حیاتی کیویں گزاری جاوے

لکھت:سعداللہ شاہ

لفظ ٹوٹے لبِ اظہار تک آتے آتے
مر گئے ہم ترے معیار تک آتے آتے
بات ایسی ہے بتانے کی نہیں دنیا کو
رو پڑے ہم بھی خریدار تک آتے آتے
گل ہن معیار دی وی ہووے گی تے بے وقعتی دی وی۔ پہلاں اک دلچسپ تے خوبصورت گل تے گل کر لینے آں۔ گل طرحدار تے ادبی ہووے تے توجہ حاصل کردی اے تے ساڈے ورگے تشنگان ادب نوں تے متاثر وی کردی اے۔ ایہدے توں غرض نہیں کہ گل کون کر رہیا اے۔ بس گل لطف دے جاوے۔ اوہی تقریر دی لذت والی گل اے۔ جون ایلیا نے تے کسے ہور تناظر وچ آکھیا سی کہ
بولدے کیوں نہیں مرے حق وچ
چھالے پے گئے زبان وچ
پر کیہ موجودہ تناظر وچ چپ رہنا ٹھیک نہیں۔ داد تے بن دی اے شہباز شریف فرماندے نیں عمران دماغ دی بجائے زبان توں معیشت چلا رہے نیں۔ عوام آٹا، چینی توں محروم شرح سود 14فیصد ہو گئی تے حکومت ساڈے منصوبیاں تے اپنی تختیاں لا رہی اے۔ غزل دے مطلع دے بعد بیتِ ثانی ایہدے توں وی زوردار اے جنگل نوکریاں دین گے، سکون قبر وچ ملے گا تے لگدا اے خان صاحب پاکستان نوں شداد دی جنت بنانا چاہندے نیں ۔ میں شہباز شریف دے بلیغ بیان دی وضاحت نیں کراں گا کہ چنگے شعر دی تفسیر اوہدے حسن دا بیڑہ غرق کر دیندی اے پر اوہناں دی گل وچ تلمیح بہت خوبصورت آئی اے کہ اوہناں نے اپنے کولوں تے کوئی الزام لاگو نہیں کیتا۔ خان صاحب دے اپنے ای دعوے تے وعدے اوہناں دے ساہمنے آئے۔ اوہناں نے آپ ای اپنے آپ نوں رد کیتا۔ اوہناں نوں تے کسے دشمن کیہ کسے دوست دی وی لوڑ نہیں پئی کہ دشمن اوہناں دا آسمان بن دا۔ شرارتی لوک کجھ نہیں کردے، صرف خان صاحب دی پرانی تقریراں نویں تقریراں دے نال جوڑ کے چلاندے جاندے نیں تے صنعت تضاد توں اجہی مزاحیہ صورتحال پیدا ہوندی اے کہ ہنسی وی آندی، غصہ وی تے ترس وی اے سب آرزو کہ خاک شد لا کے مارا ہے کہاں تو نے زمانے مجھ کو خان صاحب سوچدے تے ہون گے کہ:
اپنا تو اصل زر سے بھی نقصان بڑھ گیا
سچ مچ کا عشق مر گیا اک دل لگی کے ساتھ
باقی معاملات تے اک پاسے میں اپنے دوست آصف محمود جہڑے اری گیشن وچ افسر نیں، دے ساہمنے موجودہ حکومت دی بھینساں تے مرغی انڈیاں دے حوالے نال تعریف کیتی کہ اوہ غریباں وچ تقسیم کر رہے نیں کہ اوہ بھینساں نوں پالن تے روزگار پیدا کرن۔ اوہناں نے مسکراندیاں ہوئیاں جو کجھ دسیا تے میری خوش فہمی ہرن ہو گئی۔ آصف محمود نے وضاحت کردیاں آکھیا ایہ منصوبہ کوئی نواں نہیں اے سگوں پرانے منصوبے ای نوں زور دار انداز نال اگے چلایا گیا اے۔ پتہ چلیا کہ اوہ آپ وی ایگزیکٹو ڈسٹرکٹ افسر رہے نیں تے اوہناں دے انڈر لائیو سٹاک وی آندا سی تے اوہ وی ایسے طرح ایس منصوبے تے کم کردے رہے نیں۔ اوہناں نے کافی کجھ دسیا مثلاً بھینساں رکھن والے اکثر کٹے وغیرہ ویچ دیندے نیں۔ اوہناں نوں ترغیب دتی جاندی اے کہ اوہ ایہناں نوں پالن تے ایہدے عوض اوہناں نوں 5ہزار روپے فی کٹا دتا جاندا اے۔ مقصد ایہ کہ کٹا وڈا ہو جاوے۔ ایسے طرح بیوا نوں بھینساں وغیرہ وی دتی جاندی رہیاں نیں۔ مختصر گل ایہ کہ اوہی پرانے منصوبے نوں حکومت نے شدومد نال نمایاں کرکے پیش کر دتا اے جد کہ پچھلی حکومت ایس کم نوں روٹین سمجھدی سی۔ معزز قارئین! گل ایہ اے کہ کسے دے احسن کم نوں سلاہنا تے چاہیدا اے۔ ہن فردوس عاشق اعوان اٹھ کے جے ایہ کہندی اے کہ شہباز شریف لانگ شوز پا کے شوبازی کردے رہے نیں یاں فیر سر تے ہیٹ رکھ کے تماشا لاندے رہے نیں تے ایہناں دھواں چھڈدی گلاں تے اوہ اکھاں کیویںیقین کر لین جو وی لہور دی سڑکاں، پلاں تے دوجی تعمیرات نوں ویکھ کے شہباز شریف نوں یاد کردیاں نیں۔ خاص طور تے میٹرو تے اورنج ٹرین۔ فیر ڈینگی دے مسئلے نوں اپنا مسئلہ بنان دے ضمن وچ۔ تسیں گھٹ توں گھٹ کجھ تے اجیہا کرو کہ شوباز دی شہرت دھندلاجاوے۔ حسد توں رشک بہتر اے۔ جے حکومتی ترجمان دشنام طرازی نوں چھڈ کے کوئی عملی کارنامہ سرانجام دے دین تے عوام پرانیاں نوں آپ ای بُھل جان گے۔ جے محترمہ ایہ کہن گیاں کہ پچھلے ستر ورھیاں وچ پہلی واری عوام اینے زیادہ خوش حال و خوش و خرم نیں تے مضحکہ خیز دی تعریف ہور کیہ ہووے گی۔ جناب! گل منطق تے دلیل نال کرو، محبت تے تعلق وچ انھے ہو کے نہیں کہ:
محبتوں میں تعصب تو در ہی آتا ہے
ہم آئنہ نہ رہے تم کو روبرو کر کے
ہن تسیں آپ ای دسو کہ ایہ کہڑی راکٹ سائنس یاں مسئلہ فیثہ غوث اے کہ سمجھن وچ دقت پیش آوے کہ جدوں پٹرول، گیس، بجلی تے دوجی اشیائے ضرورت دی قیمتاں ودھدیاں نیں تے مہنگائی ودھدی اے۔ ایہدے تے ایہ آکھیا جاوے کہ میں مہنگائی کرن والیاں نوں چھڈاں گا نہیں تے فیر اوہ تے آئی ایم ایف والے ای بن دے نیں یاں فیر آپ ٹیکس لان والے۔ ہاں ایہ گل وی غلط نہیں کہ نجائز منافع خوری تے ذخیرہ اندوزی قابلِ دست اندازی اے تے ایہ وی تہاڈی ذمہ داری اے۔ تہادے اقدام تے سارے الٹ نیں جہدے نال کاروبار وچ رختہ پیندا اے۔ ہن خریدار دے شناختی کارڈ دا مسئلہ کھڑا ہو گیا اے۔ غلط کارڈ نوں ٹھیک کیویں ثابت کیتا جاوے۔ اجہے اقدام نے اقدام نے کاروبار ٹھپ کر دتے نیں۔ پہلاں ای کساد بازاری اے ہن تاجراں نے کالی پٹیاں بنھ لئیاں نیں تے احتجاج کرن جا رہے نیں۔ ایہ چنگی گل اے کہ عمران خان نے اپنی غلطی تسلیم کیتی کہ آٹا تے چینی دے بحران وچ ایہناں توں غلطیاں ہوئیاں تے ایہ غلطیاں تے ایہناں توں ہر تھاں تواتر نال ہو رہیاں نیں۔ باجوہ صاحب دی توسیع دے کیس توں لے کے موجودہ جسٹس فائز عیسیٰ دے کیس تک کوئی نہ کوئی شوشہ، کوئی نہ کوئی تماشہ روٹین اے۔ حوالے لئی اک فروغ نسیم ای کافی اے۔ بزدار صاحب دا بیان کہ ڈیڑھ ورھے وچ کرپشن دا کوئی کیس ایس حکومت دے حوالے نال ساہمنے نہیں آیا۔ غالباً اوہ آٹے چینی دے حوالے نال جہانگیر ترین تے خسرو بختیار دے ضمن وچ ساری گلاں نوں صرف الزام قرار دے چکے۔ چلو عثمان بزدار دی گل من وی لئی جاوے تے فیر جے رشوت دے بغیر کسے محکمے وچ کوئی کم نہیں ہوندا تے کیہنوں پھڑیے تے ایس کرپشن دا الزام کہدے سر جاوے گا۔ چلو ایہدے تے احتجاج وی تے کوئی نہیں کردا۔ لوک وی ایس پریکٹس دے عادی ہو چکے۔ عوام نوں چھڈو، اُتے دی سطح تے رونق لگی ہوئی اے۔ اجے میں ویکھ رہیا سی کہ پختونخوا دے اجلاس وچ ہنگامہ آرائی ہو رہی سی تے نویں گل ایہ کہ اپوزیشن والے اسمبلی وچ سپیکر لے آئے۔ یعنی لاؤڈ سپیکر تے نعرے لائے، جے اوہ نال اک ڈھول وی لے آندے تے لوازمات مکمل ہو جاندے۔ ایہ وی اپنی تھاں ٹھیک ایس ساری صورتحال وچ وی عمران خان دا کوئی سیاسی نعم البدل نہیں۔ یعنی سب توں تشویشناک گل تے قحط الرجال اے۔