بھید جہڑا کھل نہ سکیا

لکھت:سعداللہ شاہ

جو بھٹکتا ہے وہی راہ بنا جاتا ہے
ورنہ بستی میں کہاں سیدھا چلا جاتا ہے
اپنی حالت پہ مجھے خود بھی ہنسی آتی ہے
جو بھی آتا ہے مجھے اور رلا جاتا ہے
پتہ نہیں مینوں ایہ خیال لہور قلندر دی لگاتار ہار تے کیوں آیا کہ جہڑا وی اُٹھدا اے اوہ لہور قلندر نوں ہرا جاندا اے۔ کوئی حد ہوندی اے ماڑی بھیڈ ساریاں دی کھیڈ انج تاں کہندے نیں کہ بھیڑا ویلا کلیاں نہیں آندا۔سب کجھ ای ناموافق ہو جاندا اے۔ پر بھیڑا ویلا وی کدی کدی آندا اے پر لہور قلندر اُتے تے ہر ویلے ای بھیڑا ویلا رہندا اے۔ اوہناں نے تے ہارے دے سارے ریکارڈ توڑ دتے نیں۔ ہن تے اُکا ای حد کر دتی اے کہ شکست دی ہیٹرک یعنی تن واری مسلسل نکامی تے ٹورنامنٹ توں باہر۔ غالب دا شعر کیوں یاد نہ آوے گا:
نکلنا خلد سے آدم کا سنتے آئے تھے لیکن
بڑے بے آبرو ہو کر تیرے کوچے سے ہم نکلے
مجھے تو آتش بھی نہیں بھولے نہ پوچھ عالم برگشتہ طالعی آتش۔برستی آگ جو باراں کے آرزو کردیاں ساڈے طارق عزیز نے وی اک شعر وچ آکھیا سی جے اوہ کفن دی دکان کھول لین تے لوک مرنا ای چھڈ دین۔ اوہ مشہور محاورہ نہیں سنیا تسیں !غریباں نے رکھے روزے تے دن وڈے آئے۔بہرحال لہور قلندر لئی جتناجیویں ناممکن ہو گیا اے تے اوہدی قسمت وچ داد و تحسین نہیں۔ وچارے کڑھدے رہندے نیں۔ اک دو واری تے اوہ جت کے وی ہار گئے کہ چنگے بھلے رنز کرکے وی نہ جتے حفیظ نے سنچری وی کیتی سی۔ بس کیہ کریئے مقدر دی گل اے قلندر سی قیمت وچ سکندر بننا نہیں اوہ وی تے مقدر تے انحصار کردا اے:
ایسے لگتا ہے کہ آسودگی قسمت میں نہ تھی
جل گئے سایہ دیوار تک آتے آتے
ایہ گل بڑی دلچسپ اے کہ لہور قلندر اک اجہی اصطلاح بن گئی اے کہ سیاست وچ وی استعمال ہون لگی اوہ انج ہویا کہ میں اپنے کزن طیب صدیقی دے کول بیٹھا سی ہور وی دوست سن میں طیب اقبال صدیقی توں آکھیا کہ یار! تسیں جماعت اسلامی والے واقعتا بہت کم کردے او تے ایہناں حوالے نال تہاڈے لوکاں دی بہت چنگی شہرت اے۔ تہاڈے سادے لوک اقتدار وچ کسے نہ کسے شکل وچ آئے تے اوہناں تے کرپشن دا کوئی داغ تک نہیں۔ سوشل کماں وچ تہاڈا کوئی ثانی نہیں کار خیر وچ وی تسیں ودھ چڑھ کے حصہ لیندے او۔ درس قرآن تے تربیت دی محفلاں منعقد کردے او۔ حتیٰ کہ گلی محلیاں وچ لوک تہاڈے کردار دی تعریف کردے نیں۔ پر ایہ کیہ گل اے کہ الیکشن وچ تسیں آرام نال ہار جاندے او۔ لوک تہانوں آخر ووٹ کیوں نہیں دیندے؟ انج تاں طیب بہت سنجیدہ مزاج اے پر اوہدے وچ حس مزاح وی کدھرے موجود اے مسکراندیاں کہن لگا بھرا جی! اسیں لہور قلندر آں ایہ سن کے ساری محفل کشت زعفران بن گئی۔ واقعتا میں سوچن لگا کہ جماعت اسلامی تے لہور قلندر وچ بہت مشابہت اے جس طرح جماعت اسلامی والے الیکشن ہارن لئی الیکشن لڑدے نیں ایسے طرح لہور قلندر ہارن لئی ای پی ایس ایل کھیڈدے نیں۔ حالاں جے لہور قلندر والیاں نوں چاہن والے بہت نیں تے اوہ بار بار بری طرح مایوس ہوندے نیں۔ ہر واری لہور قلندر توں آس لاندے نیں کہ ایس واری شاید اوہ کپ چک لین پر قلندراں نے وی ہارن دی قسم چکی ہوئی اے۔ فرنچائز خریدن والا اوہناں تے کروڑاں روپے ہر واری ضائع کردا اے۔ شروع وچ اوہنوں 31کروڑ دا نقصان ہویا فیر 42کروڑ تے فیر ودھدا گیا۔ قلندر آخری دو پوزیشناں تے ای ڈگمگا رہے نیں۔ اوہناں نے کھڈاری بدل بدل کے ویکھ لئے حتیٰ کہ 7کپتان وی پر اوہناں نوں ایہ خیال کیوں نہیں آندا کہ کوچ نوں بدل کے ویکھ لین۔ اوہناں دا کوچ عاقب جاوید اپنی منطق پیش کردے نیں کہ جتنا کوئی مشکل کم نہیں چار پنج باہر دے تگڑے کھڈاری پا کے جتیا جا سکدا اے پر اوہ تے لوکل ٹیلنٹ نوں لیکس پوژر دے رہے نیں پر ہر واری ہارنا وی تے چنگی گل نہیں تے اوہ وی لہور دے ناں تے زندہ دلان لہور دے دلاں تے قیامت گزر جاندی اے۔ ہن تسیں کراچی قلندر بنا لو و یاں حیدر آباد قلندر۔ مذاق دی وی کوئی حد ہوندی اے۔ سوشل میڈیا تے وی ایہناں دی بھداڑ رہی اے۔ اک بندے نے اک پوسٹ لائی اے جہدے وچ نوازشریف نے اک بینر چک رکھیا اے جہدے تے تحریر اے جدوں تک لہور قلندر نہیں جت دے اوہ واپس پاکستان نہیں آن گے۔ میرا خیال ایہ اے نوازشریف چھڈ کے پرویز مشرف وی وطن واپس آ سکدے نیں پر لہور قلندر فیر وی نہیں جتن گے کہ جنی شہرت اوہناں نوں مسلسل ہار کے ملی اے اوہ کسے نوں نہیں مل سکدی۔ اوہناں دی طرح کون لگاتار ہار سکدا اے ایہ وی گویا اک فن اے جے گئی گزری ٹیم وی اک ادھ میچ جت جاندی اے ایہ جیویں محبت دی ہار اے جہدے وچ مزہ آندا اے وہی کہ ہاروں تو تجھے پائوں
تھا مقابل جو مرے دوست مرا
مجھے اچھی لگی پسپائی بھی
مسئلہ تے لہور قلندر دے مداحواں دا اے۔ وچارے ہر واری پورے جوش تے جذبہ نال ایہناں دی ڈھارس بندھان دم دم مست قلندر کردے گراؤنڈ وچ آندے نیں تے قلندراں نوں اشتعال وی دواندے نیں۔ پر ایہناں دے تے جیویں دانے ختم ہو چکے نیں یاں اوہناں نے ستو پی لئے نیں۔ ہو سکدا اے شکست ایہناں لئی نفسیاتی مسئلہ بن گئی ہووے کیوں جے اوہ جتن وی لگدے نیں تے اوہناں دے ہتھ پیر پُھل جاندے نیں۔ کدی تے کدی اوہ عثمان بزدار دی طرح معصوم لگدے نیں جہناں توں عمران خان نے اینی توقعات وابستہ کر رکھیاں نیں کہ جو ٹرمپ وی پوری نہیں کر سکدا۔ میں سمجھنا آں جے عاقب جاوید دے نال نال پی سی بی دی ایہو ضد اے کسے صورت قلندراں نوں جتوانااے تے فیر اک ای صورت اے دوجی ٹیماں دی منت کر لئی جاوے کہ اوہ ایہناں دے مقابلے وچ کارکردگی دا مظاہرہ نہ کرن۔ ایہ کم امپائراں دے ذمہ تے لایا نہیں جا سکدا کہ شک پے جاوے گا۔ کھڈاری تے ہران لئی ڈرامہ کر سکدے نیں جیویں بابا ٹک ٹک نے ورلڈ کپ وچ ساڈا کم تمام کیتا سی کہ جدوں اوہنوں یقین ہو گیا کہ ہن پاکستان نہیں جت سکدا تے اوہنے چھکے لانے شروع کر دتے۔ ویکھو گل کدھرتوں کدھر نکل جاندی اے میں سمجھنا آں کہ لہور قلندر دا کوچ ساڈے عامر خاں خاکوانی نوں بنا دتا جاوے۔ اوہ اوہناں نوں مٹھے مٹھے انداز وچ سمجھا سکدے نیں کہ ہمیشہ ہارنا کوئی چنگی گل نہیں۔ قلندرو! اپنے مداحواں ای دا کجھ خیال کر لووتہاڈے نال پیار کرن والا وی تہانوں برا کہن لگے تے فیر سوچ لوو:
میں جانتا ہوں کہ دنیا برا ہی کہتی ہے
مگر جب اس نے کہا ہے تو میں برا ہوں ناں