چھجو دا چوبارہ

Asharf Sharif

میوہسپتال بنن توں پہلاں ایہ علاقہ ہری سنگھ تلوہ دا باغ سی۔ رنجیت سنگھ دے سپہ سالار نے جدوں ایتھے باغ نہیں سی بنایا تے ایہ علاقہ باغ مائی لاڈو کہلاندا سی۔ مائی لاڈو دی مسجد اج وی ہسپتال دے مشرق وچ موجود اے۔ مائی لاڈو دے باغ توں پہلاں ایہ اک ویرانہ سی جتھے مقامی بھگت فقیر تے مسلم درویش ٹھکانہ بنا لیندے۔ انگریز دور وچ ہسپتال بنان دا منصوبہ بنیا تے بہت ساریاں یادگاراں’ سمادھیاں تے قبراں تعمیراتی کم دوران آثار توں محروم ہو گئیاں۔ ہسپتال دے اک حصے دے نال چھجو بھگت دا چوبارہ ہن وی موجود اے چارے پاسے مریضاں دے وارڈ نیں۔ درمیان وچ چوبارے دی عمارت اے۔ لہور وچ قدیم عمارتاں وچوں جے کوئی عمارت سب توں چنگی حالت وچ اے تے اوہ چھجو دا چوبارہ اے۔ وجہ ایہہ وے کہ ایہنوں دوجے علاقیاں توں نقل مکانی کرکے آن والیاں تے قبضہ مافیا توں تحفظ حاصل رہیا۔ بس ایہ ہویا کہ ہسپتال دے داخلی حصے وچ آن دی وجہ نال چوبارہ چھپ گیا اے۔
چھجو شاہجہان بادشاہ دے دور دا اک خداپرست فقیر سی۔ لہور دے فقیراں تے درویشاں دا مطالعہ کرن ویلے ایہ عجیب گل سامنے آندی اے کہ مقامی باشندیاں دے آثار نہ ہون دے برابر نیں حالاں کہ ایہناں دی چنگی بھلی گنتی پورے پنجاب وچ موجود رہی اے۔ چھجو نوں لہور دی تاریخ وچ ہزاراں گمنام ہو چکے غیرمسلم فقیراں دے سلسلے دا اک موتی سمجھ کے ویکھو تے پتہ لگے گا کہ ایہدا وی کوئی سلسلہ ہووے گا کوئی گورو ہووے گا اوس گورو دا کوئی گورو ہووے گا۔ اخلاص تے انسانی دوستی دا اک حلقہ ہووے گا۔ کنہیا لال ہندی دا کہنا اے کہ چھجو پیشے دے اعتبار نال صراف سی۔ اکثر وقت فقیراں تے بھگتاں دے نال گزاردا۔ حضرت میاں میر شاہ بلاول تے شیخ اسماعیل مشہور میاں وڈا ورگے بزرگاں دے نال اوہدی دوستی سی۔ بھگتاں تے صوفیاں دی صحت دا اثر ایہ ہویا کہ سنار دی دکان چھڈ کے تارک الدنیا ہو گیا۔ پتہ نہیں ایہ چوبارہ پہلے توں کسے عمارت دا حصہ سی یاں فیر چھجو دی موت دے بعد اوہدے عقیدت منداں نے تعمیر کرایا۔ بہرحال ایہو دسیا جاندا اے کہ ایتھے دو منزلہ چوبارہ بنیا ہویا سی جہدا زینہ لکڑی دا سی۔ چھجو ایس چوبارے وچ بہہ کے عبادت یاں دیان گھیان وچ مصروف رہندا جدوں کوئی ملاقات لئی آندا تے لکڑی دی پوڑھی لا کے اوہنوں اُتے سد لیندا۔ میری پڑنانی دسدی سی کہ اوہ بچپن وچ اپنے والد میاں جان محمد تے اپنے دادا دے نال جدوں قصور توں لہور آندیاں تے گوالمنڈی دے اک مکان وچ قیام ہوندا۔ ایہ مکان غالباً چونیاں دے تحصیلدار آتمارام دا سی۔ ایس دوران اوہناں نے چھجو دے چوبارے بارے کئی واری دسیا۔
