سرکاری ڈرائیوردی ہڈبیتی

Amar Jalil

ایدھر اودھر دیاں بے مقصد گلاں وچ وقت ضائع کرن دی تھاں اسیں اللہ رکھا دی ہڈبیتی جاری رکھنے آں۔ کدی کدائیں سانوں اپنا ناں تک یاد نہیں رہندا۔ ایس لئی تہانوں یاد دلا دیواں کہ اللہ رکھا ابن رب راکھا سرکاری ڈرائیور اے۔ جیویں عام طور تے سمجھیا جاندا اے’ اللہ رکھا سرکار نہیں چلاندا سرکار غیبی ہتھ چلاندا اے۔ اللہ رکھا سرکاری گڈی چلاندا اے۔ ایسے نکتے نوں تسیں ذہن نشین کرنا اے۔ ایہدے وچ فلسفے دا نچوڑ اے۔ اک واری فیر سن لوو۔ اللہ رکھا ابن رب راکھا ڈرائیور اے۔ اوہ سرکار نہیں چلاندا۔ اوہ سرکار دی گڈی چلاندا اے۔ یاد رہوے کہ معاشی طور تے ساڈے ملک وانگوں مستحکم ملکاں نوں وی اک غیبی ہتھ چلاندا اے۔ ایس غیبی ہتھ دے بارے کوئی کجھ نہیں جان دا۔ جہڑے لوک جانن دی جستجو کردے نیں اوہدے بعد اوہ اوہ اپنے آپ نوں بھلا بیٹھدے نیں۔ میری التجا اے کہ تسیں اپنے آپ نوں اللہ رکھا ابن رب راکھا دی ہڈبیتی تک محدود رکھو۔ بال دی کھل اتارن دے چکر وچ نہ پوو۔ اللہ رکھا ابن رب راکھا دی ہڈبیتی کیوں جے میرے ہتھے لگ گئی اے ایس لئی میں اللہ رکھا دی ہڈبیتی ایڈٹ کرن دا نیک کم اپنے ناں محفوظ کر لیا اے۔ کئی کارناں توں علاوہ ہڈبیتی میں ایس لئی وی ایڈیٹ کیتی اے کہ میرے وجود وچ موہنجوداڑو کرکٹ دا وکٹ کیپر بیٹس مین بیٹھا ہویا اے۔ اوہ جان دا اے کہ بیٹنگ کرن لئی تہاڈے کول چھیاٹھ فٹ دی تھاں ہوندی اے۔ ایس تھاں نوں کرکٹ دی زبان وچ پچ کہندے نیں۔ پچ دی لمبائی بائی گز یعنی چھیاٹھ فٹ ہوندی اے ۔ ہڈبیتی سنان لئی مینوں پچ ملی ہوئی اے پچ لامحدود نہیں ہوندی۔
زندگی وانگوں پچ دی لمبائی چوڑائی مقرر ہوندی اے۔ پچ دی لمبائی چوڑائی نوں سامنے رکھدے ہوئے اللہ رکھے دی ہڈبیتی تہانوں سنانی اے۔ میں کافی کانٹ چھانٹ کیتی اے اللہ رکھے دی ہڈبیتی وچ۔ تسیں ایڈیٹ کیتی ہوئی کتھا سنو۔ میں اک جوائنٹ سیکرٹری دا ڈرائیور آں۔ سویرے 9 وجے جوائنٹ سیکرٹری صاحب بن ٹھن کے دفتر جان لئی بنگلے چوں نکلدے نیں۔ میں سویرے چھ وجے جاگ جانا واں۔ صاحب نوں سیکرٹریٹ لے جان توں پہلاں مینوں صاحب دے اک بیٹے نوں انجینئرنگ یونیورسٹی چھڈنا پیندا اے۔ صاحب دی اک دھی نوں میڈیکل یونیورسٹی ڈراپ کرنا ہوندا اے۔ صاحب دے دو چھوٹے بیٹیاں نوں سکول لے جانا ہوندا اے۔ ایس کم توں ویہلا ہون دے بعد گڈی چمکا کے پورچ وچ کھڑی کر دینا واں۔ بیگم صاحبہ بڑی دیالو نیں۔ نوکر دے ہتھوں ناشتے وچ کڑک چائے تے ڈبل روٹی دے دو سلائس گھلدیاں نیں۔ کدی کدائیں رات دے کھانے چوں بچیا کھچیا سالن پیالی وچ پا کے گھل دیندیاں نیں۔ اکثر اوقات صاحب نوں گڈی تک چھڈن آندیاں نیں۔ بیگم صاحبہ جدوں وی صاحب نوں گڈی تک چھڈن آندیاں نیں مینوں کرن نوں دو چار کم دس دیندیاں نیں۔ دیکھو اللہ رکھے’ صاحب نوں دفتر چھڈن دے بعد سدھے میرے درزی دے کول جانا’ اوہدے کول میرے سلے ہوئے چھ جوڑے پئے ہوئے نیں’ لے آنا’ تے ہاں مسز تنویر توں میرے لئی اچار دی بوتل لے آنا۔ مستری دا کارخانہ تینوں راہ وچ پوے گا اوہدے کن کھچنا’ گڈی ٹھیک کرن وچ بدبخت نے دس دن لا دتے نیں۔ صاحب نے محکمہ دیاں چار گڈیاں اپنے کنٹرول وچ رکھیاں ہوئیاں نیں۔ اوہ چار گڈیاں اوہناں دے دھیاں پتر چلاندے نیں۔ دوستاں دے نال سیرسپاٹے کردے نیں۔ اوہناں دیاں گڈیاں اکثر خراب رہندیاں نیں مستری دے کول کھڑیاں رہندیاں نیں۔ مستری’ بچیاں تے پٹرول پمپ والیاں دے درمیان کدی پکڑ وچ نہ آن والا گٹھ جوڑ بنیا ہویا اے۔ ہر گڈی دے کھاتے وچ ڈیڑھ سو لیٹر پٹرول وکھایا جاندا اے بچیاں نوں گھر یٹھے چنگی بھلی رقم مل جاندی اے۔
جوائنٹ سیکرٹری صاحب دوپہر دے کھانے تے تقریباً روزانہ مدعو ہوندے نیں۔ دعوت دین والے اوہناں دے دوست نہیں ہوندے۔ اوہ زیادہ تر کاروباری لوک ہوندے نیں۔ جوائنٹ سیکرٹری صاحب دے اک دستخط نال اوہناں دے وارے نیارے ہو جاندے نیں۔ جدوں تک صاحب لنچ تے لنچ دے بعد سودمند گل بات وچ مصروف رہندے نیں اودوں تک میں صاحب دے ہونہاراں نوں سکول’ کالج تے یونیورسٹی توں لے کے گھر تے چھڈ دینا واں۔ جے دوست وغیرہ ہمنوا ہون تے فیر نونہار برگر شرگر کھاندے’ کافی تے شیکس پیندے ہوئے گھر پرتدے نیں۔ دیر ہو جاوے تے صاحب دی چنگی بھلی ڈانٹ مینوں کھانی پیندی اے ایس دوران جے بیگم صاحبہ دے کم وچ تاخیر ہو جاوے یاں فیر کوئی خطا ہو جاوے تے فیر میری شامت دا تسیں اندازا نہیں لا سکدے۔ بیگم صاحب امب دے اچار دی متوالی نیں کھانے دے نال دنیا بھر دے اچاراں دا مزا چکھن لئی بیگم صاحبہ دی خاتون دوستاں دے ہاں رات دے کھانے تے بھانت بھانت دے ودھیا اچاراں دی بھرمار ہوندی اے۔ بیگمات رات دیر گئے تک اچاراں دا مزا چکھدیاں رہندیاں نیں۔ میںاوہناں دیاں کوٹھیاں دے باہر ادھی رات تک اونگھدا رہنا واں۔ اوہناں نوں خیروعافیت نال گھر اپڑان دے بعد مینوں کجھ لمحیاں لئی اکھ میٹن دی ویہل مل جاندی اے۔ اچانک صبح دے 5 وجن دا الارم لائوڈ سپیکر چوں وجن لگدا اے۔ جدید دور دا الارم جوائنٹ سیکرٹری صاحب نے سرکاری خرچے نال لگوایا اے تاں جے بائی گھنٹے لگاتار ڈرائیونگ کرن دے بعد تھکن نال ٹُٹ کے مر جاواں تے لائوڈ سپیکر جہے الارم دی آواز سن کے اچانک زندہ ہو جاواں تے صاحب’ بیگم صاحبہ تے اوہناں دے ہونہاراں دی خدمت وچ جٹ جاواں۔ کہندے نیں کہ سرکاری ڈرائیور آں۔ اصل وچ میں جوائنٹ سیکرٹری صاحب تے اوہناں دے ٹبر دا ڈرائیور آں’ پر تنخواہ مینوں سرکار بہادر ولوں ملدی اے۔٭

اپنا تبصرہ گھلو