لوڈشیڈنگ دے خاتمے دی نکامی دا کارن کون؟

سنیا اے کہ دیوار چین ملک دے تحفظ لئی بنائی گئی کہ دشمن روز اوہدی آزادی سلب کر لیندے لیکن کیہ دیوار بنان مگروں چین محفوظ ملک بن گیا؟ پورا ملک ایس دیواردے حصار وچ قلعہ دی شکل اختیار کرن دے باوجود محفوظ ملک نہ بن سکیا کیوں جے اوہدے داخلی رستیاں دے محافظ نااہل تے کرپٹ سن۔ دشمن محفوظ دیوار تے نہ پھلانگ سکیا لیکن اوہناں دے کمزور کردار اوہدا رستہ نہ روک سکے۔ سو نتیجہ کیہ نکلیا حفاظت دیواراں نال نہیں محفوظ کرداراں نال ہوندی اے۔
چینی قوم نے اپنے رہنماواں دی رہنمائی وچ قومی کردار سازی نوں فوقیت دتی۔ایہہ کوئی وڈا معمہ یا پہیلی نہیں جہڑی سمجھ وچ نہ آوے۔ لکھاں دی گڈیاں کروڑاں دے جہاز تے ٹرین جے اَن ٹرینڈ نااہل ڈرائیور دے سپرد کردتے جان تے اوہناں دا حشر اوہو ہووے گا جہڑا ساڈے سامنے اے۔ وڈا کارن مالی وسائل ای نہیں ساڈے خصائل وی نیں۔ کوئی کمائو جنا مرضی کما لووے ناقص مینجمنٹ اوہنوں خوشحال نہیں ہون دیندی۔ اپنی اک عزیز جہڑی کہ بچیاں دی تعلیم و تربیت توں اک چنگا گھر دین لئی بوہتا زور تے محنت کردی ‘ سمجھایا کردا لائق محنتی باکردار تے کمائو جھگیاں توں کوٹھیاں وچ آ جاندے نیں جد کہ نالائق گنوار تے ویلیاں کھان والے کوٹھیاں ویچ کے جھگیاں وچ جا وسدے نیں۔
اج کسے وی مطالبے دا جواب مالی وسائل تے کسے منصوبے دی منصوبہ بندی مالی وسائل دے گرد گھُمدی اے۔ قومی صحت لئی ہسپتالاں اتے ارباں روپے دوائیاں’ آلات ‘ سہولتاں لئی فراہم کر دیو۔ کرپٹ افسران تے ملازمین اوہدے ثمرات عوام تک پہنچن نہیں دین گے؟ اج تعلیم لئی خوبصورت سہولتاں نال مزین عمارتاں تے تعمیر کیتی جاندیاں نیں۔ استاد تے عملہ دی قابلیت اہلیت تے دیانت نوں پیش نظر رکھیا جاندا۔ نویں ہسپتال دوجے اداریاں دی تعمیر توں ودھ بہتر اے۔ اداریاں دی گورننس اتے توجہ دتی جاوے۔ بالکل اوسے طرح لوڈشیڈنگ جئے مسائل وسائل توں ودھ محکمہ دی کالی بھیڈاں نیں جہناں دا کردار تے اخلاق تے مطمع نظر بجلی دے جھٹکیاں نال جیباں بھرنا رہ گیا اے۔
پچھلے دناں توں کجھ متاثرین لیسکو دی مدد کردے ہوئے حیرت دی انتہا نہ رہی کہ اک لائن مین توں لے کے ایکسئین تک اک ظالم پلس افسر توں ودھ اذیت ناک تے خطرناک طاقت بن چکے نیں۔ گھٹ توں گھٹ کوٹ عبدالمالک سب ڈویژن وچ تے ایس نتیجہ اتے پہنچیا کہ اوہناں دا نیٹ ورک بے حد مضبوط تے طاقتور اے۔
دیگ دے کجھ چاولاں وانگوں صرف تن متاثرین دی مختلف نوع دی مثالاں حکام بالا دی نذر نیں۔
1ـ خالد محمود مغل نامی شخص نے اک چھوٹی جئی پلاسٹک انڈسٹری جہڑی اوہنے کرایہ دی جگہ اتے عزیز و اقارب کولوں قرضہ لے کے قائم کیتی۔ کورونا دی وبا نے اوہنوں اک وکھرے امتحان توں گزاریا۔ مزدوراں دے نال خود وی کم کرن نوں عار نہ سمجھیا۔
واپڈا عملہ نے کئی واری کئی بہانیاں نال میٹرک چیکنگ دے بہانیاں نال بجلی چوری کیتی۔ پٹڑی اتے لیانا چاہیاجدوں اوہ ایس عمل دا حصہ نہ بن سکیا۔ زائد بلنگ زائد ریڈنگ وغیرہ دی مار دینا شروع کیتی۔ متعلقہ افسران توں نکامی مگروں وفاقی محتسب صاحب کولوں انصاف یعنی بل وچ ریلیف وغیرہ دا حکم حاصل کیتا۔ متعلقہ ڈی ایف او دے کول گیا تے اوہناں نے انا دا مسئلہ بناندے ہوئے عملہ نوں آکھیا کہ ہن ایہناں دا میٹر کٹ کے ایہناں نوں عدالتاں وچ جان دامزہ چکھائو۔ فیر سول جج صاحب دی عدالت توں وی حکم حاصل کیتا تے دوبارہ فیر وفاقی محتسب صاحب دے کولوں دادرسی دی درخواست کیتی ایہدے باوجود اوہناں دے رحم و کرم اتے نیں ہن اوہناں نوں عملہ دے نال رل کے بجلی چور بننا اے یا کاروبار بند کرنا اے۔
1ـ طاہر نامی اک گھریلو صارف دا میٹر 8جون توں بغیر DCOوغیرہ دے اک میٹر ریڈر نے ادا شدہ بلاں دے باوجود اتار دتا اے۔ تادم تحریر لیسکو لہور توں PROمیڈم افشاں مدثر صاحبہ دی ہدایت دے باوجود اجے تک میٹر نصب نہیں کیتا جا رہیا کہ افسران کولوں احکامات حاصل کرن توں ودھ اہمیت اوہناں دی خدمت اے۔
3ـ مثال اک معزز عمررسیدہ شہری چودھری لال دے نال عملہ دی ناروا سلوک دی اے۔ واپڈا اہلکار دستک دے کے داخل ہوندے نیں کہ تسیں بجلی چوری کررہے او بجلی چور ثابت نہیں کردے بدتمیزی تے بداخلاقی کردے ہوئے جاندے نیں تے بدتمیزی کردے رہے۔
نمبر2تے نمبر3دونویں درخواستاں اتے عملدرآمد کرانا تے درکنار’ درخواستاں پوری کوشش دے باوجود رجسٹرڈ کروا کے ڈائری دا نمبر تک حاصل نہیں کر سکے تے کسے قسم دی انکوائری تے دور دی گل اے۔ کیہ حکام بالا اوہدی تحقیقات کروا کے پورے محکمہ وچ کوئی چیک اینڈ بلینس ایسا سسٹم دا نظام ترتیب دین کے اندروں کھوکھلا ہوندے ایس نظام نوں بچا کے لوڈشیڈنگ وغیرہ دے مسئلیاں اتے گڈ گورننس نال قابو پایا جا سکے ورنہ ساری کوششاں بے سود۔