پنجابی زبان تحریک تے پنجاب قومی سمتھدے پربندھ ہیٹھ چھیواں تے ستواںپنجابی صوفی سیمینار

Punjabi Sufi Seminar

پنجابی زبان ، ادب، رہتل تے پنجابی صوفی شاعراں دے سنیہے نوں اگے ودھائون ،اجوکی نویں نسل تک پنجابی سُورمیاںتے نابر پنجابناں دی حیاتی بارے جانکاری اپڑائون، پنجاب دی تاریخی حیثیت تے پنجابی زبان نال ہوئے دھرو بارے جانکاری اج دے پڑھیاراں تے پڑھیارناں تک اپڑائون لئی جتن کرن والیاں دو ادبی تنظیماں ”پنجابی زبان تحریک”تے ”پنجاب قومی ستھ” دے پربندھ ہیٹھ گورنمنٹ لاثانی مسلم ہائی سکول(فاروق آباد) وچ 17 ستمبرہفتے والے دن سویرے 9:00 وجے چھیواں ”پنجابی صوفی سیمینار” کروایا گیا۔
”پنجابی زبان تحریک ” تے ”پنجاب قومی ستھ” دی سانجھ نال ”پنجابی صوفی سیمینارز” دا اِک سلسلا شروع کیتا گیا اے۔ایس سلسلے راہیں دوواں تنظیماں دے آگوواں مطابق پنجاب بھر دے ہائی سکولاں، کالجاں تے یونیورسٹیاں وچ ”پنجابی صوفی سیمینار” کروائے جان گے ۔17ستمبر 2022،ہفتے والے دن گورنمنٹ لاثانی مسلم ہائی سکول (فاروق آباد) وچ ہون والا ایس سلسلے دا چھیواں سیمینار سی۔ ایس ”پنجابی صوفی سیمینار” دی صدارت ، گورنمنٹ لاثانی مسلم ہائی سکول (فاروق آباد) دے ہیڈ ماسٹر محترم جناب میاں عدنان جمیل صاحب نے کیتی۔
اُچیچے پروہنیاں وچ نوجوان شاعر محترم علی عرفان (شیخوپورا)، محترما نرگس نور (لاہور)، محترم جناب ندیم افضل ندیم شامل سن۔
جدوں کہ ایس ”پنجابی صوفی سیمینار وچ سٹیج سیکرٹری دی ذمے واری جاوید پنچھی (چیئرمین پنجاب قومی ستھ) نے نبھائی۔
”پنجابی صوفی سیمینار” دا آغاز اللہ تعالیٰ دے پاک کلام توں کیتا گیا ۔ جہدی سعادت ناویں جماعت دے پڑھیار غلام مصطفی نے حاصل کیتی تے رسول اللہ ۖ دے حضور ہدیہ نعت ناویں جماعت دے پڑھیار نادر علی نے پیش کیتا۔
جتھے اللہ تے اوہدے رسول ۖ دا ذکر ہووے اوتھے اللہ دے ولیاں دا ذکر ہونا وی ضروری ہوندا اے ۔ سو ، ولی کامل ، صوفی شاعر تے قصہ سیف الملوک دے خالق ”میاں محمد بخش” رحمة اللہ علیہ دا کلام پیش کرن دی سعادت دسویں جماعت دے پڑھیار ذوالقرنین حیدر نے کھٹی۔
سٹیج سیکرٹری جاوید پنچھی نے تعارف کراندیاں دسیا کہ ”اج مینوں گورنمنٹ لاثانی مسلم ہائی سکول فاروق آباد آ کے فخر محسوس ہو رہیا اے کیوں جے ”گورنمنٹ لاثانی مسلم ہائی سکول” اوہ ادارا اے جتھے میں ناویں جماعت تک پڑھدا رہیا ۔اوس ویلے ایس ادارے دے ہیڈ ماسٹر محترم جناب امجد علی صاحب بہت ای نگھے سبھا والے اُستاد سن۔
اُستاد محترم جناب میاں امجد علی صاحب مینوں جدوں ملدے اک ای گل کہندے رہے نیں:
