کون کیہ اے؟

Shakeel Amjad Sadiq

عظیم انسان روز روز پیدا نہیں ہوندے۔ مادر دھرتی اجہے انساناں نوں ہر روز جنم نہیں دیندی۔ اجہے بندیاں لئی تریخ نوں مدتاں تک انتظار کرنا پیندا اے۔ تاں جا کے کوئی اجیہا بندہ پیدا ہوندا اے جہدے تے تریخ نوں صدیاں تک مان کرنا پیندا اے۔ سقراط جو دنیا دا پہلا فلسفی شمار کیتا جاندا اے اوہنے کوئی کتاب نہیں لکھی کیوں جے اوہ لکھنا نہیں سی جان دا۔ سقراط بڑا بدصورت سی۔ اوہدے شاگرد نے اوہدی مثال اک اجہے مجسمے نال دتی سی جو اُتوں تے بڑا مضحکہ خیز ہوندا اے پر اوہدے اندر دیوتا دی فوٹو ہوندی اے۔ سقراط دی ماں دایہ سی جد کہ اوہدا والد اک مجسمہ ساز سی۔ سقراط کدی پیسہ کمان دے بارے سنجیدہ نہیں سی کیوں جے اوہدی بیوی ہر ویلے لڑدی رہندی سی۔ سقراط نے اوہدا کدی برا نہیں سی منایا۔ سقراط دا اک خوشحال خاندان نال تعلق رکھن والا شاگرد کیٹو لکھدا اے۔ اک دن میں سقراط دے گھر گیا تے ویکھیا کہ سقراط مکان دی دہلیز تے بیٹھا سی اوہدی بیوی اوہنوں برا بھلا کہہ رہی سی سقراط دے بلھاں تے مسکراہٹ سی جدوں اوہدی بیوی نے ویکھیا کہ سقراط اگوں کوئی جواب نہیں دیندا تے اوہ غصے نال مکان دے اندر گئی تے پانی نال بھریا ہویا پتیلا لیا کے سارا پانی سقراط تے ڈولھ دتا۔ سقراط نے ہس کے مینوں کہیا۔ کیٹو مینوں پتہ سی بدل گرج رہے نیں بارش ہووے گی۔
افلاطون اپنے استاد سقراط دے کول آیا تے اوہنوں کہن لگا تہاڈا نوکر بازار وچ کھڑے ہو کے تہاڈے بارے ہرزہ سرائی کر رہیا سی۔ سقراط نے ہتھ دے اشارے نال اوہنوں چپ کرا دتا تے آکھیا تسیں ایہ گل سنان توں پہلاں تن دی کسوٹی تے پرکھو’ تے فیصلہ کرو’ کیہ تہانوں ایہ گل مینوں دسنی چاہیدی اے؟ افلاطون نے عرض کیتا استاد جی تن دی کسوٹی کیہ اے۔ سقراط نے کہیا کیہ تینوں یقین اے توں مینوں جہڑی گل دسن لگا ایں اوہ سوفیصد سچ اے۔ ہن اسیں دوجی کسوٹی ول آنے آں مینوں جو توں دسن لگا ایں کیہ ایہ چنگی گل اے۔ افلاطون نے انکار وچ سر ہلا دتا جی نہیں ایہ بری گل اے۔ سقراط بولیا جیویں ایہ گل دوجی کسوٹی تے پورا نہیں اتردی افلاطون چپ رہیا۔ سقراط نے ذرا رک کے کہیا تے آخری کسوٹی’ ایہ دس اوہ گل جو توں مینوں دسن لگا ایں کیہ اوہ میرے لئی فائدہ مند اے۔ افلاطون نے انکار وچ سر ہلا دتا تے عرض کیتا استاد جی ایہ گل بالکل وی تہاڈے لئی فائدہ مند نہیں۔ سقراط نے ہس کے کہیا جے ایہ گل میرے لئی فائدہ مند نہیں فیر ایہدے دسن دی کیہ ضرورت اے۔ افلاطون پریشان ہو کے سجے کھبے ویکھن لگا۔
سقراط دی قوت برداشت کمال دی سی شہر وچ اوہ واحد بندہ سی جو ننگے پیر برف تے گھمدا رہندا سی۔ سقراط نے نوجوانی وچ میدان جنگ وچ بہادری دا انعام حاصل کیتا سی۔ سقراط دا زیادہ وقت ایتھنز دے باغاں تے بازاراں وچ اپنے شاگرداں نال گلاں کردے گزردا۔ اج توں ڈھائی ہزار ورھے پہلاں دا عجیب و غریب فلسفی اپنے ولوں کوئی فلسفہ بیان نہیں سی کردا اوہنے اپنے پچھے کوئی کتاب تے کیہ چار صفحیاں دا کوئی چھوٹا جیہا مضمون وی نہیں چھڈیا۔ اوہ کجھ نہیں سی سکھدا۔ اوہدا اپنا کوئی فلسفہ نہیں سی اوہ لوکاں نوں کجھ دسن دی تھاں اوہناں توں پچھدا زیادہ سی۔ اوہدے سوال ای اوہدا فلسفہ سی ساری زندگی اک چادر وچ گزاری۔ کسے نے اوہنوں کہیا کہ ایتھنز وچ اک آواز سنی گئی اے کہ سقراط ایتھنز دا سب توں وڈا سیانا بندہ اے۔ سقراط نے ہس کے جواب دتا میں ایس لئی سیانا واں کہ مینوں اپنی بے علمی دا احساس اے۔
