اللہ نہ کرے کہ انج ہووے!

لکھت:محمد اکرم چوہدری

کرونا وائرس دی وجہ توں دنیا خوف و ہراس وچ مبتلا اے۔ جیویں تیویں ویلا لنگھ رہیا اے ایس وائرس دی تباہ کاریاں وچ وادھا ہوندا جا رہیا اے۔ شروع وچ چین ایس حوالے نال دنیا لئی خطرہ بنیا ہویا سی پر ہن کرونا وائرس ساری دنیا لئی اک خطرہ بنیا ہویا اے۔ کجھ دن پہلاں تک صرف چین وچ چار سو توں ودھ متاثرہ بندے رپورٹ ہوئے سن جد کہ چین توں باہر ایس وائرس توںمتاثرہ ہون والے بندیاں دی تعداد کدھرے ودھ اے۔ اٹلی، ایران، لاطینی امریکہ، کروشیا، آسٹریا، جنوبی کوریا، سپین، برازیل ، سوئٹزر لینڈ سنے کئی ممالک کرونا وائرس توں متاثر نیں۔ یورپ وچ اٹلی کرونا وائرس توں سب توں ودھ متاثر نظر آندا اے۔ اٹلی وچ کرونا سے سینکڑاں کیس ساہمنے آ چکے نیں ایس صورتحال وچ یورپی کمیشن نے سرحداں نوں بند کرن دے بجائے کھلارکھن دا فیصلہ وی کیتا اے۔ اطالوی وزیر صحت رابرٹوسپرانزا دا کہنا اے گوانڈھی ملک ایس وائرس نوں بڑی سنجیدگی نال لے رہے نیں پر حالات وگڑن دا ڈر اے۔جنوبی کوریا تے ایران دا شمار کرونا وائرس دے وڈے متاثرین وچ ہوندا اے۔ جنوبی کوریا وچ سو توں ودھ کیس ساہمنے آ چکے نیں۔ ایتھے 28ہزار پنج سو امریکی فوجی موجود نیں تے اک امریکی فوجی وچ وی کرونا وائرس دی تشخیص ہوئی اے جد کہ ایران وچ ڈیڑھ درجن توں ودھ ہلاکتاں ہو چکیاں نیں۔ ایرانی صدر حسن روحانی نوں وی بیان جاری کرنا پیا اے۔ ایران دی وزارت صحت نے وائرس پھیلن دا خدشہ ظاہر کیتا اے۔ کرونا وائرس دے معاملے وچ وی ایران دے حوالے نال امریکہ دا رویہ قابل افسوس اے۔ امریکہ ایہ سمجھدا اے کہ ایران ایس وائرس دے پھیلاؤ دے حوالے نال تفصیلات لُکا رہیا اے۔جتھوں تک تعلق پاکستان دا اے تے ایس ویلے بلوچستان نوں سب توں ودھ خطرناک صورتحال دا ساہمنا اے۔ صوبے وچ ایمرجنسی نافذ کر دتی گئی اے۔ پندرہ مارچ تک سارے تعلیمی ادارے بند رکھن دا اعلان کر دتا گیا اے۔ سکولاں وچ یکم مارچ توں شروع ہون والی داخلہ مہم نوں وی روکن دا فیصلہ کیتا اے۔ ماہرین سنے ضروری سٹاف دی چھٹیاں منسوخ کردیاں ہوئیاں ہر قسم دی ٹریننگ تے ڈیپوٹیشن تے وی پابندی لاگو کر دتی گئی اے۔ تفتان وچ پاک ایران سرحد بند اے۔ ایران وچ پنج ہزار توں ودھ پاکستانی زائرین موجود نیں اوہناں نوں وطن واپسی تے دو ہفتیاں تک خیمہ ہسپتال وچ رکھیا جاوے گا۔ ایف آئی اے دے مطابق ایران توں کسے دی امیگریشن نہیں کیتی جا رہی تے سینکڑاں ایرانیاں نوں واپس گھل دتا گیا اے۔ ایران وچ کرونا وائرس دا حملہ شدید اے ایس خطرے نال نبڑن لئی ای سرحدی علاقے وچ اہم اقدامات کیتے جا رہے نیں ۔ ایران تے پاکستان دی سرحد تے پھسے تن سو توں ودھ زائرین نوں تفتان وچ داخلے دی اجازت مل گئی اے۔