طبقاتی تفریق تے نا انصافی سماج دی موت اے

مدثر اقبال بٹ

کوئی وی ریاست قانون تے آئین دی حکمرانی توںبنا اپنے پیراں اتے نہیں کھلو سکدی۔اداریاں دی مضبوطی ہووے یا فیر دھرتی دے وسنیکاں دی اپنی اسٹیٹ نال جڑت،ہر شے دا تعلق قنون دی حکمرانی نال اے۔جے کر لوکائی نوں برابری دا احساس رہووے گا تے اوہدا اپنے ملک نال عشق وی اونھاں ای گھوڑا ہووے گا۔ماڑے تے تگڑے وچ فرق جنھاں گھٹ ہووے گا،ریاست اتے اونھاں ای اعتماد ودھے گا۔ لوک اپنی بھکھ رکھ کے وی سرکار دے خزانے نوں خالی نہیں ہون دین گے۔
ایہدے برعکس جے کر ریاست اندر طبقاتی تفریق دی قبر وچ قانون تے آئین نوں دفن کر دتا جاوے گا،تے فیر ریاست دیاں جڑاں تے بنیاداں کھوکھلیاں ہونیاں شروع ہو جان گئیاں۔ہن جے اسی اپنی ریاست دی گل کرئیے تے ایتھے ہمیشہ قانون دی گرفت ماڑے بندے لئی رہی اے۔پھڑیا جاندا اے تے ککڑی چور یا سو پنجاںدی چوری کرن والا ماڑا بندا۔اوہو ای جیلاں اندر سڑدا اے تے عدالتاں سزا وی اوسے نوں سناوندیاں نیں ،جیہدا کوئی والی وارث نہ ہووے ۔تے تگڑیاں دے خلاف تے کیس ای نہیں لگدے۔لگ وی جان تے ثابت کون کرے،مجھاں مجھاں دیاں بھیناںہندیاں نیں۔
ایہناں زرداریاںیا شریفاں چوں کیہڑا اے جنھیں جیلاں کٹیاں؟ایہہ تاں جیل وی فائیو سٹار ہوٹل جیہی کٹدے نیں۔اندر انج جاندے نیں جیویں چھٹیاں منان جارہے ہون۔دوجے بنھے کنھے ای بے گناہ اپنے بے وس ہون دے جرم وچ اج وی جیلاں اندر سڑ رہے نیں۔تے عدالتاں دیاں اُچیاں کرسیاں تے بیٹھے ججاں نوں سیاستاں تے سیاستداناں دیاں جتیاں چکن توں فرصت ای نہیں۔
میں کیوں نہ آکھاں کہ ساڈیاں مقدس عدالتاں وچ انصاف دے نام اتے جیہڑی بے انصافی ہندی اے ،اوس توں وڈا کوئی جرم ہے ای نہیں۔میں جد جیلے موئے بندیاں دی موت توں دو دو،ورھے بعد باعزت بری ہون دیاں خبراں سننا واںتے میریاں اکھاں اگے عدالتاں دے بوہے اگے اکھاں اتے پٹی بنھ کے کھلوتی اوہ مورتی آجاندی اے۔ جیہڑی باوقار تے بارعب ہون دی تھاویں مینوں کجھ ہور ای وکھالی دیندی اے۔فیراوہ اکھاں توں پٹی لاہ کے پیریںگھنگھرو بنھ کے نچدی اے ،سیٹھ پیسہ سٹدے نیں تے سامنے بھوئیں تے بیٹھی نائیکہ گاوندی اے کہ مینوں نوٹ وکھا میرا موڈ بنے۔
سیٹھ تماش بین پیسہ سٹی جاندے نیں، تے نالے جام تے جام چڑھائی جاندے نیں، جیہدے وچ شراب نہیں،اوس طبقے دا لہو ہندا اے جیہدی ہِک اتے انصاف نام دی ایہہ دیوی کنجری بن کے نچدی اے۔
اسی آزاد معاشرے دا خواب ویکھن والے لوک آں ۔جنھاں ہمیشہ اس خواب دی تعبیر ہنجو،ہاڑے تے دکھاں دی شکل وچ ای سیڑی اے۔ایہناں ٹٹیاں خواباں دیاں کرچیاں نے جیویں ساتھوں ساڈی بینائی ہی کھوہ لئی اے۔ہن تے کجھ وی وکھالی نہیں دیندا۔جس پاسے نظر ماریے انج لگدا اے، جیویں تگڑیاں دے مفاداں دی سولی اتے ٹنگے ہوئے ماڑے لوک اپنے آخری ساہ لے رہے نیں۔
