ڈرٹی سیاست کدوں تک؟

سیاست پاکستان دا اہم تھم اے۔ ایس میدان وچ غریب لئی کوئی تھاں نہیں ہوندی تے جے کوئی غریب کسے امیر دے موڈھے تے بہہ کے سیاست دے میدان وچ آ جاوے تے کجھ ورھیاں وچ اوہ غریب نہیں رہندا۔ قیام پاکستان توںلے کے اج تک وکھووکھ خانداناں نے سیاست دے میدان وچ آ کے پاکستان دی سیوا کرن دا دعویٰ کیتا پر حقیقت وچ اوہناں نے پاکستان توں ودھ اپنی تے اپنے خاندان دی سیوا کیتی۔ عمران خان دی حکومت نوں عدم اعتماد راہیں ختم کیتا گیا۔ ایس عدم اعتماد وچ جو ڈرامہ لگا اوہ نیشنل نہیں انٹرنیشنل لیول تے ویکھیا گیا۔ خان صاحب نے ایہنوں اک سازش دا ناں دے کے ملک وچ افراتفری پھیلا دتی۔ مظاہرے’ جلسے جلوس سب کجھ کیتا پر فیر وی رزلٹ صفر رہیا۔ بقول پی ڈی ایم عمران خان دی حکومت نے ملک دا خانہ خراب کر دتا۔ مہنگائی نے عام بندے دا جینا اوکھا کر دتا اے ایس لئی عمران خان دی حکومت ختم کرنا ضروری سی جیویں ای عمران خان دی حکومت ختم ہوئی تے نہ صرف تحریک انصاف والیاں نے سگوں شیخ رشید نے وی قومی اسمبلی توں استعفیٰ دے دتا پر اوہ استعفے اج تک قبول نہیں ہوئے۔ اک پاسے ساڈے وزیراعظم ملک لئی کپڑے ویچن نوں پھر رہے نیں تے دوجے پاسے ایہناں لوکاں تے کھرباں روپیے لٹائے جا رہے نیں۔
جیویں ای وفاقی حکومت تبدیل ہوئی ایہدے اثرات نے پنجاب حکومت نوں وی اپنی لھویٹ وچ لے لیا۔ پنجاب وچ وی اکھاڑ پچھاڑ دی سیاست شروع ہو گئی۔ پنجاب اسمبلی وچ وی اوہو کجھ ہویا جو قومی اسمبلی وچ ہویا۔ سپیکر اسمبلی اپنے فرائض دی تھاں اپنی سیاسی جماعت دے فرائض نبھان تے مجبور ہو گئے۔ جدو ںتک الیکشن ہوندا اے اوس ویلے تک اک ممبر اپنی پارٹی دا خیرخواہ ہوندا اے پر جدوں اوہ کسے وزارت یاں کسے ہور عہدے مثلاً سپیکر یاں صدر مملکت بن دا اے تے فیر سیاسی جماعت دی تھاں اوہنوں مملکت پاکستان دا خیرخواہ ہونا چاہیدا اے کیوں جے اوہ حلف چکدے ہوئے وعدہ کردا اے کہ میں مملکت پاکستان دا وفادار رہواں گا پر ایہ سب سیاستدان ملک دی تھاں اپنی اپنی پارٹی نال وفاداری کردے نیں تے جو بے وفا ہو جاوے اوہنوں لوٹے دا ناں دے دتا جاندا اے انج دا ای کجھ پنجاب اسمبلی وچ ہویا۔
