہنے قلم پھڑیا تے اک شاندار ناول تخلیق کیتا۔ بلیک بیوٹی ناول دراصل اک گھوڑے دی کہانی اے جہڑا خوبصورت کالی رنگت ‘ لمے والاں تے تیز رفتاری پاروں اپنی مثال آپ ہوند ااے۔ اناسیول خود دوڑ نہیں سکدی سی لیکن اپنے ایس احساس محرومی نوں اوہنے اک تیز رفتار گھوڑے وچ ڈھالیا تے ایس تخیل نال ایسا شاندار ناول لکھیا جہڑا اج تک مقبول اے۔
لکھن دی وجہ نال تہاڈا قوت مشاہدہ مضبوط ہوندا اے۔ ایہہ تہانوں نویں چیزاں بارے جانن تے تحقیق کرن تے ابھاردا اے۔ تہاڈے ذہن وچ موجود نویں آئیڈیاز تے بہترین خیالاں نوں تسیں تحریر دے ذریعے بہترین انداز وچ پیش کر سکدے او۔ لکھنا تہاڈی تخلیقی صلاحیتاں نوں بیدار رکھدا اے تے ایسے وجہ نال ایہنوں اک بہترین دماغی ایکسرسائز وی قرار دتا جاندا اے۔ لکھن دے ذریعے تسیں ایس قابل ہوندے او کہ اپنے آپ وچ جھانک سکو تے خود نوں بہتر انداز وچ پیش کر سکو۔ فرض کرو اک انسان دے کول دنیا بھر دے تجربات’ مشاہدات تے بہت زیادہ علم اے لیکن اوہ ایہہ سب کجھ صرف اپنے تک ای محدود رکھدا اے تے فیر ایس سارے دا کیہ فیدہ؟ ایہدے الٹ اک ہور فرد اے جہدے کول جنا کجھ وی تجربہ’ مشاہدہ تے علم اے اوہ اوہنوں تحریر دی صورت وچ پیش کر دیندا اے تے اوہ لوکاں تے معاشرے لئی نفع مند بن جاندا اے۔
اک تحقیق دے مطابق ہر اوہ انسان جہڑا اپنے خیالات تے روزمرہ دے حالات نوں لکھدا اے تے اوہ اوس آدمی دی نسبت چھیتی اپنے اہداف حاصل کر لیندا اے جہڑا لکھدا نہیں اے۔ تحقیق ایہہ وی دسدی اے کہ اپنے خیالات لکھن والا انسان اپنے آپ اتے تے اپنی سوچ تے زیادہ کنٹرول رکھ سکدا اے۔ ہر انسان دی زندگی وچ اک فوٹو البم ہوندا اے جہدے وچ اوہدے بچپن توں لے کے بڑھاپے تک دی تصویراں ہوندیاں نیں لیکن جے کوئی انسان روزانہ دی بنیاد تے ڈائری لکھدا تے ایہہ تحریراںاوس فوٹوالبم توں ودھ شاندار تے مفید ہو سکدیاں نیں جہدی بنیاد تے بہت ساریاں یاداں تے گلاں اوہدے سامنے آ سکدیاں نیں تے اوہ ایہناں چیزاں کولوں بہت کجھ سکھ سکدا اے۔
وارن بفٹ آکھدا اے کہ خیالات نوں عمدہ بنان دا بہترین طریقہ تحریر اے۔ رچرڈ برنسن آکھدا اے کہ اپنی چیزاں وچوں میری اہم ترین چیز میری اوہ نوٹ بک اے جہدے وچ میں لکھنا واں۔ دنیا دا ذہین ترین انسان بل گیٹس آکھدا اے کہ اپنے خیالات نوں ازسر نو مرتب کرن دا بہترین ذریعہ لکھنا اے۔
تہاڈے ذہن وچ سوال ہووے گا کہ لکھیا کیویں جاوے؟
جواب دین توں پہلے اک گل یاد رکھو کہ تسیں اوہدوں ای کجھ لکھ سکو گے جدوں تسیں کجھ پڑھیا ہووے۔ عالمی شہرت یافتہ ناول نگار سٹیفن ایڈون کنگ آکھدا اے کہ جے تسیں لکھنا چاہندے او تے پڑھن لئی ویلا کڈو کیوں جے پڑھنا تہانوں قابلیت’ صلاحیت تے لفظاں دا ذخیرہ دیوے گا۔ تہاڈے لکھن دے معیار دا انحصار ایس گل تے وی اے کہ تسیں کیہڑے معیار دا مطالعہ کردے او۔ جے تہاڈے زیر مطالعہ کتاباں ادبی اعتبار نال اعلیٰ درجے دی نیں تے فیر تہاڈی تحریر وی اعلیٰ ہووے گی۔