”جاوید پنچھی! کسے دن ساڈے سکول آ کے بالاں نال گل بات کر! ۔ ساڈے واسطے ایہ بڑے مان دی گل ہووے گی کہ ساڈے ادارے دے اک پڑھیار دا اج بہت وڈا ناں اے۔ خاص طور تے عالمی پدھر تے کھلرے پنجابی لکھاریاں وچ جاوید پنچھی دی پرسدھی (مشہوری) سُن کے مینوں فخر محسوس ہوندا اے کہ جاوید پنچھی میرا اوہ شاگرد اے جہنوں عالمی پدھر دے پنجابی لکھاری جان دے نیں۔
جاوید پنچھی نے گورنمنٹ لاثانی مسلم ہائی سکول دے پڑھیاراں نوں خطاب کر دیاں آکھیا کہ:
”اج میں تہانوں ایہ دسن آیاں کہ ماں بولی دی اہمیت کیہ اے تے ماں بولی وچ پڑھنا ساڈے لئی کیوں تے کِنّاں ضروری اے؟ اللہ تعالیٰ خودتے اوہدے بھیجے ہوئے اک لکھ چوی ہزار پیغمبر اں نے نہ صرف ماں بولی نوں اہمیت دتی اے سگوں خطے نوں وی اہمیت دتی اے۔ تاں ای تے اللہ تعالیٰ نے قرآن پاک وچ سورة ابراہیم دی چوتھی آیت وچ ارشاد فرمایا: ”اساں ہر قوم وچ اک نبی گھلیا جہڑا اوہناں دی (ماں) بولی وچ گل کردا سی تاں جے ساڈا سنیہا صاف صاف اوہناں نوں دس سکے”۔
فر سورة حٰم دی آیت ٤٤ وچ اللہ تعالیٰ نے پوری طرحاں گل نوں کھول دتا اے تاں جے ہر کسے دی سمجھ وچ آجاوے ۔اللہ تعالیٰ دا فرمان اے:
”تے جے اسیں ایس (قرآن) نوں کسے ہور زبان وچ اُتاردے تے اوہ کافر ضرور کہندے ایس (قرآن) دیاں آیتاں نوں کیوں نہ(ساڈی ماں بولی وچ) کھول دتا گیا ، کتاب عجمی بولی وچ تے نبی عربی(خطے وچ)، تسی فرما دیو! ایہ (کتاب) ایمان والیاں واسطے ہدایت تے شفا اے ، جہڑے یقین نہیں کردے اوہناں دے کناں وچ اِک روگ اے جہڑا وہناں واسطے بولا پن اے جسراں اوہناں نوں دُوروں آواز آ رہی ہووے”۔
گل لمی ہون دے ڈر پاروں صرف اینا آکھاں گا کہ اللہ تعالیٰ دا اِک فرمان ای کافی ہوندا اے۔ فر وی اللہ تعالیٰ نے قرآن پاک وچ 11آیتاں ماں بولی دے حق وچ نازل کیتیاں نیں۔ ہُن تُسی آپ سوچ لوو کہ ماں بولی دی اہمیت کیہ ہو سکدی اے؟
جے سورة ابراہیم دی چوتھی آیت نوں مُکھ رکھیے تے ایہ گل سمجھ وچ آئوندی اے کہ ”ماں بولی بولنا، پڑھنا تے پڑھانا اک لکھ چوی ہزار پیغمبراں دی سُنت اے”۔
ایس توں بعد آئے پروہنیاں وچ نوجوان شاعر ، محترم جناب علی عرفان کھوکھر نے نہ صرف پنجابی بولی دے حق وچ گل بات کیتی سگوں لاثانی سکول دے پڑھیاراں نوں اپنی شاعری وی سنائی۔
جا وید پنچھی نے اک واری فیر مائیک سنبھالیا تے گورنمنٹ لاثانی مسلم ہائی سکول فاروق آباد وچ پنجابی پڑھائون والے اُستاد محترم جناب یاسین صاحب نوں دعوت خطاب دتی۔ پنجابی اُستاد یاسین صاحب نے اپنے سکول دے بالاں نوں مختصر جہیا خطاب کیتا تے سکول وچ پنجابی صوفی سیمینار کروان تے ”پنجاب قومی ستھ” تے ”پنجابی زبان تحریک” دے آگوواں دا شکریا اداکیتا۔
نوجوان جذبیاں دی خالق محترما نرگس نور صاحبا نے اپنا تازا کلام سُنا کے سکول دے پڑھیاراں تے اُستاداں تے جادو کر دتا۔ جسراں سید وارث شاہ فرماندے نیں:
