مشکل نو ں موقع بناو

Qasim Ali Shah'

قاسم علی شاہ

برسات دا موسم سی۔ بدلاں نے اسمان اتے گھنی چادر تان رکھی سی۔ اچانک گھن گرج شروع ہوگئی تے فیر اسمان نے اپنا منہ کھولیا تے جل تھل مچ گیا۔ ساری رات مینہ وسدا رہیا۔ سویرے اٹھ کے لوکاں نے ویکھیا کہ پنڈ دے آخری سرے اتے واقع اک نشیبی پٹی نوں برساتی پانی نے اپنا راہ بنا لیتا اے تے اوہ اک نہر دی صورت اختیار کر گئی اے۔ ویکھن والیاں نے سوچیا کہ چار پنج دناں دی گل ا ے فیر پانی اتر جاوے گا لیکن جدوں پورے ہفتہ مگروں وی پانی دی روانی جاری رہی تے فیر مسئلہ واقعی سنگین صورت اختیار کر گیا۔ کیوں جے پنڈ والیاں دی آمدروفت ایسے پٹی توں ہوندی سی تے ہن نہر بن جان دی وجہ نال زندگی رک جئی گئی سی۔
دریا کنارے اک شخص کھڑا سوچ رہیا سی کہ پنڈ والیاں نے ایس نہر نوں پار تے کرنا ای اے تے ایس ویلے کوئی ذریعہ وی نہیں اے تے کیوں نہ میں اک کشتی دا بندوبست کر کے ایتھے اک چھوٹا جیا روزگار شروع کر لواں۔چنانچہ اگلے دن توں کشتی دی سروس شروع ہو گئی تے دریا پار جان دا مسئلہ حل ہو گیا لیکن کجھ ای دناں وچ اک ہور مسئلہ پیدا ہو گیا۔ سواریاں دی گنتی بوہتی سی تے کشتی اک۔ چنانچہ کشتی والا اک واری فیر متحرک ہو گیا تے آس پاس دے علاقیاں توں اٹھ’ دس ملاحواں نوں لبھیا۔ اوہناں نوں کشتیاں فراہم کیتیاں تے انج اوس Shipping Company دا سی ای او بن کے کم دی نگرانی کرن لگیا۔ اوسے پنڈ وچ اک ترکھان وی موجود سی۔ اوہنے ویکھیا کہ کشتیاں دا کاروبار ودھ گیا اے تے اوہناں وچ آئے دن کوئی نہ کوئی مسئلہ ہوندا رہندا اے تے اوہنے وی دریا دا رخ کیتا تے کشتیاں دی تعمیرومرمت دے نال نال نویں کشتیاں بنان لگیا۔ اوس سارے پس منظر وچ ہوٹل والا وی پچھے نہیں رہیا۔ اوہنے پنڈ دے چار پنج بندیاں نوں اپنے نال رلایا۔ دریا کنڈے اک سوہنا جیا چھپر پا کے میز کرسیاں لائیاں تے Fish Pointبنا کے تازہ مچھلیاں فرائی کر کے ویچن لگیا۔ کجھ دناں مگروں اک انجینئر دی نظر اوس دریا اتے پئی۔ اوہنے سوچیا بھاری سامان دے نال اوس دریا نوں پار نہیں کیتا جا سکدا’ اوہدے اتے پل بنانا چاہیدا اے۔ چنانچہ کجھ ای دناں وچ اوہنے حکومت کولوں ٹھیکہ لیتا۔ سیمنٹ’ بجری’ سریا آ گیا’ بیسیاں دی تعداد وچ مزدور تے راج کم اتے لگ گئے تے مختصر عرصے وچ پل وی بن گیا۔
جولائی دی اک طوفانی رات وچ آن والی طغیانی اگرچہ پنڈ والیاں لئی اک وڈی مصیبت بن گئی سی لیکن جہڑے عقل مند سن تے مشکل نوں موقع بنانا جاندے سن۔ اوہناں نے ایس زحمت نوں اپنے لئی رحمت بنا دتا تے اوہدے پاروں زندگی نوں ہور آسان بنایا۔
