بلوچی لوک کہانڑیاں رَب ہر چیز تے قادر اے

حضرت موسی ٰ علیہ السلام کیتے جارہئے سن کہ رستے چہ اک مُلا ملیا ہتھ چہ لوٹا پھڑے وضو کرن جارہیا سی ،حضرت موسیٰ علیہ السلام نوں پوچھیا کدھر دا ارادہ اے ؟۔
حضرت موسی ٰ علیہ السلام نیں فرمایا میں اللہ پاک دِی ملاقات نوں جارہیا واں ۔
مُلا صاحب نیں کہیا میں اللہ سُنہڑے دِی عبادت کردا واں نمازاں پڑھدا واں ،روزے وِی رکھدا واں ،اللہ سُنہڑے نوں پوچھی کہ میرا ٹھکانہ
کیڑا اے جنت یا دوذخ ؟۔
حضرت موسیٰ علیہ السلام اَگے ودے ویکھیا کہ اک فقیر رستے چہ بیٹھا پنگ پی رہیا اے ہور ہوش چہ نیں فقیر نیں پوچھیا ،اے موسی ٰ علیہ السلام
کیتھے جارہیا اے؟۔
حضرت موسیٰ علیہ السلام نیں فرمایا ۔ میں اللہ پاک نال ملاقات کرن جارہیا واں ۔
اُوس فقیر نیں کہیا میری خواہش اے کہ تو میرے بارے معلومات کریں کہ میںجنت چہ جائواں گا یا دوذخ چہ ؟۔
حضرت موسیٰ علیہ السلام اَگے تشریف لے گئیے تے اِک خشک تے ویران میدان چہ اک ہرن نظر آئیی جیڑی اک لت توں وِی لنگڑی سی ،ہرنی نیں حضرت موسیٰ علیہ السلام توں پوچھیا ،سرکار کدھر تشریف لے جارہئے او؟۔
حضرت موسیٰ علیہ السلام نیں فرمایا ،میں اللہ سہنڑے نوں ملن جا رہیا واں ۔ہرن بولی میں پیاس نال مر رہیی واں بارش ہو جائوے تے میں رج کے پانی پیئا گی تسی اللہ پاک نوں پوچھنا کہ بارش کدو ہوئوے گی؟۔
حضرت موسیٰ علیہ السلام تھوڑا ہور اَگے گئے کہ رستے چہ اک سَپ ملیا سَپ نیں پوچھیا ،اے اللہ دے پیغمبر کدھر تشریف لے جارہے او ؟۔
حضرت موسیٰ علیہ السلام نیں دسیا کہ میں اللہ پاک دِی زیارت نوں جا رہیا واں سَپ نیں پوچھیا میرے سر چہ زہر بہت زیادہ جمع ہوگئیا اے مینوں اجازت دیو کہ کسی نوں کٹ لا تاکہ میرا زہر کھٹ ہو جائوے۔
حضرت موسیٰ علیہ السلام اللہ رب العزت جل شانہ ھو دے حضور پیش ہوئوے تے سب تو پہلاں مُلا دے بارے عرض کیتا کہ او کہہ رہیا اے میں نماز ،روزہ، عبادات وغیرہ کرداواں میرا ٹھکانہ کیڑی جگہ اے؟۔
اللہ پاک جل شانہ ھو نیں فرمایا ،اُوھدی جگہ دوذخ اے۔
فیر فقیر دا سوال دھرایا ،کہ او نشے چہ دُھت پیا ہویا سی ہور اے سوال کر رہیا سی ،اللہ پاک نیں فرمایا ،اُونہوں کہی تیرا ٹھکانہ جنت چہ اے۔
حضرت موسیٰ علیہ السلام نیں حیرانی نال پوچھیا ،یااللہ اُومُلااینا عبادت گذار اے اُوھدا ٹھکانہ دوذخ اے ہور فقیر نشی اے پنگ پینادا اے تے اُھدا ٹھکانہ جنت اے اے کِی ماجرا اے؟۔
اللہ پاک نیں فرمایا تو واپس جاکے مُلا نوں کہی کہ میں اَج اِک عجیب چیز ویکھی ایکہ اک سو اُونٹ بعمہ اپنے تے لدے ہوئوے سامان دے نال میں اک سوئی دِی سوراخ چوں گذردے ویکھے نیں ،مُلا تیری گل تے اعتبار نیں کرئے گا او کہے گا تو جھوٹ بولدا اے ایس لئی او دوذخ چہ جائوے گا ،فقیر نوں وِی توں ایہی گل کہی او تیری گل من لے گا ہور تیری گل دِی تائید وِی کرے گا او جنت چہ جائوے گا ،خدا دِی قدرت نوں فقیر منے گا پر مُلا نیں منے گا او رد کردے گا۔
