ایہناں بالاں نوں ہمدردی نہیں حوصلہ چاہیدا اے

Wasut Ullah khan

سانوں اپنا آپ ویکھن توں ای ویہل نہیں ایس لئی سانوں آل دوالے رہن والیاں دی گھٹ ای خبر ہوندی اے کہ اوہ کس دنیا وچ جی رہے نیں۔ کدی کدی ایس آل دوالے ول ہمدردی دی اک نظر اٹھ تے جاندی اے پر اگلے ای لمحے اسیں اپنے آپ وچ فیر توں ڈب جانے آں۔ مثلاً امراض چشم وچ مبتلا بندیاں دی فلاح و بہبود بارے تنظیم سیوا دی پچھلے ورھے دی کنٹری رپورٹ موجب پاکستان دی اک فیصد آبادی نابینا پن دا شکار اے تے دنیا وچ موجود نابینا آبادی وچوں چار فیصد تقریباً اٹھاراں لکھ پاکستان وچ اے۔ ایہدے وچوں زیادہ تر متاثرین نوں معقول طبی سہولتاں دی مدد نال سماج لئی کارآمد بنایا جا سکدا اے پر مشکل ایہہ وے کہ امراض چشم دے مراکز تے ماہرین تک پنڈاں دی آبادی دی بڑی گھٹ پہنچ اے تے جہڑیاں عورتاں نابینا پن دا شکار نیں اوہناں نوں تسلی بخش علاج تک رسائی ملن دے امکانات نابینا مرداں دے مقابلے وچ ادھے توں وی گھٹ نیں۔ جد کہ نابینا بالاں لئی تعلیمی سہولتاں نہ ہون دے برابر نیں جے ہے وی تے نیں شہری علاقیاں تک محدود نیں۔ اک تے غربت’ اُتوں نابینا پن تے ایہدے تے سہاگہ کہ دراڈے علاقیاں دی رہائش’ ایس لئی ایہناں بچیاں دی اکثریت لئی ہر پاسیوں انھیرا ای انھیرا اے۔
نابینا کیوں جے چھیتی نظر آندا اے ایس لئی اکثر لوک نس کے اوہدی مدد نوں جاندے نیں۔ گونگا منہ کھولدا اے تے اندازا ہو جاندا اے کہ ایہدے اشاریاں نوں دھیان نال سمجھن دی ضرورت اے۔ اوہ وکھری گل اے کہ بہت سارے لوکاں نوں دیر نال یقین آندا اے کہ ایہ واقعی نابینا یاں گونگا اے ڈرامہ نہیں کر رہیا کیوں جے ہن پیشہ ور بھکاری گروہاں نے معذوری نوں وی ہتھیا لیا اے تے مصنوعی معذور وی پیدا ہون لگ پئے نیں۔ ایس مجرمانہ رجحان پاروں جو واقعی ضرورت مند نیں اوہناں تے وی شک ہون لگدا اے پر بہرے لوکاں دے نال ہور طرح دے مسئلے نیں اوہ ویکھ سکدے نیں’ سمجھ سکدے نیں پر نہ سنن دا کارن بیان نہیں کر سکدے جے اوہ اشاریاں دی زبان جان دے نیں تے سامنے والا تھوڑی دیر تے اوہناں دی گل سمجھن دی کوشش وچ دلچسپی لیندا اے پر کجھ دیر بعد اوہ وی اک کے اپنی راہ لیندا اے۔ ساڈے وچوں کنے جان دے نیں کہ ایس دنیا وچ رہن والے پنج فیصد انسان بالکل بہرے نیں یاں بڑا اُچا سکدے نیں۔ عالمی سطح تے سٹھ ورھیاں توں اُتے دی پنجی فیصد آبادی بہرے پن دا شکار اے۔ پر اوہناں وچوں بہت سارے بزرگ گل کر سکدے نیں یاں کجھ نہ کجھ اپنے بارے دس سمجھا سکدے نیں۔ پر میری توجہ دا مرکز ایس ویلے کرہ ارض دے اوہ ساڑھے تن کروڑ بچے نیں جو پیدائشی بہرے نیں۔ اوہناں نے نہ اپنی ماں دی آواز سنی تے نہ ایہ دس سکدے نیں کہ ایہ جو خوبصورت چڑی سامنے دے رُکھ تے بیٹھی اے کیہ بول رہی اے۔ اجہے پنجاہ فیصد بچے ماڑے ملکاں وچ رہندے نیں۔
