فقیر میاں رحمت ، حیاتی شخصیت تے تصانیف

وصال یا چلانا
فقیر میاں رحمت پہلی ذوالحجہ1329ھ بمطابق ٣٢ نومبر 1911ء کھوہی شرفی سابقہ تحصیل چنیوٹ ضلع جھنگ تے ھن تحصیل لالیاں ضلع چنیوٹ وچ آپ دا مزار لوکاں وچ روحانی فیض پیا ورتاندا اے۔ آپ دے جاون دے چودہ ورہے پچھوں سید امام علی شاہ تے آپ دے دوجھے منن والیاں آپ دی قبر نوں پکا کرن دا فیصلہ کیتا۔ سارا سامان اکٹھا کیتا تے کم دا سر مُڈھ بنن لگدے تاں کوئی بندہ وی اُتاں چڑھ کے کم کرن کان تیار نہ ہوندا۔ چھیکڑ تے گل ایہ مکی جے آپ دا میت چودہ ورہیاں مگروں قبر وچوں کڈھیا۔ روضے دے لمے (جنوب) آلے پاسیوں بوہڑ دے رکھ ہیٹھ رکھیا۔ چودھار خشبو ای خشبو ہو گئی۔ لوک ٹولیاں بنا بنا کے دیدار کرن لئی آون لگ پئے۔ ایہ سلسلہ ٩ مہینے تائیں چلدا رہیا۔ جدوں ایہ خبر ملتان دے انگریز کمشنر تائیں اپڑی تاں اوہ اپنی ٹبری نوں نال رلا کے آپ دے مُکھ دا دیدار کرن لئی آیا تے اپنی ٹبری نوں آکھن لگا سچے پیر تے پادری ایہوں جئے ہوندے نیں۔ اُس ٨ مربے بھوئیں تے سٹھ روپئے مہینے دا وظیفہ بنا چھوڑیا۔ جہڑی برطانیہ سرکار دیندی رہی۔ اسے وجاں پاروں جموں تے کشمیر دی رانی گاگڑا نے وی ڈھیر سارا حصہ لیا۔ مستری جموں وچوں گھلے جہڑے دربار دا کم مکا کے گئے۔
عرس
آپ دا عرس ٠١ صفر، آپ دے مزار تے واقع کھوئی میاں رحمت نزد اچھرال تحصیل لالیاں ضلع چنیوٹ وچ منایا ویندا اے تے اِس ویلے دے گدی نشین صاحبزادہ میاں غلام عباس ہوراں دربار عالیہ کھوئی شریف دا انتظام اپنے ہتھیں کیتا ہویا اے۔
خلافت دا سلسلہ
فقیر میاں رحمت توں روحانی طور تے فیض پاون آلیاں دی گنتری چوکھی ساری اے۔ ایہناں وچوں کجھ ایہو جئے خلیفے وی ہوئے نیں جہناں نوں آپ ولوں خرقہ خلافت ملیا۔ ایہناں ہستیاں بارے جانکاری کجھ انج دی اے۔
صوفی شیر محمد
آپ دا دربار کوٹلی سہچاں بدو ملہی دے نیڑے ضلع سیالکوٹ وچ اے۔ آپ دا عرس ٢٢ جیٹھ نوں منایا یندا اے۔ مرشد بارے اپنی محبت دا اظہار انج کردے نیں:
لکھ ثنا رحمت پیر تائیں جسدے دے نور تھیں رب پہچانیاں میں
راہبر ہو جس دسیا راہ سدھا تائیں رب رسول نوں جانیاں میں
مرشد مہر کیتی تاں میں فیض پایا علی نبیۖ دا نور ُسنجانیاں میں
محمد شیر ڈٹھا دوجہاں اندر تینوں حسن حُسین دا تانیاں میں
سید سوندھے شاہ
ایہناں دا دربار جھنگ تے گوجرہ دے وچکار پھتے پورا ضلع ٹوبہ ٹیک سنگھ وچ اے۔ آپ نے ساری حیاتی مرشد دا ناں چتار کے گزار دتی۔ ایہناںدا عرس ہر ورہے پہلی پھگن وچ ہوندا اے۔ آپ دا اپنے مرشد بارے انج اظہار ملدا اے۔ آپ فرماندے نیں:
بن نقشہ اسم ذات والا
ہتھ پھد مرشد فرمایا ای
نقشہ بھج گیا شیطان پج گیا
نفس قید ہویا پچھو تایا ای
کیتی مہربانی مرشد لاثانی
جدوں ذات نے پھیرا پایا ای
سوہندے شاہ تے فقیر نے کرم کیتا
بانہوں پکڑ مرشد بنے لایا ای
صوفی لال دین
ایہناں دا دربار لنگے شریف تحصیل پسرور ضلع سیالکوٹ وچ اے۔ ورہے وار عرس چیتر وچ لگدا اے۔ (جاری اے)