20 دے نیڑے پنجاب اسمبلی دے لوکاں نے پارٹی نال بے وفائی کردے ہوئے پی ڈی ایم دی حمایت کر دتی جہنوں عدلیہ نے قرار دے کے اوہناں نوں نااہل قرار دے دتا۔ پنجاب حکومت نے اوہناں سیٹاں تے دوبارہ الیکشن کرایا تے تحریک انصاف نے اپنیاں ای 20 سیٹاں وچوں 15 سیٹاں واپس لئیاں تے چار سیٹاں تے شکست کھادی پر رولا انج پایا جیویں کناں وڈا معرکہ مار لیا ہووے۔ پنجاب وچ وزیراعلیٰ دا الیکشن ہونا سی ایس لئی ایہ ضمنی الیکشن دوہاں پارٹیاں لئی بڑا اہم سی تے ایس الیکشن دے بعد تحریک انصاف نے اپنے حلیفاں دی مدد نال مطلوبہ گنتی پوری کر لئی تے اوہ پرامید سن کہ اپنے امیدوار نوں آسانی نال وزیراعلیٰ پنجاب دی سیٹ تے بٹھا دین گے پر کسے نوں کیہ پتہ کہ ایہ سیاست کناں گندا کھیڈ اے کہ ایہدے وچ کجھ وی حرف آخر نہیں جو سیاستدان جناں وڈا یوٹرن لوے گا اوہ اوناں ای پاپولر سیاستدان بن جاوے گا۔
بلوچستان دے سابق وزیراعلیٰ اسلم رئیسانی دا اک فقرہ بڑا مشہور ہویا سی کہ ڈگری ڈگری ہوندی اے ایسے طرح سیاست سیاست ہوندی اے۔ بھاویں ایہدے وچ اپنے خاندان نوں کیوں نہ زیر زبر کرنا پوے۔ پنجاب اسمبلی دا الیکشن بڑی بھج نس دے بعد مکمل ہویا تے نتیجے دا ویلا آ گیا۔ ڈپٹی سپیکر پنجاب اسمبلی دوست مزاری دا اعلان کردے ہوئے دسیا کہ پرویزالٰہی صاحب نے 186 ووٹ لیے تے حمزہ شہباز صاحب 179 ووٹ حاصل کیتے پر کامیاب امیدوار حمزہ شہباز ٹھہرے ایہدی سب توں وڈی وجہ ق لیگ دے سربراہ چوہدری شجاعت بنے جہناں نے ڈپٹی سپیکر نوں خط لکھیا کہ میری پارٹی پی ٹی آئی دے امیدوار نوں ووٹ نہیں دیوے گی تے جے کوئی ممبر ووٹ کاسٹ کرے تے اوہنوں شمار نہ کیتا جاوے جہنوں سامنے رکھدے ہوئے ڈپٹی سپیکر دوست مزاری نے حمزہ شہباز نوں کامیاب قرار دتا پر بعد وچ معاملہ سپریم کورٹ وچ چلا گیا جہدے مگروں پرویزالٰہی نوں وزیراعلیٰ پنجاب قرار دتا گیا۔
سوال ایہ پیدا ہوندا اے کہ پاکستان وچ کدوں تک ایہ ڈرٹی سیاست دا کھیڈ کھیڈیا جاندا رہوے گا کیوں ایہ سیاستدان اک دوجے دا مینڈیٹ قبول نہیں کردے؟ ایہ اپنے مفاد لئی کدوں تک لوکاں توں قربانی لیندے رہن گے؟ ایہ جہڑے سیاستدان پارٹیاں بدل بدل کے ساڈے تے مسلط ہوندے نیں اوہناں دے خلاف کیوں قنون سازی نہیں ہوندی؟ ایہ سیاستدان کدی پاک فوج’ کدی عدلیہ تے کدی اسٹیبلشمنٹ نوں بدنام کردے نیں پر اپنے ول نہیں ویکھدے جو پارٹیاں بدل بدل کے اقتدار دے مزے لے رہے ہوندے نیں۔ پاکستان دے مفاد لئی ہر ادارے تے ہر سیاستدان نوں سوچنا ہووے گا تے اپنے ملک نوں سری لنکا بنان دی دھمکی دین دی تھاں ایہنوں پوری دنیا وچ طاقتور ملک بنانا ہووے گا۔ اللہ تعالیٰ ساڈے ملک دے سارے خیرخواہواں نوں ہدایت دیوے تے ساڈا ملک دنیا وچ سب توں عظیم ملک بن جاوے۔ (آمین)