عمران خان قائد انقلاب اے

صوبائی وزیر جنگلات ماہی پروری پنجاب اسمبلی وچ پارلیمانی پارٹی دے چیف وہپ سید عباس علی شاہ اک صاف گو تے عوامی شخصیت دے طور تے صوبہ وچ اپنی شناخت رکھدے نیں۔ پچھلے وزیراعظم عمران خان دے دیرینہ ساتھی تے کرکٹ دے فین نیں۔ تحریک انصاف تے عمران خان دے نال اوہناں دی وابستگی غیر مشروط اے۔ خانیوال دے حلقہ پی پی 257 توں پارٹی ٹکٹ اتے بھاری اکثریت نال کامیاب ہوئے۔ سید عباس علی شاہ غیر معمولی حالات وچ وی عمران خان دی قیادت وچ پارٹی دے نال جڑے رہے۔ عدالت عظمیٰ دے فیصلے مگروں حمزہ شہباز شریف دی حکومت دے خاتمے مگروں مسلم لیگ ق تے تحریک انصاف دی مشترکہ حکومت پنجاب وچ پارٹی قیادت ولوں پارلیمانی چیف وہپ تے وزارت دے حق دار بنے۔ پجھلے دناں پنجاب اسمبلی وچ اوہناں دے دفتر وچ اوہناں دے ترجمان برادرم نورالہدیٰ دی کاوش نال ہون والی ملاقات دے دوران جتھے پنجاب وچ اوہناں دی محکمانہ ذمہ داریاں دے حوالے نال گل بات ہوئی اوتھے ملکی سیاسی صورتحال اتے وی اوہناں دے خیالات سنن دا موقع ملیا۔ سید عباس علی شاہ نے جمہوریت دے نال اپنی کمٹمنٹ واضح کردے ہوئے آکھیاکہ جمہوریت وچ ای پاکستان دی بقا اے کیوں جے اقوام عالم دی تریخ وچ ایسی کوئی نظیر نہیں ملدی کہ جمہور بنا تقری ہووے۔ اوہناں نے آکھیا کہ تحریک انصاف واحد قومی سیاسی جماعت اے جو ہمیشہ توں جمہوریت دے سنہری اصولاں دے عین مطابق اپنی پارلیمانی تے عوامی سیاست کر رہی اے۔ اوہناں نے پی ڈی ایم دی جماعتاں نوں ہدف تنقید بنایا تے اوہناں نوں عوامی مینڈیٹ دی توہین کرن منتخب حکومت پاکستان تے پنجاب دی بزدار سرکار نوں غیر آئینی تے قنونی طور تے اراکین پارلیمنٹ تے ممبران پنجاب اسمبلی دی وفاداریاں تبدیل کروان دا ذمہ دار ٹھہراندے ہوئے اوہناں دے ایہناں اقدامات نوں ناصرف دنیا بھر وچ رائج پارلیمانی روایات دے منافی قرار دتا بلکہ اوہناں دے حصول اقتدار دے ایس طرزعمل نوں غیر جمہوری گرداندے ہوئے ملک و قوم دے منافی تے جمہوریت لئی نقصان دہ وی آکھیا۔ صوبائی وزیر جنگلات پنجاب دا کہنا سی کہ اوہناں دے جمہور دشمن طرزعمل دی وجہ نال حالیہ ضمنی انتخابات وچ عوام نے اوہناں نوں رد کردے ہوئے تحریک انصاف دے منشور تے پچھلے وزیراعظم عمران خان دی قیادت توں انحراف کرن والیاں نوں سیاسی طور تے رد کردتا اے تے اک واری فیر قومی انتخابات دے اپنے مینڈیٹ اتے مہر تصدیق ثبت کر دتی اے جہدے توں کسی زمانے وچ پی ڈی ایم دی جماعتاں دا دھاندلی دے الزامات وی غلط ثابت ہوگئے۔ سید عباس علی شاہ نے انٹرویو دے دوران دعویٰ کیتا کہ آئندہ قومی انتخابات عوامی تائید و حمایت نال فیر عمران خان ای جتن گے تے وزیراعظم پاکستان بن کے عوامی خدمت دا سلسلہ شروع کرن گے۔ ملک و قوم دے وسیع تر مفاد نوںمدنظر تے مکرم رکھن گے ۔ ایس ویلے حکمران پی ڈی ایم نے ملکی معیشت تباہ کردتی اے۔ آئی ایم ایف کولوں کجھ ٹکیاں لئی عوام دشمن پالیسیاں دا نفاذ کر رکھیا اے جہدے توں مہنگائی دا طوفان برپا اے۔ افراط زر دی شرح وچ ہولناک وادھا ہو چکیا اے۔ بجلی’ پانی’ گیس نایاب نیں لیکن اوہناں دی قیمتاں وچ بے پناہ وادھا ہو چکیا اے۔ عالمی سطح اتے پٹرولیم مصنوعات دی قیمتاں وچ کمی دے باوجود ملک وچ اوہناں دی قیمتاں وچ بے پناہ وادھا کیتا جا رہیا اے۔ صنعت و تجارت دا پہیہ اوہناں دی پالیسیاں پاروں جام ہو چکیا۔ ہن زراعت وی تباہی دے دہانے اتے اے۔ عوام دی حیاتی اجیرن ہو چکی۔ لوک اشیا خورونوش دی قیمتاں وچ وادھے کارن خریدن توں قاصر نیں۔ خودکشیاں عام نیں لیکن وفاقی سرکار مست اے۔ سیلاب متاثرین لئی وی پیسے نہیں نیں۔ ایہہ اوہ وی قرض تے امداد منگ رہے نیں پارٹی قائد تے پچھلے وزیراعظم عمران خان دے بارے گل کردے ہوئے کہنا سی کہ اوہ جمہوریت دی روح تے قائد انقلاب نیں۔ اوہناں نے عوام نوں شعور دتا۔ امریکی تے عالمی مالیاتی اداریاں دی ڈکٹیشن نہیں لیتی۔ عوام دا ساتھ دتا۔ مضبوط تے آزاد خارجہ پالیسی نال پاکستان دی سیاسی تنہائی دور تے عالم اسلام تے مقبوضہ بیت المقدس تے کشمیر دا مقدمہ لڑیا۔اقوام متحدہ وچ علم رسالت مآب اچا کیتا۔ اسلامی پاکستان دی بنیاد رکھی۔ احساس پروگرام ہیلتھ کارڈ ڈیجیٹل پاکستان روزگار لئی آسان شرطاں اتے قرضے ٹیکسٹائل صنعت دی بحالی پانی ذخیرہ کرن لئی ڈیماں دی تعمیر عوام دوست پالیسی بنائیاں۔ اپنے محکمانہ امور دے متعلق اظہار خیال کردے ہوئے آکھیا کہ صوبائی وزیر جنگلات تے ماہی پروری سید عباس علی شاہ نے آکھیا کہ ماہی پروری دے ذریعے ملکی معیشت نوں استحکام دین لئی پلاننگ ہو رہی اے۔ ایہہ مرغی توں بہتر تے سستا گوشت اے۔ عوام نوں ترغیب دین دی مہم شروع کر رہے نیں۔ محلہ وار ایہنوں ترقی دین لئی جدید ٹیکنالوجی تے آسان قرضیاں دی سہولتاں فراہم کرن دا فیصلہ کیتا گیااے۔ ایس ضمن وچ کم جاری اے۔ ایس دے علاوہ مچھی دی برآمدات ودھان اتے وی کم جاری اے۔ جنگلات دے حوالے نال اوہناں نے آکھیا کہ ماضی وچ ایس شعبہ نوں ہر طرحاں نظرانداز کیتا گیا۔ اسیں اپنے قائد عمران خان دی ہدایت تے آئندہ نسلاں لئی سرسبز و شاداب پاکستان بنان تے گلوبل وارمنگ دے خاتمے لئی بلین
ٹری پراجیکٹ شروع کر رکھیا اے۔ پنجاب بھر وچ لکھاں درخت لگائے جا چکے نیں۔ محکمہ زراعت دے تعاون نال کساناں نوں کھیتاں دے نال پکڈنڈیاں ‘ راجباہواں دے نال نال دیہاتاں تے گھراں دے صحناں وچ پھل تے سایہ
دار درخت لگان دی ترغیب دے رہے نیں۔ شہری علاقیاں وچ وی شجر کاری مہم جاری اے۔ ہر طبقہ فکر نوں ایہدے نال جڑیا جا رہیا اے۔ ایس سلسلہ وچ ضلعی انتظامیہ تے ممبران پارلیمنٹ اتے مشتمل کمیٹیاں تشکیل دے رہے نیں جو ضلع بھر وچ ایس کارخیر نوں سرانجام دین گئیاں۔ یونین کونسل تے تعلیمی اداریاں وچ وی آگاہی مہم چلان دی تیاریاں پوریاں نیں۔ بڑی چھیتی خصوصی مہم شروع کررہے آں۔ درختاں دے تحفظ لئی قنون سازی کیتی اے۔ ہن درخت وڈن تے تن گنا جرمانہ عائد کرن دے نال نال جیل دی سزا وی ملے گی۔ ساڈی حکومت دی کوشش اے کہ
ہر علاقہ وچ اوہدی آب وہوا دی مناسبت نال پھلدار شجرکاری کریے۔ عوام محکمہ جنگلات دی نرسریاں توں پنج روپے دے عوض شجرکاری لئی پودا خرید سکدے نیں۔ صوبائی وزیر جنگلات تے ماہی پروری سید عباس علی شاہ نے عوام نوں سیلاب متاثرین لئی وی امداد دی اپیل دے نال نال شجرکاری مہم وچ تعاون دی وی اپیل کیتی۔