لوک فنکار

افشاں:(لوک گائیکہ) پنجابی گیتاں دی مشہور لوک گلوکارہ افشاں 1966 وچ قصور وچ پیدا ہوئی ۔ باپ دا ناں سردار محمد سی بوہتی تعلیم حاصل نہ کیتی ۔ اٹھ سال دی عمر وچ ای گانا شروع کر دتا۔ گھر وچ لاڈو آکھدے سن ۔ ریلوے دے گارڈ عالم گیر اوہنوں ریڈیو تے متعارف کروایا۔ محمد اعظم خاں ہوراں آپ دا ناں افشاں رکھیا۔ طفیل ہوشیار پوری دا ایہہ گیت گایا تے شہرت حاصل کیتی۔
تیرے نال چناں اسیں پیار پا کے بھل گئے
گلیاں دے ککھاں وانگوں، گلیاں چ رل گئے
افشاں نے چالی ورہے گایا ۔آخری عمر وچ صوفیا تے بزرگاں دے مزاراں تے گایا۔ غلام عباس راہی نال اوہناں دوجا ویاہ کیتا۔ پہلا ویاہ مقبول بٹ نال ہویا اولاد پہلے خاوند وچوں ای ہوئی ۔ اوہناں دے مشہور گیت زندگی تماشا بنی ، دنیا دا ہاسا بنی ، رکھ ڈولدے تے اکھ نہیں لگدی ، نمی نمی وا وگدی ، بہت سارے ملکاں وچ اپنے فن دا مظاہرہ کیتا نور جہاں تے مہدی حسن پسندیدہ گلوکار نیں۔ پرویز مہدی ، غلام علی ، تے آصف جاوید نال دو گانے وی گائے ۔ موسیقار وجاہت علی تے اے حمید، ماسٹر عبداللہ ، بخشی وزیرتے وزیر افضل نال بوہت کم کیتا۔ نور جہاں عذرا جہاں نال رشتہ داری وی اے تے سحر ، ثوبیہ جہان تے عطیہ جہان آپ دیاں شاگرد نیں۔ انڈیا وچ روبی آپ دی شاگرد اے جس نوں آپ دا ہر گانا یاد اے ۔ نیروبی ملک پسند اے بوہت سادہ رہن سہن اے ۔ اپنے آپ نوں فقیر آکھدی اے ۔ (ہما بلاک علامہ اقبال ٹائون) وچ رہائش اے
اللہ بخش استاد: 1895 وچ وزیر آباد (پنجاب) وچ پیدا ہوئے ۔مصوری وچ مشہور ہوئے ۔ آپ دے استاد ماسٹر عبداللہ سن ۔ 1914 وچ بمبئی گئے 5 سال تائیں اک سٹوڈیو وچ فوٹو گرافر تے مصور دے طور تے کم کیتا ۔ میو سکول آف آرٹس لاہور وچ استاد رہے ۔ ہندو دیو مالا تے پنجاب دے پینڈو وسیب تے بنائیاں تصویراں تے شہرت حاصل کیتی ۔ اوہناں دی اک تصویر ” آٹھواں حسن” نے بمبئی آرٹ سوسائٹی دے زیر اہتمام نمائش وچ پہلا انعام جیتا۔ پاکستان تے باہر وی اوہناں دے فن پاریاں دی نمائش ہوئی ۔ 1960 وچ پاکستان دے صدر ولوں تمغہ حسن کارکردگی ملیا۔ 1978 وچ لاہور وچ وفات پائی ۔
بالو: برصغیر دی نامور لوک فنکارہ ۔اوہ سٹیج تے کم کردی سی ۔ (جاری اے)

اپنا تبصرہ گھلو