باکمال لوگ تے عریج السدھن دی اپیل

Roheel Akbar

اسیں اوہ باکمال لوک جہڑے کشکول چک کے منگن وچ لاجواب آں تے اپنا ثانی نہیں رکھدے بلکہ جے ایہہ آکھیا جاوے کہ باکمال بھکاری لاجواب کشکول تے وی برا نہیں کیوں جے ہن دوجے ملکاں والے ساڈی شکل ویکھ کے ای بھانپ جاندے نیں کہ کشکول والے صاحب آ گئے۔ کجھ نہ کجھ تے دینا پووے گا ۔ نہیں یقین تے وزیراعظم دا دورہ چین تے فیر اوہناں دی گل بات سن لوو۔ تسیں حیران رہ جائو گے ہن تے ساڈے دوست ملک وی سانوں بھکاری سمجھ رہے نیں۔ حیران کن گل ایہہ اے کہ خیرات وچ ملن والا پیسہ آخر جاندا کتھے اے۔ غریب بندے کولوں ووٹ لے کے برسراقتدار آن والے اوسے غریب نوں مارن تے ای کیوں تلے ہوئے نیں۔ چین دا ذکر آیا تے ذرا رک کے حیران ہوئے بغیر ایہہ وی پڑھ لوو کہ ساڈی پی آئی اے پہلی انٹرنیشنل ائیر لائن سی جہدے جہاز نے چین دی سرزمین نوں چھویا سی جہدے اتے پورے چین وچ جشن منایا گیا۔ پاکستان نے چین نون تن جہاز ویچے سن اوہناں وچوں اک جہاز مائوزے تنگ استعمال کردے رہے۔ جہڑے جہاز اتے اج وی ”کرٹسی بائی پاکستان” لکھیا اے۔ پاکستان دا ویزہ کدی چین دے لوکاں دی سب توں وڈی خواہش ہوندا سی لیکن اج اوہ چین دنیا وچ ترقی دی انتہا نوں چھو رہیا اے۔ چین 46 ارب ڈالر دے منصوبے لے کے پاکستان آندا اے تے اسیں اوہنوں اپنی تریخ دااہم ترین واقعہ قرار دینے آں۔ چین اگے نکل گیا بلکہ بہت اگے نکل گیا ایتھوں تک کہ ”میڈان چائنا”چن تک وی پہنچ گیا۔ اج دنیا دے وڈے وڈے کارخانے چین وچ نیں۔ مہنگے توں مہنگا موبائل چین وچ تیار ہو رہیا اے۔ اوتھے دے سوا ارب لوکی نہ صرف خوشحال نیں بلکہ اوہ روزگار’ صحت’ تعلیم تے شاندار زندگی وچ دنیا توں دو قدم اگے ودھدے جا رہے نیں تے اسیں ہر لنگھدے دن دے نال دو قدم پچھے کھائی وچ ڈِگدے جا رہے آں۔ ایہناں لوکاں دے لیڈر اپنی قوم دے نال مخلص سن جہناں دی ملک دے نال وفاداری’ ان تھک محنت تے خودداری نے ایہناں نوں دنیا دا سین ترین ملک بنا دتا۔ چین نے کدی دوجی قوماں دے سامنے کشکول نہیں رکھیا تے اسیں اپنے ہتھ توں کشکول کدی ڈگن نہیں دتا۔ اوہ لوک اپنے ملک لئی تن من تے دھن جی جان نال قربان کرن دے ہر ویلے اپنے ملک وچ رہندے نیں جد کہ ساڈی ساری لیڈرشپ اتے کروڑاں نہیں بلکہ ارباں روپے دی کرپشن دے الزام نیں۔ اوہناں دی جائیداداں تے گھر باہر’ بچے باہر تے ہن تے اوہناں دی جڑاں وی ملک توں باہر نیں۔ ایہو وجہ اے کہ اسیں کشکول ہتھاں وچ پھڑے بھیک لین لئی دوجے ملکاں دے محتاج آں۔ اسیں ادھار دی زندگی بسر کرن والے اوہ پاکستانی آں جہناں نوں روٹی وی دوجے فراہم کردے نیں۔ سانوں اج تک قوم بنن ای نہیں دتا گیا۔ کدی فرقیاں وچ تقسیم کر کے سانوں ماریا گیا تے کدی ذات برادری تے لوکل مہاجر دا نام دے کے سانوں برباد کیتاگیا۔ تسیں یقین کرو سانوں 74 سال ہو گئے نیں آزاد ہوئے مگر ذہنی طور تے اسیں اج وی غلام آں تے ایہہ غلامی دا طوق سانوں کسے ہور نے نہیں بلکہ ساڈے کولوں ووٹ لے کے ساڈے اتے مسلط ہون والیاں نے پہنایا اے۔ اپنی جائیداداں ویچ کے الیکشن لڑن والے جتن مگروں کئی گنا بوہتی جائیداداں بنان والیاں دے کول پیسہ کتھوںآندا اے کدی کسے نے حساب نہیں لیتا۔ ایہو وجہ اے کہ اسیں مردار خور تے بھکاری بن چکے آں۔ اسیں کدی افغانستان وچ امریکہ تے روس دی سٹی ہڈیاں چوسنے آں تے کدی ات گردی دے خلاف جنگ دے ڈھانچے اتے بیٹھ کے گوشت نوچدے آں۔ اسیں اج تک خود نوں قوم سمجھیا تے نہ ای قوم وانگوں اپنی نسلاں دی پرورش کیتی۔ اسیں 24کروڑ بھکاری آں تے ہر سال ایہناں بھکاریاں وچ پنج دس لکھ نویں بھکاریاں داوادھا کر دینے آں تے جے اسیں اپنا طر ز عمل نہ بدلیا تے ایہہ وی وڈے ہو کے اپنے بزرگاں وانگوں کشکول لئی بھیک منگن لئی دنیا ول ویکھن لگن گے۔ کاش اسیں اج ای جاگ جائیے۔ اللہ تعالیٰ نے سانوں دنیا دا حسین ترین ملک دتا اے جہڑا گنے دی پیداوار وچ پوری دنیا وچ پنجویں نمبر تے اے تے چینی اسیں باہروں درآمد کرنے آں۔ گندم دی کاشت وچ ساڈا اٹھواں نمبر اے۔ سستی روٹی تے درکنار اسیں گندم وی باہروں درآمد کرنے آں۔ چاول دی پیداوار وچ
اسیں دسویں نمبر تے آں تے کپاس دی پیداوار وچ پاکستان چوتھا وڈا ملک اے مگر اوہدے باوجود شہری با آسانی تن ڈھانپن دا کپڑا نہیں خرید سکدا کیوں جے ساڈے اتے سرمایہ داراں’ منشا’ ریاضا’ جاگیرداراں’ وڈیریاں’ زرداریاں’ ترینیاں’ چودھری’ سومرو’ جتوئی’ شاہ’ ملک’ پیراں’ مجاوراں’ لغاریاں’ مزاریاں’ کھراں’ شریفاں’ نیازیاں’ خاناں’ ن لیگیاں’ گیلانیاں’ چٹھیاں’ اوہناں دے گماشتاں تے مذہبی تے خلائی مخلوق والی اشرافیہ قابض اے ایس لئی تھوڑا نہیں پورا سوچو اوہدے مگروں کرپٹ نظام دے خلاف شعور اٹھ کھڑے ہووو۔ اپنے جئے عام لوکاں نوں ووٹ دے کے اگے لیائو جہناں نوں پروٹوکول دی لوڑ ہووے گی نہ باہر بیٹھے ہوئے بچیاں دی۔ اخیر وچ اک ای میل جہڑی میرے نام لکھی ہوئی سی اوہنوں وی شامل کر لینے آں۔ میرا نام عریج السدھان اے تے میں امریکہ وچ انسانی حقوق دے کارکن دے طور تے تہانوں اپنے بھرا عبدالرحمن السدھن دے بارے لکھ رہی آں۔ عبدالرحمن سعودی عرب وچ ہلال احمر لئی کم کردے سن جہڑا کہ اک عالمی انسانی نیٹ ورک اے۔ 2018 وچ اوہ گرفتاری مگروں غائب ہو گیا تے اوہنوں 3سال تک بغیر کسی الزام دے قید رکھیا گیا۔ مگروں اوہنوں اک خفیہ مقدمے وچ سزا سنائی گئی جد کہ مینوں حراست وچ لیتے جان یا سفری پابندی لائی جان دا خدشہ اے۔ ساڈی آن لائن پٹیشن اتے دستخط کرو تے شاہ سلمان نوں مطالبہ کرو کہ اوہ کارکناں’ انسانی حقوق دے محافظاں تے اوہناں دے خاندان دے افراد اتوں من مانی سفری پابندیاں اٹھان۔ سعودی عرب نے انسانی حقوق دے بین الاقوامی قنون نوں برقرار رکھن دا وعدہ کیتا ہویا اے لیکن اوہدے باوجود بولن والے بہت سارے کارکناں تے اوہناں دے خاندان دے افراد اتے سفری پابندیاں عائد نیں ۔ تہاڈی ہمدردی دی منتظر عری السدھن ‘بھین عبدالرحمن السدھان۔

اپنا تبصرہ گھلو