”وارث شاہ اساں نال جادوواں دے،
کئی رانیاں کیتیاں چیلیاں نیں”
سو نرگس نور نے وی نویں نسل وچوں لفظاں دے جادو نال بہت سارے بالاں نوں اپنے چیلے بنا لیا۔
کہندے نیں ”پکیاں تھاواں” دے کول نہیں جانا چاہیدا کیوں جے ”پکیاں تھاواں ” تے ہوائی مخلوق یعنی جن تے پریاں رہندے نیں جہڑے کہ کسے وی انسان نوں قابو کر لیندے نیں۔ ایہ گل بلکل سچ اے کیوں جے ندیم افضل ندیم نے ”پکیاں تھاواں” لکھ کے بہت سارے لوکاں نوں قابو کر لیا ہویا اے۔ ہاں جی ایہ اوہ ندیم افضل اے جہدے دو پنجابی شعری پراگے چھپ چُکے نیں ۔ اک پاکستانی پنجاب وچ ”پکیاں تھاواں” تے اک چڑھدے پنجاب وچ ”ہُن تینوں کیہ؟”
ندیم افضل ندیم ضلع شیخوپورا دی تحصیل صفدر آباد دے رہن والے نیں اوہناں نے اپنی بہترین شاعری سنا کے ”پنجابی صوفی سیمینار” دے رلتیاں توں بہت چوکھی داد کھٹی۔
آخر تے گورنمنٹ لاثانی مسلم ہائی سکول (فاروق آباد) دے ہیڈ ماسٹر محترم جناب میاں عدنان جمیل صاحب نے گال بات کردیاں نہ صرف سیمینار واسطے آئون والے پروہنیاں دا شکریہ ادا کیتا سگوں ایہ وی آکھیا کہ : ”جاوید پنچھی نے اج ساڈی بھلی ہوئی ماں بولی نال ملوا دتا اے ۔ میں ایہناں دا انتہائی شکر گزار ہاں کہ پنجاب بھر دے بوائز سکولاں وچوں سب توں پہلاں ساڈے ادارے نوں چُنیا”۔
ایس توں بعد ”پنجابی صوفی سیمینار” واسطے آئے پروہنیاں دی سیوا وچ چاہ سموسے پیش کیتے گئے۔
”پنجاب قومی ستھ” تے ”پنجابی زبان تحریک” ولوں گورنمنٹ لاثانی مسلم ہائی سکول وچ کروائے گے ”پنجابی صوفی سیمینار” وچ دوواں تنظیماں دی سانجھ نال سکول دے 5بالاں نوں تے 3اُستاداں نوں پنجابی پٹکے پیش کیتے گئے۔
٭٭٭٭٭٭٭
”پنجاب قومی ستھ” تے ”پنجابی زبان تحریک” دی سانجھ نال ستواں ”پنجابی صوفی سیمینار” گورنمنٹ انٹر کالج (فاروق آباد) وچ ہویا۔
”پنجاب قومی ستھ” تے ”پنجابی زبان تحریک” ولوں پنجاب بھر دے سکولاں تے کالجاں وچ ”پنجابی صوفی سیمینار” کروان دا جہڑا سلسلا شروع کیتا گیا اے۔ اوس سلسلے دا ستواں ”سیمینار” گورنمنٹ انٹر کالج (فاروق آباد) وچ 17ستمبر 2022نوں ہفتے والے دن 11:00وجے ہویا۔
ایس ”پنجابی صوفی سیمینار” دی صدارت ”پنجاب قومی ستھ” دے چیئرمین جاوید پنچھی نے کیتی۔ گل بات کرن والیاں وچ عوامی لہجے دی شاعرا ، تِن شعری پراگیاں دی خالق ، کئی ادبی تنظیماں دی ممبر ، محترما نرگس نور صاحبا تے ”پکیاں تھاواں” دے خالق محترم جناب ندیم افضل ندیم شامل سن۔ جدوں کہ نوجوان شاعر افضال اسلم تے متے خاں آسی (فیروز وٹواں) نے وی اپنا کلام سنایا۔
