اس جنم کے ساتھی

tanveer-zahoor

پچھلے مہینے اک خبر میری نظر چوں گزری محمد انور کمبوہ دے خاکیاں تے مشتمل کتاب ”اس جنم کے ساتھی” دی تعارفی تقریب پنجاب انسٹیٹیوٹ آف لینگوئج آرٹ اینڈ کلچر (پلاک) وچ ہووے گی۔ مینوں ایہ ناں جانیا پچھانیا جیہا لگا۔ میں اپنے کالج دے ساتھی رمضان شاہد نال فون تے رابطہ کیتا تے محمدانور کمبوہ دے بارے پچھیا تے اوہنے کہیا کہ ایہ ساڈا 1965ء وچ اسلامیہ کالج ریلوے روڈ وچ کالج دا ساتھی رہیا اے۔ سگوں ایہ میرا کلاس دا تے بنچ دا ساتھی وی سی۔ ایس ناطے میں اوہدے پنڈ وی اک واری گیا۔ اوہدا پنڈ پل شاہ دولہ کامونکی دے نیڑے اے۔ رمضان شاہد نے دسیا کہ کالج دے زمانے وچ اوہنوں لکھن دا شوق نہیں سی۔ رمضان شاہد نال کالج دے زمانے توں لے کے ہن تک دوستی چلی آ رہی اے۔ اوہ ایم اے کرن دے بعد لیکچرر ہو گیا تے بطور پروفیسر ریٹائر ہویا۔ ہن اوہ اپنے ناں توں پہلاں پروفیسر لکھدا اے۔ رمضان شاہد نال ہن تک میرا ٹیلی فونک رابطہ اے۔ میں رمضان شاہد توں محمدانور کمبوہ دا فون نمبر پچھیا تے فیر میری کمبوہ ص احب نال گل ہوئی اوہنے مینوں مختصر طور تے دسیا کہ میں اسلامیہ کالج ریلوے روڈ تے سول لائنز وچ تہاڈا کالج فیلو رہیا واں۔ بی اے کرن دے بعد میں ایل ایل بی کیتا تے ضلع کچہری گوجرانوالہ وچ وکالت شروع کر دتی۔ میں اوہدے توں فرمائش کیتی کہ اوہ اپنے خاکیاں دا مجموعہ مینوں ڈاک راہیں گھل دیوے میں اوہدا مطالعہ کرکے کالم لکھنا چاہنا واں۔ خاکے پڑھن دے بعد مینوں احساس ہویا کہ اوہدے وچ تخلیقی صلاحیتاں بہت نیں۔ اوہنے کالج دے دور وچ لکھنا شروع کیوں نہیں کیتا۔ کتاب 2020ء وچ چھپی پر ایہدی تقریب پچھلے مہینے کروائی گئی۔ پہلا خاکہ اوہنے اپنے والد دے بارے لکھیا جہدا عنوان اے ”میرے محبوب” اٹھاراں صفحیاں تے مشتمل ایس خاکے وچ اوہنے اپنے والد دا ناں کدھرے نہیں لکھیا۔ خاکہ پڑھن دے بعد مینوںمحسوس ہویا کہ اوہدا والد دے نال کناں پیار تے محبت رہی۔ ایہ اک مثالی محبت سی’ ایہ اک قسم دا خاکہ نما مضمون اے۔ اپنے والد دی موت نوں اوہنے ایس طرح بیان کیتا اے۔
بس اوہ پل فیر واپس نہیں آیا کہ میں اوہناں دے ملکوتی چہرے نوں ویکھ کے اپنی اکھاں نوں تسکین دے سکاں۔ رات دے کسے وقت اوہ مینوں چھڈ کے دنیا توں چلے گئے اوہ مینوں ایس سنسار وچ اکلا چھڈ کے جانا تے نہیں چاہندے ہون گے قضا اوہناں نوں زبردستی لے گئی ہووے گی۔ صبح جدوں میں اٹھیا تے میرے تے اسمان ٹُٹ پیا سی۔ شفقت’ محبت’ پیار تے ایثار و قربانی ورگے الفاظ اپنے معنی کھو چکے سن۔ اوس ویلے توں اج تک اکلا واں۔ جدائی دا پل کل دی گل لگدی اے۔ اوس ویلے دا غم اج وی سجرا اے۔ اوہ مینوں ساری زندگی اپنے توں وکھ کرن ویلے فی امان اللہ کہندے رہے مینوں ایس کوتاہی دا بڑا دکھ اے کہ میں اوہناں نوں جاندے ہوئے فی امان اللہ وی نہ کہہ سکیا۔ اوہناں نوں جدا ہوئے انج تے اک عرصہ گزر چکیا اے پر اوہناں دی کمی قدم قدم تے محسوس کرنا واں بے آسرا تے بے سہارا زندگی گزار رہیا واں۔ میں آپ بڑھاپے وچ قدم رکھ رہیا واں۔ پیار کرن والی وفاشعار بیوی اے تابعدار بچے نیں ہن تے پوتے دوہترے وی نیں۔ پورا آئیڈیل پریوار اے۔ دوست احباب نیں پر اوہناں ورگی کامل ہستی کدھرے نظر نہیں آندی۔
اوہنے اپنے والد دے خاکے وچ لکھیا۔ میرے والد دی لائبریری وچ ادبی’ دینی تے تریخی کتاباں دا اک ذخیرہ سی۔ اوہناں دی لائبریری چوں میں جس پہلی کتاب دا مطالعہ کیتا اوہ وارث شاہ دی داستان ہیررانجھا سی۔ ایہو وجہ اے کہ اوہدے خاکیاں وچ پنجابی زبان دا تڑکا تے پنجابی اکھان (ضرب المثل) استعمال کیتے گئے۔ ایہدے وچ دس خاکے نیں تے آخر وچ اک مضمون مقدمہ تریخ پاکستان شامل اے۔ اک خاکہ چھلاوا اے جہدے وچ ضلع کچہری لہور وچ وکیلاں دے بیٹھن لئی جھونپڑیاں ہوندیاں سن۔ سینئر تے نامور وکیل جھونپڑیاں یاں پھٹیاں تے بیٹھدے سن جہناں وچ لہور ہائیکورٹ بار دے صدر تے سینئر ممبرز بیٹھدے سن پر معروف وکیل چوہدری محمد رفیق باجوہ’ چوہدری غلام باری سلیمی’ امین ملک’ چوہدری عبدالرشید’ احسان وائیں لائبریری دے باہر اوپن ایئر وچ بیٹھدے سن۔ ایس خاکے وچ محمدانور کمبوہ نے اکبر لہوری دا ذکر نہیں کیتا جو اک ٹبے تے میز کرسی رکھے بیٹھے ہوندے سن۔ اکبرلہوری اردو تے پنجابی دے نامورشاعر تے رائٹر سن۔ اوہناں دے نال اوہناں دا بیٹا حمیداکبر بھٹی تے بیٹی صدیقہ الطاف ایڈووکیٹ وی بیٹھدے سن حمیداکبر بعد وچ پی سی ایس کرکے اے سی تے ڈی سی ہو گیا۔ کچہری بار روم وچ مشتاق بٹ ایڈووکیٹ’ احسان وائیں’ رفیق باجوہ بیٹھدے سن۔ ایس طرح ایہناں لوکاں نال وی میری دوستی ہو گئی۔ آخر وچ اوہنے پاکستا ندی مختصر تریخ بیان کیتی اے جو ہر زمانے لئی سند اے۔ کتاب وچ ڈاکٹر خواجہ محمد ذکریا دا پیش لفظ شامل اے۔ کتاب وچ احسان اللہ طاہر صدر شعبہ پنجابی گورنمنٹ ڈگری کالج گوجرانوالہ دی رائے وی دتی گئی اے۔ کتاب دا انتساب اوہنے اپنی رفیقہ حیات (ناز پروین) دے ناں کیتا اے۔ کتاب ”سانجھ” دی چھترچھاویں چھاپی گئی اے۔ ٭٭

اپنا تبصرہ گھلو