ایمان دی کمزوری، ڈھیٹ پُنا یاں کجھ ہور؟

ڈاڈھی گرمی پاروں شارٹ فال ودھن نال لوڈشیڈنگ وی شدت اختیار کر چکی جہدے تے وفاقی حکومت تے صوبائی حکومتاں نے مارکیٹس رات 9 وجے بند کرن دا حکم دتا تاجراں نے گل منن توں انکار کردے ہوئے احتجاج دا اشارا دتا۔ وجہ کیہ؟ کہ کاروبار تباہ ہو جان گے۔ ایہناں عقلمنداں توں کوئی پچھے کہ تسیں 12 یاں اک وجے دکاناں کھولن دی تھاں 8 یاں 9 وجے دکاناں کھولو’ دکان کھولن دا دورانیہ متاثر نہیں ہووے گا تے ظاہر اے آمدن وی متاثر نہیں ہووے گی۔ ایہنوں ایمان دی کمزوری کہیا جاوے یاں ڈھیٹ پُنا؟ کہ عزت’ ذلت’ رزق تے موت اللہ تعالیٰ دے اختیار وچ اے۔ قرآن ایس گل نوں بار بار دہراندا اے جو گل بار بار دہرائی جاوے اوہدا بنیادی مقصد ایہو ہوندا اے کہ انسان نوں باور کرایا جاوے کہ اوہدے رب دی کیہ منشا اے؟ پر اسیں آں کہ اینی روشن تے واضح نشانیاں دے باوجود حقیقت نوں نہیں سمجھدے۔ افسوس کہ قرآن جناں انسان نوں جھنجھوڑدا اے انسان اوناں ای لاپرواہی دا مظاہرہ کردا اے۔ قرآن دنیا دی سب توں ودھ پڑھی جان والی کتاب اے پر ایہ وی حقیقت اے کہ سب توں ودھ ناسمجھ کے پڑھی جان والی کتاب وی۔ ایہدا عملی مظاہرہ اج کل تاجر برادری ولوں ہو رہیا اے۔
ایہناں دیہاڑیاں ملک وچ اک پاسے ڈاڈھی گرمی اپنے تیور وکھا رہی اے تے دوجے پاسے بدترین لوڈشیڈنگ نے واقعی زندگی دی تلخی نوں ناقابل حد تک ودھا دتا اے۔ ساڈی حکمران اشرافیہ دے نیڑے لوکاں دی کوئی وقعت نہیں۔ پاکستان دے قیام دے نال ای طالع آزماواں نے ایہنوں اپنی گرفت وچ ایس طرح لیا کہ ایہدے قیام دے اصل مقصد نوں ای کنڈ پچھے سٹ دتا۔ ہر کسے نے اپنی ذات نوں ترجیح دتی تے لوکاں نوں اُکا نظرانداز کیتا۔ ایتھوں تک کہ لوکاں نوں قوم بنن ای نہیں دتا گیا۔ ایہو وجہ اے کہ حکمران اپنے آپ نوں اشرافیہ تے لوکاں نوں بھیڈ بکریاں سمجھدے نیں۔ قیام پاکستان دے نال جس اسلامی نظام دی توقع سی تاں جے ہر کوئی اپنیاں خواہشاں تے اسلامی عقیدے دے مطابق حیاتی گزار سکے۔ لوک اجیہا نظام چاہندے سن جہدی جھلک خلفائے راشدین دے نظام وچ آندی اے جہدے وچ خلیفہ وقت اینی تنخواہ دا تقاضا کردا سی جو مدینہ دے کسے مزدور دی مزدوری دے برابر ہووے جد کہ ایتھے حکمران اشرافیہ دی اکثریت مراعات یافتہ طبقیاں تے مشتمل اے ایس لئی ایہناں نے پاکستان لئی اسلامی نظام دی امپورٹڈ جمہوری نظام دا انتخاب کیتا جہدے وچ اوہناں دے مفادات دا تحفظ چھپیا سی پر جمہوریت دے ثمرات دا عشرعشیر وی لوکاں تک نہیں اپڑن دتا گیا۔ ایوب دور نوں پاکستان دی ترقی وچ مثالی کہیا جاندا اے ایہ دور مارشل لاء دا دور سی۔ پاکستان دا پہلا منگلاڈیم ایسے دوروچ 1965ء وچ مکمل ہویا جو دنیا دا چھیواں وڈا ڈیم اے ایوب دور وچ ای 1958 وچ دنیا دا سب توں وڈا تربیلا ڈیم شروع ہویا ایہنے 78ء وچ کم شروع کیتا 82ء وچ مکمل طورتے فعال ہویا۔ ایسے ورھے پاکستانیاں نے پہلی واری لوڈشیڈنگ دا ناں سنیا۔ یو پی ایس یاں جنریٹر توں اودوں تک کوئی واقف نہیں سی۔ اودوں جنرل ضیاء دا مارشل لاء سی۔ اوہناں دا ایہ بیان ریکارڈ دا حصہ اے کہ لوڈشیڈنگ میری زندگی تک جاری رہوے گی۔ ایہ اتفاق اے کہ 1988ء وچ جہاز حادثے وچ اوہ دنیا توں رخصت ہوئے اوہناں دے بعد وی مسئلہ انج دا انج ای رہیا جہنوں بعد دی سیاسی رجیم نے اپنے مالی مفادات دی تکمیل لئی استعمال کیتا۔
ہائیڈرل پاور پلانٹ لان یاں ڈیم بنان دی تھاں تیل تے گیس نال چلن والے پلانٹ لا کے مہنگی بجلی پیدا کیتی گئی۔ ایہدے وچ سیاستداناں دے مفاد دیاں کہانیاں رینٹل پاور پلانٹ تے نندی پور دے ناں توں انصاف دی منتظر نیں۔ ایسے تجربے نوں پچھلے ورھیاں پھر دہرایا گیا جدوں گیس تیل نال چلن والے پلانٹس لا کے اک پاسے گیس دی قلت پیدا کیتی گئی تے دوجے پاسے مہنگے تیل نال مہنگی بجلی بنا کے بجلی انساناں دی پہنچ توں دور کر دتی گئی جہدی آڑ وچ سبسڈی دی مد وچ ارباں روپیے ڈکارے جانے لگے۔ مسئلہ فیر وی حل نہ ہویا۔ دوجا ظلم ایہ کہ ایہناں پاور کمپنیاں نال عجیب معاہدہ ہویا کہ تسیں بجلی گھٹ وی بنائو پر پیسے پورے لوو۔ ایس طرح سرکلرڈیٹ نے رہی سہی کسر کڈھ دتی۔ موجودہ حالات وچ بجلی دی کھپت گھٹ کرن لئی دکاناں رات 9 وجے بند کرن دا فیصلہ ہویا جہنوں تاجر برادری نے منن توں انکار کر دتا حالاں کہ پاکستان اجہے خطے وچ اے جتھے سورج لائٹ سارا سال رہندی اے۔ جے دنیا ایہدے توں استفادہ کر سکدی اے تے اسیں کیوں نہیں۔ ساڈے ایتھے اجہیاں ساریاں کوششاں’ تجربے ماضی وچ وی نکام ہوئے۔ معذرت دے نال کاروباری طبقہ چمگادڑاں تے الوئواں دے گروہ توں لگدا اے جو دن نوں کاروبار کرن دی تھاں رات نوں ترجیح دیندا اے۔ مشہور مقولہ اے کہ چھیتی سونا’ چھیتی اٹھنا صحت دی علامت اے۔ ساڈی تاجر برادری ایہدے الٹ چل رہی اے یعنی چرکا سونا تے چرکا اٹھنا جہدے نتیجے وچ اکثریت دے تے ڈھڈ ودھ گئے نیں تے بلڈپریشر’ شوگر تے دل دا مرض عام اے ایس لئی دکاناں 8 وجے کھولو’ رات 8 وجے بند کرو’ صحت وی برقرار تے سوشل لائف وی بحال پر اوہ جو کہندے نیں کہ اپنے آپ نوں بدلنا اوکھا ہوندا اے ایہو گل اے۔ ایہنوں ایمان دی کمزوری کہوو یاں ڈھیٹ پُنا؟۔٭٭