فقیر میاں رحمت ، حیاتی شخصیت تے تصانیف

کھوئی میاں داموں تے گاموں اچھروال وچ ٹھکانہ
٢٣ سال سالک دی حیاتی گزارن پچھوں مرشد کول حاضری دتی تے اتھوں ہک گھوڑا ملیا تے حکم ملیا گھوڑے تے چڑھ کے اچھروال دے نیڑے ہک تھاہر اے کھوہی میاں داموں تے گاموں دی اُتھے ونج کے ڈیرہ لا لئو۔ داموں تے گاموں اُتھے ہک کھوہ لایا ہویا ہا۔ ایہناں دا طریقہ ایہ ہائی ہک نال دے تھینہہ کجھ منگن پنن ویندا تے دوجھا گھر راہندا۔ ہک دیہیں اللہ دا کرنا انج ہویا ہک بھرا پنن باہر گیا ہویا ھا دوجھا اللہ کول ٹر گیا۔ جدوں دوجھا بھرا ہٹیا تے ویکھیا جے بھائیا پورا ہو گیا اے تاں آکھن لگا بھراوا اٹھی کے ہک وار مل تے سہی۔ جد اوہ ملن کا ن اٹھیا ہک دوجھے دے گل لگے تے اُتھائیں اوہدے وی ساہ مُک گئے۔ ایہناں نوں وکھو وکھ کرن دا ڈھیر سارا ترلا کیتا گیا پر ایہناں نوں وکھرا نہ کر سگے۔
نال دے پنڈ لنگر مخدوم اچ فتویٰ دتا ویندا ھا ایتھے ونج کے اس ویلے دے عالماں کولوں مسئلے دا حل پچھیا تے ایہناں فرمایا ایہناں دوھاں نوں کپ کے وکھرا نہیں کیتا ونج سگدا۔ ایہ شریعت دے وی خلاف اے۔ ایہناں دوہاں نوں ہک قبر اچ رکھ چھوڑو تے انج ای کیتا گیا۔ انج فقیر میاں رحمت نے دسی ہوئی تھاہرے پکا ٹھکانہ کر لیا تے آپ دا جتھے ھن دربار اے اس دے اگوں ہک ون دا رُکھ اے۔ اوہدے تھلے بہہ رب دی عبادت کریندے تے آپ فرماندے کہ اس رُکھ دے تھلے جناب غوثِ اعظم جیلانی تے بادشاہ سلطان دی پالکی لہندی اے۔ ھن اس تھاں دا ناں کھوہی میاں رحمت یا دربار میاں رحمت علی مشہور اے۔
ویاہ تے دھیاں پتر
کھوہی میاں داموں تے گاموں اچھروال وچ فقیر میاں رحمت ہوراں نے ٹھکانہ کر لیا تے آپ نوں مرشد ولوں حکم ملیا فقیر میاں رحمت شادی کر، تاں آپ چپ کر گئے۔ دوجھی وار شادی دا حکم ہویا اس ویلے فقیر میاں رحمت دی عمر ٠٩ سال ھا۔ آپ عرض کردن سائیں میری ھن شادی دی کہڑی عمر اے دوجھی گل ایہ اے جہڑی پچھلے پہرے اولاد ہوسی۔ اس نوں کوئی نہ کوئی عیب ہوسی۔ مُڑ اوہ روٹی ٹکر دے پچھے دھکے کھاسن تاں لوک کیہ آکھسن بادشاہ سلطان دے فقیر دا بالی بچہ کیہ پیا کریندا اے تاں حکم ہویا فقیر توں شادی کر اللہ سوہنا جہڑی اولاد تینوں دیسی اوہ دوجھیاں توں نویکلی ہوسی۔ تے بادشاہ سلطان دے ناں دے صدقے ایہناں کول کائی شئے نہ مکسی۔ انج فقیر میاں رحمت ہواراں ٠٩ سال دی عمر وچ مرشد دی آکھ تے شادی کیتی۔ اللہ پاک نے ہک پتر دتا جہڑا جمدے لا ای بولن لگ پیا کہن لگا فقیر رحمت نوں میرے ساہویں لائے آئو۔ جدوں آپ نوں سدیا گیا تے آپ نے عرض کیتی ، فقیر سائیں ہک نیام اچ اکٹھے دو تلواراں نہیں رہ سگدیاں تاں فقیر صاحب آکھن لگے تسیں اس دنیا نوں چھوڑ دیئو میں تاں ہالیں مرشد دی نوکری کرنی اے۔ اوہ انج اللہ نوں پیارے ہوگئے جہناں دا ناں میاں معصوم علی ھا۔ فقیر میاں رحمت دی اولاد وچ پنج پتر تے ہک دھی ہائی۔
پتراں وچ میاں شیر محمد، میاں سلطان بخش، میاں علی محمد، میاں ولی محمد، میاں نور حسین تے دھی دا ناں شیر بی بی ہائی۔ ایہناں دا ویاہ حضرت سلطان باہو دے سجادہ نشین حضرت نور محمد دے نال ہویا۔ (جاری اے)