کرونا وائرس دی آمد دے نال ای ایہدے نال نبڑن لئی دستیاب اشیاء دی قیمتاں وچ حیران کن طور تے وادھا ویکھن وچ آ رہیا اے۔ ایہ ساڈی اخلاقی موت دی تازہ ترین مثال اے۔ اسیں انفرادی طور تے اینے بداخلاق تے بے ایمان ہو چکے آں کہ مشکل ترین حالات وچ وی نجائز فائدہ چُکن توں باز نہیں آندے۔ ایہ انفرادی پہلو اے کہ جہدے کول جہڑی لوڑ دی شے موجود اے اوہ اوہدے توں فائدہ چکدا اے تے انتظامی سطح تے ہر افسران ہنگامی حالات نال نبڑن لئی ویلے سر اقدامات نہیں کردے نتیجتاً افراتفری پھیلدی اے تے ایس افراتفری وچ نہ صرف انسانی جاناں دا ضیاع سگوں عام بندہ ذہنی تناؤ دا وی شکار ہوندا اے۔ حکمران مشکل دے ویلے سُتے رہندے نیں تے جدوں کوئی مصیبت آندی اے تے بغیر سوچے سمجھے اقدامات کردے نیں تے معاملات وگڑ جاندے نیں۔ موجودہ حکومت لئی سب توں وڈا مسئلہ کرونا وائرس توں پیدا ہون والی صورتحال تے قابو پانا اے۔ وائرس دے پھیلاؤ نوں روکنا مشکل مرحلہ تے ہے ای ایہدے توں وچ مشکل مرحلہ کرونا وائرس توں بچاؤ لئی استعمال ہون والی اشیاء دی بلاتعطل فراہمی تے قیمتاں نوں قابو وچ رکھنا اے۔ دعا اے پاکستان کرونا وائرس توں بچیا رہوے۔ ملک پہلاں ای بڑے مسئلیاں دا شکار اے۔ وزیراں دا غیر سنجیدہ رویہ مسئلیاں وچ وادھے دی وجہ بن دا اے۔ ہن تک حکومت کسے وی اہم مسئلے نوں بہتر انداز وچ سلجھان وچ نکام رہی اے۔ ایہناں حالات وچ کرونا وائرس حملہ آور ہو گیا تے عوام دا کوئی پرسان حال نہیں ہووے گا۔ سندھ وچ پیپلزپارٹی دی دوجی سیاسی جماعتاں نال نہیں بن دی تے بلوچستان دے سیاستداناں تے سرکاری افسراں دے کم کرن دا وکھرا ای روایتی انداز اے۔پنجاب وچ سیاسی عدم استحکام اے۔ وزیراعلیٰ عثمان بزدار تے سپیکر پنجاب اسمبلی چودھری پرویز الٰہی نوں ہر دوجے دن ملاقات کرنی پیندی اے۔ کے پی کے وچ بی آر ٹی منصوبہ حکمراناں دی اہلیت دا منہ بولدا ثبوت اے ایہناں حالات وچ کرونا وائرس دا حملہ ہوگیا تے فیصلہ سازاں دی قوت فیصلہ کم نہیں کرے گی تے عوام نوں پچھن والا کوئی نہیں ہووے گا۔ صوبائی حکومتاں نوں ایس حوالے نال متحرک رہن تے پیدا ہون والی ہنگامی صورتحال نال نبڑن لئی ہر ویلے تیار رہن دی لوڑ اے۔ جدوں تک کرونا وائرس دا خطرہ موجود اے بہتر ایہو اے کہ صوبے تے وفاق دی سطح تے ذمہ دار وفاقی وزراء ٹیلی ویژن پروگراماں وچ رلت دے بجائے اپنے دفتراں وچ ویلا گزارن تے سارے معاملات دی آپ نگرانی کرن۔ ٹی وی تے آ کے الزامات لان یاں الزامات دا جواب دین توں بہتر اے کہ وائرس نال نبڑن لئی اقدامات تے عوام نوں محفوظ بنان لئی فیلڈ وچ رہن۔ اسیں اینے منظم، باشعور تے اہل نہیں آں کہ ایس طرح دے مسئلیاں دا مقابلہ کر سکیے اللہ ساڈے تے رحم فرمائے تے اجہی بیماریاں توں محفوظ فرمائے۔آمین

اپنا تبصرہ گھلو