تہانوں مارچ 2020تے یاد ہووے گا جدوں دنیا بھر وچ کورونا نے سر چکنا شروع کیتا سی تے فیر اچانک شدت اختیار کر لیتی۔ پوری دنیا لاک ڈائون دی زنجیراں وچ بنھ گئی۔ کاروبار ٹھپ ہو گئے’ انڈسٹریاں بند ہو گئیاں تے نوبت ایتھے تک پہنچی کہ وڈی وڈی کمپنیاں دیوالیہ ہو گئیاں۔ ایس صورتحال نے عام بندے نوں شدید انداز وچ متاثر کیتا۔ ایس اندوہناک صورتحال وچ ہر شخص بوکھلا گیا لیکن فیر جیویں جیویں ویلا لنگھدا گیا تے اوس مشکل نال نبڑن لئی اوہناں دے ذہن وچ مختلف طریقے وی آندے گئے۔ نتیجہ ایہہ نکلیا کہ ہر شخص ای کامرس اتے منتقل ہو گیا تے ایس میڈیم نے کاروبار نوں کئی گنا ودھا دتا۔ رپورٹ ایہہ وی دسدی اے کہ جہناں لوکاں دا کاروبار کوویڈ19توں پہلاں آن لائن دستیاب سی اوہ شدید مالی نقصان توں کافی حد تک محفوظ رہے بلکہ اوہناں نے ایس کٹھن دور وچ وی کافی ترقی کیتی۔
سڑک اتے چلدے ہوئے انسان دے سامنے جے اک وڈا پتھر آ ڈِگے تے اوہ انسان بڑا بے وقوف ہووے گا جہڑا پتھر نوں ٹکراں مار کے رستے توں ہٹانا چاہوے۔ عقل مند انج نہیں کرے گا بلکہ اوہ کوئی متبادل رستہ لبھن دی کوشش کرے گا تے عین ممکن اے کہ دوجے رستے اتے اوہدے لئی بوہتے موقعے تے فیدے ہون۔ ایہو مثال انسان دی زندگی وچ آن والی مشکل دی ہوندی اے۔ شاہراہ زندگی اتے چلدے ہوئے جے تہاڈے سامنے مشکلاں دا اینا بھاری پتھر آ ڈگیا کہ اوہدے پچھے تہانوں کجھ نظر ای نہیں آ رہیا تے ہن تہاڈی عقل تے جذبیاں دا امتحان اے۔ تہاڈا مائنڈ سیٹ ای ہن طے کرے گا کہ تسیں اوس رکاوٹ نوں اختتام سمجھنا اے یافیر اک نویں مرحلے دا نقطہ آغاز۔
دنیا بھر وچ مقبول کتاب The 5 AM Club دا اک بہترین جملہ اے کہ میں آسان زندگی دی خواہش نہیں کردا کیوں جے اوہدے وچ ترقی تے قوت نہیں اے۔ مینوں اک چیلنج والی زندگی عطا کر جہڑی میرے اندر دا بہترین باہر لیاوے تے اوہدے لئی مینوں آہنی عزم دیوے تے مینوں ناقابل شکست بنا۔
مشکلات تے مصائب درحقیقت انسان نوں جنھجوڑن لئی آندے نیں تے ایہدے وچ انسان دی بہترین قابلیت باہر نکلدی اے لیکن ایہہ فیر ہووے گاجدوں انسان Growth Mindset دا حامل ہووے۔ ایسے شخص دی زندگی وچ اختتام نہیں ہوندا بلکہ اوہ رستہ بدل بدل کے اپنی منزل اتے پہنچدا اے۔ اوہدے دل و دماغ اتے مایوسی قبضہ نہیں جماندی۔ ایہدا اپنے آپ اتے تے اپنی ذات اتے مضبوط یقین ہوندا اے تے ایہو یقین اوہنوں وڈی توں وڈی آزمائش وچ وی سرخرو کرا دیندا اے۔
مائنڈسیٹ لئی دو چیزاں بنیادی حیثیت رکھدیاں نیں:یقین تے سوچ۔
تسیں کیہڑے یقین دے حامل او؟ جے تسیں ایہہ یقین رکھدے او کہ زندگی وچ ہر چیز سکھی جا سکدی اے تے تہاڈا مائنڈ سیٹ درست اے لیکن جے تہاڈا یقین ایہہ اے کہ سکھنا اوکھا اے تے فیر تسیں چاہے جہڑا وی کورس کر لوو یا ڈگری لے لوو تسیں زندگی وچ اگے نہیں ودھ سکدے۔ یقین دا اگلا مرحلہ ایہہ اے کہ زندگی وچ آن والی مشکل تے رکاوٹ نوں تسیں Full Stopسمجھدے او یا فیر معمولی جیا سپیڈ بریکر۔ جے معمولی تکلیف اتے وی تہاڈے ہتھ پیر پھل جاندے نیں تے تسیں ہمت ہار جاندے او تے ایہدا مطلب ایہہ ہویا کہ تسیں Fixed Mindset دے حامل او۔ انج دا شخص ہر مسئلے اتے ایہہ فیصلہ کر لیندا اے کہ ہن بس زندگی ختم ہو گئی۔ حالانکہ ایسا نہیں اے۔ رات دے آن دا مطلب مایوسی تھوڑی ہوندی اے!!اوہ تے صبح دے اجالے دا پیش خیمہ ہوندی اے۔