فیر حضرت موسیٰ علیہ السلام اُوس ہرن جیڑی تن سال توں پیاسی اے اُھدا سوال پوچھیا کہ بارش کدوں ہوئوے گی؟۔
اللہ پاک نیں فرمایا ست سال بعد بارش ہوئوے گی فیر رج کے پانی پی لیں ایس توں بعد سَپ دے سوال بارے پوچھیا کہ سَپ کہندا اے کہ زہر بہت زیادہ جمع ہوگیااے کینوں کٹا؟۔
اللہ پاک نیں فرمایا کہ اُونہوں کہی فلاں جگہ تے اک پالئیی اے اک اُوھدی ماں اے تے اک او اے تو اُوس پالئیی نوں کٹ لے۔
حضرت موسی ٰ علیہ السلام واپس تشریف لائیے تے ویکھیا کہ سَپ رستے چہ انتظار کرہیا ایسَپ نیں پوچھیا اے اللہ دے نبی دس مینوں اجازت مل گئی اے کسی نوں کٹن دی ،حضرت موسیٰ علیہ السلام نیں فرمایا فلاں جگہ تے اک پالئیی رہندا اے توں جاکے اُونہوں کٹ لے۔
اَگے ودھے تے ویکھیا کہ اُوہی لنگڑی ہرن کھڑی اے ہرن نیں اپنے سوال دا جواب منگیا تے حضرت موسیٰ علیہ السلام نیں فرمایا کہ ست وریاں بعد بارش ہوئوے گی فیر توں رَج کے پانی پئیی لیی ۔ہرنی خُشی نال جھلانگاں مارن لگی کہ بیشک میرا اللہ ای سنن والااے اُوسی ویلے بارش ہون لگی ،ہرن نیں رَ ج کے پانی پیتا اَگے ودھے تے ویکھیا کہ فقیر وِی رستے چہ کھڑا اے فقیر نیں پوچھیا ، حضرت موسیٰ علیہ السلام نیں فرمایا ،میں تیرے سوال دا جواب بعد چوں دا ںگا پہلے اے گل سن جو کجھ میں اَج اپنیاں اکھیاں نال ویکھیا اے ؟۔
فقیر نیں پوچھیا کِی ویکھیا اے تسی؟۔
حضرت موسیٰ علیہ السلام نیں فرمایا ، میں اک سو اُونٹاں دِی لمبی لائن ویکھی جیدے تے سامان وِی لدیا ہویاسی او سب کجھ اک سوئی دِی نوک چوں گذر رہئے سن ، فقیر نیں کہیا تو سو اُونٹویکھے نیں جیڑے سوئی دِی نوک توں گذر رہئے نیں جے اللہ ایس ساری کائنات نوں وِی سوئی دِی نوک توں گذار دیوئے تے او ایدھی قدرت رکھدا اے او قادر مطلق اے ہر چیز تے قادر اے ایدھے چہ کوئی شک والی گل نیں اے ۔
حضرت موسیٰ علیہ السلام نیں فرمایا تیری جگہ جنت اے اے اُوس سہنڑے رب دا فیصلہ اے ۔ایس توں بعد حضرت موسیٰ علیہ السلام اَگے ود گئے۔
مُلا وِی انتظار چہ سی مُلا نیں اپنا سوال پوچھیا ،حضرت موسیٰ علیہ السلام نیں فرمایا ترے سوال دا جواب میں فیر دیوا گا پہلے اے سن جو میں اَج ویکھیا اے۔میں ویکھیا اے کہ اک سو اُونٹاں دی لمنبی لائن اے اُونہاں تے سامان وِی لدیا ہویاں اے ہور او اک سوئی دِی نوک تو گذر رہے نیں ۔
مُلا نیں جلدی نال کہیا بھلا اے وِی کدی ممکن اے کہ سو اُونٹ سوئی دِی نوک چوں گذر سکن میںنیں مندا،اے جھوٹ اے۔