صحرائے چولستان کسے مسیحا دا منتظر

Sardar Akhtar

اخترسردار چودھری

موت تے برحق اے تے ساریاں نے مرنا اے لیکن ایہدا جواب تے کوئی صاحب علم ای دے سکدا اے کہ چولستان وچ جہڑا پانی دا قحط اے تے ایہدے نال جانور تے انسان مر رہے نیں۔ کیہ ایہناں داحساب کتاب اوہناں حکمراناں’ مذہبی تے سیاسی لیڈراں توں آخرت والے دن نہیں ہووے گا؟ چولستان وچ جہڑے بچے غذائی قلت یعنی بھک’ پیاس’ بیماری توں جان دی بازی ہار رہے نیں کیہ ایہہ قتل نہیں اے۔ جے انج ای اے تے فیر ایہدی ذمہ واری کوئی قبول کیوں نہیں کر رہیا؟ سوال ایہہ وی اے کہ کیہ بچیاں نوں بھکے رکھ کے مارنا ات گردی نہیں ؟بچیاں دے علاج لئی سہولتاں مہیا کرنا’ اوہناں دی خوراک دا پربندھ کرنا’ کہدی ذمہ واری اے؟ تے جہناںدی ایہہ ذمہ واری اے۔اوہناں کولوں پچھنا کہدی ذمہ واری اے؟ آیا کہ اوہ اپنی ذمہ واری نوں کیوں پورا نہیں کر رہے؟
ایہہ وی پچھنا سی کہ قنون وچ تے اسلام وچ ایہدی کوئی سزا وی اے کہ نہیں اے؟ آخر ایہدے اتے نوٹس کیوں نہیں لیا جا رہیا۔ میڈیا نوں چاہیدا اے کہ سیاست توں باہر کڈ کے تھوڑا ویلا ملک تے قوم نوں وی دیوے اپنا کم کرے۔ مسئلے تے مشکلاں عوام تے حکمراناں دے سامنے بیان کرے تاں جے کوئی تے اٹھے جہڑے اوہناں لئی سوچے’ کجھ کرے’ صرف بیان دین نال کیہ ہووے گا۔ سوشل میڈیا توں پتہ چلدا اے کہ چولستان وچ ایس ویلے حالات بہت خراب نیں۔ انسان تے انسان جانور پانی نہ ملن تے مر رہے نیں۔ خشک سالی اے بارشاں ہوئیاں نہیں۔ایتھے بارشاں نہ ہون نال گھمبیر صورتحال اے۔ ہن صورت حال ایہہ اے کہ اک تے روہی وچ بارش بالکل وی نہیں ہوئی۔ اودھرسورج سوانیزے اتے اے۔ شدید ترین گرم ہواواں چل رہیاں نیں۔
صحرائے چولستان وچ پانی دی کمی پاروں سینکڑاں مال مویشی مرن دی اطلاعاواں آ رہیاں نیں۔ سخت گرمی’ بارشاں دی کمی نال خشک سالی اے جتھے فصلاں مکمل طور تے ختم’ انسان تے حیوان’ چرند’ پرند پانی دی بوند بوند نوں ترس گئے۔ چولستان وچ زندگی دا انحصار بارشاں اتے اے۔ بارشاں دے پانی نوں ایتھے دے باسی ٹوبھیاں دی شکل وچ محفوظ کردے نیں۔ ایہناں توں انسان تے مویشی پانی پیندے نیں۔ چولستان وچ ایس سال اینی خشک سالی ہوئی کہ بارش دے پانی نال بھرے ہوئے ٹوبھے وی خشک ہو گئے۔ چولستان وچ ہون والی حالیہ خشک سالی نال حالات ایس نہج اتے پہنچ چکے نیں کہ اوتھے زندگی گزارنا مشکل ای نہیں ناممکن ہو گیا اے۔
