(اج دی گل) مینوں اپنیاں کولوں آزادی چاہیدی اے

Khalid Bloch PIc

خالد بلوچ

آزادی دااک سفنا حضرت علامہ اقبال نے ویکھیا…تے بہت ساری قربانیاں تے اک بھاری قیمت دے عوض 1947 وچ پاکستان وجود وچ آگیا۔ گویا آزادی دا سورج طلوع ہویا تے پاکستان دا وجود کرہ ارض اتے نمودار ہو گیا” انسانی لاشاں نال لال زمین’ ابلدا ہویا تھاں تھاں تو لہو تے اوس لہو نال بِھجی ہوئی ارض وطن جہدے متھے اتے سبز جھنڈا لہرا دتا گیا۔ لاشاں نال لدی ٹریناں’ خاک تے لہو وچ لتھڑی’ ادھ جلی’ تعفن زدہ لیکن اوہناں تعفن زدہ لاشاں توں اٹھن والی بو دے بھبھولے وی گویا دھرتی نوں معطر کر رہے سن۔ ماواں جوان پتراں’ دھیاں نوں پچھے بہت پچھے چھڈ آئیاں سن’ گویا کہڑا اپڑیا تے کہڑا وچھڑ گیا۔ ایس آزادی دے سفر وچ!! سعادت حسن منٹو دا افسانہ ”ٹھنڈا گوشت ”یاد آجاندا اے۔ ایسی آزادی دے سفر وچ اک نوجوان خوبصورت لمے قد دی کڑی جہڑی کہ اپنی جوانی دی پہلی سیڑھی ای مشکل نال چڑھی ہووے گی۔ آزادی دے اوس قافلے توں وچھڑ گئی تے سکھاں دے اک جتھے دے ھتے چڑھ گئی تے سکھاں دی کرپاناں نے اوہدے معصوم تے نازک بدن وچ ہزاراں دراڑاں پا دتیاں۔ آواز ائی بلونت کور بوہا کھول چھیتی کر۔ بھوہا کھلدا اے تے بلونت کور اپنے کھسم کولوں پچھدی اے: ایہہ کون اے جہنوے موہنڈھیاں اتے چکیا ہویا اے۔ سکھ اپنی بیوی نوں آکھدا اے کہ ایہہ موسلی ساڈے ھتے چڑھ گئی سی تے ویکھ اپنی آخری سانواں وچ اے۔ اوہ اوہنوںچارپائی اتے لٹا دیندا اے تے فیر اپنی کرپان اوہدے سینے وچ اتار دیندا اے تے شاید اوہدی نفرت دی اگ دا الائو اجے وی ٹھنڈا نہیں ہویا ہووے گا۔ اوہنے اوہدے خون آلودہ کپڑیاں نوں اوہدے ٹھنڈے تے مردہ جسم توں آزاد کردتا تے اوہ بھکے گدھ وانگوں اوہدے بدن نوں نوچن لگیا۔ اوہ اک مردہ جسم نال جنسی لذتاں حاصل کر رہیا سی کہ بلونت کور اک زنانی سی تے حوا دی بیٹی دے نال ہون والا بھیانک کھیڈ کسے حالت منظور نہیں سی تے فیر بلونت کور نے اپنے کھسم ای دی کرپان اوہدے بدن وچ اتار کے اوہنوں وی ہمیشہ لئی ٹھنڈا کر دتا۔ ذرا اک لمحہ لئی سوچو تے محسوس کرو کہ کہنی قربانیاں مگروں ایہہ ملک’دھرتی نوں حاصل کیتا گیا اے۔ ایہہ تے دھرتی دی دھی دی اک چھوٹی جئی مثال اے تے بدقسمتی وقت کہ اسیں آزادی ہو کے وی غلامی در غلامی وچ دھنسدے چلے گئے تے پتہ چلیا کہ اسیں پہلے برطانوی راج دے غلام ساں تے ہن غلام ابن غلام بن چکے آں تے پہلاں سندے ساں کہ 22خانداناں دے ہتھوں پوری قوم یرغمال بنا لیتی گئی اے تے بس ایہناں دا راج چل رہیا اے تے ویلے دے نال نال پاکستان دی عمر دا ادھا حصہ مارشل لا کھا گیا تے ادھا حصہ امریکن غلاماں مطلب سیاستداناں نے ادھیڑ کے رکھ دتا۔ ایس ملک دے نال واریاں لائیاں گئیاں۔
مجھ کو آزادی ملی بھی تو کچھ اس طرح ناسک
جیسے کمرے سے اٹھا کر کوئی صحن میں پنجرہ رکھ دے
اک واری اک مرد مجاہد ذوالفقار علی بھٹو دی شکل وچ پاکستان نوں غلامی توں آزاد کروان لئی میدان عمل وچ اتریا تے فیر کیہ ہویا!! اوہنوں اوہدی سزاد تی گئی تے اوہدا جوڈیشل قتل کروادتا گیا۔ اوہ پھانسی دے پھندے اتے جھول گیا۔ فیر میر مرتضیٰ بھٹو نوں قتل کردتا گیا تے ذوالفقار علی بھٹو دی دھی بے نظیر بھٹو نوں شہید کروا کے بھٹو خاندان نوں ہمیشہ لئی اقتدارتوں باہر کردتا گیا تے پیپلز پارٹی دی بگ ڈور آصف علی زرداری دے ہتھاں وچ آ گئی۔ ایدھر ذوالفقار علی بھٹو دے اقتدار دا سورج جنرل ضیاء الحق دے ہتھوں غروب ہو گیا تے ضیاء الحق پاکستان اتے امریکن آشیرباد نال قابض ہو گیا تے ضیاء الحق نے جتھے امریکن غلاماں دی اک فوج سویلین شکل وچ پیدا کیتی اوتھے ای میاں محمد نواز شریف جئے کردار نوں وی پیدا کیتا۔ ضیاء الحق مگروں براہ راست پاکستان باضابطہ پاکستان دے عوام نوں امریکن غلامی وچ دھکیل دتا گیا تے فیر پاکستان نوں فٹبال بنا دتا گیا۔ پیپلز پارٹی آصف زرداری دی حکومت تے اگلی واری میاں نواز شریف دونویں امریکن غلام۔ ایس طرح پاکستان دی قوم اوہناں دے تے امریکن آقا دے عذاب بھگتدے رہے۔ قوم دے کول کوئی چوائس نہیں سی تے دونویں سیاستداناں نے دونویں ہتھاں نال ملک نوں لٹیا۔ بھاری ڈالراں دے عوض ڈرون حملیاں دے علاوہ پاکستان دے فوجی اڈیاں نوں امریکن دے حوالے کر دتا گیا۔ ڈرون نال سینکڑاں بے گناہواں نوں قتل کیتا جاندا رہیا تے پاکستان نوں امریکن اَگ وچ جھونک دتا گیا۔ جہدے توں تقریباً 80 ہزار توں ودھ پاکستانی فوج تے سویلین دی جاناں دا نذرانہ تے ارباں ڈالر پاکستان دے ایہدے وچ جھونکے گئے۔ لوڈشیڈنگ’ خارجہ پالیسی ‘ بھک’ تنگدستی’ بیماری’ جہالت تے بیروزگاری پاکستانی غلام قوم دا مقدر بن گئی۔ کوئی رستہ نہیں بچیا تے پاکستان دے کرکٹر عمران خان نے سیاست وچ انٹری پائی تے اوہناں دی 22سالہ کوشش مگروں 2018 وچ پاکستان دا اقتدار اوہناں دے ہتھاں وچ آ گیا مگر پاکستان دی دونویں وڈی جماعتاں تے دوجی پاکستان وچ مولانا فضل الرحمن دی جہناں دی شہرت کوئی چنگی نہیں اے تے اوہ JUI اک مذہبی تنظیم دی نمائندگی کردے نیں’ اوہناں سنے پاکستان دی چھوٹی وڈی ساری سیاسی جماعتاں جہناں وچ زیادہ تر جماعتاںاتے نیب وچ کیس چل رہے سن اوہ اکٹھے ہو کے PDMاک پلیٹ فارم اتے وزیراعظم عمران خان دے خلاف صف آرا ہو گئے تے ساڈے تن سال تک پی ڈی ایم دے پلیٹ فارم توں اوہناں دے خلاف تحریک جاری رہی جد کہ وزیراعظم عمران خان نے ذوالفقار علی بھٹو وانگوں امریکن تسلط توں نکلن تے اک آزاد تے خودمختار خارجہ پالیسی دی گل کیتی تے امریکن حکومت نے اوہناں دی حکومت نوں سٹن دی سازش دا آغاز کر دتا۔ امریکہ نے پاکستان دے سیاستداناں تے ادارے’ میڈیا دے ذریعے پاکستان وچ عدم اعتماد لیان دا منصوبہ بنایا۔ اوہدا دوجا ریزن عمران خان دا دورہ روس سی۔ ایس طرح اپریل 2022دے پہلے ہفتے وچ امریکن سازش کامیاب ہو گئی تے بدقسمتی وقت پاکستان اک واری فیر سیاسی عدم استحکام دا شکار ہو گیا تے موجودہ وزیراعظم جہڑا کہ آپ وی ارباں دے فراڈ وچ ملوث اے تے ضمانت اتے اے اوہنے پوری قوم نوں پیغام دتا کہ تسیں بھکاری قوم او تے بھکاریاں تے غلاماں دی کوئی چوائس نہیں ہوندی۔ گویا اوہناں دا پیغام سی کہ امریکن غلامی ای پاکستان دی بقا اے۔ بہرحال ایس طرح پاکستان اج فیر اک ایسے چوراہے اتے کھڑا ہے جہدا ہر رستہ غلامی تے یا فیر خونی انقلاب ول جاندا نظر آ رہیا اے۔ 25مئی 2022اک واری فیر پاکستان دے عوام تے امریکن غلاماں جہناں وچ سیاستدان’ ادارے’ میڈیا تے بیورو کریسی ہن آمنے سامنے کھڑے نیں’ کیہ ہووے گا۔ ادارے جت جان گے؟امریکہ جت جاوے گا؟ یا فیر پاکستان دی اک دھی چوک چوراہے اتے ننگے سر کھڑی بے بسی دی تصویر بنی آکھ رہی ہووے گی کہ مینوں کسے دشمن کولوں نہیں اپنیاں کولوں بچائو!! تے میرے پیراں وچ پئی ایہناں زنجیراں نوں کون اتارے گا؟ 75 ورھیاں مگروں اک واری فیر اوہ آزادی دا سفنا ویکھ رہی ہووے گی۔ کیہ اسیں فیر آزاد ہونااے۔ امریکن کولوں یا فیر امریکن گماشتے دو خانداناں کولوں لیکن کیہ ایسا ہووے گا؟ تے کون کرے گا؟
ماتھے پہ تیرا یہ آنچل تو بہت خوب ہے لیکن
تو اگر اس سے اک پرچم بنا لیتی تو اچھا تھا

اپنا تبصرہ گھلو