کشمیر وچ اسرائیلی طرز اتے نسل کشی دی بھارتی پالیسی

Kashmir Report

ایس ویلے بھارت دی حکومت اسرائیلی مشوریاں اتے تے اوہدے طریقے کار اتے عمل پیرا اے۔ا سرائیل جو کجھ مقبوضہ فلسطین وچ کر رہیا اے بھارت نے وی ہن اوہو پالیسی کشمیر وچ اپنانا شروع کردتی اے۔ اسرائیل وانگوں ہن بھارت کشمیر وچ عام مظاہرین اتے وی غداری تے ات گردی دے مقدمہ بنا رہیا اے جہناں نوں بھارت دی دوردراز بدنام زمانہ جیلاں وچ لمے عرصے دی سزا سنا کے بھیجیاجاندا اے۔ نہتے لوکاں اتے براہ راست فائرنگ کر کے اوہناں نوں موت دے گھاٹ اتار رہیا اے۔ جنگجوواں دے نام اتے سیاسی تے سماجی طور تے متحرک نوجواناں نوں فوج نال تصادم دی آڑ وچ شہید کیتا جا رہیا اے۔ ایہ سب کجھ صرف ایس لئی کیتا جا رہیا اے تاں جے کشمیریاں دی جاری تحریک آزادی دا لک توڑیا جا سکے تے اوہناں دی عددی اکثریت ختم کر کے مقبوضہ کشمیر جہڑااک مسلم اکثریتی ریاست نوں کسے نہ کسے طرح ہندو اکثریتی ریاست قرار دیوے تے دنیا دی اکھاں وچ دھول جھونکے۔ صرف ایہو نہیں بھارتی فوج ہن اسرائیل دے فوجی تے انتظامیہ وانگوں علاقے وچ مشتبہ سرگرمیاں وچ استعمال ہون دا الزام لا کے کشمیریاں دے گھراں نوں بارود چھڑک کے تباہ کر دیندی اے۔اوہناں نوں سٹ کے ملیامیٹ کر دیندی اے۔ ہن تک ہزاراں گھراں نوں بمباری کر کے تباہ کیتا جا چکیا اے یا بارود چھڑک کے ساڑ کے خاکستر کیتا جا چکیا اے۔ ایہہ سب اوہو ہتھکنڈے نیں جہڑے اسرائیل مقبوضہ فلسطین وچ استعمال کر رہیا اے۔ ایہہ اک خطرناک طرزعمل اے ایہدے اتے سخت احتجاج کرنا ہووے گا۔
کیوں جے ایہہ انسانی حقوق دی بدترین خلاف ورزی اے۔ ممنوعہ ہتھیار تے کیمیاوی ہتھیار کشمیریاں اتے استعمال کر کے بھارت جہناں جنگی جرماں دا ارتکاب کر رہیا اے۔ ایس مسئلے نوں عالمی سطح اتے اجاگر کر کے بھارتی فاشزم نوں بے نقاب کرنا ہووے گا۔ ورنہ بھارتی استبداد دا خونخوار بھیڑیا یا باڑے وچ بند بکریاں وانگوں کشمیریاں دا قتل عام کردا رہوئے گا تے کوئی وی اوہدا ہتھ روک نہیں سکے گا ۔ جہڑے ملک کشمیر نوں بھارت دا اندرونی معاملہ قرار دیندے نیں خاص کر مسلم ملکاں نوں جھنجھوڑن دی بوہتی لوڑ اے کیوں جے ایہہ تساہل پسندی تے بے اعتنائی لکھاں کشمیریاں نوں مار کے پوری ریاست نوں اک قبرستان وچ تبدیل کر دیوے گی ایس لئی ایس ظلم تے کشمیریاں دی نسل کشی دے خلاف بھرویں آواز چکن تے عالمی سطح اتے تحریک چلان دی لوڑ اے۔
ایہہ اک تلخ حقیقت اے کہ ایس ویلے کشمیر دی جہڑی صورتحال اے اوہدے اتے حکومت پاکستان ولوں اوہ ایکشن نہیں لیا جا رہیا جہدی توقع سی۔ جے بھارتی فوج ایسے طرح روزانہ کدی چار تے کدی چھ کشمیری مجاہداں نوں شہید کردی رہی تے اوہناں بچے کھچے مجاہداں وی چھیتی نامعلوم گمنام قبراں وچ دفن کر کے بھارتی فوج اوہناں دا نام ونشان مٹا دیوے گی۔ انج ایس جاری تحریک نوں ہولی ہولی ختم کرن وچ بھارت سرکار کامیاب ہو سکدی اے۔ ایس ویلے بھارتی حکمران تے بھارتی فوج دے ترجمان تواتر نال روزانہ پریس کانفرنساں وچ کشمیروچ عسکریت پسنداں نوں مارن دی کارروائیاں اتے بڑے فخر نال مسرت دا اظہار کر رہے نیں تے دعوے کر رہے نیں کہ ایہناں تیز رفتار کارروائیاں دی وجہ نال وڈی تعداد وچ جگنجو مارے جا رہے نیں تے جہڑے بچ گئے نیں اوہناں نوں وی چھیتی ختم کردتا جاوے گا۔
ایہناں حالات وچ پاکستان دا فرض ایہہ بندا اے کہ اوہ کشمیر وچ کشمیریاں دی جاری نسل کشی اتے عالمی برادری دی توجہ دواوے۔ ایس مسئلے نوں دنیا دے ہر فورم اتے چکے۔ جے حکومت پاکستان لئی ایسا کرن وچ کوئی عار اے تے فیر حکومت آزادکشمیر نوں اگے کرے۔ اخیر اوہ کس مرض دی دوا اے۔ اوہنوں کشمیریاں دی نمائندہ حکومت قرار دے کے دنیا بھر وچ آزادکشمیر تے پاکستان دے سلجھے پڑھے لکھے کشمیریاں نوں مقبوضہ کشمیر وچ انسانی نسل کشی دا پردہ فاش کرن دی ذمہ واری سونپے مگر ایس کم نوں سیاست رشوت تے اقرباپروری توں بہت دور رکھیا جاوے۔ من پسند نہیں کشمیر دے حقیقی ترجماناں نوں جہناں نوں ملک تے قوم دا درد ہووے پاکستانی سفارتخانیاں دے تعاون نال ای ایہناں ملکاں وچ جا کے عالمی رائے عامہ بیدار کرن د ی ذمہ داری سونپی جاوے۔
ایہہ وفد ہر ملک وچ کشمیریاں نوں نال رلا کے بھارتی سفارتخانیاں تے قونصل خانیاں دے باہر احتجاجی مظاہریاں وچ مقبوضہ کشمیر وچ بھارتی ظلم بے نقاب کرے۔ کشمیردی آئینی حیثیت تے اوہدے اتے بھارتی جبری قبضے دے خلاف دستاویزی ثبوت اوتھوں دے عوام انسانی حقوق دی تنظیماں تے سیاسی تے سماجی جماعتاں تے تنظیماں دے سامنے لیاوے ورنہ کدھرے مقبوضہ کشمیر دی ڈیمو کرافی تبدیل کر کے اوتھے ہندوواں نوں آباد کر کے غیر قنونی شہریت دے کے جے بھارت نے کشمیری مسلماناں نوں اقلیت وچ تبدیل کردتا تے مسئلہ کشمیر ہمیشہ لئی ختم ہو سکدا اے۔

اپنا تبصرہ گھلو