چار آدمی تے فائونٹین ہائوس

sofia bedar

ڈاکٹر امجد ثاقب سمندر دے وچکار اک اجیہا لائٹ ہائوس نیں جو ڈبدی بیڑیاں’ بھٹکدے جہازاں تے مسافراں نوں روشنی دی نوید تے سمت دیندا اے۔ کدی کدی میں سوچنی آں جینٹیک انجینئرنگ والیاں نوں ڈاکٹر امجد ثاقب تے ایدھی صاحب ورگے لوکاں دا خلیاتی تجزیہ کرواناچاہیدا اے تے ہو سکے تے کلوننگ نال دوچار ڈاکٹر امجدثاقب بن جان تے ملک دے سارے مسئلے حل ہو جان۔ سیلاب وچ ڈبے لوکاں دی خوراک’ دوائیاں دی فکر اے تے چھت لئی ہتھ پیر مار رہے نیں۔ پاکستان دا قرضہ لاہن دی سبیل سوچدے رہندے نیں عرف عام تے ایہنوں دیوانگی کہیے پر جدوں اوہناں دی تصنیف چار آدمی پڑھ لوو تے قصہ چہار درویش دیاں ساریاں گنڈھاں کھلنیاں شروع ہو جاندیاں نیں۔
سر گنگا رام’ ملک معراج خالد تے ڈاکٹر رشید چوہدری دی کہانی جو درویش ڈاکٹر امجدثاقب دی زبانی طرز تحریر ایسا اے کہ منظر دی دھند چھٹدی اے تے تنے بزرگ عید والے دن دعا لئی اٹھائے ہتھاں دی برکت نال سامنے تن کرسیاں تے آ بیٹھدے نیں۔ کسے متروک زبان وچ گل بات کر رہے نیں
بہت پیچھے بہت اندر
کسی گہرے کنوئیں کی تہہ میں
پوشیدہ ہیں کچھ باتیں
کسی احساس سے حرکت سے
یہ باہر نہیں آتیں
بہت گہری کھدی ہیں اور
زباں متروک ہے ان کی
اپنی نظم کا ٹکرا یاد آ گیا
متروک زباناں وچ ناقابل فہم احساس تے اپنے ورگے ایثار والیاں دا اثاثہ اپنے موڈھے تے چکے ساڈے ورگے بے حساں دے درمیان اپنا کم تسلسل نال جاری رکھے ہوئے نیں۔ اوہناں دے احاطہ خیال وچ تنے بزرگ خوشحال تے محو کلام نیں ڈاکٹر صاحب اپنی ناخوشی تے اوہناں دی خوشی دا مآخذ جاننا چاہندے نیں تے اوہ اوہناں نوں زندگی دا گُر دسدے نیں۔
گر سکھا دیں گے بادشاہی کا
ہم فقیروں سے دوستی کر لو
سرگنگا رام جہڑے بڑے زرخیز تخلیقی ذہن دے نال لہور نوں نواں نقشہ تے منظر دے رہیا سی۔ اوہدے لئی ہندو عورتاں دے ستی ہو جان دا معاملہ تے ہندومت وچ ودوا بیوا دی زندگی دا اجیرن ہونا تکلیف دہ سی اوہناں دے کھانے پینے’ پہنن توں لے کے سماجی رتبے دی پسپائی سرگنگارام لئی ناقابل قبول سی انگریزاں دی گرفت توں پہلاں تے ستی دا معاملہ عروج تے سی جہنوں 1857ء تک انگریزاں نے ایکٹ دے راہیں روکنا ممکن بنایا جتھے سوسائٹی دا پریشر سی اوتھے آپ وی ہندو ناریاں اپنے آپ نوں پوتر تے پتی ورتا ثابت کرن لئی مرے ہوئے پتی دا سر جھولی وچ رکھ کے چتا نوں اگ دیندیاں انج وی اوہناں دے ہاں ست جنم دے رشتے تے یقین اوسے پتی دے نال جین مرن تے تیار کردا۔ ایہ طلسم ٹٹیا تے وی بیوہ نوں اوہدا بطور انسان حق ملنا ناممکن سی۔ ایس پسماندگی تے جبرواستبداد دے بالمقابل سرگنگارام دی مثبت سوچ کھڑی سی دوجیاں کئی عمارتاں وانگوں انج دیاں بہت ساریاں عورتاں لئی بیوہ گھر بنایا گیا جو اج فائونٹین ہائوس اے۔ جدوں بنیا اودوں وی کاخیر سی تے ہن وی اے۔ سارے سماجی ذہنی مریضاں توں بچان لئی غریب بیوہ دی آماجگاہ سی تے ہن زمانے دے بخشے ہوئے مرض نال لڑ رہے مریضاں دا ٹھکانا اے۔
ڈاکٹر رشید چوہدری نوں اتفاق نال میں اپنی امی دے نال ویکھیا اے اوہ میوہسپتال وچ سن تے فائونٹین ہائوس دا شہرہ ہو رہیا سی ایہ اوہناں کجھ نابغہ روزگار ہستیاں وچ سن جو پورے ملک وچ مشہور ہوندے نیں کوئی ذرا جہی وی دیوانگی دی گل کردا سارے ازراہ تفنن کہندے ایہنوں ڈاکٹر رشید چوہدری کول لے جا’ ملک وچ ہولی ہولی ذہنی امراض دا تذکرہ شروع ہویا سی ایس توں پہلاں مریضاں نوں بجلی دے جھٹکے تے سنگلاں نال واہ سی۔ ڈاکٹر رشید چوہدری اپنی سادہ ترین طرز زندگی نال والدین دیاں دعاواں پاروں باہر توں اعلیٰ تعلیمی ڈگریاں لے کے پرتے سن جہنوں ایتھوں دے اوہناں دے اپنے رشتے دار وی بے کار سمجھدے سی اوہ کہندے بننا ای سی تے ہارٹ یاں کڈنی دا ڈاکٹر بن دا کنہوں پتہ سی کہ ڈاکٹر رشید چوہدری اک مثال بن جاوے گا۔ میں بچپن وچ ویکھیا ماں نے کہیا ایہ ڈاکٹر رشید چوہدری نیں ذہنی امراض دے سب توںوڈے ڈاکٹر۔ چھریرے بند’ لماں قد تے دلکش مثبت شخصیت دے مالک بڑی محبت نال ملے بعد وچ الحمرا وچ اوہناں دے بیٹے ہارون رشید صاحب دے وی لیکچر سنے اوہ سانوں سمجھا رہے سی کہ اج اسیں الحمرا دی چھت تھلے بیٹھے خوش گپیاں کر رہے آں تے سانوں کوئی سرخاب دے پر نہیں لگے کیہ وجہ اے کہ ایس ویلے اسیں کارڈیالی وارڈ وچ نہیں الحمرا وچ آں؟ میں اوہناں دی فلاسفی توں شکر دی عجیب منزلاں نوں اپڑ گئی اپنی آسائشاں تے صبر کرنا’ قناعت کرنا سکھیا۔ اوس ویلے کیویں وڈے وڈے لوک پیدا ہو رہے سن نواں نواں پاکستان سی لوک تازہ ولولہ انگیز جذبیاں نال لبریز وطن لئی کم کر رہے سن ڈاکٹر رشید چوہدری نے ایس کم نوں انجام تے اپڑایا جیویں نیویارک دے پنج ذہنی امراض توں شفا یاب ہون والیاں نے آغاز کیتا سی۔
فائونٹین ہائوس دی داستان نیویارک توں شروع ہوندی اے دنیا دا سب توں پہلاں فائونٹین ہائوس نیویارک وچ بنیا جدوں ذہنی امراض نال لڑدے پنج بندیاں نے مل کے چھوٹا جیہا گھر کرائے تے لیا۔٭

اپنا تبصرہ گھلو