ڈاکٹر محمد علی دا ”تصوف تے خدمت خلق” بارے لیکچر

Pilac Report

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ ڈاکٹر محمد علی نے ”تصوف تے خدمت خلق” دے موضوع اتے لیکچر دتا،جہڑے حضرت فضل شاہ نور والے دے پتر نیں جہڑے کہ قادریہ سلسلہ دے بزرگ سن اوہناں دا ڈیرہ دھرمپورہ وچ اے۔ اوہناں نے آکھیا کہ ساڈے باباجی فرمایا کردے سن۔ سب توں وڈا کمال تے کرامت مخلوق خدا دی خدمت اے۔ جہڑا ایس رستے نوں اختیار کر لیندا اے اوہدے لئی دین و دنیا دے سارے رستے آسان ہو جاندے نیں۔ کوئی وی تند خو تے متکبر شخص راہ سلوک دا مسافر نہیں ہو سکدا۔ ایس رستے اتے چلن لئی سب توں پہلاں اپنی انا نوں قربان کرنا پیندا اے’ اپنے نفس نوں مارنا پیندا اے۔ اوہناں نے آکھیا کہ ساڈے والد صاحب دے کول اشفاق احمد’ حفیظ جالندھری تے حنیف رامے جئی شخصیات باقاعدگی نال حاضری دیندیاں سن۔ اوہناں نے آکھیا کہ میرے والد نے دنیاوی تعلیم حاصل نہیں کیتی سی۔ ایہدے باوجود جدوں گل بات کردے تے انج لگدا کہ اوہ بہت وڈے عالم نیں۔ اوہناں دے کول جہنا وی علم سی اوہ سارا علم لدنی سی۔ اوہناں نے آکھیا کہ اج ساڈے نوجوان مغربی تہذیب دی تقلید وچ دیوانے ہوئے پھردے نیں حالانکہ خود مغرب اپنی تہذیب توں راہ فرار اختیار کرن دی کوشش وچ اے۔ انسان دی اصل معراج روحانیت اے جہدے توں سکون قلب حاصل ہوندا اے ۔ جہنوں ایہہ حاصل ہو گیا اوہدے نزدیک دنیاوی چیزاں دی کمی یا زیادتی کوئی معنی نہیں رکھدی۔ رب ذوالجلال دی ذات دے علاوہ ایس دنیا دی ہر چیز فانی اے۔ بقا صرف اوس وحدہ لاشریک لئی اے جہدے قبضہ قدرت وچ زمین وآسمان دی بادشاہی اے۔

اپنا تبصرہ گھلو