ایہدے برعکس Growth Mindset والا بندہ ہر مشکل وچ وی اپنے لئی موقعے لبھ لیندا اے۔ زندگی دے سفر وچ جے رستے اتے مشقت ہو وی جاوے تے اوہ اوہدے توں گھبرا کے سفر نہیں چھڈدا بلکہ چلنا جاری رکھدا اے۔ گو کہ اوہنوں بوہتا زور لانا پیندا اے۔ اوہدے پسینے چھٹ جاندے نیں تے گیس تن جانیاں نیں لیکن ایس مشکل نوں اوہ اختتام نہیں بلکہ اپنے اعصاب دی مضبوطی دا ذریعہ بناندا اے۔ کیوں جے اوہنوں یقین ہوندا اے کہ زندگی وچ کسے وی مشکل دا مطلب The End نہیں بلکہ ہر مقام توں اگے اک ہور مقام منتظر ہوندا اے تے ذوق سفر نہ ہووے تے جین دامزہ اے تے نہ ای فیدہ۔
مائنڈ دے نال یقین دا اک گہرا تعلق اے۔ انسان دااپنے آپ اتے یقین کہ ہاں میں کر سکنا واں یا فیر کسے استاد یا سینئر دا اوہدے موہنڈھے اتے تھپکی دے کے آکھنا کہ پتر؟ تسیں بہت اگے جا سکدے او دنیا دی اک بہت وڈی طاقت اے۔ Growth Mindsetوالے انسان دے کول Yes, I can دا یقین ہوندا اے تے ایسے پاروں اوہ خود نوں تے دنیا نوں بدل سکدا اے جد کہ Fixed Mindset والا I can`t دے کھوہ وچ قید ہوندا اے۔
دوجایقین ایہہ اے کہ میں جہڑے ایس زمانے وچ موجود آں’ میں ایویں نہیں آیا بلکہ مینوںکسے خاص مقصد دے تحت گھلیا گیا اے۔ انسان دا ایہہ یقین جہنا پختہ ہوندا اے اوہناں ای اوہ زندگی وچ سنجیدہ ہوندا اے تے اپنے مقصد نوں تلاش کرن دی جستجو کردا اے۔
تیجا یقین ایہہ اے کہ غلطیاں دا مطلب سکھنا ہوندا اے۔ ایس دنیا وچ جہنے وی لوک کامیابی دی معراج اتے پہنچے نیں اوہ آخر انسان ای سن تے میں وی انسان آں۔ میں وی جے اپنی غلطیاں دی اصلاح کر لواں تے اوہناں توں ودھ کے کامیاب ہو سکنا واں۔ (Practice) مشق نال ای انسان کمال ول ودھدا اے لیکن جہڑا انسان اپنی غلطی نوں تسلیم نہیں کردا اوہ ترقی وی نہیں کر سکدا۔ دراصل ایہہ اوہدی انا دا مسئلہ ہوندا اے۔ انا اوہنوں آکھدی اے کہ تو بالکل ٹھیک اے۔ تینوں غلطی تسلیم کرن دی لوڑ نہیں یقین۔ جانو!ساڈے معاشرے دا سب توں وڈا مسئلہ غربت نہیں اے بلکہ انا اے۔ ایہہ انا ای اے جہڑی انسان نوں درگزر توں دور تے بدلہ لین اتے اکساندی اے۔ روڈ اتے جاندے ہوئے اوہدی گڈی دے نال معمولی جیا وی کوئی لگ جاوے تے ایہہ ہاتھا پائی تے اوہدی بے عزتی کرنا تے اتر آندا اے تے نوبت وڈے جھگڑے تک پہنچ جاندی اے۔ ایس ساری صورتحال وچ اوہ اپنے ویلے دے نال نال اپنی انرجی تے Emotions(جذبات) نوں وی بے دردی نال ضائع کر دیندا اے تے مگروں اوہدے اتے پچھتاندا اے جد کہ انا توں خالی عاجز انسان نوں اللہ ہمیشہ نوازدا اے۔ صراحی وی پیمانے نوں اوہدوں ای بھریا کردی اے جدوں اوہ سرنگوں ہو جاندی اے۔