التجا اے کہ سیاسی جماعتاں نے جے سیاست کرنی اے تے اوہدے اتے کرن کہ اسیں چولستان تے تھر نوں زندگی دی سہولتاں مہیا کرنا اے ایس لئی سانوں ووٹ دین۔ کوئی فلاح دا کم وی کرن۔ اک دوجے نال جنگ دی بجائے غربت تے افلاس تے بھک تے پیاس نال جنگ کرن۔ایس توں سبحان و تعالیٰ وی اوہناں توں راضی ہووے گا۔ اوہناں دی بخشش دا سامان ہووے گا۔ جیویں کہ شروع وچ عرض کیتی اے کہ مر تے ساریاں نے جانا اے۔ اج جہڑے اے سی لگے کمریاں وچ بیٹھے نیں’ جہڑے صاحب اختیار تے اقتدار نیں جہڑے عدل دے پاسبان ہین۔ موت اوہناں نوں وی آوے گی اوہناں کولوں ایہہ سوال ہووے گا کہ چولستان وچ جدوں انسان تے مال مویشی بھک تے پیاس نال موت دا شکار ہو رہے سن تسیں اوس ویلے کیہ کر رہے سو؟
چولستان وچ بچے مردے رہن گے۔ ایہہ اوہناں دے نصیب وچ لکھیا اے۔ موت برحق اے۔ مرن مگروں حساب ہووے گا۔ہاں ذمہ واراں دا تعین ہو جاوے گا۔ چولستان دی عوام تے ساڈے جئے قلم کار تے صرف دعا کر سکدے نیں یا اللہ کولوں ڈراسکدے نیں۔ غذائی قلت اینی اے کہ بچے بھک نال کمزورہوندے جاندے نیں تے سُک سُک کے جان توں گزر جاندے نیں۔ اینے وڈے پیمانے اتے کوئی فلاحی’ خیراتی’ این جی اوز’ ادارے مدد نہیں کر سکدے کیوں جے اوہناں دے کول اینے وسائل نہیں ہوندے۔ ایہہ ذمہ واری صوبائی تے وفاقی حکومت دی اے جہناں نوں ایہدا احساس کرنا چاہیدا اے کہ چولستان وچ انسان پانی دی بوند بوند نوں ترس رہے نیں’ گندم دے دانے دانے نوں سسک رہے نیں۔
چولستان وچ زندگی دا انحصار بارش دے پانی اتے اے۔ ایتھے نہر دریا نہیں ‘ ریت وچ کھوہ کھودے جاندے نیں جہناں وچوں اکثر کڑوا پانی نکلدا اے۔ پانی لئی چولستان دے واسیاں نوں کئی کئی میل دا سفر کرنا پیندا اے۔ ایس ویلے ٹوبھے خشک ہو گئے نیں’جنگلی حیات نوں شدید خطرہ لاحق اے’ جانور مررہے نیں’ انسان مختلف بیماریاں وچ مبتلا ہو رہے نیں’ چولستان کربلا بن چکیا اے۔ چولستان وچ قحط سالی’ انسان’ حیوان’ چرند’ پرند پانی دی بوند بوند نوں ترس گئے۔ نہری پانی دی بندش نال چولستان وچ زندگی مشکل ہو گئی اے۔ پیاس نال خلق خدا مر رہی اے۔ صحرا وچ پسماندگی دے ماحول وچ زندگی گزارن والیاں لئی ایس ملک دے ایواناں وچ کدی دردمندی نال نہیں سوچیا گیا۔ ایہناں مسئلیاں اتے کدی کوئی قومی کانفرنس نہیں ہوئی’ کدی کسی مکالمے دا آغاز نہیں ہویا۔
