پاکستان واپس آن دی ہمت توں محروم نواز شریف

اسیں ٹک ٹاک دے دور وچ جی رہے آں۔ تقریباً ہر شخص بے چین اے کہ لوک ایہدے اتے توجہ مرکوز رکھن۔ زندگی معمول دے مطابق گزر رہی ہووے تے ایسی توجہ مگر نصیب نہیں ہوندی۔ کجھ ہٹ کے کرنا پیندا اے۔ا نج کردے ہوئے مضحکہ خیزحرکات سرزد ہو جانا یقینی اے۔ ایسے کارن ٹک ٹاک تے دوجے سوشل میڈیا پلیٹ فارماں اتے 18توں 35 سال دے درمیان والی عمر دے منڈے کڑیاں ای چھائے رہے۔ ویلا گزرن دے نال مگر ہن سترے بترے ہوئے بزرگاں نوں وی خیال آنا شروع ہو گیا اے کہ اوہ وی کسے توں گھٹ نہیں۔ امریکہ وچ اوہناں دی وجہ نال بلکہ Granfluencers دا لفظ وی مشہور ہو رہیا اے۔ مذکورہ لفظ دی تفہیم لئی یاد رکھو کہ سوشل میڈیا اتے چھائے نوجواناں نوں Influencer آکھیا جاندا اے۔ لوکاں دے ذہناں اتے اثر انداز ہون والے انگریزی وچ دادا یا نانا نوں Grand Fatherآکھیا جاندا اے لہٰذا سترے بترے بڈھیاں نے ٹک ٹاک دا رخ کیتا تے Grand دا (D)تے Influenceدا اِن ہٹاکے Fluance دے نال رلا دتا تے انج Granfluencer دی اصطلاح ایجاد ہو گئی۔
مذکورہ بالا تمہید ایس لئی بنھی اے کہ دو دن پہلاں سوشل میڈیا اتے اک تصویر وائرل ہوئی سی۔ اوہدے وچ وطن عزیز دے موثر ترین ذہن ساز صحافی نجم سیٹھی جہناں دی چڑیا اندر دی خبراں لیان دی وجہ نال زبان زدعام اے اک کشتی وچ پچھلے وزیراعظم نواز شریف دے نال بیٹھے سن۔ ایہہ تصویر دیکھ کے گماں ہوندا اے کہ پارٹی ہو رہی اے۔ ایمانداری دی گل اے کہ ایس تصور اتے پہلی نظر پیندے ای میں خوش ہویا۔ زندگی توں لطف اندوز ہونا انسان دا بنیادی حق اے۔ نجم سیٹھی تے نواز شریف مذکورہ حق نوں بھرویں انداز وچ استعمال کردے نظر آئے۔ تھوڑی دیر مگروں میرا ضرورت توں زیادہ جھکی تے اداس ذہن ایہہ سوچن نوں مجبور ہو گیا کہ مذکورہ تصویر ذرا بچگانہ اے۔ ایہناں دونواں حضرات دے بارعب تے سنجیدہ امیج دے نال میچ نہیں کردی۔
مگروں اپنے ٹی وی شووچ نجم صاحب نے تفصیل نال مذکورہ تصویر دا پس منظر بیان کردتا۔ اوہناں دی زبانی پتہ چلیا کہ نواز شریف صاحب دے نواسے تے محترمہ مریم نواز صاحبہ دے فرزندان کیمبرج یونیورسٹی وچ تعلیم حاصل کر رہے نیں۔ اوہ اوہناں نوں ملن یونیورسٹی گئے سن۔ اوس یونیورسٹی دے نال اک دریا بہندا اے۔ اوہدے دونویں پاسے منظر دل موہ لیندے نیں۔ نجم سیٹھی تے نواز شریف کشتی وچ بیٹھ کے اوہناں توں لطف اندوز ہو رہے سن۔ رب کریم دونواں نوں ہمیشہ خوش رکھے۔ زندگی دے مزے لیندے رہن۔
