چوہدری پرویزالٰہی دی قیادت وچ شعبہ معدنیات نوں جدید خطاں اُتے اُساریا جا رہیا اے

Kiran Fazal Butt

ایس گل وچ کوئی شک نہیں کہ پاکستان معدنی تے قدرتی وسائل نال مالا مال اے۔ پاکستان دنیا دا واحد ایسا ملک اے جہڑا اپنے قدرتی وسائل تے معدنیات پاروں پوری دنیا وچ مشہور اے۔ تاہم ترقی تے خوشحالی دا انحصار ایہناں وسائل دے دانشمندانہ تے ذہانت دے نال مناسب استعمال اُتے ہے۔ ایہہ وسائل کسی وی ملک دی حفاظت تے سلامتی دا ذریعہ ہوندے نیں۔ ایس ضمن وچ صوبہ پنجاب معدنی ذخائر دے حوالے نال خاص اہمیت دا حامل اے۔ پنجاب معدنی وسائل نال مالا مال صوبہ اے جہناں وچ سونا’ لوہیا’ تانبا تے چاندی وغیرہ شامل نیں۔ محکمہ معدنیات تے کان کنی پنجاب صوبہ وچ موجود معدنی ذخائر دی تلاش’ پیمائش تے ترقی’ نیز پٹہ جات دی عطائیگی’ سروے’ تحقیق تے ترقی بشمول کاناں دے مالکان کولوں معاوضہ’ کرایہ جات تے رائلٹی اکٹھی کرن تے کان کناں دی سیفٹی تے صحت دا ذمہ دار اے۔ وزیراعلیٰ پنجاب چودھری پرویزالٰہی دی متحرک قیادت وچ محکمہ کان کنی تے معدنیات ملکی تے غیر ملکی سرمایہ کاری نوں راغب کرن لئی پنجاب وچ کاناں تے معدنیات دی کھوج تے کھدائی دے فروغ تے ترقی لئی کوئی کسر نہیں چھڈ رہیا تاں جے صوبے دی مجموعی پیدااور وچ مثبت تبدیلی نوں یقینی بنایا جا سکے۔ ایہو وجہ اے کہ مائنز اینڈ منرلز ڈیپارٹمنٹ نے دبئی ایکسپو 2020 وچ بھرویں طریقے نال رلت کیتی سی تے منرل انویسٹمنٹ پوٹیشنل پنجاب دے عنوان تے کامیاب سیمینار دا انعقاد کیتا سی جہنے صوبہ پنجاب وچ موجود معدنی تے قدرتی ذخائر بارے بین الاقوامی سطح اتے پہچان قائم کیتی۔ اج مائنز اینڈ منرلز ڈیپارٹمنٹ قیمتی معدنیات دی دریافت لئی مائننگ دے روایتی طریقہ کار نوں ترک کر کے جدید ٹیکنالوجی دے فروغ’ تی ریسرچ تے ٹریننگ اتے بھرویںتوجہ دے رہیا اے۔
وزیراعلیٰ پنجاب چودھری پرویزالٰہی دے مطابق معدنیات دے شعبے وچ سرمایہ کاری دی بھرویں صلاحیت موجود اے تے معدنی ذخائر توں فیدہ چکنا حکومت دی اولین ترجیحات وچ شامل اے۔ وزیراعلیٰ پنجاب دے ایسے ویژن تے عمل پیرا ہوندے ہوئے صوبائی وزیر معدنیات لطیف نذر شعبہ معدنیات تے کان کنی نوں جدید خطوط تے استوار کرن دے خواہشمند نیں۔ وزیر معدنیات پنجاب دے مطابق معیشت نوں مضبوط کرن لئی زمین وچ لکے خزانیاں نوں بروئے کار لیانا ضروری اے۔ شعبہ معدنیات نوں پائیدار بنیاداں تے فروغ دین لئی اصلاحات متعارف کروائیاں گئیاں نیں۔ پچھلی حکومتاں وچ مائنز اینڈ منرل سیکٹر نوں شوبازی دی نذر کیتا گیا۔ وڈے وڈے دعوے کیتے گئے لیکن اک پائی دا وی فیدہ نہ ہویا۔ وزیراعلیٰ پنجاب نے ایس سیکٹر اتے خصوصی توجہ دتی۔ کاناں دی لیز دے حوالے نال یکساں پالیسی اپنائی گئی۔ مائننگ دے شعبہ نال جڑے افراد نوں ہرممکن سہولتاں فراہم کیتیاں جا رہیاں نیں۔
وزیر معدنیات لطیف نذر تے سیکرٹری معدنیات پنجاب اسداللہ فیض دی قیادت وچ محکمہ معدنیات پنجاب بھرویں کارکردگی دا مظاہرہ کردے ہوئے اہم اقدامات سرانجام دے رہیا اے۔ محکمہ معدنیات پنجاب دے سال 2021وچ کیتے گئے معنی خیز اقدامات قابل تحسین ثابت ہو رہے نیں جہدے وچ سال 2019-2020 وچ رائلٹی وچ صوبے دی تریخ وچ پہلی واری ریکارڈ 10.19 ارب روپے دی وصولی’ کان کنی جئے مشکل ترین تے تکنیکی شعبے وچ پہلی واری زنانیاں دی شمولیت لئی ویمن ان مائننگ جئے تریخی منصوبے دا اعلان’ مائننگ انجینئرنگ دی طالبات لئی چار مہینے تے مشتمل انٹرن شپ پروگرام دا آغاز’ دوران انٹرن شپ طالبات لئی 20000روپے ماہانہ وظیفہ’ ڈسٹرکٹ اٹک وچ دریائے سندھ وچ پلیسر گولڈ (سونے دے ذخائر) دا ممکنہ جائزہ’کوہ سلیمان رینج’ ڈی جی خان ڈویژن وچ کوئلے’ خام لوہے’ چونے دے پتھر دی ممکنہ تشخیص’ ڈائریکٹوریٹ جنرل آف مائنز اینڈ منرلز پنجاب دی اَپ گریڈیشن تے ایڈمنسٹریٹو ڈیپارٹمنٹ دا آئی ٹی انٹی گریشن ‘ ڈپٹی ڈائریکٹر چکوال دے دفتر لئی معدنیات دی رائلٹی دی ڈیجیٹل مانیٹرنگ’ انسپکٹوریٹ آف مائنز پنجاب دے معائنہ دے نظام دی ڈیجیٹلائزیشن’ مکڑوال ضلع میانوالی وچ 10 بستریاں اتے مشتمل مائنز لیبر ویلفیئر ہسپتال دا قیام’ سانگھڑ/ گلکی’ سالاربند/ سوری نالہ تے بستی ڈہر تحصیل کوہ سلیمان وچ مائنز لیبر ویلفیئر ڈسپنسریاں دا قیام’ ڈی جی خان دے دوردراز کان کنی والے علاقیاں وچ کاناں دے مزدوراں نوں صحت دی بنیادی سہولتاں دی فراہمی’ کان کناں دے بالاں لئی سکالرشپ/وظیفے وچ 300فیصد وادھا’ معذور مزدوراں لئی امدادی پیکج وچ ماہانہ 6000روپے تک دا وادھا شامل نیں۔ دُوجے پاسے’وزیراعلیٰ پنجاب اینوں مکمل طور تے ڈیجیٹلائز کرن دے خواہاں نیں جد کہ مائنز اینڈ منرلز ڈیپارٹمنٹ پنجاب وزیر معدنیات لطیف نذر دی زیر قیادت وزیراعلیٰ دے مشن اتے عمل پیرا ہوندے ہوئے جدید ٹیکنالوجی دے استعمال نوں فروغ دے رہیا اے۔ ڈیجیٹلائزیشن دے ذریعے ادارے دے امور وچ شفافیت آوے گی جہدی بنا تے صوبے وچ مائنز اینڈ منرلز دے حوالے نال سرمایہ کاراں نوں ون ونڈو آپریشن دی سہولت دین تے غور کیتا جا رہیا اے تاں جے معدنی وسائل نال بھرواں استفادہ حاصل کیتا جا سکے جہدے توں صوبے دی آمدن وچ وادھا تے بے روزگاری وچ کمی واقع ہووے گی۔ پنجاب وچ کثیر مقدار وچ معدنی وسائل موجود نیں جہدے توں سرمایہ کاری دے ذریعے فیدے حاصل کیتے جا رہے نیں۔ سرمایہ کاراں نوں ون ونڈو آپریشن دے ذریعے آسانیاں دینا ہدف اے۔
ڈیجیٹلائزیشن پاروں نہ صرف محکمے دی کارکردگی وچ بہتری آوے گی بلکہ رشوت’ سفارش تے اقربا پروری اتے قابو پان وچ وی مدد ملے گی۔ ڈیجیٹلائزیشن دے ذریعے محکمہ معدنیات دا مکمل نظام اک سسٹم نال منسلک ہو جاوے گا۔ کاناں دی لیز دے معاملات وچ ہور شفافیت آوے گی۔ کان کناں دی حفاظت تے حادثیاں توں بچن وچ مدد ملے گی۔ ایسے طرح کان کناں لئی بنائے گئے ہسپتال تے اوہناں دے بالاں لئی بنائے گئے سکولاں نوں ڈیجیٹلائز کرن دا عمل جاری اے۔ چیتا رہوے کہ محکمہ معدنیات پنجاب عوام تک معلومات دی رسائی لئی دور جدید دے مائنز کیڈ سٹرل سسٹم دا فروری 2021 وچ افتتاح کر چکیا اے۔ کیڈسٹرل سسٹم دی تیاری ڈیجیٹلائزیشن ولوں انقلابی قدم اے جد کہ کان کنی توں متعلقہ مزدوراں دی فلاح و بہبود لئی سارے وسائل بروئے کار لیائے جا رہے نیں۔ گویا مائن ورکرز نوں بہتر توں بہتر سہولتاں دی فراہمی محکمہ معدنیات پنجاب دی اولین ترجیح اے۔ سمارٹ اپروچ دے ذریعے معدنی وسائل توں فیدے چکے جا رہے نیں۔ ایسے وجہ نال ہر سال محکمہ معدنیات دی آمدن وچ وادھا ہو رہیا اے۔ محکمہ معدنیات تے کان کنی پنجاب دے پروجیکٹس دی بہتر تکمیل وچ پنجاب انفارمیشن ٹیکنالوجی بورڈ بہت کارگر ثابت ہویا۔
جے پی ٹی آئی بی دی گل کیتی جاوے تے ایہہ ادارہ پنجاب ولوں مقرر کردہ اک خودمختار ادارہ اے جہڑا کہ پنجاب دی معیشت لئی جدید بنیاد فراہم کردا اے۔ پی آئی ٹی بی دا مقصد موثر طریقے نال پنجاب حکومت’ مقامی تے بین الاقوامی کاروباری اداریاں لئی آئی ٹی خدمات تے بنیادی سہولتاں فراہم کرن اتے کاربند رہنااے۔ پنجاب انفارمیشن ٹیکنالوجی بورڈ نوں جہناں اغراض و مقاصد لئی تشکیل دتا گیا سی
