تبدیلی رجیم تے سقوطِ ڈھاکہ…حیرت انگیز مماثلت

پاکستان ویسے تاں اپنے آغاز توں ای پاکستان دی طاقتور ایجنسیاں دے رحم و کرم اتے چلا گیا سی۔ پاکستان دے عظیم لیڈر بانی قائداعظم نوں کئی گھنٹے فٹ پاتھ اتے ایمبولینس وچ جان بوجھ کے رکھیا گیا تے اوہناں دی موت دی تصدیق مگروں ہسپتال پہنچایا گیا۔ ایس طرح تے ہن لیاقت علی خان دا لیاقت باغ وچ قتل’لگ بھگ گیارہ سالاں مگروں پاکستان وچ ایوب خان دا مارشل لا نافذ کر دتا گیا تے جمہوریت دا سرعام قتل عام کر دتا گیا۔ ایہہ وی کھلی حقیقت اے کہ مشرقی پاکستان دے نال افواج تے مقتدر حلقیاں دی زیادتیاں دی اک لمی لسٹ اے۔ بہرحال ایوب خان دے دور اقتدار وچ مشرقی تے مغربی پاکستان دے درمیان نفرتاں دی خلیج مزید گہری ہوندی چلی گئی۔ بالآخر تقریباً 12سالہ ایوبی دور مگروں اقتدار جرنل یحییٰ دے کول منتقل ہو گیا تے پاکستان وچ اک وار فیر جمہوریت دی صداواں گونجن لگیاں۔ ”کفر ٹوٹا خدا خدا کر کے” تے انتخابات ہوئے تے عوامی لیگ دے سربراہ شیخ مجیب الرحمان مشرقی پاکستان توں تقریباً 107نشستاں اتے جت گئے جدکہ مغربی پاکستان توں جناب ذوالفقار علی بھٹو جہناں نے 92سیٹاں حاصل کیتیاں لیکن جرنل یحییٰ خان تے اوس ویلے دے مقتدر حلقیاں نے رل کے ذوالفقار علی بھٹو نوں اقتدار سونپ دتا تے اوس ویلے دی وڈی پارٹی عوامی لیگ نوں دیوار دے نال لا دتا گیا تے پاکستان وچ لولی لنگڑی جمہوریت دا ڈرامہ رچایا گیا۔ ایس طرح ممکن نہیں سی کہ اک وڈی پارٹی نوں باہر رکھ کے سسٹم چلایا نہیں جا سکدا یا ایسے اقتدار دا عرصہ کسے طور وی بوہتا نہیں ہوندا۔ مگروں عوامی لیگ دے سربراہ شیخ مجیب الرحمان نوں اہلخانہ سمیت قتل کر دتا گیا جہڑا کہ ا نتہائی خوفناک عمل سی۔ بالآخر 16دسمبر 1971 اقتدار دے اک سال تے اک ہفتہ مگروں پاکستان دا مشرقی حصہ جہڑا کہ مغربی پاکستان توں وی وڈا حصہ سی۔ بھارت دے ہتھوں شکست کھا کے 90ہزار توں ودھ فوجی قیدی بنا دیندے نیں۔
تے پاکستان مغربی پاکستان تک محدود ہو گیا۔ تہانوں یاد ہووے گا کہ امریکہ دااک بحری بیڑہ کدی وی نہیں پہنچ سکیا تے امریکن ای درحقیقت مشرقی پاکستان وچ شکست دا پہلا کارن بنے۔ بہرحال گل ہو رہی اے کہ 1979 دے اک فوجی جرنل یحییٰ خان تے سقوط ڈھاکہ وچ کنی مماثلت اے۔ پاکستان جمہوری/غیر جمہوری مارشل لاواں دی زد وچ رینگدا رہیا تے جناب جرنل قمر جاوید باجوہ میاں نواز شریف دے دوراقتدار وچ چیف آف آرمی سٹاف دے عہدے اتے فائز ہو گئے۔ مگروں 2018 وچ انتخابات وچ عمران خان دی تحریک انصاف دی قومی تے تن صوبائی حکومتاں قائم ہو گئیاں۔ یقینا عمران خان دی حکومت وی بیلنس قائم رکھن لئی بنائی گئی لیکن انج محسوس ہوندا اے کہ سازشاں وچ گھڑی اپوزیشن نے عمران خان دی حکومت نوں فیل کرن تے اوہنوں سیاسی منظرنامے توں آئوٹ کرن دی سازشاں وچ مصروف ہو گئے۔عمران خان نوں ٹف ٹائم دین لئی PDMپاکستان ڈیمو کریٹک موومنٹ بنایا گیا تے مولانا فضل الرحمان جہڑے کہ اک اسلامی جماعت جمعیت علمائے اسلام نوں PDMدا صدر بنا دتا گیا تے پاکستان دی تقریباً ساری سیاسی جماعتاںرائٹ لفٹ پاکستان دشمن ‘ افواج دشمن سارے ایہدے وچ شامل ہو گئے تے اک نویں جدوجہد دا آغاز ہو گیا۔جد کہ عمران خان اپنی گورننس نوں بہتر بنان تے پاکستان نوں ترقی دی راہ اتے گامزن کرن وچ مصروف اے جد کہ پتہ چلیا کہ جرنل باجوہ جہڑے کہ بظاہر عمران خان حکومت دے نال نیں لیکن امریکن ایواناں وچ عمران خان حکومت دے خاتمے لئی تیزی نال کم شروع کردتا۔ امریکن سمجھ گئے سن کہ عمران خان اک غیرت مند ضدی تے پاکستان دے مفادات اتے کسی طور سمجھوتا نہیں کر سکدا۔ جد کہ افغانستان توں 20سالہ جنگ وچ حال ای وچ ایہنوں نسنا پیا تے بڑی بے عزتی چکنا پئی اوہ ہن وی انتقام وچ انھے ہو چکے۔ بہرحال عمران دی ساڈے تن سالہ بہترین دور اقتدار دے خاتمہ لئی پاکستان دے سارے مقتدر حلقیاں نے اپنا پورا پورا حصہ پایا تے تقریباً 60 فیصد ضمانتاں اتے رہا قیدیاں دی حکومت قائم کر کے پاکستان دی سب توں وڈی سیاسی جماعت پاکستان تحریک انصاف دا خاتمہ کر دتا تے اوہناں نوں اقتدار توں باہر ای نہیں کیتا جد کہ اسمبلیاں توں وی باہر ہو گئے تے PDMدی جماعتاں نے خود ای اپوزیشن بنا لیتی تے پاکستان الیکشن کمیشن دے کمشنر’ عدلیہ’ میڈیا تے دوجے سارے ادارے بالکل اوسے طرح اکھٹے ہوگئے جیویں یحییٰ خان دے دور وچ ذوالفقار علی بھٹو نوں اقتدار وچ لیان لئی ہوئے۔
ویسے جرنل قمر جاوید باجوہ چیف آف آرمی سٹاف موجودگی وچ اک ایسی حکومت جہدے اتے کسے وی قسم دا کوئی کرپشن دا الزام نہیں سی تے پاکستان دے سارے معاشی اشاریے مثبت جا رہے سن تے پاکستان بڑی تیزی نال ترقی کر رہیا سی لیکن چونکہ امریکن دی خواہش نوں پورا کرنا سی۔ گل ایتھے ختم نہیں ہوئی۔ اک نام نہاد جمہوری قید سیٹ اپ وچ عمران خان جہنوں پاکستان دی کروڑاں عوام نے حمایت کیتی۔ اوہناں نے مقتدر حلقیاں دے نال جمہوری بنیادی حقوق نوں بری طرح پامال کردے ہوئے اوہناں توں احتجاج دا حق وی کھو لیتا تے 25 مئی نوں ہون والی اک احتجاج دی کال اتے ایس نام نہاد جمہوری امپورٹڈ حکومت نے بری طرح چادر چار دیواری دا نہ صرف تقدس پامال کیتا تے 19مئی توں 25مئی تک ہزاراں بے پناہ عورتاں مرداں دی گھراں توں جبری گرفتاریاں دے علاوہ 25مئی نوں پورا پاکستان خود حکومت نے بند کر کے پلس’ رینجرز تے فوج دے ہتھوں تریخ ساز ظلم و ستم کیتا۔ ایتھوں تک کہ اینی آنسو گیس دی شیلنگ کہ گھراں وچ موجود زنانیاں بڈھے’ بچیاں نال ہسپتال بھر گئے۔ بہرحال پاکستان دی عدلیہ خموش تماشائی بنی ر ہی۔ الغرض ساری ملی بھگت کون نہیں جاندا سی۔ انج عمران خان نوں خموش کروان دی سازشاں بام عروج تے پہنچ گئیاں۔ حتیٰ کہ کنٹرول کرن لئی ایہدے قتل دے منصوبے زبان زد عام نیں۔ پتہ چلیا کہ افغانستان وچ کوچی نامی گروپ نوں عمران خان دے قتل دی سپاری وی دے دتی گئی اے۔ موجودہ امپورٹڈ حکومت جہڑی کہ اکثریتی قیدیاں اتے مبنی اے اوہناں نے خود ای اپنے قنون وچ تبدیلی کر کے خود نوں آزاد تے بری کروایا اے تے اوہناں اتے بنے بارہ ارب کروڑ دے کرپشن کیسز خود ای ختم کردتے نیں جد کہ نیب قنون وچ تبدیلی کر کے کرپشن نوں لیگل کر لیتا گیا اے تے پاکستان وچ انصاف دین والے ادارے بڑے سکون نال ایہناں نوں ویکھ رہے نیں تے ٹس توں مس نہیں ہو رہے جد کہ پاکستان وچ اک واری فیر فوج تے عوام دے درمیان ودھن والی نفرتاں تے دوریاں ایس قدر ودھ چکیاں نیں کہ ا یہدا موازنہ مشرقی پاکستان وچ ہون والی زیادتیاں تے نفرتاں مگروں ہویا سی۔ دونوواں وچ مماثلت بڑی واضح اے کہ اوس ویلے جناب ذوالفقار علی بھٹو نوں لیایا گیا تے اکثریتی پارٹی نوں باہر رکھیا گیا۔ اوس ویلے فوجی آمر یحییٰ خان سن تے نتیجہ مشرقی پاکستان ریت وانگوں ہتھوں نکل گیا۔ اج ایہہ امریکن تبدیل رجیم وچ چیف آف آرمی سٹاف جرنل قمر جاویدباجوہ نیں تے بالکل اک اکثریتی پارٹی کولوں اقتدار کھو کے سارے کرپٹ تے قیدیاں دے ہتھاں وچ دے دتے گئے نیں تے اقتدار اتے براجمان کر کے وڈی پارٹی نوں دیوار نال لا دتا اے تے شیخ مجیب الرحمان وانگوں عمران خان دے قتل دی منصوبہ بندیاں ہو رہیاں نیں تے اج ذوالفقار علی بھٹو دے داماد آصف علی زداری نیں جہڑے کہ امریکن رجیم دے روح رواں نیں۔ ویلے دا فرق اے۔ا وتھے مشرقی پاکستان ٹٹیا سی’ ایتھے جہڑے امریکن پروگرام اے اوہدے وچ پاکستان نوں ڈیفالٹ کر کے جوہری اثاثیاں تک رسائی مگروں پاکستان نوں کئی حصیاں وچ تقسیم کرنا شامل اے تے مشرقی پاکستان مگروں مغربی پاکستان نوں شمال تے جنوب توں کڈنا اے جہدے تے پاکستان بڑی تیزی نال عمل پیرا اے تے خوانخواستہ ہدف دے کول اوہناں نے پہنچا دتا اے۔