اک سویر جدوں سقراط بازار وچ آیا تے اوہنے ویکھیا کہ اوہدے خلاف مندرجہ ذیل قرارداد جرم چسپاں کیتی گئی اے۔ سقراط نے جرماں دا ارتکاب کیتا اے۔ اوہدا پہلا جرم ایہہ وے کہ اوہ اوہناں دیوتاواں دی پرستش نہیں کردا جہناں نوں ایہ شہر پوجدا اے ایہدی تھاں اوہ اپنے ولوں نویں دیوتا لے آیا اے۔ دوجا جرم اوہدا ایہہ وے کہ اوہ نوجواناں نوں وگاڑدا اے ایس لئی اوہدی سزا موت اے۔ ایس الزام ارائی دے پچھے سب توں وڈا محرک انیٹس نامی اک چمڑا فروش سی۔ اوہنوں سقراط دے خلاف ذاتی بغض سی۔ گل ایہہ وے کہ سقراط نے اوہدے پتر نوں مشورہ دتا سی کہ اوہ کھلاں تے چمڑے دا کم چھڈ کے فلسفے نال ناطہ جوڑے۔ انیٹس دا اصرار سی کہ اوہدے پتر نوں گمراہ کرن دی کوشش کیتی گئی اے ایس لئی سزا موت توں گھٹ نہیں ہونی چاہیدی۔ ایس طرح چمڑا تے علم اک دوجے دے سامنے آ گئے۔ فتح چمڑے نوں حاصل ہو گئی۔ سقراط نوں پھڑ لیا گیا اوہدے تے مقدمہ شروع ہو گیا۔ سقراط چاہندا تے موت دی سزا توں بچ سکدا سی۔ وجہ ایہہ وے کہ ایتھنز دے قنون وچ ایہ گنجائش موجود سی کہ موت دی سزا پان والا کوئی بندہ جلاوطنی نوں متبادل سزا دے طور تے چن سکدا سی ایس لئی جس بندے نوں موت دی سزا ملدی سی اوہنوں ایہ اختیار وی مل جاندا سی کہ اوہ اپنی ریاست توں باہر چلا اوے تے ایس طرح موت دی سزا توں بچ جاوے۔ سقراط ایہ اختیار کر سکدا سی پر اوہ ایس طرح بچ نکلن تے تیار نہیں سی۔ اوہدا وقت آ گیا سی تے اوہ جان لئی تیار سی۔ جدوں سقراط دی زندگی د ا آخری دن آیا تے اوہدے کئی شاگرد اوہنوں جیل وچ ملن لئی آئے۔ شاگرد سقراط دے دوالے اکٹھے نیں۔ سقراط اوہناں وچوں اک نوں اپنے کول بلاندا اے۔ اوہدے والاں نوں چھوہندا اے تے نال ای زندگی’ موت تے روح دی ابدیت دے بارے اپنے خیالات بیان کردا اے۔ اوہ کہندا اے کہ موت تے ابدی نیند اے’ اوہ خودفراموشی دی مٹھی ابدی کیفیت اے’ جہدے وچ کوئی تکلیف نہیں’ کوئی ظلم تے ناانصافی نہیں’ کوئی مایوسی نہیں تے نہ ای دکھ درد اے یاں فیر اوہ اجیہا دروازہ اے جہدے چوں گزر کے اسیں زمین توں جنت وچ داخل ہو جانے آں۔ اوہ اجہی غلام گردش اے جو سانوں سدھی اللہ دے ایوان وچ لے جاندی اے تے دوستو اوتھے کسے نوں اوہدے خیالات پاروں سولی تے نہیں چڑھایا جاندا ایس لئی ہسو تے میرے جان تے افسوس نہ کرو۔ جدوں تسیں مینوں قبر وچ اتاروگے تے جان لینا کہ تسیں بس میرے جسم نوں دفن کر رہے او میری روح نوں نہیں۔ جدوں اوہنوں موت دی سزا دتی گئی اوہدے شاگرد جیل دی کوٹھڑی وچ اوہنوں ملن آئے اک شاگرد نے کہیا افسوس ساڈے استاد نوں بے گناہ ماریا جا رہیا اے۔ سقراط نے زیرلب مسکرا کے کہیا: تے کیہ تسیں چاہندے سی کہ میں گناہ دے بعد ماریا جاواں؟ سقراط نے ہسدے ہوئے اپنے روندے ہوئے شاگرداں دے سامنے زہر دا پیالا پی لیا۔ ایہ واقعہ ایتھنز وچ 404 قبل مسیح پیش آیا۔
دوستو! غیرذمہ داری’ لالچ’ ہوس’ بے ایمانی’ کرپشن’ ناانصافی نال بھرے معاشرے وچ کسے وی عظیم انسان تے عظیم لیڈر دا پیدا ہونا ناممکن اے۔٭٭

اپنا تبصرہ گھلو