ایس سیمینار دی کاروائی اللہ تعالیٰ دے سوہنے ناں نال شروع کیتی گئی۔ تلاوت کلام پاک دی سعادت انٹر کالج دے پڑھیار ”محمد ابراہیم” نے حاصل کیتی تے رسول کریم ۖ دے حضور ہدیہ نعت کالج پڑھیار عبدالحفیظ نے پیش کیتا۔ جدوں کہ پنجابی صوفی شاعر تے لوک داستان ”سیف الملوک” دے خالق میاں محمد بخش رحمة اللہ علیہ دا کلام پڑھن والے پڑھیاراں وچ محمد فائز، محمد بلال دے ناں شامل سن۔
بوائزانٹر کالج دے پڑھیارا ں وچوں جہناں مُنڈیاں نے تلاوت کیتی، کلام پڑھیا اوہناں بالاں نوں بطور انعام ”پنجاب قومی ستھ” تے ”پنجابی زبان تحریک” ولوں پنجابی پٹکے دتے گئے۔ اوہناں توں علاوا انٹر کالج دے دو اُستاد اں یعقوب مسیح تے شوکت صاحب نوں وی پنجابی پٹکے پوائے گے۔ یعقوب مسیح صاحب نے تے شوکت صاحب نے نہ صرف پروہنیاں نوں ”جی آیاں نوں” آکھیا سگوں تعارفی کلمات وی آکھے۔
ایس توں بعد حسب روایت نوجوان شاعر علی عرفان نے نہ صرف اپنا کلام سنایا سگوں پنجابی زبان دے ودھاء واسطے گل بات وی کیتی۔
پنجابی صوفی شاعر تے قصص المحسنین دے خالق مولوی عبدالستار دی دھرتی (فیروز وٹواں) توں آئے دو نوجوان شاعراں (متے خاں عاصی تے افضال اسلم) نے اپنا کلام سنایا۔
”پنجابی صوفی سیمینار” کروان والی ٹیم دی ممبر ، تِن شعری پراگیاں دی خالق، نوجوان نسل دی نمائندا شاعرا، محترما نرگس نور صاحبا نے اپنی شاعری راہیں کالج دے پڑھیاراں نوں پنجابی زبان ول آئون لئی پریریا۔
ایس توں بعد ”پکیاں تھاواں” تے ”ہُن تینوں کیہ” دے خالق محترم جناب ندیم افضل ندیم جہڑے کہ کسے تعارف دے محتاج نہیں ۔ اوہناں نے کالج دے پڑھیاراں نوں اپنیاں نویاں نظماں سنا کے پڑھیاراں دے بُلّھاں تے ہاسے کھلار دتے۔
گورنمنٹ بوائز انٹر کالج فاروق آباد وچ ہون والے ایس ”پنجابی صوفی سیمینار دے صدر ”جاوید پنچھی” نے آخر تے گل کردیاں آکھیا کہ :
” اللہ تعالیٰ نے اپنی مخلوق دی بھلائی واسطے ، اپنی مخلوق نوں سدھا رستا وکھائون تے اللہ دا سنیہا لوکائی تک صاف صاف اپڑائون لئی اک لکھ چوی ہزار پیغمبر دنیا تے بھیجے تے ہر پیغمبر نوں اوہناں دی ماں بولی وچ وحی کیتی گئی۔ جسراں سورة ابراہیم دی چوتھی آیت وچ اللہ ارشاد فرماندا اے: ”اساں ہر قوم وچ اک رسول گھلیا جہڑا اوہناں دی ہی بولی بولدا سی تاں جے ساڈا سنیہا اوہناں نوں صاف صاف دس سکے”۔
انج ماں بولی وچ گل کرنا، ماں بولی پڑھنا تے پڑھائونا اک لکھ چوی ہزار پیغمبراں دی سُنت اے۔
”پنجابی زبان دا ودھا ء اوس ویلے تک ممکن نہیں جدوں تک ”پنجابی زبان تحریک” دا سدا پنجابی سٹوڈنٹس تک نہیں اپڑدا۔ کیوں جے کسے وی تحریک نوں کامیاب بنائون وچ سٹوڈنٹس دا بہت حصا ہوندا اے۔ سو اسیں ہر طرح جتن کر کے ”پنجاب بھر دے کالجاں تے یونیورسٹیاں وچ پنجابی صوفی سیمینار کراواں گے”۔
