دو ہزار وپیے دے فضائل

بھاویں شہبازشریف دے خلاف اہم گواہ ملک مقصود دی موت نے نظام تے رکھے یقین دے اک ہور پتھر نوں ہٹا دتا اے پر ستم ظریف اجہے حالات وچ وی شغلیہ خبراں لے کے آندے نیں۔ بڑے دناں بعد دوستاں دی منڈلی سجی سی۔ اکثر تخلیقی صلاحیتاں دے مالک۔ اک چیلنج سامنے رکھیا کہ فرض کرو اوہناں نوں حکومت دو ہزار روپیے دیوے تے اوہ ایس خزانے نوں کس طرح خرچ کرن گے۔ اک بولیا میں ایہدے تے نظم لکھاں گا۔ دو ہزار کی محبت، ادھار کی محبت، بیکار کی محبت، اغیار کی محبت۔ دوجے نے کہیا: اک ناول لکھاں گا دو ہزار فریب، موضوع تے بہت وڈا اے دو ہزار فریب اک بندہ تے نہیں دے سکدا پوریاں یاراں جماعتاں ملانیاں پیندیاں نیں اک توں ودھ کے اک فریبی جمع کرنا پیندا اے۔ انج دیاں پھپھے کٹنیاں ٹیم وچ شامل کرنیاں پیندیاں نیں جو اسمان دا ٹکڑا زمین تے تے زمین دی ٹاکی اسمان تے لا سکن جو جھوٹ بولن تے سچ لگے جو ستم کرن تے کرم لگے۔ کجھ دوست تے سنجیدہ ہو گئے۔ غلام حسین دو ہزار تے دو ہزار لعنتاں بھیج رہیا سی۔ مزمل دی اکھاں وچ غیریقینی پن ویکھیا۔ شاہد دا دل کر رہیا سی دو ہزار دی محبت وچ مٹھیائی ونڈے۔ ایہ لوک دو ہزار دے فضائل دسدے ہوئے ساڈیاں اکھاں کھول رہے سن۔ گھیو تے کوکنگ آئل دی قیمت دو مہینے دوران یوٹیلیٹی سٹوراں تے دونی ہو گئی اے۔ دالاں دے فی کلو مُل 30 روپیے توں 70 روپیے کلو تک ودھ گئے نیں۔ چاول دی فی کلو قیمت وچ 50 توں سو روپیے وادھا ہو گیا اے۔ پٹرول دے مُل 60 روپیے ودھ گئے نیں ہور پنجی روپیے ودھن دی افواہ اے۔ لہور توں اسلام آباد دا کرایہ 1250 توں ودھا کے 2000 کر دتا گیا اے۔ شہر وچ بساں ختم کر دتیاں گئیاں نیں۔ پٹرول تے چلن والیاں ٹیکسیاں تے رکشیاں دے کرائے خوفناک حد تک ودھ گئے نیں۔ دو ہزار روپیے کدھروں مل جان تے ایس مہنگائی دا مقابلہ کرن دے قابل ہو سکیے۔
رائے ونڈ روڈ تے اسیں واپسی لئی ایل ڈی اے ایونیو ون دے سگنل تے ضرور رکنے آں۔ ایتھے کجھ کھسرے بھیک منگدے نیں۔ میں اک نوں کول بلایا۔ پچھیا: دو ہزار روپیے مل جان تے کیہ کریں گی؟ اوہ گی بلان تے خش ہویا۔ سو ضرورتاں نیں’ اینے پیسے تے ساڈے اک ہفتے دے میک اپ تے خرچ ہو جاندے نیں میں کہیا روٹی دی بجائے تینوں میک اپ دی پئی اے۔ اوہنے تڑاخ نال جواب دتا ایہ جو بیگماں ٹی وی تے آندیاں نیں کدی اوہناں دے میک اپ دی قیمت ویکھو۔ مہینے دے لکھاں روپیے خرچ کردیاں نیں۔ اسیں نمانیاں دے تھوڑے جہے خرچ وی تہانوں لوکاں نوں برداشت نہیں۔ اوہناں نوں کدی میک اپ دے بناں ویکھو نریاں چڑیلاں نیں۔ کئی سیانے لوک دو ہزار وچ پرستان دی سیر کوہ قاف دیاں حسیناں نال ملاقات’ سوئٹزرلینڈ دے دورے’ ترکی تے امریکہ دی یاترا’ بیرون ملک توں علاج فراری کار خریدن’ موریشس دا جزیرہ بک کرن تے ایئرلائن خریدن لئی استعمال کرنا چاہندے نیں۔ میرے محلے دے بہت سارے لوکاں وچ عجیب جیہا جوش و خروش پیدا ہو چکیا اے۔ اوہناں لوکاں دا خیال اے منحرف رکن نذیر چوہان ایس واری ن لیگ دے ٹکٹ تے ضمنی الیکشن لڑ رہیا اے۔ سنیا اے رئیل اسٹیٹ توں کافی پیسہ بنایا اے ایسے لئی ساڑھے تن ورھے حلقے وچ پیر نہیں رکھیا۔ ہن ہزاراں روپیے وچ ووٹ خریدن دا منصوبہ اے۔ ایس حلقے توں ایس توں پہلاں پیپلزپارٹی دے اسلم گل قومی اسمبلی دی سیٹ تے نوٹاں نال تریہہ ہزار ووٹ لے چکے نیں۔ مسلم لیگ ن نے ووٹاں دی خریدوفروخت دے ثبوت الیکشن کمیشن نوں دتے سن۔ دو ہزار دا اک ووٹ۔ دو ہزار روپیے بہت وڈی رقم ہوندی اے۔ جہدے کول دو ہزار ہون اوہنوں کئی گارڈ رکھنے پیندے نیں۔ رقم کدی نقدی دی صورت وچ نہیں رکھی جاندی۔ چیک نال ادا ہوندی اے۔ کسے ملک نوں پتہ لگ جاوے کہ پاکستانی اپنے ملک توں دو ہزار روپیے دی منی لانڈرنگ کر رہے نیں تے اوہ فوراً حرکت وچ آ جاندا اے۔ آپ ساڈیاں عدالتاں تے مالیاتی ادارے اوہنوں سزا دین دا انتظام کردے نیں۔
کجھ دن ہوئے وڈا گوشت خریدن گیا۔ قصائی نے دو کنٹینر گوشت بنھ دتا۔ میں ہکا بکا رہ گیا۔ فریج وچ بھلا اینی گنجائش کتھے اے اُتوں چھوٹا جیہا گھر’ ایناں سارا گوشت کتھے رکھاں۔ خیر پچھیا: کنے دا اے۔ دو ہزار دے دیو’ دو ہزار روپیے وچ نیک بخت نے پتہ نہیں کنے سانڈ کوہ کے شاپر وچ پا دتے سن۔ گھر جاندے ہوئے میں گوشت تقسیم کردا گیا دو ہزار روپیے کنے بابرکت نیں۔ میرے دوست عرفان چشتی دا معاملہ تے ہور وی دلچسپ اے۔ اوہنوں حکومت ولوں گھٹ آمدنی والیاں لئی سکیم توں دو ہزار ملے۔ سٹور تے گیا پورے مہینے دا سودا سلف خریدیا’ ویکھیا تے کجھ رقم باقی سی۔ بجلی’ پانی’ گیس دے بل بھر دتے۔ رقم فیر وی ختم نہیں سی ہو رہی۔ ہن موٹرسائیکل لے کے پٹرول پمپ تے چلا گیا۔ ٹینکی فل کروا لئی۔ دو ہزار وچوں پنجاہ روپیے ہن وی اوہدے کول سن کئی مہینے توں بیگم نویں سوٹ دا کہہ رہی سی۔ عرفان چشتی نے دو سوٹ خرید لئے۔ ایس رقم نال گھر آندے ہوئے پنج کلو امب وی خرید لئے۔ کافی دیر توں گڈی ٹریفک جام وچ پھسی سی۔ پتہ لگا کہ اک جلوس جا رہیا اے۔ لوک تھوڑے ای سن اوہ وی پاگل تے جھلے جہے’ اوہناں دے ہتھ وچ بریانی دے ڈبے سن چکن تے چاول دی مہک مصالحیاں نال مل کے اوہناں نوں جیویں جنون وچ مبتلا کر رہی سی۔ ایہ غریب کارکن سن جہناں تے ورھیاں توں قیمے والے نان تے بریانی دا جادو پھوکیا ہویا اے۔ دو انگلیاں چک کے اکھاں نوں پھیلا کے سنجیدہ لہجہ تے اک نعرہ دو ہزار دو ہزار۔ اللہ اوہناں تے رحمت فرمائے۔ چنگے بھلے ہوندے سن۔ برا بھلا سمجھدے سن۔ ہن اوہناں دی جیب وچ دو ہزار دی رقم اے۔ میں اوہناں دی دل شکنی نہیں کرنا چاہندا پر ایہ میرے راہ وچ رکاوٹ بن گئے نیں۔ پتہ نہیں کنی دیر اوہناں دیوانیاں توں راہ لین وچ لگ جاوے۔٭