اک اندازے موجب پاکستان وچ سکول دی عمر نوں اپڑن والے بہرے بالاں دی گنتی تقریباً دس لکھ دسی جاندی اے۔ ایہناں وچوں صرف پنجاہ ہزار بچے ای کسے نہ کسے تعلیمی ادارے دا منہ ویکھ پاندے نیں۔ سرکاری سکولاں وچ اشاریاں دی زبان جانن والے تربیت یافتہ استاد نہ ہون دے برابر نیں۔ پرائیویٹ سکول ایہناں بچیاں نوں داخل کرن توں ہچکچاندے نیں کیوں جے فیر وکھرے توں سپیشل ٹیچرز تے خصوصی سہولتاں چاہیدیاں نیں تے سو روپیے لا کے ہزار روپیے دا نفع کمان دی دوڑ وچ شامل پرائیویٹ ایجوکیشنل سیکٹر لئی اجہے بچیاں تے سرمایہ کاری سراسر گھاٹے دا سودا اے۔ معروف نجی سکولاں دی کوشش ہوندی اے کہ معذور بچیاں دے والدین نوں کسے نہ کسے بہانے مایوس کرکے جان چھڑا لئی جاوے کیوں جے اہمیت بچے دے مستقبل توں ودھ سکول دی شہرت تے سٹیٹس دی اے۔ رہی گل سرکار دی تے اوہ تے آپ ایناں اُچا سن دی اے تے ایناں گھٹ ویکھ پاندی اے کہ بہرے’ گونگے تے نابینا بالاں دا مستقبل کس گین وچ اے۔ ریاست قنون سازی کرکے فرض کر لیندی اے کہ مسئلہ حل ہو گیا اے۔ گھر وچ وی اکثر بہرے تے گونگے بچے وکھرے رہن تے مجبور ہوندے نیں جے والدین یاں بھین بھراواں وچوں کوئی اک وی اوہناں نوں صرف ہمدردی نال ویکھن دی تھاں اوہناں دی زبان سکھ لوے تے ایہ بچے وی ہولی ہولی روزمرہ دے ضروری بنیادی اعتماد تے گرفت کرکے احساس کمتری نوں جھٹکدے ہوئے زندگی دے ہم قدم ہو سکدے نیں۔
اجہی گلاں نال ایہناں بچیاں نوں اپنے پیراں تے کھڑا کرن لئی گھر والیاں دے دل وچ جو تھوڑی بہت امنگ جاگدی وی اے اکثر دم توڑ جاندی اے۔ نابینا’ بہرے یاں گونگے بچے جے کسے نہ کسے طرح سماج تے سرکاری رکاوٹاں نال لڑ لڑا کے اپنی قابلیت تے صلاحیت ثابت وی کر دین تے سامنے بیٹھا انٹرویو بورڈ اوہناں دے ارماناں دی کمر توڑن لئی تیار ہوندا اے۔ اسیں تہاڈیاں صلاحیتاں دی قدر کرنے آں پر کیوں جے ایہ ذمہ داری والا کم اے ایس لئی تسیں شاید ٹھیک طرح نہیں کر سکو گے۔ تسیں چاہو تے اسیں تہانوں فلاں فلاں نوکری دے سکنے آں تے ایہ فلاں فلاں نوکری اکثر تھلے درجے دا کوئی معمولی کم ای ہوندا اے۔ اجہے ماحول وچ ایہ فیصلہ کرنا اوکھا اے کہ نابینا’ بہرے تے گونگے اسیں آں یاں اوہ جو اپنی ایس مشکل توں چھٹکارا پان لئی ہر امتحان چوں گزرن لئی تیار نیں۔ پر اسیں اوہناں نوں ہمدردی تے ترس توں اڈ ضروری حوصلہ تے موقع دین لئی بالکل وی تیار نہیں۔٭٭

اپنا تبصرہ گھلو