طارق عزیز نوںساڈا سلام

Roheel Akbar

مجید امجد’ منیر نیازی تے میرے شہر ساہیوال دے رہائشی میرے مادرعلمی گورنمنٹ کالج ساہیوال توں پڑھے ”دیکھتی آنکھوں اور سنتے کانوںکو سلام ” کرن والے طارق عزیز نوں اج ساڈا سلام جہناں نوں ساڈے کولوں وچھڑے پورے دو سال گزر گئے ایہہ تے بھلا ہووے جرنلسٹ اینڈ ٹریڈرز فورم دا کہ اوہ کسی دی یاد دا سلسلہ جان نہیں دیندے۔ ایس فورم دے صدر فاروق آزاد مال روڈ اتے نقی مارکیٹ وچ کدی سالگرہ دا کیک کٹ رہے ہوندے نیں تے کدی کسی لئی قاری خالد محمود دے نال رل کے دعائیہ تقریب کردے رہندے نیں۔ طارق عزیز اوہ سچے’ کھرے تے محب وطن پاکستانی سن جہناں دے والد نے 1936 وچ اپنے نام دے نال پاکستانی لکھنا شروع کر دتا سی تے طارق عزیز وی 28 اپریل 1936 نوں جالندھر دے پنجابی ارائیں خاندان وچ پیدا ہوئے۔ تہاڈے والد دا نام میاں عبدالعزیز پاکستانی سی۔ اوہناں نے اپنی شروع دی تعلیم جالندھر وچ حاصل کیتی تے 1947 وچ اوس ویلے دے منتگمری شہر ہن ساہیوال وچ ہجرت کر گئے جتھے اوہناں نے گورنمنٹ کالج ساہیوال توں گریجویشن کیتا۔ طارق عزیز پاکستان ٹیلی ویژن دے میزبان’ شاعر تے فلمی اداکار سن جہڑے پی ٹی وی دے کوئز شو نیلام گھر توں شہرت دی بلندیاں تک پہنچے جہڑا پہلی واری 1974 وچ نشر ہویا مگروں اوہدا نام بدل کے طارق عزیز شور تے فیر بزم طارق عزیز رکھیا گیا۔ اوہ پاکستان ٹیلی ویژن اتے نمودار ہون والا پہلا چہرہ وی سن تے اوہ 1997 تے 1999 دے درمیان پاکستان دی قومی اسمبلی دے رکن وی رہے سن۔ اوس الیکشن وچ اوہ پچھلے وزیراعظم عمران خان دے مقابلے وچ 50 ہزار ووٹاں توں کامیاب ہوئے سن۔ طارق عزیز نے 1961 وچ ریڈیو پاکستان توں اپنے کیرئیر دا آغاز کیتا تے جدوں پاکستان ٹیلی ویژن (پی ٹی وی) نے نومبر 1964 وچ لہور توں اپنی ابتدائی نشریات شروع کیتیاں تے عزیز اوہدے اتے نظر آن والے پہلے شخص سن تے پی ٹی وی دے پہلے مرد انائونسر بن گئے۔ اوہ اپنے کوئز شو نیلام گھر’ طارق عزیز شو تے بزم طارق عزیز دے پلیٹ فارم نوں استعمال کر کے تجارتی کامیابیاں حاصل کرن والے پہلے ٹی وی میزباناں وچوں اک سن۔ اوہناں نے اپنے شوز وچ بہت سارے قابل ذکر دانشوراں’ کھیڈاں دے افراد تے مشہور شخصیات دے انٹرویو کیتے۔ طارق عزیز نے فلمی اداکار وحید مراد تے زیبا دے نال پاکستانی فلماں ”انسانیت(1967)’ ہار گیا انسان’ قسم وقت کی (1969) سنے تقریباً 54 فلماں وچ کم کیتا۔ طارق عزیز کئی ٹیلی ویژنز دے پروگراماں تے مارننگ شوز وچ نظر آئے۔ اوہناں نے خیراتی مقصداں لئی ٹیلی تھون دا وی پربندھ کیتا۔ اوہناں دی فلماں وچوں اک سالگرہ (1969) وی سی جہڑی اک انتہائی کامیاب میوزیکل فلم سی تے اوس فلم نے دو نگار ایوارڈ ز جتے۔ طارق عزیز اپنے کالج دے زمانے وچ طلبہ دی سیاست وچ سرگرم سن تے 1970 وچ ذوالفقار علی بھٹو دی پاکستان پیپلز پارٹی وچ شامل ہوئے۔اوس ویلے طارق عزیز نوں ”فائر برانڈ سوشلسٹ” آکھیا جاندا سی۔ 1996 وچ طارق عزیز نے پاکستان مسلم لیگ (ن) وچ شمولیت اختیار کیتی تے لہور توں پاکستان دی قومی اسمبلی دے رکن منتخب ہوئے۔ اوہ اوہناں سیاسی کارکناں وچوں اک سن جہناں اتے 1997 وچ سپریم کورٹ آف پاکستان دی عمارت اتے حملے دا الزام عائد کیتا گیا سی مگر اک پروگرام وچ اوہ ایس گل دی حلفاً قسم دے چکے نیں کہ اوہناں نوں آخر دم تک ایس حملے دا کوئی علم نہیں سی مگرمگروں اوہ اوہناں کرداراں توں واقف ہو گئے سن۔ اوہناں دا آکھنا سی کہ سیاست بڑی بے رحم چیز اے۔ پرویز مشرف دے دور صدارت وچ اوہناں نے پاکستان مسلم لیگ ق وچ شمولیت اختیار کیتی تے میاں منیر اوہناں دے بہترین دوست سن۔ طارق عزیز سیاست وچ وی دلبرداشتہ ہو گئے تے فیر واپس اپنی دنیا وچ لوٹ آئے۔ اوہ اک انسان دوست’ کتاب نال محبت کرن والے تے شاعری کرن والے بے مثال انسان سن۔ طارق عزیز دے ہاں اک بچہ پیدا ہویا جہڑا فوت ہو گیا۔ اوہدے مگروں تسیں اولاد دی نعمت توں محروم رہے۔ اوہ ایہنوں وی اللہ دی رضا سمجھ کے شکر ادا کردے رہے۔ اوہناں نے اپنی ساری دولت پاکستان دی غریب عوام دے نام کر دتی۔ یقینا اوہ ساڈے ساریاں لئی اک رول ماڈل نیں۔ طارق عزیز پنجابی زبان دے سب توں وڈے محافظ ‘ شاعر تے ادیب سن۔ اوہناں دی کتاباں وچ ہمزاد دا دکھ’ اقبال شناسی’ ہزار داستان (اخبار دے کالماں دا مجموعہ) فٹ پاتھ سے پارلیمنٹ تک شامل نیں جہناں نوں پڑھ کے مزہ آندا اے۔ اوہانں دی حیاتی وچ جدوں کدی ملاقات ہوندی تے اوہناں نال گل بات کرکے طمانیت محسوس ہوندی سی۔ اوہناں دے اندر پاکستان تے پاکستانیاں دا جنا درد میں محسوس کیتا شاید ای کسی ہوروچ ویکھیا ہووے۔ اوہ نہ صرف اپنے شہر’ اپنے دوستاں نال محبت کرن والے سن بلکہ اوہناں نوں اپنے کالج دا زمانہ بہت یاد آندا سی۔ ساہیوال دے سٹیڈیم چوک وچ بیٹھ کے گپاں لانا وی اوہناں نوں ہمیشہ یاد رہیا۔ اوہناں دا انتقال 17جون 2020 نوں 84 سال دی عمر وچ لہور وچ ہویا۔ 16جون 2020 دی رات طبیعت خراب ہون مگروں اک پرائیویٹ ہسپتال وچ داخل کرایا گیا سی مگر جانبر نہ ہو سکے تے خالق حقیقی نال جا ملے۔ اوہناں نوں گارڈن بلاک گاردن ٹائون قبرستان وچ سپردخاک کیتا گیا۔ اللہ تعالیٰ اوہناں نوں جنت الفردوس وچ اعلیٰ مقام عطا فرماوے۔ آمین۔
صدر پاکستان ولوں 1992 وچ قوم لئی خدمات اتے پرائیڈ آف پرفارمنس ایوارڈ دتا گیا۔ 9ویں پی ٹی وی ایوارڈز وچ اوہناں نے 1998 وچ بہترین میزبان دا ایوارڈ جتیا اوہناں دا ای اک شعر جہڑا اوہ اکثر دوستاں دی محفل وچ سنایاکردے سن۔
کہ ہم وہ سیاہ نصیب ہیں طارق کہ شہر میں
کھولیں دکاںکفن کی تو سب مرنا چھوڑ دیں

اپنا تبصرہ گھلو