دنیاوچ قتل ہون والے مشہور سیاسی آگُو

Abdul Hafeez Zafar

دنیا دی سیاسی تریخ دا مطالعہ کیتا جاوے تے سانوں علم ہوندا اے کہ کئی اجیہے مشہور سیاسی رہنما سن جہڑے غیر فطری موت نال ہمکنار ہوئے۔ ایہہ اک وکھرا سوال اے کہ اوہناں نوں قتل کیتا گیا؟ تھلے اوہناں مشہور سیاسی شخصیات دا ذکر کیتا جا رہیا اے جنہاں نوں قتل کردتا گیا۔
1ـابراہام لنکن
ابراہام لنکن دا شمار امریکہ دے اہم ترین صدراں وچ ہوندا اے۔ اوہناںنے امریکہ دی سالمیت لئی قربانی دتی۔ امریکہ وچ خانہ جنگی1861 وچ شروع ہوئی تے ایہدی وجہ ایہہ سی کہ ریاستاں وچ لڑائی شروع ہو گئی۔ کجھ ریاستاں یونین دے حق وچ سن یعنی اوہ وفاقی یونین دے نال وفاداری نبھا رہیاں سن۔ دُجے پاسے اوہ ریاستاں سن جو کنفیڈریشن چاہندیاں سن تے علیحدگی دی خواہش مند سن۔ وفاقی یونین دے حامیاں نوں ”نارتھ” آکھیاجاندا سی جد کہ کنفیڈریشن دے حامیاں نوں ”سائوتھ” آکھیا جاندا سی۔ دوجا اہم مسئلہ غلامی دا سی۔ ابراہام لنکن غلامی دے خلاف سن جد کہ کنفیڈریشن دے حامی غلامی برقرار رکھنا چاہندے سن۔خانہ جنگی ویلے 40لکھ دے کول سیاہ فام لوکاں نوں غلام بنایا گیا۔ ایس خانہ جنگی دے دوران قریباً ست لکھ امریکی سپاہی ہلاک ہو گئے۔ایہہ خانہ جنگی چار سال تک جاری رہی۔
1865ء وچ ایہہ خانہ جنگی اوس ویلے ختم ہوئی جدوں کنفیڈریشن دے حامیاں دے جرنیل لی نے یونین جرنیل گرانٹ دے سامنے ہتھیار سٹ دتے۔ اوہدے قریباً پنج دناں مگروں جون ولکز بوتھ نامی اک بندے نے ابراہام لنکن نوں گولی مار کے ہلاک کردتا۔ جون ولکز بوتھ سٹیج ایکٹر سی تے کنفیڈریشن دا زبردست حامی سی ۔ ابراہم لنکن پہلے امریکی صدر سن جنہاں نوں قتل کیتا گیا۔
2ـمہاتما گاندھی
ہندوستان دی تحریک آزادی دے رہنما مہاتما گاندھی نوں جنوری 1948 نوں اک انتہا پسند ہندو نے گولی مار کے ہلاک کر دتا۔ ایس انتہا پسندی ہندو دا ناں نتھورام گوڈسے سی۔ اوہ برہمن سی تے ہندو مہاسبھا نال تعلق رکھدا سی۔ ایس دے علاوہ اوہ آر ایس ایس دا سابق رکن سی۔ گوڈسے دا خیال ایہہ سی کہ تقسیم ہند ویلے گاندھی نے مسلماناں لئی نرم گوشہ رکھیا سی۔ گوڈسے نے گاندھی نوں تن گولیاں ماریاں۔ زمین اتے ڈِگن مگروں گاندھی نوں اوہدے کمرے وچ پہنچایا گیا لیکن اوہ جاں بحق ہو گیا۔ گوڈسے تے مہاتما گاندھی دے قتل دا مقدمہ چلایا گیا۔ ایس دے علاوہ گوڈسے دے مددگار نارائن اپتے تے چھ دوجے بندے وی شامل سن۔8نومبر1949 نوں گوڈسے تے نارائناپتے نوں موت دی سزا سنائی گئی۔ اگرچہ گاندھی دے دونویں پتراں رام داس گاندھی تے منی لال گاندھی نے اوہناں دی سزا وچ تخفیف لئی اپیلیاں کیتیاں سن لیکن اوس ویلے دے بھارتی وزیراعظم پنڈت جواہر لعل نہرو’ ولبھ بھائی پٹیل تے گورنر جنرل چکروتی راج گوپال نے ایہ اپیلیاں رد کردتیاں۔ 15نومبر 1949 نوں گوڈسے تے اپتے نوں اینالہ جیل وچ پھانسی دے دتی گئی۔