تحریر وچ بہتری لیان دا آسان طریقہ ڈائری لکھنا اے۔ ایہہ اوہ آسان طریقہ اے جہدے وچ تہانوں زور لا کے لکھنا نہیں پیندا بلکہ جو کجھ تہاڈے نال بیتیا’ تسیں رات نوں پرسکون ہو کے بیٹھو تے دن بھر دے سارے حالات لکھو۔ اوہدا اک فیدہ ایہہ وی ہووے گا کہ تہانوں منظر نگاری وی آ جاوے گی کہ تسیں کہڑی کہڑی جگہ گئے سو۔اوتھے دا منظر کیسا سی۔ کہنے کیہ لباس پایا ہویا سی تے کدے نال تہاڈی کیہ گل ہوئی۔ جے تسیں کوئی مضمون لکھنا تے اوہدے بارے پوری معلومات حاصل کرو تے جدوں لکھن لئی بیٹھو تے اک آسان تے موثر طریقہ ایہہ اے کہ موضوع نوں صفحے دے درمیان وچ لکھ لوو۔ فیر اوہدے آسے پاسے اوہ سارے ذیلی موضوعات لکھ لوو جہڑے تہاڈے خیال وچ اوہدے ضمن وچ آ سکدے نیں۔ فیر اوہناں ساریاں نوں نمبروار ترتیب دے دیو کہ کہڑے ذیلی موضوع نوں پہلے بیان کرنا اے۔ کہنوںدوجے’ تیجے نمبر اتے تے کہنوں سب توں اخیر وچ تے فیر اللہ دا ناں لے کے لکھنا شروع کر لوو۔
تحریر دے حوالے نال اک بنیادی گل ایہہ وی یاد رکھو کہ ہر تحریر دے تن حصے ہوندے نیں۔ ابتدائیہ’ وسطانیہ تے اختتامیہ۔
تہاڈی تحریر دا ابتدائیہ دلچسپ ہونا چاہیدا اے تاں جے جہڑا وی پہلی لائن پڑھے تے اوہ اہنوں اخیر تک پڑھن تے مجبور کرے۔ایہہ آغاز کہانی توں وی ہو سکدا اے۔ حیرت انگیز جملے توں وی تے منظر نگاری توں وی۔ وسطانیہ (تحریر دا درمیانی حصہ) وچ تسیں اپنے موضوع دے متعلق معلومات دینا ہوندیاں نیں۔ ایس لئی ایہہ تھوڑا تفصیلی ہوندا اے۔ اختتامیہ (تحریر دا آخری حصہ) وچ تسیں موضوع دا مغز دینا ہوندا اے تے ایہہ گل وی واضح کرنی ہوندی اے تے تسیں ایس تحریر توں اپنے قارئین نوں کیہ پیغام دینا چاہندے او۔
تحریر وچ بہتری لیان لئی اک طریقہ ایہہ وی اے کہ تسیں جدوں سویرے اٹھو تے اک کاپی لے کے اوہدے وچ لکھنا شروع کر دیو۔ تہاڈے ذہن وچ ہووے گا کہ کیہ لکھیے۔ ارے بھائی’ کجھ وی لکھو۔ تسیں موضوع تے جملیاں دے ربط دے چکر وچ نہ پوو۔ بس جو تہاڈے ذہن وچ آ رہیا اے اوہ لکھدے جائو۔ ایہہ پریکٹس دراصل تہاڈے قلم دی روانی لئی اے۔ کجھ دن دی مشق مگروں تہانوں لکھن توں گھبراہٹ نہیں ہووے گی تے کسے وی موضوع تے تسیں بآسانی لکھ سکو گے۔
جے تسیں چنگا لکھنا چاہندے او تے اوہدے لئی اک مخصوص ویلا مقرر کر لوو تے فیر اوہدے وچ تسیں دوجا کوئی کم نہ کرو۔ Harry Potter سیریز دی مصنفہ جے کے رولنگ آکھدی اے کہ تسیں جدوں اپنے لکھن لئی ویلا مخصوص کر لوو تے فیر اوہدے وچ دوجیاں نوں انکار کرنا سکھو۔ مصنفہ جدوں اپنے ناول اتے کم کر رہی سی تے گھر وچ بالاں دے شور دی وجہ نال کم وچ کافی خلل آ رہیا سی۔ اوہنے شہر دے اک مہنگے ہوٹل وچ اپنے لئی کمرہ بک کیتا۔ بیگ چکیا تے چلی گئی تے اودوں تک اوتھے مقیم رہی جدوں تک اوہناں دا کم مکمل نہیں ہویا۔
بانو آپا نے اشفاق صاحب کولوں لکھن وچ بہتری لئی مشورہ منگیا تے اوہناں نے اک مثال نال سمجھایا:
تسیں ہتھ وچ روٹیاں دے چھوٹے چھوٹے ٹکڑے لے کے دریا کنارے بیٹھ جائو تے اک اک کر کے سٹدے جائو۔ اگلے دن فیر جا کے انج کرو تے مچھیاں آنی شروع ہو جان گئیاں۔ جدوں تسیں تواتر نال انج کرنا شروع کر دیو گے تے فیر تسیں ویکھو گے کہ تہاڈے پہنچن توں پہلے ای اوتھے مچھیاں آ چکیاں ہون گئیاں۔
لکھن دی مثال وی ایسی اے۔ تسیں اک ای ویلے وچ لکھن دی مشق شرو ع کرو تے کجھ دناں مگروں تہاڈی کیفیت ایہہ ہووے گی کہ جیویں ای تسیں قلم چکو گے تے خیالاں دی مچھیاں فوراََ تہاڈے دماغ وچ پہنچ جان گئیاں تے تسیں اک شاندار تحریر لکھ سکو گے۔

اپنا تبصرہ گھلو