”تھوتھا چنا باجے گھنا”

عمومی طورتے سربراہان ملک پائیدار کاروباری معاہدے کرن لئی غیرملکی دورے کردے نیں پر تریخ وچ کالے حرفاں وچ لکھیا جاوے گا کہ اک اجیہا منچلا وزیراعظم وی آیا سی جو وزارت خارجہ نوں فرمائش کرکے صرف سیرسپاٹے لئی غیرملکی دورے کردا سی اوہ ہیلی کاپٹر نوں موٹرسائیکل وانگوں استعمال کرکے پراپیگنڈا کرواندا سی کہ ایہ تے 55روپیے فی کلومیٹر پیندا اے کناں بدقسمت سی کہ جس ملک وی گیا روایتی ریاستی استقبال دے اعزاز توں محروم ای رہیا۔ ایس بین الاقوامی بے نوائی دے سلسلے نے طول پھڑیا تے ریاست چونک اٹھی بعد وچ پتہ لگا کہ ایہ ملک نیازی حکومت نوں نہ منن تے نہ ای اوہدے تے اعتبار کرن لئی تیار نیں سی پیک معلومات خفیہ نہ رکھن دی وجہ نال چین دی پاکستان نال دوری دا تے بچے بچے نوں پتہ چل گیا اے۔ ایہدے باوجود نیازی پونے چار ورھے تک چین نال چنگے تعلقات بارے سفید غلط بیانی کردا رہیا۔ حکومت ڈگن توں کافی پہلاں ای اقتدار دیاں راہداریاں وچ گونجنا شروع ہو گیا سی کہ گھڑیاں تے تحفے ویچن دی احمقانہ تے غیرسنجیدہ حرکتاں دی وجہ نال سعودی عرب تے متحدہ عرب امارات پاکستان توں دور ہو گئے نیں جہدا نتیجہ چنگا نکلن والا نہیں ہر انٹرویو وچ اوہ ”تھوتھا چنا باجے گھنا” وانگوں بولدا رہیا۔ مجال اے کسے نے اوہنوں سمجھایا ہووے کہ بول بچن نہیں عملی کم ای کم آندے نیں۔ اک اک کرکے ملائیشیا’ ترکی ایران’ افغانستان تے امریکہ دے نال کاروباری تے رسمی تعلقات وی اوہدے شوق انٹرویو نوں پیارے ہو گئے اوہدی ہر پریس کانفرنس’ ہر خطاب تے ہر انٹرویو اوہدی سیاسی ناپختگی دیاں پرتاں اتاردے چلے گئے۔ مخالفین لئی کیتی گئی بدزبانی اوہنوں دن بدن تھلے ڈھاندی رہی’ پونے چار ورھیاں وچ نیازی حکومت خارجہ پالیسی دے محاذ تے وی کوئی کمال نہ کر سکی نیازی حکومت تے قریبی دوست ملکاں لئی وی ایس درجے ناقابل قبول ہو گئی کہ اوہناں دے نال وڈا تجارتی معاہدہ سائن کرنا تے دور مفاہمتی یادداشت تے وی دستخط کرنا وی فضول عمل قرار پایا۔
ایہناں حالات وچ ملتان دے بے مزہ حلوے دے ذمے اک ای کم رہ گیا سی کہ امریکی صدر دا فون آنا چاہیدا اے پر بقول شاعر پونے چار سال نرگس اپنی بے نوری پر روتی رہی نہ امریکی صدر دا فون آیا تے نہ مودی نے فون چکیا۔ فرح گوگی’ پیرنی صاحبہ تے دوجے انکشافات دے بعد ریاست نوں مکمل طور تے پتہ لگ چکیا سی کہ نیازی دی ہر ویلے فضول راگنی دی وجہ نال پاکستانی معیشت تے تشخص دوویں تباہی دے کنڈھے تے اپڑ چکے نیں جہدا اپاء کرن لئی کئی ورھے چاہیدے ہون گے۔ معاشی بدحالی دے بعد بین الاقوامی تنہائی نے ریاست نوں نیوٹرل ہون تے مجبور کر دتا جہدے پاروں تحریک عدم اعتماد آئی تے کامیاب ہوئی۔ میاں شہبازشریف دی حکومت ولوں سخت فیصلے کرن تے ہر کوئی دور دی کوڑی لا رہیا اے کہ کیہ لوڑ سی بھنور وچ پھسی حکومتی بیڑی وچ بیٹھن دی؟ اک ورھا ہور اڈیک لیندے تے کیہ جاندا؟ نیازی حکومت نے آئی ایم ایف نال جہڑا معاہدہ کیتا سی اوہدے بعد بجلی’ گیس’ پٹرول دیاں قیمتاں دے نال مہنگائی وچ وادھا ہونا ای سی احتسابی نکامی دا میڈل کمان دے بعد معاشی نکامی دی ٹرافی وی نیازی دا مقدر سی جہدے بعد پوری دی پوری تحریک انصاف دا اپنے آپ تیاپانچہ ہو جانا سی ایس بیانیے تے ہر کوئی اپنی اپنی آزاد رائے دا اظہار کر رہیا اے پر میرا موقف ایہ وے کہ جے گھروچ اگ لگی ہوئی ہووے تے پہلا آپشن ایہہ وے کہ باہر بہہ کے بچ جان دا شکر منائو تے اگ بجھن دا انتظار کردے رہوو بھاویں سب کجھ سڑ کے سواہ ہو جاوے۔ دوجا آپشن ایہہ وے کہ اگے ودھ کے اگ بجھان دا آہر کرو تاں جے نقصان دے حجم نوں گھٹ توں گھٹ کیتا جا سکے میاں نوازشریف دی قیادت وچ مسلم لیگ نے بے حس رہ کے باہر بیٹھن دی تھاں دوجے ہور مشکل ترین آپشن نوں چنیا۔ اپنا سب کجھ داء تے لگا کے میاں نوازشریف نوں وطن عزیز دی خدمت کرن دا فرض سونپ دتا اللہ دے فضل نال میاں شہبازشریف اوہی کجھ کر رہے نیں جہدے نال نہ صرف ملک دیوالیہ ہون توں بچ جاوے گا سگوں ملکی معیشت وی بحال ہو جاوے گی۔
خدا دی پناہ ریاست پاکستان تے بدترین معاشی تباہی مسلط کرن والا شہباز حکومت دے سخت معاشی اقدامات تے تنقید کر رہیا اے اوہ آپ اپنی نااہلی تے ظلم نوں من رہیا اے کہ آئی ایم ایف دے کہن دے باوجود اساں قیمتاں ودھان دی تھاں گھٹ کر دتیاں۔ ایہ سی اوہ بارودی سرنگ جو نیازی وچھا کے گیا مشکل ترین حالات وچ حکومت سانبھ کے وزیراعظم شہبازشریف تے وزیراعلیٰ پنجاب حمزہ شہباز ملک دی خدمت لئی دن رات اک کر رہے نیں۔ اوہناں نے ثابت کر دتا اے کہ ایہ شریف برادران ای سن جہناںنے مشکل وقت وچ وی ملک نوں اکلا نہیں چھڈیا اصل جہاد اوہ ہوندا اے جدوں وطن پکارے تے اوہدے سپاہی سینہ تان کے میدان وچ آجان۔ چین نال معاہدہ ہو گیا جہدے بعد قومی خزانے وچ دو ارب تریہہ کروڑ ڈالر آ جان گے آئی ایم ایف نال وی نہ صرف معاہدہ ہو جاوے گا سگوں اک ورھے دی توسیع وی مل جاوے گی جہدے بعد معاشی قاتلاں دے دلاں تے بجلی ڈگے گی۔ خدا نے چاہیا تے بہت جلد خوشحالی دا نواں سورج نکلے گا ایسے امید دے تناظر وچ مریم نوازشریف بالکل ٹھیک کہندیاں نیں کیتا وی سی تے کرکے دکھاواں گے۔