3ـلیاقت علی خان
پاکستان دے پہلے وزیراعظم لیاقت علی خان نوں 16اکتوبر 1951نوں راولپنڈی وچ گولی مار کے شہید کر دتا گیا۔ اوہ اوس ویلے راولپنڈی دے کمپنی باغ وچ عوامی جلسے نال خطاب کررہے سن۔ لیاقت علی خاں دی شہادت مگروں اوس باغ دا ناں لیاقت باغ رکھ دتا گیا۔ لیاقت علی خان نوں قائد ملت وی آکھیا جاندا اے۔ اوہ قائداعظم دے قریبی ساتھی سن۔اوہناں دے قاتل دا ناں سید اکبر سی۔ جیویں سید اکبر نے لیاقت علی خان نوں گولیاں مار کے شہید کیتا اوہدی کجھ دیر مگروں سید اکبر نوں وی گولیاں مار کے ہلاک کردتا گیا۔ لیاقت علی خان دا قتل اج وی اک معمہ اے۔
4ـجان ایف کینیڈی
امریکہ دے مقبول صدر جان ایف کینیڈی وی غیرفطری موت دا شکار ہوئے۔ 22 نومبر1963 نوں صدر کینیڈی کولی ہاروے اوسولڈ نے ڈلاس (ٹیکساس وچ گولی مار کے ہلاک کر دتا۔ گولی اوہناں دے دماغ تے لگی۔ اوہناں نوں ہسپتال پہنچایا گیا جتھے اوہناں دی موت دی تصدیق کردتی گئی۔ابراہام لنکن مگروں جان ایف کینیڈی دوجے امریکی صدر سن جہڑے غیر فطری موت نال ہمکنار ہوئے۔ کینیڈی دی موت مگروں جانسن امریکہ دے صدر بن گئے۔ اوہ امریکہ دے 36 ویں صدر سن۔ مگروں صدر جان ایف کینیڈی دے بھتیجے رابرٹ کینیڈی نے آکھیا کہ اوہنوں یقین اے کہ اوہدے چچا نوں اک سازش دے تحت قتل کیتا گیا۔ کینیڈی دی موت مگروں مختلف سازشی نظریات سامنے آئے۔ کجھ نے سی آئی اے نوں مورد الزام ٹھہرایا’ کسے نے کے جی بی نوں تے کجھ لوکاں نے کیوبا دے صدر کاسترو اتے انگلی چکی۔ جہڑے لوک سی آئی اے اتے الزام عائد کر رہے سن اوہناں دا آکھنا سی کہ جان ایف کینیڈی سیاہ فام لوکاں دے حقوق دی گل کر رہے سن جہڑی سی آئی اے نوں پسند نہیں سی۔ ایہہ وی آکھیا گیا کہ اوسولڈ کلا قاتل نہیں ہور لوک وی قتل دی ایس سازش وچ ملوث نیں۔ اوسولڈ دی عمر اوس ویلے صرف 24سال سی۔
اوسولڈ نے قتل دی ذمہ واری قبول کرن توں انکار کردتا تے آکھیا کہ اوہ احمق اے۔ اوہدے دو دن مگروں اوسولڈ کوڈلاس پلس ہیڈ کوارٹرز دے احاطے وچ اک مقامی نائٹ کلب دے مالک جیک روبی نے گولی مار کے ہلاک کر دتا۔ اجے تک بہت سارے امریکی ایہہ تسلیم نہیں کردے کہ جان ایف کینیڈی دا قاتل اوسولڈ دا ذاتی فعل سی۔ اوہ ایہہ سمجھدے نیں کہ کینیڈی نوں اک سازش دے تحت موت دی وادی وچ اتاریا گیا۔
5ـشاہ فیصل
سعودی فرمانروا شاہ فیصل بن عبدالعزیز نوں 25مارچ 1975 نوں اوہناں دے بھتیجے فیصل بن معید نے گولی مار کے شہید کر دتا۔ اوہناں دا بھتیجا امریکہ توں واپس آیا سی۔ اوس ویلے کویت توں کجھ نمائندے آئے ہوئے سن۔ شہزادہ فیصل نے پہلے اوہناں نال گل بات کیتی جہڑے شاہ فیصل دا انتظار کر رہے سن۔شہزادہ فیصل اوہناں نال گلے ملن لئی اگے ودھے۔ جدوں اوہ کول پہنچے تے اوہناں نے پستول کڈ لیتا تے بالکل کولوں شاہ فیصل نوں گولی ماردتی۔ اک باڈی گارڈ نے شہزادہ فیصل اتے تلوار دا وار کیتا۔ وزیر تیل ذکی یمانی نے شور مچادتا کہ شہزادے نوں نہ ہلاک کرو۔ شاہ فیصل نوں فوری طور تے ہسپتال لے جایا گیا۔ اوہ زندہ سن کیوں جے ڈاکٹراں نے اوہناں دے دل دا مساج کیتا سی۔ لیکن اوہناں دی ایہ کاوشاں بے سود ثابت ہوئیاں تے شاہ فیصل خالق حقیقی نال جا ملے۔آکھیا جاندا اے کہ شاہ فیصل اسرائیل دے بہت خلاف سن کیوں جے اوہ سمجھدے سن کہ اسرائیل عرباں دے خلاف اے۔ اسرائیل دے خلاف کارروائیاں دے سلسلے وچ اوہ ہر ویلے مالی امداد لئی تیار رہندے سن۔ اوہناں نوں ریاض وچ شہید کیتا گیا۔ اوہناں دے قاتل شہزادہ فیصل نوں ریاض دی اک جیل وچ پہنچا دتا گیا۔ شریعت کورٹ نے مقدمہ چلا کے شہزادہ فیصل نوں موت دی سزا دتی۔ پہلے اوہدے بارے آکھیا گیا کہ اوہدا ذہنی توازن درست نہیں لیکن شریعت کورٹ نے اوہنوں ذہنی طور تے درست قرار دتا۔ 18جون 1975 نوں شہزادہ فیصل دا سر قلم کردتا گیا۔
6ـشیخ مجیب الرحمان
15اگست1975 نوں بنگلہ دیش دے پہلے صدر شیخ مجیب الرحمن تے اوہناں دے خاندان دے بیشتر افراد نوں اک فوجی بغاوت مگروں ہلاک کردتا گیا۔ نوجوان فوجیاں دے اک گروپ نے شیخ مجیب دی رہائشگاہ اتے حملہ کیتا۔ وزیر تجارت خوندکر مشتاق احمد نے فوری طور تے حکومت سنبھال لیتی تے اپنے صدر ہون دا اعلان کردتا۔ ہن بنگلہ دیش وچ 15 اگست نوں یوم اگست نوں یوم سوگ منایا جاندا اے تے اوس دن سرکاری چھٹی ہوندی اے۔ شیخ مجیب الرحمان اتے ایہ الزامات عائد کیتے گئے کہ ا وہناں نے اقربا پروری نوں فروغ دتا۔ مجیب الرحمان دے خاندان اتے کرپشن دے الزامات وی عائد کیتے گئے۔ ایہہ گل وی عام ہو گئی کہ شیخ مجیب الرحمان خاندانی بادشاہت دے قیام دے خواہاں نیں۔ ملک وچ افراتفری دا دور دورہ سی۔ خوراک دی قلت پاروں قحط دی صورتحال پیدا ہو گئی جہدے تباہ کن نتیجے برآمد ہوئے۔ قحط پاروں قریباً چار لکھ بندے لقمہ اجل بن گئے۔ بہت سارے تجزیہ کار ایس قحط نوں شیخ مجیب الرحمان دے قتل دی بنیادی وجہ قرار دیندے نیں۔ جدوں شیخ مجیب الرحمان نوں ہلاک کیتا گیا اوس ویلے اوہناں دی دونواں دھیاں شیخ حسینہ تے شیخ ریحانہ جرمنی وچ سن۔ اوہ جرمنی توں دہلی چلی گئیاں تے اوتھے پناہ حاصل کر لیتی۔ 1981 وچ شیخ حسینہ خودساختہ جلاوطنی مگروں بنگلہ دیش آ گئیاں۔
8ـانور سادات
مصر دے صدر انور سادات نوں 6اکتوبر 1981 نوں قاہرہ وچ سالانہ وکٹری پریڈ دے دوران مصری اسلامی جہاد دے ارکان نے قتل کر دتا۔ جون 1981 وچ انور سادات دے خلاف نکام فوجی بغاوت ہوئی سی جہدے نتیجے وچ کریک ڈائون کیتا گیا۔ کئی اپوزیشن رہنما گرفتار کر لیتے گئے۔ آکھیا جاندا اے کہ قتل ویلے اوہ بہت مقبول سن۔ کجھ دا آکھنا اے کہ اوہ اپنی مقبولیت گوا چکے سن۔ عام خیال ایہو اے کہ صدر سادات نوں کیمپ ڈیوڈ معاہدے دے نتیجے وچ موت دے گھاٹ اتاریا گیا۔ خود صدر سادات تے اوہناں دی اہلیہ نوں ایہہ علم سی کہ اسرائیل دے نال امن معاہدہ کرن دا فیصلہ خطرناک اے۔ انور سادات اوہ پہلے رہنما سن جنہاں نے اسرائیل نال دو سال پہلے امن معاہدہ کیتا۔ ایس فیصلے اتے مصر دے بہت سارے لوکاں نے ناراضی دا اظہار کیتا۔ ایس معاہدے دے خلاف ملک بھر وچ اوہناں دے خلاف پرتشدد مظاہرے شروع ہو گئے۔ انور سادات نیشنل ڈیموکریٹک پارٹی دے لیڈر سن۔ کیمپ ڈیوڈ معاہدہ نوں اوس ویلے دے امریکی صدر جمی کارٹر دی مکمل حمایت حاصل سی۔ لیکن بہت سارے عرباں دے نزدیک انور سادات نے فلسطینیاں نال غداری کیتی سی۔ انور سادات مصر دے پچھلے صدر جمال عبدالناصر دے قریبی ساتھی سن۔
9ـاندرا گاندھی
31اکتوبر 1984 نوں بھارتی وزیراعظم اندرا گاندھی نوں اوہناں دے سکھ محافظاں نے گولیاں مار کے موت دی وادی وچ اتار دتا۔ اندرا گاندھی نوں وزیراعظم دی رہائشگاہ دے باغ وچ قتل کیتا گیا۔ سکھاں نوں ایس گل دا بہت رنج سی کہ اوسے سال اوہناں دی مقدس جگہ گولڈن ٹیمپل (دربار صاحب) اتے بھارتی فوج نے حملہ کر کے بہت سارے سکھاں نوں ہلاک کردتا سی۔ اوہ سمجھدے سن کہ ایہ سب کجھ اندرا گاندھی دی مرضی نال ہویا اے۔ ایس حملے وچ سکھ رہنما جرنیل سنگھ بھنڈرانوالہ وی جاں بحق ہو گئے۔ ایس حملے نوں ”آپریشن بلیو سٹار” دا ناں دتا گیا۔ اندرا گاندھی دے اک قاتل بے انت سنگھ نوں دوجے محافظاں نے گولی مار کے ہلاک کردتا۔ ایس حملے وچ اک ہور سکھ کہارسنگھ نے وی سازش وچ حصہ لیتا سی۔ بے انت سنگھ دے ساتھی ستونت سنگھ تے کہارسنگھ نوں دہلی دی تہاڑ جیل وچ پھانسی دے دتی گئی۔
10ـ بے نظیر بھٹو
27دسمبر نوں پاکستان دی پہلی خاتون وزیراعظم بے نظیر بھٹو نوں لیاقت باغ راولپنڈی وچ ات گردی دا نشانہ بنایا گیا۔ اوہ اوس ویلے اک عوامی جلسے نال خطاب کر کے واپس جا رہیاں سن۔ بے نظیر بھٹو دو واری پاکستان دی وزیراعظم رہ چکیاں سن۔ اوہناں دا قتل ہن تک اک معمہ اے۔ آکھیاجاندا اے کہ اوہناں نوں اک 15سالہ خودکش بمبار بلال نے قتل کیتا۔ اوہدے مگروں اوس ات گرد نے اپنے آپ نوں وی دھماکے وچ اُڈا دتا۔ات گردی دے ایس حملے وچ بے نظیر بھٹو دے علاوہ 24بندے جاں بحق ہوئے۔ بہرحال ایہہ اک اندوہناک واقعہ سی۔ پیپلز پارٹی دے رہنما ہن تک شکایت کردے نیںکہ اوہناں دی لیڈر نوں اوس ویلے دے صدر پرویز مشرف نے مناسب سکیورٹی مہیا نہیں کیتی۔ بہرحال بے نظیر بھٹو دی شہادت اک عظیم قومی نقصان سی۔ اوہناں دے قتل دی تحقیقات لئی اقوام متحدہ دی اک ٹیم وی پاکستان آئی سی۔ آکھیا جاندا اے کہ اقوام متحدہ دی ٹیم نوں صرف ایہہ اختیار دتا گیا سی کہ اوہ بے نظیر بھٹو دے قتل دے حوالے نال حقائق تے حالات دا پتہ لان۔ بہرحال اوہدا کوئی نتیجہ برآمد نہیں ہویا۔ لیاقت علی خان مگروں بے نظیر بھٹو دوجی سیاسی رہنما سن جنہاں نوں لیاقت باغ راولپنڈی وچ قتل کیتا گیا۔

اپنا تبصرہ گھلو