ٹک ٹاک دے علاوہ دورساڈا انھی نفرت تے عقیدت وچ تقسیم دا وی اے۔ کشتی وچ نجم سیٹھی تے نواز شریف نوں بے فکر نوجواناں وانگوں نیم دراز ہوئے ویکھیا تے اوہناں دے نقاد سڑ بَل گئے۔ سستی جگتاں نال دونواں دا مذاق اڈایا۔ گل مگر ایتھے ختم نہیں ہوئی۔ ایس تصویر دے چھپن مگروں نجم صاحب نے اپنے ٹی وی شو وچ پاک امریکہ تعلقات دی داستان چھیڑ دتی۔ اوہنوں سناندے ہوئے ساڈی سرزمین دا ذکر وی ہویاجہڑا 1980 دی دہائی وچ سوویت یونین نوں افغانستان وچ گھیر کے اوس سپرطاقت دی تباہی نوں یقینی بنان لئی بطور اڈا استعمال ہوئی سی۔
تحریک انصاف دے متوالیاں نے نجم صاحب دی سنائی داستان نوں محض تریخ دی یاددہانی دی صورت نہیں لیتا۔ دوجمع دو دا کلیہ استعمال کردے ہوئے بلکہ طے کر دتا کہ نجم سیٹھی تے نواز شریف کشتی وچ بیٹھے پاکستان نوں اک واری فیر امریکہ دی خوشنودی لئی بطور اڈا پیش کرن دے منصوبے بنا رہے سن۔ اوہناں دے قائد عمران خان نے جد کہ ایس تناظر وچ Absolutely Not دا اعلان کر رکھیا اے۔ غالباً ایسے کارن بائیڈن انتظامیہ مشتعل ہو گئی۔ واشنگٹن وچ مقیم پاکستانی سفیر نوں دھمکی آمیز پیغام دتا۔ عمران خان اوہدے باوجود جھکن نوں آمادہ نہ ہوئے تے ساڈی قومی اسمبلی وچ بیٹھے چور تے لٹیریاں دے ذریعے اوہناں دے خلاف تحریک عدم اعتماد پیش کراو دتی گئی۔ عمران خان دے لائے ڈپٹی سپیکر قاسم سوری نے مذکورہ تحریک نوں بیرونی سازش قرار دیندیاں ہوئیاں رد کردتا سی۔ ساڈے قومی سلامتی دے اداریاں تے اعلیٰ عدلیہ دے مگر تحریک انصاف ولوں میر جعفر ٹھہرائے افراد نے قاسم سوری دا فیصلہ قبول نہیں کیتا۔ ایس امر نوں یقینی بنایا کہ جہڑی تحریک عدم اعتماد پیش ہوئی اے اوہدے اتے ہر صورت گنتی کروائی جاوے۔ عمران خان صاحب ایہدی وجہ نال وزارت عظمیٰ توں فارغ ہو گئے۔ ہن قومی حمیت دی بحالی لئی جدوجہد وچ مصروف نیں۔
میں مذکورہ تاویل سنی تے حیرت وچ مبتلا ہو گیا۔ بچپن وچ سنی کہانیاں وانگوں ایہہ تاویل سندے ہوئے ہاسا وی آیا تے رونا وی۔ نجم سیٹھی دی رسائی پاکستان ای نہیں امریکہ تے برطانیہ دے طاقتور ترین حلقیاں تک وی پراثر تصور ہوندی اے۔ میرے کو ل ایس ضمن وچ اگرچہ اوہناں دی محدودات عیاں کرن نوں کجھ ٹھوس مثالاں وی نیں۔ اوہناں نوں سنان توں گریز ای بہتر کیوں جے نجم صاحب بہت وڈے بندے ہون توں پہلاں میرے عزیز ترین دوست وی رہے نیں۔ اوہناں دا ٹہکا شہکا برقرار رہوے تے مینوں دلی خوشی ہووے گی۔ نواز شریف دا اپنا عالم ایہہ اے کہ اوہناں دے سگے چھوٹے بھراشہباز شریف ایہناں دناں پاکستان دے وزیراعظم نیں۔ دکھاوے دے چیف ایگزیکٹو ہندے ہوئے وی تاہم اوہ اپنے بھرا دی باعزت وطن واپسی دی راہ نہیں بنا سکدے۔ پاکستان آن دی ہمت توں محروم نواز شریف پاکستان وچ امریکہ نوں اڈے فراہم کرن دا فیصلہ کیویں کر سکدے نیں۔ ایس سوال دا جواب میرا کند ذہن اجے تک لبھ نہیں سکیا اے۔