اوہ اوہناں اتے بااحسن طریقے نال پورا اتر رہیا اے تے پنجاب حکومت دے مختلف ڈیپارٹمنٹاں دے نال ایم او یوز سائن کرن دے نال نال ترجیحی بنیاداں اتے کم کر رہیا اے۔ کجھ مہینے پہلاں پی آئی ٹی بی تے مائنز اینڈ منرلز ڈیپارٹمنٹ دے دوران خوشگوار ماحول وچ ایم او یو اتے سائن کیتے گئے۔ ایم او یو دے تحت محکمہ معدنیات تے کان کنی پنجاب لئی کمپلینٹ مینجمنٹ سسٹم (CMS) دا اجرا کیتا جاویگا۔ ایس حوالے نال پنجاب آئی ٹی بورڈ محکمہ لئی خصوصی ہیلپ لائن نمبر وی وضع کر چکیا اے۔ شہری محکمہ معدنیات توں متعلق معلومات تے شکایتاں خصوصی ہیلپ لائن نمبر 99030122-042 اتے درج کروا سکن گے۔ کمپلینٹ مینجمنٹ سسٹم تے وضع کیتی گئی ہیلپ لائن نوں محکمہ پی آئی ٹی بی دا آئی ٹی ڈیپارٹمنٹ تے سٹیزن کنٹیکٹ سنٹر دی سربراہی وچ پرکھیا جا رہیا اے۔ چیئرمین پی آئی ٹی بی دے مطابق محکمہ معدنیات دی آٹومیشن نال محکمانہ کارکردگی وچ بہتری آوے گی۔ پی آئی ٹی بی ضلع چکوال لئی رائلٹی انسپکشن اینڈ کلیکسن رجیم’ لیز مینجمنٹ سسٹم وی وضع کرے گا۔ اوہدے نال نال ڈیپارٹمنٹ ڈاک سسٹم تے ہیومن ریسورس مینجمنٹ سسٹم توں متعلق سافٹ ویئر وی تیار کرے گا۔سیکرٹری محکمہ معدنیات اسداللہ فیض دے مطابق جدید سسٹم نال ریکارڈ دی
مانیٹرنگ’ محکمانہ احتساب’ سروس ڈیلیوری تے شکایات دا ویلے تے ازالہ کیتا جا سکے گا۔ پی آئی ٹی بی محکمہ معدنیات لئی ہارڈویئر انسٹال کرن وچ وی معاونت فراہم کرے گا۔ وزیراعلیٰ پنجاب پرویزالٰہی دے ویژن تے وزیر معدنیات پنجاب لطیف نذر دی قابل قیادت وچ کان کنی دی ڈیجیٹلائزیشن دا عمل جاری اے۔ سیکرٹری مائنز اینڈ منرلز اسداللہ فیض نے کجھ دناں پہلاں پی آئی ٹی بی تے مائنز لیبر ویلفیئر آرگنائزیشن دے نمائندیاں دے نال اک میٹنگ دی صدارت کیتی جہدے وچ مائنز لیبر ویلفیئر ہسپتالاں دے سارے پراسیس نوں ڈیجٹائز کرن دے طریقہ کار اتے تبادلہ خیال کیتا گیا جد کہ ایم ایل ڈبلیو تے پی ٹی بی نوں سیکرٹری مائنز ولوں ہدایت کیتی گئی اے کہ اوہ مشترکہ طور تے ایسا عمل تیار کرن جہناں توں صحت دی خدمات دی فراہمی نوں شفاف’ تیز تے موثر بنان لئی ڈیجیٹائز کیتا جاسکے۔ حکومت پنجاب ولوں کان کنی دے شعبے وچ تیز رفتار ترقی تے مائن ورکراں دی فلاح تے خوشحالی لئی مائننگ سیکٹر نوں خصوصی بنیاداں اتے ڈیجیٹلائز کرن دا عمل جاری اے۔ مائنز اینڈ منرلز ڈیپارٹمنٹ نے مائنز لیبر ویلفیئر ہسپتال سروسز دا آئی ٹی وچ انضمام کیتا اے تاں جے صحت عامہ دی سہولت نوں ڈیجیٹل بنیاداں اتے فراہم کیتا جا سکے۔مائنز اینڈ منرلز ڈیپارٹمنٹ نے حکومتی فنڈز دے موثر تے شفاف استعمال نوں یقینی بنان لئی مائنز لیبر ویلفیئر ہسپتال دے سارے عمل نوں ڈیجٹیائز کرن دا عزم کیتا اے۔ ایس توں مزدوراں دا سرکاری خدما ت اتے اعتماد ودھے گا تے انتظامی محکمے نوں عوامی فنڈز دے استعمال جیویں کہ انوینٹری ٹرن اوور’ مفت دوائیاں دی تقسیم وغیرہ دی سخت نگرانی وچ مدد ملے گی۔ عمل نوں ڈیجٹیائز کرن نال مریض دا وقت بچ جاوے گا تے محکمے نوں بعد دے دورے اتے بہتر علاج لئی مریض دا ریکارڈ/ تریخ برقرار رکھن وچ مدد ملے گی۔ ہسپتال دی ویلے تے مداخلت تے اپ ڈیٹ لئی ڈیجیٹائزیشن دے ذریعے مریضاں دی تعداد دی نگرانی کیتی جا سکے گی۔ مزید برآں ایہہ منصوبہ وی بنایا گیا اے کہ ایہہ ہسپتال عام لوکاں لئی وی کھلے رہن گے جد کہ کجھ بستر کان دے مزدوراں تے اوہناں دے اہلخانہ لئی مختص کیتے جان گے جد کہ پی ٹی بی تے ایم ایل ڈبلیو سارے ہسپتالاں دا مشترکہ دورہ کر رہے نیں تاں جے سیکی مائنز نوں بہتر تجویزاں دتیاں جا سکن۔ علاوہ ازیں ایس عمل نوں یقینی بنان لئی سارے قائم کردہ ہسپتالاں تے ڈسپنسریاں نوں ترجیحی بنیاداں اتے ڈیجیٹل کیتا جا رہیااے جہدے وچ ہسپتال دے طریقہ کار’ ہسپتال دی انونٹری’ سارے ہسپتالاں تے ڈسپنسریاں دا انضمام تے مریض دی منتقلی نوں یقینی بنایا جا رہیا اے۔ مائنز اینڈ منرلز ڈیپارٹمنٹ ولوں کارکردگی’ شفافیت تے پیداواری صلاحیت نوں ودھان لئی مختلف عوامل نوں ڈیجیٹلائز کرن لئی بے مثال اقدامات کیتے جا رہے نیں جہدے وچ انسپکٹوریٹ آف مائنز’ پنجاب لاہور دے کم نوں مضبوط بنانا تے ڈیجیٹلائز کرنا’ ضلع چکوال تے جہلم لئی معدنیات دی رائلٹی دی ڈیجیٹل مانیٹرنگ’ ڈائریکٹوریٹ جنرل مائنز اینڈ منرلز’ پنجاب دی مضبوطی تے ایڈمنسٹریٹو ڈیپارٹمنٹ دی آئی ٹی انٹیگریشن’ شفافیت تے عام لوکاں نوں کان کنی دی رعایتی معلومات دی فراہمی لئی معدنی کیڈسٹرل نظام’ آئی فائلنگ تے آفس آٹومیشن سسٹم دا نفاذ’ پی آئی ٹی بی دے ذریعہ تیار کردہ e-FOAS تے ہیومن ریسورس مینجمنٹ انفارمیشن سسٹم (HRIMS) دا نفاذ شامل نیں۔ خواتین تے کان کنی’ ایہہ سنن وچ دو مختلف تے ناممکن جئی گلاں لگدیاں نیں لیکن ایس ناممکن نوں ڈیپارٹمنٹ آف مائننگ اینڈ منرلز پنجاب نے خواتین دی ودھدی دلچسپی کارن ممکن وچ بدل دتا۔ روایتی طور تے کان کنی دے شعبے نوں مرداں لئی مخصوص سجمھیا جاندا اے کیوں جے ایہدے وچ اوہناں نوں سخت جسمانی مشقت کرنا پیندی اے لیکن پاکستان وچ ہن زنانیاں وی ایس شعبے وچ خاصی دلچسپی لے رہیاں نیں۔ بلاشبہ زنانیاں دے فعال کردار دے بغیر معاشرے دی ترقی ناممکن اے۔ ساڈے معاشرے دی زنانیاں کسے توں گھٹ نہیں۔ا وہ ہر شعبہ ہائے زندگی وچ مرداںدے موہنڈھے نال موہنڈھا لائے ایس ملک دی ترقی وچ اپنا حصہ پا رہیاں نیں۔ حکومت پنجاب کان کنی دے شعبے نوں کاروباری زنانیاں لئی پرکشش بنان لئی مراعا ت فراہم کر رہی اے۔ وزیراعلیٰ چوہدری پرویزالٰہی نے ہمیشہ خواتین دی اہمیت نوں جانچدے ہوئے اوہناں نوں بااختیار بنان لئی اقدامات کیتے۔ وزیراعلیٰ پنجاب تے وزیر معدنیات لطیف نذر دی قیادت وچ محکمہ معدنیات نے انقلابی اقدام کردے ہوئے ملکی تریخ دی پہلی ویمن ان مائننگ کانفرنس دا پربندھ کیتا۔ فلیگ شپ منصوبے ویمن ان ماننگ دا تسلسل برقرار رکھدے ہوئے دوبئی ایکسپو وچ ویمن ان سٹیل کانفرنس مگروں لہور وچ بریکنگ بیریرز دے عنوان نال اہم سیمینار دا پربندھ کیتا گیا۔ سیمینار وچ کان کنی دے شعبے وچ خواتین لئی موجود موقعے نوں اجاگر کیتا گیا۔ وزیراعلیٰ پنجاب دے حکم تے ویمن ان ماننگ دے ذریعے ماننگ انجینئرنگ نال جڑی طالبات نوں چار مہینے دی انٹرن شپ دتی جا رہی اے۔ انٹرن شپ کرن والی طالبات نوں 20ہزار ماہانہ وظیفہ وی دتا جا رہیا اے۔ ”ویمن ان مائننگ” پہلی واری وویمن ڈویلپمنٹ سکیم اے جہدے وچ کان کنی دے شعبے نوں صنفی مرکزی دھارے وچ لیان اتے توجہ مرکوز کیتی گئی اے جو کہ مرداں دے غلبہ والا تکنیکی شعبہ اے۔ ویمن ان ماننگ ملکی تریخ وچ پہلی ایسی سکیم اے جہدے ذریعے کان کنی جیسے مشکل شعبے وچ خواتین نوں شمولیت دتی جاوے گی۔
10ملین روپے دے بجٹ تے مشتمل ایہہ سکیم اک سال دے عرصے وچ مکمل کیتی جا رہی اے۔ محکمہ معدنیات خواتین لئی ایس شعبے نوں کھولن تے ایہناں نوں ایہدے وچ کم لئی اک سازگار ماحول فراہم کرن دی خواہش رکھدا اے۔ محکمہ معدنیات تے کان کنی وزیراعلیٰ پنجاب دی قیادت وچ ڈیجیٹلائزیشن تے ویمن ان مائننگ توں انڈسٹری نوں فروغ دین تے روزگار دے موقعے فراہم کرن لئی کوشاں اے۔ لہٰذا مائننگ دے شعبہ نال جڑے افراد نوں ہر ممکن سہولتاں فراہم کیتی جا رہیاں نیں تاں جے معدنی ذخائر جئی قومی دولت توں ودھ توں ودھ فیدے حاصل کیتے جا سکن تے صوبہ پنجاب ایہناں وسائل نوں بروئے کار لیاندے ہوئے معاشی لحاظ نال مستحکم ہو سکے۔ الحمداللہ!اج وزیراعلیٰ پنجاب چوہدری پرویزالٰہی دی زیر نگرانی صوبہ پنجاب شاندار ترقی دا نواں باب بن رہیا اے۔

اپنا تبصرہ گھلو