بالاں دی حفاظت’ سب دی ذمہ داری

امریکہ دی ریاست میساچوسٹس دے شہر لوول وچ اک افسوسناک واقعہ ہویا جدوں اک تن سالہ بچہ اپنی بے بی سڑ دے مکان توں گواچ گیا۔ مقامی پولیس’ ریاست دی پولیس’ فائر بریگیڈ’ غوطہ خور ٹیم تے عام شہری ساری رات اوہنوں لبھدے رہے تے اگلے دن اوہدی لاش قریبی جوہڑ توں غوطہ خوراں نے لبھ لئی۔ بچے دے والدین اوہنوں نگہداشت کرن والی دے کول چھڈ کے ملازمت تے گئے ہوئے سن۔ ایس توں پہلاں مئی وچ امریکی ریاست ٹیکساس دے اک ایلیمنٹری سکول وچ 19 نکے بالاں نوں اک جنوبی بندے نے کلاس روم وچ گولیاں مار کے مار دتا سی۔ ایس واقعے وچ اک ٹیچر بالاں نوں بچاندے جان توں ہتھ دھو بیٹھی۔ ایس واقعے نے اے پی ایس سکول دے سانحے دی یاد تازہ کر دتی جدوں اپنے طالب علماں نوں بچاندے ہوئے اوہناں دی پرنسپل نے اپنی جان وی قربان کر دتی۔
اقلیتاں دی زندگی اجیرن کرن والے ملک بھارت توں اک چنگی خبر’ ریاست چھتیس گڑھ دے اک پنڈ وچ دس سالہ گونگا بہرہ بچہ کھیڈدے ہوئے اپنے گھر دے پچھواڑے اسی فٹ گہرے کھوہ وچ ڈگ گیا تے مقامی بندیاں دی کوشش نکام ہوئی’ ریسکیو دی خصوصی ٹیم سدی گئی۔ تنگ کھوہ وچ پانی دی سطح گھٹ کرن لئی مرکزی واٹرسپلائی بند کر دتی گئی تے آل دوالے دے گھراں دے پانی دے نل تے موٹراں چالو کر دتیاں گئیاں۔ پنج دن بعد برابر توں سرنگ کڈھ کے بچے نوں زندہ بچا لیا گیا جہدی ہمت دی داد سارے دے رہے نیں۔ کجھ مہینے پہلاں مراکش وچ پنج سالہ بچہ سو فٹ ڈونگھے تنگ کھوہ وچ پنج دن تک پھسیا رہیا جہدے لئی دنیا بھر توں لوکاں نے ہمدردی دے پیغامات گھلے پر اوہ امداد اپڑن توں پہلاں جان توں ہتھ دھو بیٹھا ایہدے کجھ ہفتے بعد افغانستان وچ وی انج دا ای اک دلخراش واقعہ پیش آیا جدوں اک چھ سالہ بچہ تنگ گھاٹی وچ ڈگن دے بعد ساریاں کوششاں دے ب اوجود زندہ نہ بچ سکیا۔
ساڈے ملک وچ وی آئے دن اجہے واقعات ہوندے نیں جہدے وچ معصوم جاناں’ ظلم’ زیادتی تے غفلت دا شکار ہو کے زندگی توں ہتھ دھو بیٹھدیاں نیں جد کہ بچیاں تے جسمانی’ ذہنی تے جنسی تشدد دے خلاف آواز اٹھان والے وی گھٹ ای نظر آندے نیں۔ کجھ دیہاڑ پہلاں راولپنڈی دے نیڑے اک قصبے وچ ٹیوشن پڑھان والے درندہ صفت انسان نے دس سالہ بچی نوں جنسی تشدد دا نشانہ بنان دے بعد جانوں مار دتا تے موقعے توں نس گیا۔ بدقسمت بچی دے والد دے بیان دے مطابق پنج بھائی بھیناں وچوں اوہ سب توں وڈی سی تے شام نوں ٹیوٹن پڑھن نیڑلی بیٹھک جاندی سی جتھوں اوہ رات گئے تک واپس نہ پرتی تے اوہدی تلاش شروع ہوئی تے کجھ گھنٹیاں بعد اوہدی خون آلودہ لاش قریبی قبرستان چوں ملی۔ وزیراعلیٰ پنجاب نے ایس دل دہلا دین والے واقعے دا نوٹس لیندے ہوئے مجرم دی گرفتاری تے رپورٹ پیش کرن دے احکامات جاری کیتے نیں جد کہ وکھووکھ سیاسی و سماجی تنظیماں ایس سانحے نوں نظرانداز کرکے دوجے معاملیاں وچ رُجھیاںنیں۔
حال ای وچ لہور دے اک پارک وچ کھیڈدے بچے نوں دو سنگدل بندیاں نے اغوا کر کے والدین توں بھاری تاوان دا مطالبہ کر دتا تے رقم نہ ملن تے بچے نوں قتل کرن دی دھمکی دے دتی ایس کیس وچ عوام تے میڈیا دی توجہ تے پولیس دی ہشیاری نال نہ صرف بچہ بحفاظت بازیاب کرا لیا گیا سگوں مجرم وی اپنے انجام نوں اپڑ گئے۔ دو دن پہلاں گلگت بلتستان دے سیاحتی مقام نلتر جھیل وچ اک بچہ ڈب گیا تے جدوں اوہنوں کڈھیا گیا تے اوہدیاں ساہواں بند سن۔ ایس موقعے تے اک لیڈی ڈاکٹر تے اوہناں دے شوہر جو سیاحتی ٹور تے آئے ہوئے سن اوہناں نے فوراً سی پی آر تے مصنوعی تنفس راہیں اوس بچے دی جان بچائی۔ بچے دے والدین’ مقامی بندے تے انتظامیہ نوں اللہ تعالیٰ دے کرم دے بعد اوس وزیٹر جوڑے دا احسان مند ہونا چاہیدا اے جو اوس ویلے اوتھے موجود سی۔ جرائم’ حادثے تے آفات کدھرے وی ‘ کسے وی ویلے ہو سکدیاں نیں پر جدید ٹیکنالوجی بھرپور تیاری’ بہتر حکمت عملی تے لوکاں دے تعاون نال نقصان نوں گھٹ کیتا جا سکدا اے۔
یو این چارٹر وچ بچیاں دے حقوق دے تحفظ تے بہت زور دتا گیا اے پر بدقسمتی نال تریجی دنیا دے ملکاں وچ گھٹ عمر بچے سب توں ودھ استحصال دا شکار نیں۔ پاکستانی معاشرے وچ وی ودھدی ہوئی گھٹن’ ناانصافی’ معاشی ناہمواری’ وسیلیاں دی تھوڑ تے آبادی وچ وادھے نے بچیاں لئی خطرات ودھا دتے نیں جہدے خاتمے لئی ریاست تے لوکاں نوں رَل کے کوشش کرنی ہووے گی تاں جے ہر بچے تے بچی نوں صحت’ تعلیم’ تحفظ تے بنیادی حقوق برابری دی سطح تے مل سکن۔٭٭