ایہناں زندہ لاشاں نوں اپنیاں چنجاں نال نوچدے ایہہ شریف،زرداری،ٹوانے ،مئیں، چودھری،خان، قریشی تے وڈیریاں دا جیویں ڈِھڈ ای نہیں بھر دا۔ایہہ رکشے والے،اِٹاں ڈھون والے،صفائی کرن والے ،مشیناں دا ایندھن بنن والے،روٹی دی اک اک برکی توں لڑن والے لوک ،ایہہ لوک جنھاںدیاں ہڈیاں اتے ساڈی اشرافیہ دی عیاشی لئی عمارت اساری جاندی اے،ایہناں نوں روز مارن دے بہانے بنائے جاندے نیں،تاں جے ایہناں وڈے مردار خوراں دے ڈِھڈ بھرے جان۔ایہناں قاتلاں نوں کدی کسے سزا نہیں دتی،ایہناں نوں کدی کسے نہیں پچھیا کہ قومی خزانہ خالی تے تہاڈے بوجھے ہمیشہ ای کیوں بھرے رہندے نیں۔سچی پچھو تے ایہناں قاتلاں دا سب توں وڈاوکیل ساڈا جیوڈیشل سسٹم اے،جیہدا ڈر، کدی کسے تگڑے نوں نہیں رہیا۔ایتھیحاکم تے تگڑا جو چاہے کرے، تے جیویں چاہے کرے۔اونھوں کوئی پچھن والا نہیں۔قنون وی اوہدا تے قانون نافذ کرن والے ادارے وی اوہدے۔اوہ آوازاں بند کرے یا فیر جِیباں تالووں کھچے،اونھوں پچھن دسن والا کوئی نہیں۔اج دی گل دے اخیر اتے میں آوازاں چپ کران تے جِیباں تالووں کھچن دی نندیا کرن دے نال نال ایہہ وی آکھاں گا کہ عمران ریاض جیہے لوکاں دی گرفتاری نال تسیں کیہ ایہہ سمجھدے او کہ لوکی بولن توںڈر جان گے؟لفظ گونگے ہوکے چپ دی بکل مار کے اپنے ساہ آپے ای گھٹ لین گے؟ایاز امیر جیہے سوجھواناں نوں مار کٹ کے تسیں اوہناںکولوں سچ دی طاقت کھوہ لوو گے یا فیر میرے جیہے بندے نوں ڈرا دھمکا کے اوہ گلاں کروا لئو گے جیہڑیاں میرے ضمیر دی موت نیں؟۔۔۔نہیں بیبا!ایہہ نہیں ہونا۔تسیں قانون تے انصاف نوں کنجری بنا کے نچا لئو یا فیر میرے جیہے لوکاں نوں سولی چاڑھ کے اپنیاں چنجاں نال بوٹی بوٹی نوچ کے ویکھ لئو۔ اسیں سائیں فقیر لوکاں سچ آکھنوںنہیںجے ٹلنا۔ جنھاں فقیراں نوں ضیا تے ایوب جیہے ظالم نیواں نہ کر سکے ،اوہ تہاڈے ایہناں حربیاں نال کیویںڈِگ پین گے۔نہ حرف مرنے نیں ،تے نہ ای آوازاں قید ہونیاں نیں۔تسیں جنھاں مرضی زور لا لئو،فقیراں دے میلے وی سجنے نیں ،تیسچ دے نعرے وی وجنے نیں ۔تسین کنھی دیر تیکر عمران ریاض نوں قید رکھو گے تے ایاز امیر جیہے لوکاں اتے حملے کرائو گے۔اخیر ہار تہاڈی ای ہونی اے۔میں اپنے حساس اداریاں نوں وی آکھاں گا کہ ہن تہاڈا ہور نیوٹرل رہنا نہیں بندا۔ جیہڑے باندر ہتھ ماچس آگئی اے ،ایہہ اپنی پوشل دے نال نال سچ ناں دا رکھ وی ساڑھنا چاوندا اے۔تہانوں وی اپنا کردار ادا کرنا پوے گا،تاں جے ماڑا بندہ مایوسی دی موت نہ مرے۔اوہ اپنی فوج ول ویکھ رہیا اے جیہدے اتے اونھوں اج وی اعتماد اے۔دیس پیارے دی سلامتی لئی ڈھیر دعاواں۔