نکی عمر دی وجہ نال ہن مینوں اوہ تفصیلاں یاد نہیں صرف گوالمنڈی سرکیاں دیاں دکاناں’ رہائشی مکان تے چھجو دے چوبارے دا حوالا یاد اے۔ چھجو بھگت دا انتقال ہویا تے ایہ چوبارہ اوہدی سمادھی بنا دتا گیا بعد وچ مہاراجہ رنجیت سنگھ نے عمارت دی آرائش وچ واہوا دلچسپی لئی۔ چوبارے دے نال کئی دوجیاں عمارتاں تعمیر کیتیاں گئیاں۔ چاردیواری پکی تعمیر ہوئی۔ احاطے دے اندر بہت سارے دالان’ شہ نشیناں’ مکلف نشست گاہواں بنائیاں گئیاں۔ ہر ہفتے دوشنبہ تے سہ شنبہ دے دناں وچ عقیدت مند مرد و عورتاں اکٹھے ہوندے تے عارفہ کلام گاندے۔ چھجو بھگت دی سمادھی دے نال جے رام’ بھگت راگھو’ بھگت جوالا’ بھگت باوا ٹھاکرداس ‘دوار دا دواس’ گورداس آپا’ بھگت بدری’ بھگت دیا’ بھگت گھمنڈی’ بھگت دیالو تے شیودیال چوپڑہ دیاں سمادھیاں سن۔ ایہناں دا ہن کوئی نام و نشان نہیں جدوں لہور تے تن سکھ غارت گر حکمران ہوئے تے باوا پرسوتم داس جے پور توں آیا غارت گر حکمراناں نے اوہنوں چھجو بھگت دی سمادھی تے نال واقع مندر دا مختار بنا دتا۔ اوہنے سونے دے کم والا مندر بنایا۔ اوہدی موت دے بعد باوا گودڑ مہنت بنیا فیر دوارکاداس توں باوا ہربھجن داس مہنت ہویا۔ اصول ایہ رہیا کہ اوہدے مہنت شادی نہیں سن کردے مجرد رہندے۔ ایہ دائود پینٹھیے کہلاندے نیں ایس گروہ دا مہنت دائودرام اے اوہناں دی وکھری گرنتھ اے۔
دسیا جاندا اے کہ ایس گرنتھ وچ خدا دی واحدانیت دا ذکر اے۔ گوشت کھانا شراب پینا جھوٹ بولنا تے اللہ توں سوا کسے توں حاجت بیان کرنا ممنوع اے۔ چھجو بھگت اک ہزار چھ سو چھیانوے بکری یعنی 1052ہجری نوں جہان فانی توں رخصت ہویا۔ مورخین دسدے نیں کہ چھجو دا صرف چوبارہ نہیں سی ایس تھاں اک چھوٹا جیہا پنڈ بن گیا سی۔ چاردیواری دے اندر زمین کاشت ہوندی سی جہنوں سیراب کرن لئی دو کھوہ موجود سن۔ مہنت دوارکاداس نوں عمارتاں تے باغاں دا شوق سی۔ 1823 نوں دوارکاداس دا انتقال ہویا۔ اوہدا جانشین بڑا فضول خرچ سی۔ 1830 وچ سارے باغات تے املاک رہن رکھ دتے گئے۔ اوہدی عیش بندی نے فقیراں دا ڈیرہ ویران کر دتا۔
انگریز حکمران بنے تے لہور وچ کنگ ایڈورڈ میڈیکل کالج بنان دا فیصلہ ہویا۔ چھجو بھگت دی سمادھی اے جو سلامت چلی آ رہی اے۔ ایتھے مریضاں دے لواحقین کدی نماز پڑھدے نیں تے کدی اپنے کپڑے دھو کے کھلی تھاں تے پا دیندے نیں۔ چھجو بھگت دیاں کئی کرامتاں مشہور نیں۔ کہیا جاندا اے کہ اوہنے اوتھے اک چشمہ جاری کیتا جتھے عرصے تک لوک برکت لئی نہاندے۔ چھجو بھگت دا چوبارہ لہور دی کثیرالقومی رومانوی تے ثقافتی زندگی دا نشان اے۔ ایسے لئی مشہور اے:
جو مزا چھجو دے چوبارے
اوہ بلخ نہ بخارے

اپنا تبصرہ گھلو