مائنڈسیٹ دا دوجا بنیادی رکن سوچ اے۔ ایہہ اوہ خیال ہوندا اے جہڑا انسان دے ذہن وچ خودبخود آندا اے تے دراصل ایہو انسان دی اصلیت ہوندی اے۔ تسیں چنگا سوچدے او’ برا سوچدے او’ اپنے آپ نوں کامیاب سوچدے او یا نکام۔ ایہناں ساریاں دا تعلق ایس گل نال اے کہ تسیں کیہ سندے او’ کیہ پڑھدے تے کیہ ویکھدے او۔ جو وی تہاڈے دماغ وچ In ہوندا اے’ Outوی اوہو ہوندا اے۔ کامیاب ہون لئی ضروری اے کہ انسان کامیاب لوکاں دی کہانیاں پڑھے تے سنے۔ کیوں جے جدوں انسان اپنے جئے انسان نوں کامیاب ہوندا ہویا ویکھدا اے فیر ای اوہدا عزم ودھدا اے۔
المیہ ایہہ اے کہ اج معاشرے وچ ڈی موٹیویشنل سپیکر ز ہر جگہ پائے جاندے نیں تے جہڑا وی انسان کجھ نواں قدم چکنا چاہندا اے ایہہ لوک آکھدے نیں: ایہہ کم تہاڈے بس دا نہیں تسیں کر ای نہیں سکدے تے انج اک انسان دے اچے عزائم مٹی وچ رول دتے جاندے نیں۔ قصہ مشہور اے کہ ڈڈواں دا اک گروپ جا رہیا سی۔ مینہ وسیا سی’ زمین چکڑ نال بھڑی ہوئی سی۔ اچانک اک پھسلیا’ دوجا اوہنوں بچان لئی لپکیاتے اوہ وی پھسل گیا تے کردے کردے سارے ای تھلے کھوہ وچ جا ڈگے۔ ہن ساریاں نے باہر آن لئی زور لانا شروع کیتا۔ اینی دیر وچ جنگل توں دوجے ڈڈو وی آ گئے تے کھوہ دے منڈیر اتے بیٹھ کے اوہناں نوں اوازاں دین لگے۔ کھوہ وچ موجود ڈڈواں نے بڑی کوشش کیتی لیکن اوہ نکل نہیں سکے تے اک اک کر کے واپس پانی وچ ڈگدے گئے لیکن اک ڈڈو ایسا سی جہڑا بار بار کوشش کر رہیا سی۔ اتے والے ڈڈواں نے شور پانا شروع کیتا :توں نہیں نکل سکدا۔ ویکھ باقی سارے وی تھلے پئے نیں’ ایہہ تہاڈے وس دا نہیں اے لیکن ڈڈو مسلسل جدوجہد کر رہیا سی تے اک لمی تگ و دو مگروں بالآخر اوہ کھوں توں نکل آیا۔ باہر موجود ڈڈواں نوں تے چپ لگ گئی۔ اوہناں نے اوہدے کولوں اوہدی بہادری دی وجہ پچھی لیکن سارے ایہہ ویکھ کے حیران رہ گئے کہ اوہ تے بہرہ سی۔
تسیں زندگی وچ اگے ودھنا اے تے آس پاس دی آوازاں اتے دھیان نہ دیو۔ ایتھے ایسی آوازاں گھٹ ای ہون گئیاں جہڑیاں تہاڈا حوصلہ ودھان۔
جیویں دریا وچ تیراکی لئی ضروری اے کہ تہاڈی تیاری مکمل ہووے تے تہانوں تیرنا آندا ہووے ورنہ تسیں منہ زور لہراں دے رحم و کرم اتے ہووو گے جہڑیاں تہاڈی زندگی وی کھوہ سکدیاں نیں۔ ایسے طرح زندگی دی مشکلاں لئی وی تیاری دی لوڑ اے تے اوس تیاری دا نام مائنڈسیٹ اے۔ جے تسیں اپنا مائنڈ سیٹ Growthوالا بنا دتا تے فیر تسیں ہر طرح دے حالات دا سامنا کر سکو گے تے مشکل نوں وی اپنے لئی موقع بنا سکو گے۔

اپنا تبصرہ گھلو