”پنجابی صوفی سیمینارز” دے ذریعے جتھے نویں نسل نوں پنجاب دی تواریخ تے صوفی شاعراں بارے بھرویں جانکاری ملے گی اوتھے بہت سارے سٹوڈنٹس ”پنجابی زبان تحریک” دے بانہ بیلی وی بنن گے۔
دنیا بھر دے ماہرین تعلیم کہندے نیں : ”بچے نوں اوہدی ماں بولی وچ پڑھائو تے اوہ چھیتی سکھدا اے۔ پر ساڈے ایتھے عجیب سسٹم اے کہ سپریم کورٹ آف پاکستان دے فیصلا دین توں بعد وی ساڈے بالاں نوں مادری بولی وچ تعلیم نہیں دتی جاندی۔
”ساڈی ماں بولی نال بہت دھرو ہویا اے۔ جدوں انگریز نے29مارچ 1849نوں پنجاب تے قبضا کیتا۔اوس ویلے بہت لُٹ مار کیتی گئی۔ پنجابی کتاباں تے لائبریریاں ساڑ دتیاں گئیاںکوئی ادھی صدی بعد انگریزحاکماں نے سکول کھولے تے ایتھوں دے ڈی سیز نوں پُچھیا کہ: ”سکولاں وچ کہڑی زبان رائج کیتی جائے؟” ڈی سیز نے نمبرداراں توں پُچھیا۔
نمبرداراں دے تِن طبقے سن ۔ پہلا طبقا اوہ جہڑا انگریز حکمراناں توں ڈردا سی۔ دوجا اوہ جہڑا چاپلوسی کر کے اوہناں دے نیڑے ہونا چاہندا سی تاں جے نمبرداری بحال رہوے۔ تیجا طبقا جہڑا اپنے علاقیاں وچ پاورفُل سی تے انگریز حکمراناں نے اوس طبقے نوں مراعات، پیسے تے زمیناں دے کے خرید لیا سی۔ ایہو جہی صورت حال وچ نمبرداراں وچوں انگریز حکمراناں سامنے کون بولدا؟
سو اوہناں اکو گل آکھی”جسراں حضور دی مرضی” …..۔
رہندی کسر اوہناں کڈھ دتی جہڑے انگریز دے چمچے کڑچھے یوپی سی پی توں اوہناں دے نال آئے سن۔ اوہ کہن لگے : ”اُردو اور پنجابی دونوں ملتی جُلتی زبانیں ہیں لہٰذا آپ سکولوں میں اُردو رائج کر دیں”۔
فر ایہ ہویا کہ سکولاں وچ اُردو رائج کر دتی گئی ۔ جہڑا پنجابی نصاب اوس ویلے تک مدرسیاں وچ پڑھایا جاندا سی اوہ راتو رات بدل دتا گیا۔ ”
پچھلے ورھے جدوں پنجاب وچ پی ٹی آئی دی حکومت سی۔ سپریم کورٹ آف پاکستان نے پنجابیاں ولوں دائر کیتی گئی اک پٹیشن تے فیصلا جاری کیتا کہ” سارے صوبیاں نوں حق حاصل اے پئی اوہ اپنے بالاں نوں ماں بولی وچ تعلیم دین”۔
اوس فیصلے دی روشنی وچ سارے پنجاب دے سکولاں کالجاں توں پنجابی پڑھن والے بالاں دا ڈیٹا کٹھا کیتا گیا۔ جتھے پنجابی پڑھائون والے اُستاد موجود نہیں سن۔ اوتھے پنجابی اُستاد لائون لئی پنجاب سرکار تے زور پایا گیا ۔ جہدا سِٹا ایہ نکلیا کہ ہُن تک پرائمری تے ہائی سکولاں وچ چار ہزار اُستاد بھرتی کرن لئی منظوری دے دتی گئی اے تے ساڈے ضلع شیخوپورا واسطے پنجابی اُستاداں دیاں 226سیٹاں منظور ہو چُکیاں نیں۔ اسیں اُمید کردے ہاں کہ بہت چھیتی کالجاں واسطے وی پنجابی دیاں سیٹاں کڈھیاں جاون گیاں۔ انج پنجابی زبان روز گار نال وی جڑ جائے گی تے فیر پنجابی زبان ترقی ول ٹر پئے گی۔ امید کیتی جا سکدی اے کہ ساڈے بال پنجابی زبان دا چنگا بھلک ضرور ویکھن گے۔

اپنا تبصرہ گھلو