حکومت پاکستان کولوں مطالبہ اے کہ روسی چولستان دے لوکاں دے حالات اتے رحم کیتا جاوے’ اوہناں نوں پانی فراہم کیتا جاوے۔ اسیں پاک فوج کولوں مطالبہ کرنے آں کہ اپنی صلاحیتاں دے ذریعے پیاسی روہی نوں خوشحال کیتا جاوے۔ حکام بالا نوں درخواست کرنے آں ایہدا نوٹس لووے۔ اسیں اوہناں سارے دوستاں نوں جہڑے سوشل میڈیا اتے روہی چولستان وچ پانی دے مسئلے اتے آواز چک رہے نیں اوہناں نوں سلام پیش کرنے آں ‘ اوہناں نوں اپنی آواز چکنا چاہیدی اے۔ میڈیا دے دوستو چولستان دی آواز بنو اوہناں لئی آواز چکو۔ سیاست دا محاذ گرم اے لیکن ایس ویلے چولستان توں آن والے پانی پانی پکاردی ہوئی آوازاں اتے کن دھرن دی لوڑ اے۔ اک خاص گل ایہہ ہے کہ جہڑی حکومت بندی اے اوہنوں اپنی حکومت دے لالے پے جاندے نیں تے بنن والی ہر حکومت بجائے اپنے فرائض ادا کرن دے اپنے اقتدار دی بقا دی جنگ وچ گزار دیندی اے۔ ٹی وی چینل 24گھنٹے ایسے سنسنی خیزی توں اپنے پروگرام دی ریٹنگ کشید کردے نیں۔ بس ایہہ اک سرکس اے جہڑی پاکستان وچ لگی ہوئی اے۔ ایسے ماحول وچ کون ایہناں لئی سوچے گا’ کون آواز چکے گا۔
ایس صحرا داکل رقبہ 66لکھ 60ہزار پنج سو ایکڑ اے۔ صحرائے چولستان جہڑا مقامی طور تے روحی دے نام توں وی مشہور اے’ بہاولپور شہر’ پنجاب’پاکستان توں 30کلومیٹر دے فاصلے اتے واقع اک صحرا اے۔ چولستان پنجاب دا اہم صحرا اے۔ ایہہ جنوب مشرق وچ راجستھان نال جا ملدا اے۔ ایتھے دے مقامی لوک خانہ بدوش نیں جہڑے صحرائے چولستان دے ٹھوبیاں دے گرد اپنا مسکن بناندے نیں۔ ٹوبھا پنجابی زبان وچ پانی دے تالاب نوں آکھدے نیں۔ برسات دے دناں وچ ایہہ ٹوبھے پانی نال بھر جاندے نیں۔ روہی دے شمال وچ 3 اضلاع بہاولنگر’بہاولپور تے رحیم یار خان واقع نیں تے جنوب ول انڈیا دا بارڈر اے۔اوس پار ہندوستان دا صوبہ راجستھان اے اوتھے وی دو اضلاع جیسلمیر تے بیکانیر نوں صحرا لگدا سی لیکن حکومتی کوششاں نال صحرا ہن گلزار بن چکیا اے تے ہن اوتھے مکمل آبادی ہو گئی۔
چولستان وچ ایس ویلے تازہ ترین صورتحال ایہہ ہے کہ پانی دی قلت دی وجہ نال تریخ دا بدترین عذاب آیا ہویا اے۔ بارشاں نہ ہون پاروں پانی دے قدرتی ذخائر ٹوبھے تے جوہڑ ریت دی چادر اوڑھ چکے نیں۔ چولستان دے 1100 ٹوبھیاں وچوں 95 فیصد خشک ہو چکے نیں۔ خشک سالی ودھن دی وجہ نال جانوراں لئی چارہ وی ناپید ہو گیا اے۔ جنگلی جڑی بوٹیاں تک سُکن لگیاں نیں۔ حکومت نوں اپیل اے چولستان دے انساناں تے جانوراں لئی خوراک تے پانی دا فوری طور تے بندوبست کیتا جاوے ورنہ اوہناں دے لکھاں جانور پیاس تے بھک نال مر جاون گے۔ محکمہ موسمیات دے مطابق گرمی دی شدت وچ وادھے د ا امکان اے۔ جے گرمی دی شدت 45 توں ہور دو چار گریڈ تے ودھدی اے تے انسانی جاناں تے مال مویشی دا نقصان دا خطرہ اے۔ ایہدے تے حکومت وقت نوں فوری توجہ دینا چاہیدی اے۔

اپنا تبصرہ گھلو