بھوت خانہ

Aqtdar Javid

ابوالعباس السفاح جو سلطنت عباسیہ دا بانی سی دی حکومت 44 ملکاں تے پھیلی ہوئی سی۔ اوہدی سلطنت وچ دس توں ودھ زباناں بولیاں جاندیاں سن جہناں وچ عربی’ آرمینی’ جارجین’ عبرانی تے ترک شامل سن۔ کئی ٹائم زون سن۔ السفاح اوہدا لقب سی جہدا مطلب سادہ معنیاں وچ قصائی دا سی۔ اوہنے اپنے پیش روئواں نوں چن چن کے ختم کیتا تے پنج سو سالہ عباسی دور حکومت دی بنیاد رکھی۔ اوہ اوس تھانے وچ کیہ تعینات ہویا سارے مجرماں دے حلقیاں وچ اک شور مچ گیا۔ کوئی کہوے تھانیدار کجھ دن دا مہمان اے۔ کوئی کہوے جیویں ای ایس پی یاں ڈی پی او دا تبادلہ ہووے گا اوہدی ساری آکڑ نکل جانی اے۔ نویں دے نو دن ہوندے نیں پرانی دے سو دن ہوندے نیں۔ کوئی کہوے اوہدے بھائی بڑے تگڑے نیں اوہدا خاندان بڑا بارسوخ اے۔ اوہناں دے سہارے تے ہوا وچ اڑ رہیا اے۔ ایہ بہار کجھ دن دی اے۔ نویں تھانیداری اے’ نویں نویں تعیناتی اے چھیتی ای اوہدی پھوک نکل جانی اے۔ ایہ اک فون دی مار اے۔ اجے اوہدے وڈے افسراں نال ملاقات اے پوری واقفیت نہیں۔ پوری واقفیت ہوئی تے اوہدے ہوش ٹھکانے آ جان گے۔ تھانے وچ ماتحت ملازماں وچ خوف تے نہیں پر اوہ سارے گہم گئے سن۔ اوہناں دا کہنا سی اوس تھانے نے رنگ رنگ دے تھانیدار ہنڈائے نیں ہن اوہناں تھانیداراں دا نام و نشان وی باقی نہیں۔ اسیں آں تے تھانہ اے۔ بستہ بیس وچ شامل سارے لوکاں نے اپنی اپنی محفوظ پاکٹس بنائی ہوئی سی۔ تھانیدار اوہناں محفوظ پاکٹس نوں اوہناں دیاں جنتاں قرار دیندا سی۔ ایس جنت وچ اوہناں دا ڈنکا وجدا سی۔ اوہناں دی اپنیاں عدالتاں سن اپنے قاضی سن’ اپنے ہتھ چھٹ ملازم سن جو پل بھر وچ مخالف نوں اڑا دیندے سن۔
انج وی ہویا کہ اوتھے مخالف نوں دن دیہاڑے گولیاں دا نشانہ بنایا جاندا۔ لوک ڈر جاندے تے گھراں وچ دبک جاندے۔ پنچایت وچ کیس جاندا اوتھے نہ بنچ کسے دی گل سن دا نہ کسے نوں گل کرن دیندا۔ جس دن اوہ پہلی واری تھانے وچ داخل ہویا تے صبح دے اٹھ نو وجے سن۔ اوتھے اک ہو دا عالم سی تھانے دے سارے کمرے کھلے سن۔ کسے کمرے وچ کسے ذی روح دا وجود نہیں سی۔ تھانہ گھٹ تے بھوت ہائوس زیادہ لگ رہیا سی۔ گرمیاں دے دن سن اک کمرے وچ پکھا چلن دی آواز تے اوہ اوہدے وچ داخل ہو گیا۔ پچھلی کندھ تے کسے سپاہی دی وردی تے ٹوپی لمک رہی سی۔ اک لوہے دا بیڈ سی جہدے تے کئی رجسٹر کھلے پئے سن۔ پکھے دی ہوا نال اک کاغذ ایدھر اودھر اڑ رہیا سی۔ اوہنے اوہ کاغذ اک رجسٹر وچ رکھیا تے باہر نکل آیا۔ ایسے کمرے توں اگے اوہنوں سلاخاں والا کمرہ نظر آیا۔ اوہنوں یقین ہو گیا کہ ایہو تھانے دی حوالات اے۔ اوہ بڑا خوش ہویا کہ حوالات وچ بند ملزماں توں تھانے تے اوہدے عملے بارے شاید کجھ جانکاری مل سکے۔ حوالات دا جندرا کھلا پیا سی تے حوالات خالی پئی سی۔ جیویںایس تھانے دی حدود وچ کوئی ملزم ای نہیں سی۔ جیویں ایتھے کوئی جرم ہوندا ای نہیں۔ حوالات دے نال اک چھوٹا جیہا راہ پچھے ول نکل رہیا سی اوہ ہولی ہولی اوس پاسے چل پیا۔ پچھے تن چار کمرے سن اوتھے کمریاں توں اچے اچے خراٹیاں دی آواز آ رہی سی۔ کمریاں دے بوہے کھلے سن۔ جس کمرے توں خراٹیاں دی آواز آ رہی سی اوہ اوس کمرے وچ داخل ہویا تے سامنے میز تے کھانے دے بھانڈے پئے سن جہدے توں لگدا سی کہ اوہ چنگے رج کے ستے پئے نیں۔ اوہنے اوہناں دے چہریاں نوں غور نال ویکھیا۔ شکلوں پیشہ ور مجرم لگ رہے سن۔ اک کرسی تے کسے ملازم دی بندوق وی پئی سی۔ خوابیدہ بندیاں دے تن و توش تے خراٹیاں توں وی پتہ لگ رہیا سی کہ اوہناں نوں کھانے پین دا وادھو سامان ملیا سی تے اوہناں نے جی بھر کے کھانے تے ہتھ صاف کیتے نیں۔انج لگدا سی کہ اوہناں نوں ہن قیامت تک نہ کوئی جگا سکدا اے نہ ہلا سکدا اے۔
ہن سویر دے دس وجے چکے سن۔ تھانے وچ زندگی دے آثار پیدا ہون لگ پئے۔ اک چھوٹی عمر دا لڑکا اندر داخل ہویا تے کھانے دے بھانڈے سمیٹن لگا۔ اک ادھ نان صحیح سلامت بچیا پیا سی اوہنے اوہ وکھرا کر لیا جیویں ایہ اوہدے کم دی چیز ہووے۔ اوہنے ستے پئے لوکاں نوں جگاندے ہوئے کہیا اٹھو بھائی اٹھو تھانیدار صاحب دا حکم اے اوہناں نوں دس وجے جگا دیا کرو۔ اٹھو اٹھو نہیں تے ایہ چابی پھڑو تے آپ حوالات وچ جا کے باہروں جندرا لا دینا۔ ارے اندازہ تے بالکل ٹھیک سی ایہ مجرم لوک سن تے ایتھے آرام نال سوں رہے سن تے حوالات خالی پئی سی۔ سارے مجرم ہولی ہولی اکھاں ملدے ہوئے اٹھے تے اکٹھے حوالات وچ جا اپڑے۔ ایہناں وچ پھنے خان جیہا باہروں جندرا لا کے چابی جیب وچ پان لگا تے نویں تھانیدار نے اوہدے توں چابی کھوہ لئی۔ اوہنے اک کرسی کھچی اوہدے تے بیٹھا تے چھوٹے نوں کہن لگا کہ جو جو ملازم آندا جاوے میرے سامنے پیش کردے جائو۔ چھوٹے لئی ایہ اک عجیب واقعہ سی اوتھے تے حوالاتی اپنی مرضی نال حوالات توں اندر باہر جاندے سی۔ ایہ کیہ واقعہ ہو گیا؟ جدوں باراں وجے دے نیڑے تھانے دے سارے ملازم اپڑ گئے تے اوہنے اپنا تعارف کروایا تے دسیا کہ اوہ ایتھے نواں تھانیدار تعینات ہویا اے۔ ساریاںدے رنگ اڈ گئے۔ اوہنے سب توں پہلاں منشی نوں ایہناں سارے مجرماں دا ریکارڈ لیان دا حکم دتا تے ساریاں دے ہوش اڈ گئے۔ انج تے اوہناں دے وہم و گمان وچ وی نہیں سی۔ ایہ دن وی آنا سی’ مجرماں دا رجسٹر بالکل خالی سی اوہدے وچ کسے دا ناں تک نہیں سی۔ چھوٹا ایہ سب کجھ شوق تے دلچسپی نال ویکھ رہیا سی۔ مجرم حوالات وچ کھسر پھسر کر رہے سن۔ انج تے پہلے کدی ہویا ای نہیں۔ چنگا بھلا ساڈا بھوت خانہ چل رہیا سی۔ ہن اوہ جیویں سوچ رہے نیں کدھرے ایہ تھانیدار عباسیہ سلطنت دا بانی ابوالعباس الفساح ای نہ ثابت ہو جاوے اوہ حوالات دی چابی اپنے قبضے وچ ای نہ لے لوے۔ ساڈا بھوت خانہ برباد ای نہ ہو جاوے۔٭٭

اپنا تبصرہ گھلو